27/02/2024
ကိုယ်ဝန်ဆောင်စဥ် သကြားဓာတ်များခြင်း
(Gestational Diabetes) (၁)။
မေမေတို့ရေ Gestational Diabetes ဆိုတာကတော့ မေမေတို့ အနေနဲ့ ကလေး လေးကို လွယ်ထားရချိန် ကိုယ်ဝန်ဆောင်စဥ်မှာ ဆီးချိုတက်လာခြင်းကို ဆိုလိုပါတယ်။ ယခင်က ဆီးချိုမရှိခဲ့သော်လည်း ကိုယ်ဝန်ဆောင်သော အခါမှသာ ဆီးချိုတက်လာခြင်းကို Gestational Diabetes ဆိုပြီးခေါ်လိုက်တာပါ။
ကမ္ဘာ့ကျန်းမာရေးအဖွဲ့ အစည်းရဲ့ သတ်မှတ်ချက်အရဆို မနက်ခင်း အစာမစားမီ ဆီးချိုစစ်တဲ့အခါ 7.8 mmol/L ထက်ပိုများနေမယ် (သို့မဟုတ်) 75gm ရှိတဲ့ Glucose သောက်ပြီး ၂နာရီ ကြာတဲ့အခါ စစ်ရင် 11.1mmol /L ထက်ပိုများ နေခဲ့မယ် ဆိုရင် ကိုယ်ဝန်ဆောင်စဥ် ဆီးချိုတက်ခြင်း (Gestational Diabetes) စပါပြီလို့ ပြောလို့ ရပါတယ်။
ကိုယ်ဝန်ဆောင်စဥ် သွေးတွင်းမှာ သကြားဓာတ်များ နေခြင်းက မိခင်ကိုရော၊ ကလေးကိုပါ ထိခိုက်မှုတွေ ရှိနိုင်ပါတယ်။
သတင်းကောင်းတော့ ရှိပါတယ်။ ဒါကတော့ Gestational Diabetes ဖြစ် နေတဲ့ မေမေဟာ ဆရာဝန်က ညွှန်ကြား တဲ့အတိုင်း အစားအစာထိန်းမယ်၊ ထိုက်သင့်မျှတတဲ့ အားကစား လေ့ကျင့်ခန်းလုပ်မယ်၊ လိုအပ်ခဲ့ရင် ဆေးသောက်မယ် ဆိုရင်တော့ နောက်ဆက်တွဲ ဆိုးကျိုးတွေကိုလဲ တားနိုင်သလို၊ ကလေးရော အမေရော ထိခိုက်မှု မရှိနိုင်ပါဘူး။
🖍🖍 လက္ခဏာတွေက ဘာတွေလဲ။
ကိုယ်ဝန်ဆောင်စဥ် ဆီးချိုတက်ခြင်းမှာ သိသာတဲ့ လက္ခဏာတွေ မပြတတ်ပါဘူးတဲ့။
ဒါပေမဲ့ စိတ်မပူပါနဲ့။ မေမေတို့ ကိုယ်ဝန်အပ်ထားတဲ့ ဆရာဝန်ဆီသာ မှန်မှန် သွားပါ။
သူကပဲ စစ်ဆေး ပေးပါလိမ့်မယ်။
ကိုယ့်အမျိုးထဲမှာလဲ ဆီးချိုက ရှိနေတယ်။ ကိုယ်ကလဲ သိပ်စိတ်ပူရင်တော့ ကိုယ်ဝန်စယူကတည်းက ဆီးချို မကြာခဏ ဖောက်ပေးနိုင်ပါတယ်။ ဆရာဝန်ကိုလဲ တောင်းဆိုနိုင်ပါတယ်။
🖍🖍 ဘာကြောင့် ဖြစ်ရသလဲ။
အတိအကျ မသိရသေးပေမဲ့ ဖြစ်နိုင်တဲ့ အရာတွေကို ရှင်းပြ ပေးပါ့မယ်ဆိုပြီး လေ့လာ စမ်းသပ်တဲ့ စာစောင်တွေက ပြောပြကြတယ်။
ကျွန်တော်တို့ ခန္ဓာကိုယ်က အစားအစာ တစ်ခုကို စားလိုက်တဲ့အခါ ဒီအစားအစာတွေက သွေးထဲမှာ Glucose အဖြစ် ပြောင်းတယ်။ ဒီ Gluose ဆိုတဲ့ အချိုဓာတ်ကို ပြန်ဖျက်ဖို့ ခန္ဓာကိုယ်က အင်ဆူလင် (Insulin) ဟော်မုန်းကို ထုတ်ပေးတယ်။
ကိုယ်ဝန်ဆောင်တဲ့ အခါမှာ မေမေတို့ရဲ့ အချင်းက နေပြီးတော့ ဟော်မုန်းတွေ အများကြီး ထွက်တယ်။
ကိုယ်ဝန်ဆောင်စဥ် ထွက်သမျှ ဟော်မုန်း တွေအကုန်လုံးက ဒီအင်ဆူလင်ကို ပြန်ဖျက်ကြတယ်။
ဒီတော့ အင်ဆူလင် နည်းလာတယ်။ အင်ဆူလင် နည်းလာတော့ သွေးတွင်း သကြားဓာတ် များလာတယ်။
ကိုယ်ဝန်က ရင့်လေလေ ဒီဟော်မုန်းတွေ များများထွက်လေလေပဲမို့ ကိုယ်ဝန်ရဲ့ နောက်ပိုင်းလတွေ အတိအကျအားဖြင့် ကိုယ်ဝန် အပတ် ၂၀ ခန့်က စပြီး မေမေတို့ရဲ့ သွေးတွင်း သကြားဓာတ်ဟာ များများလာပါသတဲ့။
ဒါနဲ့ပဲ ကိုယ်ဝန်ဆောင်စဥ် သွေးတွင်းသကြားဓာတ် မြင့်တက်ပြီး Gestational Diabetes ဆိုပြီး ဖြစ်လာတာပါပဲ။
သို့သော် ကလေးမွေးပြီးတာနဲ့ မေမေတို့ဆီမှာ အချင်းလဲ မရှိတော့တာကြောင့် ဟော်မုန်းတွေလဲ မထွက်တော့ သလို သွေးတွင်းသကြားဓာတ်လဲ ပြန်နည်းသွားပါတယ်။
ကလေး မွေးပြီးတာနဲ့ မေမေတို့ဟာ အရင်လို လူကောင်း အခြေအနေကိုပဲ ပြန်ရောက်မှာပါ။ စိတ်မပူပါနဲ့ ။
🖍🖍 ဘယ်သူ တွေမှာ ဖြစ်နိုင်လဲ။
ကိုယ်ဝန်ဆောင်မေမေတိုင်း ဖြစ်နိုင်ပါတယ်။ သို့သော် ပျမ်းမျှ အားဖြင့် ဘယ်သူတွေမှာ အဖြစ်များလဲ ဆိုတာတော့ ဖော်ပြလိုက်ရပါတယ်။
အရမ်းဝတဲ့ မေမေတွေ (BMI က ၃၀ ကျော်နေရင် အဖြစ်များပါတယ်)
မိသားစု ထဲမှာ ဆီးချိုရောဂါ ဖြစ်တဲ့ သူတွေ ရှိရင်
မေမေတို့ရဲ့ မိသားစုဖြစ်တဲ့ ဖေဖေ မေမေတွေ မောင်နှမတွေ အဒေါ် တွေမှာ သက်ကြီးဆီးချို Type 2 Diabetes ရှိရင် ကိုယ်ဝန်ဆောင်စဥ် သကြားဓာတ်များခြင်း (Gestational Diabetes) ဖြစ်နိုင်ခြေ များပါတယ်။
အရင် ကိုယ်ဝန်တွေတုန်းက မွေးတဲ့ ကလေးတွေက မွေးစပေါင်ချိန်ဟာ အလေးချိန် 4.5 kg ထက်များနေရင်လဲ ဒီကိုယ်ဝန်မှာ ကိုယ်ဝန်ဆောင်စဥ် ဆီးချို တက်ခြင်း (Gestational Diabetes) ဖြစ်နိုင်ပါတယ်။
အရင် ကိုယ် ဝန်တွေတုန်းက အကြောင်းအရင်းမရှိပဲ ကလေးအသေလေးတွေ မွေးဖွားခဲ့ဖူးရင်။
အရင်ကိုယ်ဝန် တွေ တုန်းက ကလေး တွေဟာ မွေးရာပါ ချို့ ယွင်းချက်ရှိတဲ့ ကလေးတွေ ဖြစ်နေခဲ့ရင် ဒီကိုယ်ဝန်မှာလည်း ကိုယ်ဝန်ဆောင်စဥ် ဆီးချိုတက်ခြင်း (Gestational Diabetes) ဖြစ်နိုင်ချေ များပါတယ် မေမေတို့ရေ။
မေမေတို့ရေ ဒီတစ်ပုဒ်မှာတော့ ကိုယ်ဝန်ဆောင်စဥ် သကြားဓာတ်များခြင်း (Gestational Diabetes) ရဲ့ လက္ခဏာတွေ၊ ဖြစ်ရတဲ့ အကြောင်းရင်းတွေ ဘယ်သူတွေမှာ အဖြစ်များလဲဆိုတာကို ဖော်ပြခဲ့ ပြီး နောက်တစ်ပုဒ်မှာတော့ ဆိုးကျိုးတွေ၊ ကာကွယ်ရမဲ့ နည်းလမ်းတွေနဲ့ မွေးဖွားရန် လမ်းညွှန်တွေကို ဖော်ပြပေးသွားပါမယ်။
Dr.MKK
::::::::::::::::::::::::::::::::
