Referral Office in Myanmar

03/01/2026

ခေါင်းမူးပြီး မိုက်ခနဲဖြစ်သွားရင် ဒါကို ချက်ချင်းလုပ်ပါ...........................
လမ်းလျှောက်နေရင်းပဲဖြစ်ဖြစ်၊ ထိုင်ရာကနေ ထလိုက်တာပဲဖြစ်ဖြစ် ရုတ်တရက် ခေါင်းမူးပြီး မျက်စိရှေ့မှာ မိုက်ခနဲဖြစ်သွားတာ (Blackout) မျိုး ကြုံဖူးပါသလား?

ဒါဟာ ဦးနှောက်ဆီကို သွေးစီးဆင်းမှု ခဏတာ လျော့နည်းသွားလို့ ဖြစ်ရတာပါ။

ဒီလိုဖြစ်လာရင် လဲကျပြီး ခေါင်းထိခိုက်တာမျိုး မဖြစ်ရအောင် အောက်ပါအချက်တွေကို ချက်ချင်း လုပ်ဆောင်ရပါမယ်။

(၁) လုပ်လက်စ အလုပ်ကို ရပ်ပြီး ချက်ချင်း ထိုင်ချလိုက်ပါ
အဓိကအချက်: မိုက်ခနဲ ဖြစ်တာနဲ့ "ခဏနေ သက်သာသွားမှာပါ" ဆိုပြီး ဆက်မလျှောက်ပါနဲ့။ ဘေးနားမှာ ဘာမှမရှိရင်တောင် ကြမ်းပြင်ပေါ်မှာ ချက်ချင်း ထိုင်ချလိုက်ပါ သို့မဟုတ် လှဲချလိုက်ပါ။

ရည်ရွယ်ချက်: မတော်တဆ လဲကျပြီး ဦးခေါင်းနဲ့ ခန္ဓာကိုယ် ထိခိုက်ဒဏ်ရာရတာကို ကာကွယ်ဖို့ပါ။

(၂) ခြေထောက်ကို မြှင့်ထားပါ (လှဲနေမယ်ဆိုရင်)
လုပ်ဆောင်ရန်: အကယ်၍ လှဲချလိုက်တယ်ဆိုရင် ခြေထောက်အောက်ကို ခေါင်းအုံး (သို့မဟုတ်) တစ်ခုခုခံပြီး ခန္ဓာကိုယ်ထက် မြင့်အောင် မြှင့်ထားလိုက်ပါ။

ရည်ရွယ်ချက်: ခြေထောက်ဘက်ရောက်နေတဲ့ သွေးတွေက နှလုံးနဲ့ ဦးနှောက်ဆီကို ပြန်စီးဆင်းလာပြီး ခေါင်းမူးတာကို မြန်မြန် သက်သာစေပါတယ်။

(၃) ကြပ်နေတဲ့ အဝတ်အစားတွေကို လျှော့ပါ
လုပ်ဆောင်ရန်: ကော်လာကြယ်သီး တပ်ထားရင် ဖြုတ်လိုက်ပါ။ ခါးပတ် (Belt) ပတ်ထားရင် လျှော့လိုက်ပါ။ လည်စည်း (Tie) ကို ဖြေလိုက်ပါ။

ရည်ရွယ်ချက်: အသက်ရှူရ လွယ်ကူစေဖို့နဲ့ သွေးလှည့်ပတ်မှု ကောင်းစေဖို့ ဖြစ်ပါတယ်။

(၄) လေကောင်းလေသန့် ရပါစေ
လုပ်ဆောင်ရန်: လူအုပ်ကြားထဲမှာဆိုရင် လူခွဲခိုင်းပါ။ ပြတင်းပေါက်တွေ ဖွင့်ထားပါ။ ယပ်ခတ်ပေးပါ။

(၅) သတိပြန်လည်လာရင် ရေ သို့မဟုတ် ဓာတ်ဆားရည် တိုက်ပါ
လုပ်ဆောင်ရန်: လူက သတိကောင်းကောင်းရပြီဆိုမှ ရေအေးအေးလေး သို့မဟုတ် ဓာတ်ဆားရည်ကို ဖြည်းဖြည်းချင်း သောက်ပါ။

သတိပေးချက်: သတိမကောင်းတကောင်း ဖြစ်နေချိန်မှာ ရေအတင်းတိုက်ရင် သီးပြီး အသက်ရှူလမ်းကြောင်း ပိတ်သွားနိုင်လို့ သတိပြုပါ။

ရှောင်ကြဉ်ရမည့် အချက်များ
-------------------
ချက်ချင်း ပြန်မထပါနဲ့: သက်သာသလို ရှိသွားရင်တောင် ချက်ချင်း ဝုန်းခနဲ ပြန်မထပါနဲ့။ ဖြည်းဖြည်းချင်း အရင်ထိုင်ပါ၊ ပြီးမှ မတ်တတ်ရပ်ပါ။

ကား/ဆိုင်ကယ် ဆက်မမောင်းပါနဲ့: ခေါင်းမူးနေတုန်း ယာဉ်ယန္တရား မောင်းနှင်ခြင်းကို လုံးဝ ရှောင်ကြဉ်ပါ။

ဘယ်အချိန်မှာ ဆေးရုံ/ဆေးခန်း သွားသင့်လဲ? (Red Flags)
------------------------
သာမန် ခေါင်းမူးတာမဟုတ်ဘဲ အောက်ပါလက္ခဏာတွေ တွဲရှိနေရင် အရေးပေါ် ကုသမှု ခံယူရပါမယ်။

✅ရင်ဘတ်ပါ အောင့်လာလျှင် (နှလုံးပြဿနာ ဖြစ်နိုင်သည်)။

✅စကားပြောရ လေးလံလာလျှင်၊ မျက်နှာရွဲ့သွားလျှင် (လေဖြတ် လက္ခဏာ ဖြစ်နိုင်သည်)။

✅ရင်တုန်တာ အရမ်းမြန်နေလျှင်။

✅ခေါင်းကိုက်တာ အရမ်းပြင်းထန်လာလျှင်။

✅မကြာခဏ မေ့လဲချင်သလို ဖြစ်နေလျှင်။

"သာမန် ပင်ပန်းလို့၊ အိပ်ရေးပျက်လို့ မူးတာဆိုရင် ခဏနားလိုက်ရင် သက်သာသွားနိုင်ပါတယ်။
ဒါပေမယ့် အထက်ပါ လက္ခဏာတွေ ပါလာရင်တော့ 'ခဏနေ သက်သာမှာပါ' ဆိုပြီး လုံးဝ အချိန်မဆွဲပါနဲ့ နီးစပ်ရာ ဆေးရုံကို ချက်ချင်းသွားပါ။"

ဒေါက်တာခန့် (Dr နေလင်းအောင်)
M.B.,B.S (Mdy), M.Med.Sc (Int.Med)
MRCP (UK), MRCPE, FRCP (Glasg)
Consultant physician
အထူးကုသမားတော်

/Credit

26/12/2025

မြန်မာနိုင်ငံမှာ ကျောက်ကပ်ဆေးခြင်း (dialysis) လုပ်နေရတဲ့ လူနာတွေ အရမ်းများလာပါတယ်။ တစ်ပတ်ကို (၂–၃) ကြိမ် ဆေးကြရတယ်။ တစ်ခါဆေးရင် ပိုက်ဆံ၊ အချိန်၊ ကိုယ်ခန္ဓာအင်အား အားလုံးကို ယူသွားပါတယ်။

♦️ကျောက်ကပ်ဆေးခြင်း(Dialysis) ဆိုတာ တစ်ခါဆေးရင် ပိုက်ဆံ အများကြီးကုန်ပါတယ်။ တစ်လကို သိန်းနဲ့ချီ ကုန်တာပါ။ တစ်နှစ်လောက် ဆေးရရင်ကိုပဲ မိသားစုဘဝ တစ်ခုလုံး ပြောင်းလဲသွားနိုင်ပါတယ်။

ကျောက်ကပ်ဆေးနေရတဲ့ လူက အလုပ်မလုပ်နိုင်တော့တာ များပါတယ်။မိသားစုက ဝိုင်းထောက်ပံ့ရပါတယ်။ လူနာ နဲ့ လူနာရှင် မိသားစု တို့ရဲ့ စိတ်ပိုင်းဆိုင်ရာလည်း ပင်ပန်းရပါတယ်။

♦️ကျောက်ကပ်အစားထိုးခြင်း (Kidney transplant)ကို လူတိုင်း မလုပ်နိုင်ပါဘူး။ အရမ်း ချမ်းသာမှ လုပ်နိုင်တာပါ။ ဒါတောင် ကျောက်ကပ်လှူတဲ့သူကို ရှာရတာ ခက်ပါတယ်။ အစားထိုးပြီးရင်လည်း ပြီးသွားတာမဟုတ်သေးပါဘူး။ ဆေးဖိုး နဲ့ ကျန်းမာရေး စောင့်ရှောက်မှု အတွက် ကုန်ကျစရိတ် အရမ်းကြီးပါတယ်။ လူအများစုသည် ကျောက်ကပ်အစားထိုးခြင်း ကို လုပ်နိုင်ဖို့ မလွယ်ကူကြပါဘူး။

❗ဒါကြောင့် မဖြစ်ခင် ကာကွယ်တာက
ဖြစ်ပြီးမှ ကုတာထက် အဆ (၁၀၀) လောက် ငွေကုန်၊ အချိန်ကုန် သက်သာပါတယ်။

♦️အောက်ပါ လက္ခဏာတွေဖြစ်လာရင် လုံးဝ မပေါ့ဆပါနဲ့...
✓ ဆီးသွားရင် သွေးပါခြင်း။
✓ ဆီးအရောင် မမှန်ခြင်း။
✓ အမြဲပင်ပန်း၊ အားနည်းနေခြင်း။
✓ အကြောင်းမရှိပဲ ပိန်လိုက်လာခြင်း။
✓ ခါးဘေးနာခြင်း။
-------------------------------

♦️ ကိုယ့်ကျောက်ကပ်ကို ကိုယ်ကာကွယ်ဖို့အတွက်
✓ ရေ လုံလောက်အောင် သောက်ပါ
✓ အငန် လျော့ပါ
✓ ဆေးကို ကိုယ်တိုင် မသောက်ပါနဲ့
✓ သွေးတိုး၊ ဆီးချို ရှိရင် ထိန်းပါ
✓ တစ်နှစ်တစ်ခါ ဆီးစစ် + သွေးစစ် လုပ်ပါ။
ကျောက်ကပ်ရောဂါက အစောပိုင်းမှာ မသိသာပါဘူး။ ဒါပေမယ့် နောက်ဆုံးအဆင့် ရောက်ရင် ဘဝတစ်ခုလုံးကို ယူသွားပါတယ်။

♦️ကျမ အဖေက ကျောက်ကပ်ကင်ဆာနဲ့ အသက်ဆုံးရှူံးခဲ့ရတာပါ။ ဆီးသွားတဲ့အခါ ဆီးက သွေးအရောင် ဖြစ်လာပါတယ်။ အသက်(၈၇)နှစ်မို့ ခွဲစိပ်ဖို့ကို ဆရာဝန်တွေက အားမပေးပါဘူး။ အဖေ့ရဲ့ နှလုံးခုန်နှုန်းကလည်း အရမ်းနှေးနေလို့ ခွဲစိပ်ခန်းမှာတင် တစ်ခုခု ဖြစ်သွားနိုင်တာမို့ ဆေးရုံကဆင်းပြီး တစ်လလောက်မှာပဲ ဆုံးသွားခဲ့တာပါ။
---------------------------

♦️ကျောက်ကပ်ကို တဖြည်းဖြည်း ပျက်စီးစေနိုင်တဲ့ အလေ့အကျင့်များ

✓အငန်အရမ်းစားလွန်းခြင်း (ငါးပိ၊ ငါးပိရည်၊ ငါးပိထောင်း)
✓ ရေလုံလောက်အောင် မသောက်ခြင်း။
✓ ရေမသောက်ဘဲ လက်ဖက်ရည်၊ ကော်ဖီနဲ့ပဲ အစားထိုးသောက်ခြင်း။
✓ ဆရာဝန် မညွှန်ကြားတဲ့ ဆေးတွေကို ကိုယ်တိုင် အလွန်အကျွံ သောက်ခြင်း။
✓ သွေးတိုး၊ ဆီးချိုကို မထိန်းသိမ်းထားနိုင်ခြင်း။
✓ ဆေးလိပ်၊ အရက် အလွန်အကျွံသောက်ခြင်း။
--------------------------

♦️ကျောက်ကပ်ဆေးတဲ့အဆင့် မရောက်သေးသူများ ရှောင်သင့်တဲ့ အစားအသောက်များ....

✓ အငန် အရမ်းများတဲ့ အစားအစာများ။
(ငါးပိ၊ ငါးပိရည်၊ ငါးပိထောင်း၊ ဆားများတဲ့ ငါးခြောက်/ပုဇွန်ခြောက် )
✓ ခေါက်ဆွဲခြောက်ထုတ် / အမှုန့်ဟင်းရည်များ ( ခနခနမစားသင့်)
✓ ဆီပြန်၊ အဆီများ၊ အကြော်များ
✓ အချိုရည်၊ စွမ်းအင်ဖြည့်အချိုရည်
✓ ပိုတက်ဆီယမ်(Potassium) မြင့်တဲ့ အသီးအနှံများဖြစ်တဲ့ ငှက်ပျော၊ လိမ္မော်၊ ဒူးရင်းသီး( အလွန်အကျွံ မစားရန်)
✓ ပဲမျိုးစုံ၊ အခြောက်ခံ အသီး အနှံများ (များများ မစားရန်)
----------------------------

♦️ကျောက်ကပ်ကို ကာကွယ်ဖို့ စားသင့်တဲ့ အစားအသောက်များ

✓ ထမင်း (ပမာဏထိန်းပြီး) စားပါ။
✓ ဟင်းသီးဟင်းရွက် (ပြုတ်/ချက်)စားပါ( ဂေါ်ဖီ၊ သခွားသီး၊ ပန်းဂေါ်ဖီ စားသင့်)
✓ ပန်းသီး၊ သစ်တော်သီး စတဲ့
Potassium ပိုတက်ဆီယမ်ဓါတ် နည်းတဲ့ အသီးများစားပါ။
✓ ငါးပြုတ်၊ ငါးပေါင်း (အငန်မများ)
✓ ကြက်ဥအကာ
✓ ရေ

❗ကျောက်ကပ်ဆေးနေရတဲ့သူများ ရေကို ဆရာဝန်ညွှန်ကြားတဲ့ ပမာဏအတိုင်းသာ သောက်ရပါမယ်။

Aye Aye Khain
Copy/Credit

26/12/2025

#သားအိမ်ထုတ်လိုက်ရင် သွေးဆုံးမကိုင်တော့ဘူး၊ ပိုနေကောင်းပြီး အေးချမ်းပြီ လို့ ကျွန်မ ထင်ခဲ့မိပါတယ်။ ဒါပေမယ့် လက်တွေ့မှာတော့.....🥰

ကျွန်မ အသက် ၅၃ နှစ် (၂၀၁၈ ခုနှစ်) မှာ သားအိမ်နံရံထူတဲ့ ပြဿနာကြောင့်၊ နောင်တစ်ချိန် ကင်ဆာဖြစ်လာမှာ စိုးရိမ်ပြီး ကိုယ်ပိုင်ဆုံးဖြတ်ချက်နဲ့ သားအိမ်ထုတ်ခဲ့ပါတယ်။ အခြားဘာရောဂါအခံမှ မရှိပါဘူး။ ငွေကုန်ကြေးကျခံပြီး သက်သာလှတဲ့ မှန်ပြောင်းနဲ့ ခွဲစိတ်မှုကို ရွေးချယ်ခဲ့လို့ လူနာလည်း မြန်မြန်ပြန်ကောင်းခဲ့ပါတယ်။

ဒါပေမဲ့... ခွဲစိတ်ပြီး ၆ လ အကြာမှာတော့ မထင်မှတ်ထားတဲ့ ဆိုးကျိုးတွေကို စတင်ခံစားလာရပါတော့တယ်။

🌸 ကျွန်မ ကြုံတွေ့ခဲ့ရတဲ့ "ရုတ်တရက် သွေးဆုံးခြင်း" (Surgical Menopause)

ခါးအထက်ပိုင်းတွေ ပူဖျင်းပြီး ချွေးစေးတွေ တစ်နေ့ကို အကြိမ်ပေါင်းများစွာ ထွက်ပါတယ်။
မောပန်းလွယ်ပြီး၊ အထူးသဖြင့် စိတ်ရှုပ်စရာရှိရင် ပိုဆိုးပါတယ်။
ညဘက် အိပ်မပျော်ခြင်း၊ စိတ်ဓာတ်ကျလွယ်ခြင်း၊ အလိုလိုနေရင်း ဝမ်းနည်းအားငယ်ခြင်းတွေ ဖြစ်လာပါတယ်။
နေထိုင်ရတာ မပျော်ရွှင်ဘဲ အလိုမကျမှုတွေ များလာပါတယ်။
နှလုံးအထူးကုနဲ့ ပြန်ပြမှ သိလိုက်ရတဲ့ အမှန်တရားကတော့ "သားအိမ်ထုတ်ထားတဲ့သူတွေလည်း သွေးဆုံးကိုင်ပါတယ်" ဆိုတာပါပဲ။

💡 ဘာကြောင့် ပိုဆိုးရတာလဲ?
^^^^^^^^^^^^^^^^^^
ပုံမှန် သွေးဆုံးတာက ဟော်မုန်း တဖြည်းဖြည်းချင်း လျော့နည်းသွားတာပါ။ ဒါပေမယ့် သားအိမ်ထုတ်လိုက်တဲ့အခါ ခန္ဓာကိုယ်အတွက် လိုအပ်တဲ့ ဟော်မုန်း ထုတ်လုပ်မှုက "ရုတ်တရက် လုံးဝပြတ်တောက်" သွားပါတယ်။ ဒါကြောင့် သားအိမ်ထုတ်ထားသူတွေရဲ့ သွေးဆုံးကိုင်ဝေဒနာက သာမန်ထက် ပိုပြင်းထန်ပြီး ၅ နှစ်လောက်ထိ ကြာမြင့်တတ်ပါတယ်။
ဒါ့အပြင် နှလုံးရောဂါ၊ အရိုးပွရောဂါ ဖြစ်နိုင်ခြေတွေလည်း မြင့်တက်လာနိုင်ပါတယ်။

🩺 အမျိုးသမီးများအတွက် အကြံပြုချက်
^^^^^^^^^^^^^^^^
အသက် ၆၀ ကျော်နေပြီ (သို့) မဖြစ်မနေ ထုတ်ရမယ့် ကြီးမားတဲ့ ရောဂါတစ်ခုခုရှိနေရင်တော့ ဆရာဝန်နဲ့ တိုင်ပင်ပြီး ထုတ်တာ အကောင်းဆုံးပါ။
ဒါပေမယ့် အသက် ၆၀ မပြည့်သေးဘူး၊ မထုတ်ဘဲ ကုသလို့ရတဲ့ အခြေအနေမျိုးဆိုရင်တော့ မိမိသဘောနဲ့ အလွယ်တကူ မထုတ်လိုက်ပါနဲ့လို့ အကြံပြုချင်ပါတယ်။

🍀 မိသားစုဝင်များသို့ မေတ္တာရပ်ခံချက်
^^^^^^^^^^^^^^^^^^
သွေးဆုံးကိုင်ဝေဒနာ ခံစားနေရတဲ့ အမျိုးသမီးတွေဟာ လူရောစိတ်ပါ ပင်ပန်းနေတတ်ပါတယ်။ ဒါကို မိသားစုဝင်တွေက နားလည်ပေးပြီး စာနာဖေးမပေးကြဖို့ အထူးလိုအပ်လှပါတယ်။

ကျွန်မလို အမှားမျိုး မကြုံရလေအောင် ဘဝတူ အမျိုးသမီးများကို စေတနာရှေ့ထားပြီး မျှဝေလိုက်ရပါတယ်။ အားလုံး ကျန်းမာပျော်ရွှင်ကြပါစေရှင်
may myanmar
======================
#သားအိမ် #ကိုယ်တွေ့အတွေ့အကြုံ #ကျန်းမာရေးဗဟုသုတ
Copy/Credit

26/12/2025

အာရုံကြောတွေအားမနည်းအောင် ဒီစာကိုဖတ်ပါ😔😔

အမြဲတမ်း နုံးချိနေတာမျိုး၊ စိတ်မကြည်တာမျိုး၊ အလုပ်လုပ်ရင် အာရုံမစိုက်နိုင်တာမျိုးတွေ ဖြစ်နေပြီလား? 😴 ဒါဆိုရင်တော့ သင့်ရဲ့ အာရုံကြောစနစ် (Nervous System) က အချက်ပေးခေါင်းလောင်း တီးနေတာပါပဲ။
ကျွန်တော်တို့ရဲ့ ခန္ဓာကိုယ်မှာ အာရုံကြောဆိုတာ "အင်တာနက်လိုင်း" နဲ့ တူပါတယ်။ လိုင်းမကောင်းရင် ဘာမှလုပ်လို့မရသလိုပဲ၊ အာရုံကြော အားနည်းလာရင် မှတ်ဉာဏ်တွေ လျော့နည်းလာမယ်၊ စိတ်တိုလွယ်လာမယ်၊ တစ်နေ့ကုန် ပင်ပန်းနေပါလိမ့်မယ်။ 📉

အာရုံကြောကို တိတ်တဆိတ် ဖျက်ဆီးနေတဲ့ အချက်တွေနဲ့ ပြန်လည်လန်းဆန်းစေမယ့် နည်းလမ်းတွေကို အသေးစိတ် လေ့လာကြည့်ရအောင်... 👇

⚠️ အာရုံကြောကို ပျက်စီးစေသော အဓိကအချက် (၅) ချက်
၁။ အိပ်ရေးပျက်ခြင်း (Lack of Sleep)
အိပ်စက်ခြင်းဟာ အာရုံကြောဆဲလ်တွေ သူတို့ဘာသာ ပြန်လည်ပြုပြင်ဖို့နဲ့ တစ်နေ့တာ စုဆောင်းထားတဲ့ အဆိပ်အတောက်တွေကို ဖယ်ရှားဖို့ အကောင်းဆုံးအချိန်ဖြစ်ပါတယ်။ အိပ်ရေးပျက်တဲ့အခါ ဦးနှောက်ထဲက အာရုံကြောတွေက သတင်းအချက်အလက်ကို ကောင်းကောင်း မပို့ဆောင်နိုင်တော့ဘဲ မှတ်ဉာဏ်ချို့ယွင်းတာ၊ တုံ့ပြန်မှုနှေးကွေးတာတွေ ဖြစ်စေနိုင်ပါတယ်။

၂။ ဖုန်းနှင့် စခရင်များကို အလွန်အကျွံကြည့်ခြင်း (Digital Overload)
ဖုန်းကထွက်တဲ့ Blue Light ဟာ ဦးနှောက်က Melatonin (အိပ်စက်ခြင်းကို ကူညီတဲ့ဟော်မုန်း) ထွက်ရှိမှုကို ဟန့်တားပါတယ်။ ဒါ့အပြင် အချက်အလက်အသစ်တွေကို အဆက်မပြတ် ကြည့်ရှုနေခြင်းက အာရုံကြောတွေကို ပင်ပန်းနွမ်းနယ်စေပြီး အာရုံစူးစိုက်မှု အားနည်းခြင်း (Attention Deficit) ကို ဖြစ်စေပါတယ်။

၃။ကိုယ်လက်လှုပ်ရှားမှု မရှိခြင်း (Sedentary Lifestyle)
တစ်နေကုန် ထိုင်နေတာ ဒါမှမဟုတ် ကိုယ်လက်လှုပ်ရှားမှု မရှိတာက သွေးလှည့်ပတ်မှုကို နှေးကွေးစေပါတယ်။ သွေးလှည့်ပတ်မှု မကောင်းတဲ့အခါ အစွန်အဖျား အာရုံကြော (Peripheral Nerves) တွေဆီ အာဟာရဓာတ် မရောက်တော့ဘဲ ထုံကျဉ်တာတွေ ဖြစ်လာနိုင်ပါတယ်။

၄။ စိတ်ဖိစီးမှုများခြင်း (Chronic Stress)
စိတ်ဖိစီးတဲ့အခါ ခန္ဓာကိုယ်က Cortisol ဟော်မုန်းတွေကို အများကြီး ထုတ်ပေးပါတယ်။ အချိန်ကြာလာတဲ့အခါ အဲဒီဟော်မုန်းတွေက ဦးနှောက်ရဲ့ မှတ်ဉာဏ်အပိုင်း (Hippocampus) ကို ထိခိုက်စေပြီး အာရုံကြောစနစ်ရဲ့ လုပ်ဆောင်ချက်တွေကို ကမောက်ကမ ဖြစ်စေပါတယ်။

၅။ ဗီတာမင် B12 ချို့တဲ့ခြင်း (Vitamin B12 Deficiency)
ဗီတာမင် B12 ဟာ အာရုံကြောတွေကို ဖုံးအုပ်ထားတဲ့ အကာအကွယ်လွှာ (Myelin Sheath) တည်ဆောက်ဖို့အတွက် မရှိမဖြစ် လိုအပ်ပါတယ်။ B12 ချို့တဲ့တဲ့အခါ အာရုံကြောတွေက တဖြည်းဖြည်း ပျက်စီးလာပြီး ခြေလက်တွေ ထုံကျဉ်တာ၊ လမ်းလျှောက်ရ ခက်ခဲတာတွေ ဖြစ်တတ်ပါတယ်။
သတိပြုရန်: အရက်အလွန်အကျွံ သောက်ခြင်းနှင့် ဆေးလိပ်သောက်ခြင်းတို့ကလည်း အာရုံကြောဆီသို့ သွေးစီးဆင်းမှုကို နည်းပါးစေပြီး ပျက်စီးမှုကို မြန်ဆန်စေပါတယ်။

✅ အမြဲလန်းဆန်းနေစေမယ့် နေထိုင်နည်း (၆) သွယ်
၁။ အရည်အသွေးရှိတဲ့ အိပ်စက်ခြင်းကို ဖန်တီးပါ 🌙
ညဘက် ၇ နာရီကနေ ၉ နာရီအထိ အိပ်ပါ။ အိပ်ခန်းကို မှောင်နေပါစေ။ အိပ်ခါနီး Blue Light (ဖုန်းမျက်နှာပြင်) ကြည့်ခြင်းကို ရှောင်ကြဉ်တာက အာရုံကြောတွေကို အနားပေးဖို့ အကောင်းဆုံးနည်းလမ်းပါ။

၂။ အာရုံကြောအတွက် အာဟာရကို ဦးစားပေးပါ 🥑
Vitamin B1, B6, B12 တို့ဟာ အာရုံကြောအတွက် "နံပါတ် (၁) အစာ" ပါ။ အစေ့အဆန်၊ အစိမ်းရောင်ရှိသော ဟင်းသီးဟင်းရွက်၊ ဥအမျိုးမျိုးနဲ့ ပင်လယ်ငါးတွေကို ပိုစားပေးခြင်းဖြင့် အာရုံကြောတွေကို ပြန်လည်ပြုပြင်ပေးပါတယ်။

၃။ ရေဓာတ်ကို စနစ်တကျ ဖြည့်တင်းပါ 🥛
မနက်အိပ်ရာနိုးနိုးချင်း ရေတစ်ဖန်ခွက် သောက်ပါ။ တစ်နေ့တာလုံးမှာ ရေကို နည်းနည်းချင်းနဲ့ မကြာခဏ သောက်ပေးတာက အာရုံကြောဆက်သွယ်မှုတွေကို ချောမွေ့စေပါတယ်။

၄။ စိတ်တည်ငြိမ်မှု လေ့ကျင့်ခန်း လုပ်ပါ (Meditation) 🧘‍♀️
တစ်နေ့ကို ၁၀ မိနစ်ခန့် တရားထိုင်ခြင်း သို့မဟုတ် ငြိမ်သက်စွာ ထိုင်နေခြင်းက အာရုံကြောစနစ်ကို နိုးကြားနေတဲ့ အခြေအနေ (Fight or Flight Mode) ကနေ အနားယူတဲ့ အခြေအနေ(Rest and Digest Mode) ကို ပြောင်းလဲပေးပြီး။ အာရုံကြောတွေ ခဏတာ အနားယူပီး။ တစ်နေ့လုံး လန်းဆန်းစေပါတယ်။

၅။ သဘာဝပတ်ဝန်းကျင်နဲ့ ထိတွေ့ပါ (Earthing) 🌳
မြေကြီးပေါ်မှာ ခြေဗလာနဲ့ လမ်းလျှောက်တာ၊ သစ်ပင်တောတောင်တွေကြား သွားလာတာဟာ ခန္ဓာကိုယ်ထဲက လျှပ်စစ်စက်ကွင်းတွေကို မျှခြေဖြစ်စေပြီး အာရုံကြောပင်ပန်းမှုကို သက်သာစေပါတယ်။

၆။ ဦးနှောက်ကို အသစ်အဆန်းတွေ သင်ယူခိုင်းပါ 📚
စာဖတ်တာ၊ ဘာသာစကားအသစ် သင်တာ ဒါမှမဟုတ် ပဟေဠိဖြေတာတွေ လုပ်ပေးပါ။ အာရုံကြောဆဲလ်တွေဟာ အလုပ်လုပ်လေလေ၊ ပိုမိုခိုင်မာလာလေလေ ဖြစ်လို့ပါပဲ။

💪 အာရုံကြော အားကောင်းစေမယ့် လေ့ကျင့်ခန်း (၃) ခု
* လည်ပင်းနှင့် ပုခုံး အကြောလျှော့ခြင်း (Neck & Shoulder Rolls)- တစ်နေကုန် ကွန်ပျူတာကြည့်၊ ဖုန်းကြည့်တာကြောင့် တင်းမာနေတဲ့ အာရုံကြောတွေကို ပြေလျော့စေပြီး ဦးနှောက်ဆီ သွေးစီးဆင်းမှု ကောင်းစေပါတယ်။
* မျှခြေလေ့ကျင့်ခန်း (Balance Exercises)- ခြေထောက်တစ်ဖက်တည်းနဲ့ ရပ်တာမျိုး (Yoga Tree Pose) လုပ်ပေးပါ။ ဒါဟာ ဦးနှောက်နဲ့ အာရုံကြောတွေကြား ဟန်ချက်ညီညီ ပေါင်းစပ်လုပ်ဆောင်မှုကို လေ့ကျင့်ပေးတာပါ။
* အမြန်လမ်းလျှောက်ခြင်း (Brisk Walking)- တစ်နေ့ကို မိနစ် ၂၀ ခန့် သွေးပူအောင် လမ်းလျှောက်ပေးတာက အာရုံကြောတွေကို အောက်ဆီဂျင် အပြည့်အဝ ရရှိစေပါတယ်။

💡 အနှစ်ချုပ်
ကိုယ်ခန္ဓာကျန်းမာဖို့ အားကစားလုပ်သလိုပဲ၊ အာရုံကြော ကျန်းမာဖို့ကလည်း စနစ်တကျ နေထိုင်တတ်ဖို့ လိုပါတယ်။ အားဆေးတွေထက် အကျင့်ကောင်းလေးတွေက သင့်ကို ပိုပြီး လန်းဆန်းစေမှာပါ! 💪

ဒီပို့လေးကို အခြားလိုအပ်နေသူတွေဆီရောက်အောင် ပြန်လည်အလင်ပြပေးပါအုန်း။ ဒီဆောင်းပါးလေးက သင့်အတွက်အသုံးဝင်ရင် ကျေးဇူးလို့ချန်ခဲ့ပေးပါ။ ပျော်ရွှင် ကျန်းမာကြပါစေ။




Copy/Credit

21/12/2025

အဟာရဓာတ်တွေ လျှော့နည်းနေရင်
————-
၁ ။ မဂ္ဂနီဆီယမ် လျှော့နည်းနေရင်…
ကြွက်တက်တာ၊ စိုးရိမ်စိတ်များတာနဲ့ အိပ်မပျော်တာတွေ ဖြစ်တတ်ပါတယ်။
အသက်ကြီးသူတွေရဲ့ ၇၀% က မဂ္ဂနီဆီယမ်ချို့တဲ့နေတတ်ကြပါတယ်။
ချို့တဲ့တာကြောင့် ပြန်လည်ကောင်းမွန်နှုန်း ၄၀ % နှေးကွေးသွားပါတယ်။

၂ ။ ပိုတက်ဆီယမ် လျှော့နည်းနေရင်…
အားနည်းတာ၊ ပင်ပန်းနွမ်းနယ်တာနဲ့ နှလုံးခုန်နှုန်းစည်းချက်မမှန်တာတွေ ဖြစ်တတ်ပါတယ်။
၁ % လောက် လျှော့နည်းနေရင်တောင် ကြွက်သားနဲ့ အာရုံကြောလုပ်ဆောင်ချက်မှာ သက်ရောက်မှု ရှိပါတယ်။
ဦးနှောက်အသိပိတ်နေပြီး သွေးပေါင်ချိန်မြင့်တက်နိုင်ပါတယ်။

၃ ။ ကယ်လ်ဆီယမ် လျှော့နည်းနေရင်…
ကျဉ်တာ၊ အကြောဆွဲတာ ဖြစ်အောင်လှုံ့ဆော်ပေးပြီး အရိုးကြွပ်ဆပ်နိုင်ပါတယ်။
ကယ်လ်ဆီယမ်က ကိုယ်တွင်းကြွက်သားအားလုံး ချုံ့ဆန့် နိုင်ဖို့ လိုအပ်ပါတယ်။

၄ ။ သံဓာတ် လျှော့နည်းနေရင်…
မောပန်းတာ၊ အသားအရေဖျော့တော့တာနဲ့ ခေါင်းမူးတာတွေ ဖြစ်တတ်ပါတယ်။
သံဓာတ်ချို့တဲ့တာကြောင့် ကိုယ်တွင်းအောက်ဆီဂျင်ပို့ဆောင်မှု ၃၀ % ထိ ဖြတ်တောက်နိုင်ပြီး စွမ်းအင်နဲ့ ဇီဝဖြစ်စဉ်က ၃၀ % ထိ လျှော့နည်းနိုင်ပါတယ်။

၅ ။ ဆိုဒီယမ်လျှော့နည်းနေရင်…
ခေါင်းမူးတာ၊ ဦးနှောက် ပိတ်မှောင်ပြီး မတွေးတောနိုင်တာနဲ့ စွမ်းအင် လျှော့နည်းတာတွေ ဖြစ်တတ်ပါတယ်။
ဆိုဒီယမ်က အရည်ညီညွတ်မျှတမှုရှိအောင် နဲ့ အာရုံကြောအချက်ပြနိုင်အောင် ထိန်းချုပ်ပေးပါတယ်။

၆ ။ ဇင့် လျှော့နည်းနေရင်…
အနာကျက်နှေးကွေးတာ၊ ခုခံအား အားနည်းတာနဲ့ ဘာစားစား အရသာမရှိ ဖြစ်နေတတ်ပါတယ်။
ဇင့်ချို့တဲ့နေတာကြောင့် တက်စတိုစတီရုန်း ၂၅ % ထိ လျော့ကျနိုင်ပါတယ်။

၇ ။ ဗီတာမင် D လျှော့နည်းနေရင်…
စိတ်ခံစားချက် အတက်အကျများတာ၊ ခုခံအားလျှော့နည်းတာနဲ့ ပင်ပန်းနွမ်းနယ်တာတွေ ဖြစ်တတ်ပါတယ်။
အသက်ကြီးသူ ၄၀ % ကျော်က ဗီတာမင် D ချို့တဲ့ နေတတ်ကြပြီး နာတာရှည်ရောဂါ ဖြစ်နိုင်ခြေ ၄၀ % မြင့်မားပါတယ်။

၈ ။ ဗီတာမင် B12 လျှော့နည်းနေရင်…
ကျဉ်တာ၊ ဦးနှောက်ပိတ်ပြီး မတွေးခေါ်နိုင်တာနဲ့ စွမ်းအင်လျှော့နည်းနိုင်ပါတယ်။
သတ်သတ်လွတ်စားသုံးသူတွေနဲ့ အသက် ၅၀ ကျော်သူတွေမှာ အဖြစ်များပြီး ဗီတာမင် B12 ချို့တဲ့ရင်အာရုံကြောပျက်စီးကာ စိတ်ဓာတ်ကျနိုင်ပါတယ်။

၉ ။ ရေ နဲ့ ဓာတ်ဆား လျှော့နည်းနေရင်…
ရေ ၂ % လောက် လျော့ကျနေရင်တောင် ဇီဝဖြစ်စဉ် နဲ့ အာရုံစူးစိုက်နိုင်မှု နှေးကွေးနိုင်ပါတယ်။ ဦးနှောက်အတွင်း သွေးလှည့်ပတ်မှု ၂၅ % လျှော့နည်းသွားပြီး ပင်ပန်းနွမ်းနယ်ကာ ခေါင်းကိုက်နိုင်ပါတယ်။

၁၀ ။ အိုမီဂါ-၃ ချို့တဲ့ခြင်း
အာရုံစူးစိုက်နိုင်မှု လျော့နည်းသွားပြီး ရောင်ရမ်းမှုများပြားလာတာကြောင့် အရွယ်အိုမင်းမှု မြန်ဆန်နိုင်ပါတယ်။

၁၁ ။ အိုင်အိုဒင်းချို့တဲ့ခြင်း
သိုင်းရွိုက်ဟော်မုန်းထုတ်လုပ်မှု လျှော့နည်းသွားပြီး ဇီဝဖြစ်စဉ် ၁၀ -၁၅ % နှေးကွေးသွားနိုင်ပါတယ်။

၁၂ ။ ဆီလီနီယမ်ချို့တဲ့ခြင်း
ဓာတ်တိုးဖိစီးမှု မြင့်မားလာပြီး အဆိပ်အတောက်ဖြေလုပ်ငန်း ၁၀ -၁၅ % ထိ အားနည်းသွားနိုင်ပါတယ်။

#အားလုံးကျန်းမာကြပါစေ။
#ဒေါက်တာခင်မိုးမိုး
Copy/Credit

21/12/2025

နှလုံးရောဂါအတွက်သွားဖုံးရောဂါ၊ခံတွင်းသန့်ရှင်းရေးအရေးကြီးပုံ
သွားဖုံးရောဂါနှင့် ခံတွင်းသန့်ရှင်းရေးညံ့ဖျင်းခြင်းက ဘက်တီးရီးယားများ သွေးကြောထဲသို့ ဝင်ရောက်စေပြီး ရောင်ရမ်းမှုကို ဖြစ်စေနိုင်ပြီး သွေးကြောများကို ပျက်စီးစေပြီး နှလုံးရောဂါဖြစ်နိုင်ခြေကို တိုးစေနိုင်သည်။ASCVD (နှလုံးသွေးကြောဆိုင်ရာရောဂါများသည်)ကမ္ဘာတစ်ဝှမ်းတွင် သေဆုံးမှု၏ နံပါတ်တစ် အကြောင်းရင်း အဖြစ် ရှိနေဆဲ ဖြစ်ပြီး ခံတွင်းသန့်ရှင်းရေးကို တိုးတက်ကောင်းမွန်အောင်လုပ်ဆောင်ခြင်းသည် ယင်းဖြစ်ပွားခြင်းမှ တားဆီးရန် နည်းလမ်းတစ်ခုဖြစ်နိုင်သည်။

လေ့လာမှုအချို့တွင်ငယ်စဉ်ကသွားများကို ဂရုစိုက်ခြင်းသည် နောက်ပိုင်းတွင် နှလုံးရောဂါဖြစ်နိုင်ခြေကို လျှော့ချနိုင်ကြောင်း တွေ့ရှိခဲ့ပြီး ငယ်စဉ်က သွားများကို ဂရုစိုက်ခြင်း ဆိုင်ရာ အသေးစိတ်အချက်အလက်များ ပါဝင်သည်။
သွားဖုံးရောဂါကို ကုသခြင်းသည် သွေးပေါင်ချိန်၊ မြင့်မားသောသိပ်သည်းဆ lipoprotein ကိုလက်စထရောအဆင့်နှင့် ရောင်ရမ်းမှုအမှတ်အသားများကဲ့သို့သောရလဒ်တိုင်းတာမှုများကို တိုးတက်ကောင်းမွန်စေကြောင်း ခိုင်မာသောအထောက်အထားများရှိသည်ဟု သုတေသီများက ၎င်းတို့၏ထုတ်ဝေထားသောစာတမ်းတွင် ရေးသားထားသည် ။

သွားဖုံးရောဂါသည် နှလုံးဖောက်ပြန်ခြင်း၊ လေဖြတ်ခြင်း၊ atrial fibrillation၊ နှလုံးပျက်ကွက်ခြင်း၊ peripheral artery ရောဂါ၊ နာတာရှည်ကျောက်ကပ်ရောဂါနှင့် နှလုံးသေဆုံးမှုတို့ ဖြစ်နိုင်ခြေမြင့်မားခြင်းနှင့် ဆက်စပ်နေကြောင်း လေ့လာမှုများစွာက တွေ့ရှိခဲ့သည်။ သွားဖုံးရောဂါသည် ASCVD နှင့် ဆက်စပ်နေသော နာတာရှည်ရောင်ရမ်းမှုကို သိသိသာသာ ဖြစ်ပေါ်စေသော်လည်း၊ အကြောင်းရင်းနှင့် အကျိုးဆက် ဆက်နွယ်မှုကို အတည်မပြုနိုင်သေးပါ။
နှလုံးသွေးကြောဆိုင်ရာရောဂါဖြစ်နိုင်ခြေအချက်တစ်ခု သို့မဟုတ် တစ်ခုထက်ပိုသောအချက်များရှိသူများသည် အန္တရာယ်ပိုများသည်ဟု ယူဆရပြီး နာတာရှည်ရောင်ရမ်းမှုကို ဖြေရှင်းရန်အတွက် ပုံမှန်သွားစစ်ဆေးမှုများနှင့် သွားဖုံးရောဂါစောင့်ရှောက်မှုမှ အကျိုးကျေးဇူးရရှိနိုင်ပါသည်။

ယခင်လေ့လာမှုများအရ သွားတိုက်ခြင်းကို မကြာခဏပြုလုပ်ခြင်းသည် ၁၀ နှစ်ကြာ ASCVD အန္တရာယ်နည်းပါးခြင်းနှင့် ဆက်စပ်နေကြောင်း တွေ့ရှိခဲ့ရပါသည် (တစ်နေ့လျှင် တစ်ကြိမ် သို့မဟုတ် ထို့ထက်နည်းသော သွားတိုက်ခြင်းအတွက် ၁၃.၇% နှင့် တစ်နေ့လျှင် သုံးကြိမ် သို့မဟုတ် ထို့ထက်ပိုသော သွားတိုက်ခြင်းအတွက် ၇.၃၅%) နှင့် ရောင်ရမ်းမှုအမှတ်အသားများ လျော့နည်းသွားခြင်းတို့ ဖြစ်ပါသည်။

သွားတိုက်ခြင်း၊ သွားကြားထိုးခြင်းနှင့် ပုံမှန်သွားစစ်ဆေးခြင်းတို့သည် ကျန်းမာသောအပြုံးတစ်ခုအတွက်သာမက သင့်နှလုံးကိုကာကွယ်ရာတွင် အရေးကြီးသောအစိတ်အပိုင်းတစ်ခုလည်းဖြစ်သည်။

https://www.sciencealert.com/your-mouth-and-your-heart-are-connected-gum-disease-linked-to-heart-risks

https://newsroom.heart.org/news/gum-disease-may-be-linked-to-plaque-buildup-in-arteries-higher-risk-of-major-cvd-events
Copy/Credit

A review by the American Heart Association Cardiovascular Disease Prevention Committee strengthens the case that keeping our gums healthy helps protect against heart disease.

21/12/2025

ပန်းနာရင်ကြပ်ရောဂါ လက္ခဏာများ

ပန်းနာရင်ကြပ်ရောဂါသည် နာတာရှည် အသက်ရှူလမ်းကြောင်းဆိုင်ရာ ရောဂါဖြစ်ပြီး အသက်အရွယ်မရွေး ဖြစ်ပွားနိုင်ပါသည်။ ပန်းနာရင်ကြပ်ရောဂါသည် အဖြစ်များသော ရောဂါဖြစ်ပြီး ကမ္ဘာပေါ်ရှိ လူဦးရေ၏ သန်း ၃၀၀ ကျော်တွင် ပန်းနာရင်ကြပ်ရောဂါ ရှိနေကြောင်း တွေ့ရပါသည်။

ပန်းနာရင်ကြပ်ရောဂါ ရှိသူများတွင် လေပြွန်ကျဥ်းနေသဖြင့် အသက်ရှူလျှင် တရွှီရွှီမြည်ခြင်း၊ ချောင်းဆိုးခြင်း၊ ရင်ဘတ်ထဲတွင် တင်းကြပ်နေပြီး အသက်ရှူမဝခြင်း၊ အသက်ရှူကြပ်ခြင်း၊ မောခြင်း၊ ခေါင်းမူးခြင်း တို့ခံစားရတတ်ပါသည်။ ပန်းနာရင်ကြပ်ရောဂါ လက္ခဏာများကို အပျော့စားမှ ပြင်းထန်အဆင့်အထိ ခံစားရနိုင်ပါသည်။

ပန်းနာရင်ကြပ်ရောဂါ ရှိသူများတွင် ရောဂါပျောက်ကင်းအောင် မကုသနိုင်သော်လည်း ဆရာဝန်ညွှန်ကြားထားသော ရှူဆေးများ ပုံမှန်ရှူခြင်း၊ ဆေးပုံမှန်သောက်ခြင်း၊ ပန်းနာရင်ကြပ် ရောဂါဖြစ်စေသော ဖုန်မှုန့်၊ မီးခိုးငွေ့၊ ပန်းဝတ်မှုန်၊ တိရိစ္ဆာန်အမွှေးများ၊ ပိုးဟပ်၊ မှို တို့နဲ့ ထိတွေ့မှုနည်းအောင် နေခြင်း၊ တုတ်ကွေးရောဂါ ကာကွယ်ဆေး နှစ်စဥ်ထိုးခြင်း၊ ဆရာဝန်နှင့် ပုံမှန်ပြသ၍ စစ်ဆေးမှုခံယူခြင်း တို့ လုပ်ဆောင်ခြင်းဖြင့် ပုံမှန်အတိုင်း လှုပ်ရှားသွားလာနိုင်ပါသည်။

ထို့ပြင် ပန်းနာရင်ကြပ်ရှိသူများ ဆေးငွေ့ရှူရာတွင် Nebulizer (ရင်ကြပ်ရှူဆေးစက်) များအသုံးပြု၍လည်း အဆုတ်ထဲအထိရောက်အောင် များစွာ အထောက်အကူပြုစေနိုင်ပါသည်။

အရည်အသွေးမြင့် အိမ်သုံးကျန်းမာရေး စောင့်ရှောက်မှု ပစ္စည်းများကို ထုတ်လုပ်လျက်ရှိသော Microlife ကုမ္ပဏီမှ Nebulizer စက်များကို ယခုအခါ မြန်မာနိုင်ငံတွင်လည်း ဝယ်ယူရရှိနိုင်ပြီ ဖြစ်ပါသည်။
Copy/Ctedit

20/12/2025

ဝိတ်ချချင်သူများအတွက် Intermittent Fasting နည်းလမ်း(၇)မျိုး 🍽️⏰
________

- by Dr.Zay Nyi Nyi (MediFlow)

Intermittent Fasting ဟာ ကျန်းမာရေးနဲ့ ဝိတ်ချဖို့အတွက် အတော်လေး ခေတ်စားနေပါတယ်။ လူတစ်ဦးနဲ့တစ်ဦး ကိုက်ညီမယ့် နည်းလမ်းက မတူညီနိုင်တာမို့ ကိုယ်နဲ့အဆင်ပြေတာကို ရွေးချယ်နိုင်ဖို့ လူကြိုက်များတဲ့ နည်းလမ်း (၇) ခုကို စုစည်းဖော်ပြပေးလိုက်ပါတယ် 👇

1️⃣ ခုမှစလုပ်မယ့် သူများအတွက် 12:12 နည်းလမ်း 🕒

ဒါကတော့ Intermittent Fasting ကို ခုမှ စမ်းလုပ်မယ့်သူတွေအတွက် အကောင်းဆုံးပါ။ တစ်နေ့တာရဲ့ ၁၂ နာရီကို အစာမစားဘဲ နေတာပါ။
• ဥပမာ - ည ၇ နာရီ နောက်ဆုံးစားပြီး နောက်နေ့ မနက် ၇ နာရီမှ ပြန်စားတာမျိုးပါ။

☑️ အားသာချက် - အိပ်ချိန်မှာ အဓိကထား Fastingလုပ်တာဖြစ်လို့ ဗိုက်ဆာတဲ့ဒဏ်ကို သိပ်မခံစားရဘဲ အကျင့်လုပ်ရ လွယ်ကူပါတယ်။
________

2️⃣ နာမည်အကြီးဆုံး 16:8 နည်းလမ်း 🕒

ဒါကတော့ အသုံးအများဆုံးနဲ့ ထိရောက်တဲ့နည်းလမ်းပါ။ တစ်နေ့တာရဲ့ ၁၆ နာရီကို အစာမစားဘဲနေပြီး ကျန်တဲ့ ၈ နာရီအတွင်းမှာပဲ အစာစားတာပါ။
• ဥပမာ - မနက် ၁၀ နာရီမှာ ပထမဆုံးအစာစားပြီး ညနေ ၆ နာရီမှာ နောက်ဆုံးအစာစားတာမျိုးပါ။

☑️ အားသာချက် - ညစာ စောစောစားတတ်သူတွေအတွက် အဆင်ပြေဆုံးပါပဲ။ အဆီကျနှုန်း သိသိသာသာ မြန်ဆန်စေပြီး နေ့စဉ်လုပ်ငန်းဆောင်တာတွေနဲ့လည်း ကိုက်ညီအောင် ညှိယူရလွယ်ပါတယ်။
________

3️⃣ 5:2 နည်းလမ်း (The Fast Diet) 🗓️

တစ်ပတ်မှာ ၅ ရက်ကို ပုံမှန်အတိုင်းစားပြီး ကျန်တဲ့ ၂ ရက်မှာတော့ ကယ်လိုရီကို အနည်းဆုံး (ဥပမာ- 500 to 600 kilocalories) ထိ လျှော့ချစားသောက်တာပါ။
• မှတ်ချက် - အစာလျှော့စားမယ့် ၂ ရက်ကို တစ်ဆက်တည်း မလုပ်ဘဲ ကြားထဲမှာ ခြားပြီး လုပ်ပေးရပါမယ်။

☑️ အားသာချက် - နေ့တိုင်း အစာဖြတ်စရာ မလိုတဲ့အတွက် လူမှုရေးကိစ္စတွေ၊ ပါတီပွဲတွေ ရှိသူတွေအတွက် အဆင်ပြေပါတယ်။
________

4️⃣တစ်ရက်ခြားFasting (Alternate-Day Fasting) 🔄

ဒီနည်းကတော့ တစ်ရက်ကို ပုံမှန်စားပြီး နောက်တစ်ရက်မှာတော့ အစာကို လုံးဝဖြတ်တာ (သို့) ကယ်လိုရီ အနည်းငယ် (၅၀၀ ခန့်) ပဲ စားတာပါ။

☑️ အားသာချက် - ဝိတ်အလွန်အကျွံ တက်နေသူတွေနဲ့ နှလုံးကျန်းမာရေးအတွက် အလွန်ထိရောက်ပေမယ့် ဗိုက်ဆာတတ်သူတွေအတွက်တော့ အနည်းငယ်ခက်ခဲနိုင်ပါတယ်။
________

5️⃣ OMAD (One Meal a Day) 🍱

ဒီနည်းလမ်းကတော့ 23:1 နည်းလမ်းလို့လည်း ခေါ်ပါတယ်။ ၂၃ နာရီ အစာဖြတ်ပြီး ၁ နာရီအတွင်းမှာပဲ အားလုံးကို အပြီးစားတာပါ။ များသောအားဖြင့် ညစာ (သို့) နေ့လယ်စာ တစ်နပ်ကိုပဲ ရွေးချယ်ပြီး ဝအောင် စားကြပါတယ်။

☑️ အားသာချက် - အချိန်ကုန်သက်သာစေပြီး အဆီလောင်ကျွမ်းမှုကို အမြင့်ဆုံးရောက်စေပါတယ်။ ဒါပေမယ့် တစ်နပ်တည်းမှာ လိုအပ်တဲ့ အာဟာရစုံအောင် စားဖို့တော့ လိုအပ်ပါတယ်။
________

6️⃣ Eat Stop Eat (၂၄ နာရီ အစာဖြတ်ခြင်း) 🚫

တစ်ပတ်မှာ တစ်ကြိမ် (သို့) နှစ်ကြိမ်လောက် ၂၄ နာရီ အစာ လုံးဝဖြတ်တာပါ။
• ဥပမာ - ဒီနေ့ ညစာ စားပြီးရင် နောက်နေ့ ညစာကျမှ ပြန်စားတာမျိုးပါ။ ဒီနည်းလမ်းကတော့ အနည်းငယ် ပြင်းထန်တာကြောင့် အတွေ့အကြုံရှိသူတွေပဲ စမ်းသင့်ပါတယ်။

☑️ အားသာချက် - တစ်ပတ်မှာ ကယ်လိုရီ စုစုပေါင်းကို အများကြီး လျှော့ချပေးနိုင်တဲ့အပြင် Insulin sensitivity ကိုလည်း ကောင်းမွန်စေပါတယ်။
________

7️⃣ Warrior Diet (စစ်သည်တော် နည်းလမ်း) ⚔️

ညဘက်မှာ တစ်နပ်ကြီးကြီးမားမား စားတဲ့ ရှေးခေတ် စစ်သည်တော်တွေရဲ့ ပုံစံကို ယူထားတာပါ။
နေ့ဘက် နာရီ၂၀မှာ အသီးအနှံ အနည်းငယ်နဲ့ ရေပဲ သောက်ပြီး ညဘက် ၄ နာရီအတွင်းမှာပဲ အာဟာရပြည့်ဝတဲ့ အစာတွေကို ဝအောင်စားတာပါ။
________

⚠️ သတိထားရမယ့်အချက်များ

1. Fasting Window မှာ ဘာသောက်လို့ရလဲ❓
ရေ၊ အချိုမပါတဲ့ ကော်ဖီခါး (Black Coffee)၊ Green Tea တို့ သောက်လို့ရပါတယ်။ သကြားနဲ့ နို့ဆီ လုံးဝ မထည့်ရပါဘူး။

2. Eating Window မှာ ဘာစားမလဲ❓
အစာစားတဲ့ windowမှာ တွေ့သမျှ အကုန်စားတာမျိုး မဟုတ်ဘဲ အသားဓာတ် (Protein)၊ ဟင်းသီးဟင်းရွက် (Fiber) တွေကို ဦးစားပေး စားရပါမယ်။

3. ဘယ်သူတွေ မလုပ်သင့်ဘူးလဲ❓
ကိုယ်ဝန်ဆောင်မိခင်များ၊ နို့တိုက်မိခင်များ၊ အသက် ၁၈ နှစ်မပြည့်သေးသူများ၊ ဆီးချိုဆေး သောက်နေရသူများနှင့် Eating Disorder (အစာစားခြင်းဆိုင်ရာ စိတ်ရောဂါ) ရှိသူများကတော့ ဆရာဝန်နဲ့ အရင်တိုင်ပင်ဖို့ အထူးလိုအပ်ပါတယ်။

ကျန်းမာပြီး လှပတဲ့ ခန္ဓာကိုယ်ကို ပိုင်ဆိုင်ဖို့အတွက် နည်းလမ်းမှန်ကန်ဖို့က အဓိကပါ။ မိမိနဲ့ အဆင်ပြေဆုံး ဖြစ်မယ့် နည်းလမ်းကို ရွေးချယ်ပြီး Intermittent Fasting ကိုစတင်နိုင်ကြပါစေလို့ ဆုတောင်းပေးလိုက်ပါတယ်ခင်ဗျာ။

ဒေါက်တာဇေညီညီ
MediFlow

#ဝိတ်ချနည်း #ကျန်းမာရေးဗဟုသုတ
Copy/Credit

19/12/2025

လူပြောများနေတဲ့ ပိန်ဆေး Mounjaro (Tirzepatide) ထိုးသင့် မထိုးသင့် ????

အခုတလော ပိန်ဆေး ထိုးကြတယ် ဆိုပြီး လူအများကြားမှာ ရေပန်းတော်တော်စားနေပါတယ်

တကယ် ပိန် လား????

- ပိန် ပါတယ်။ ဝိတ်တကယ်ကျပါတယ်။

ပိန်ဆေးဆိုပြီး ထိုးနေကြတဲ့ Mounjaro (Tirzepatide) အလုပ် လုပ်တဲ့ ပုံ က (glucose-dependent insulinotropic polypeptide) and GLP-1 (glucagon-like peptide-1) receptor agonist

နားလည် အလွယ်ဆုံး ပြောရရင်

- ဗိုက် ပြည့်တယ် ဆိုတဲ့ ခံစားချက် ရအောင် လုပ်ပေးထားပြီး အစာစားချင်စိတ် နည်းအောင်၊
- အစာအိမ်ကနေလဲ စားလိုက်တဲ့ အစာ ကို ဖြည်းဖြည်းချင်း အစာအိမ်က ပြန်ထွက်အောင် (slow gastric emptying) လုပ်ပေးထားတဲ့ ဆေးပါ။

ဆေးစထိုးရင်တော့ 2.5 mg ကို တပါတ်တကြိမ် (၄) ပါတ် ထိုးပြီး နောက်ပိုင်း 5 mg ကနေ 15 mg အထိ တိုးထိုးသွားတာမျိုးပါ။

ဘေးထွက်ဆိုးကျိုး လဲ ရှိပါတယ်
1. မူးမော်၊ အော့အန်
2. ရင်ပြည့်၊ ရင်ကယ် ဖြစ်တာ
3. မစားချင်လို့ အစာ မစားရာ ကနေ အစာအိမ်နာတာ၊ ယောင်တာတွေ ဖြစ်နိုင်ပါတယ်
4. ရေရှည် အစာစားချင်စိတ် နည်းသွားပြီး အာဟာရ ချို့တဲ့ တာမျိုး ဖြစ်နိုင်ပါတယ်။
5. ဝမ်းချုပ်ခြင်း

ဘေးထွက်ဆိုးကျိုးလဲ ရှိသလို ကောင်းကျိုးလဲ များပါတယ်။
1. ဝိတ်ကျစေခြင်း
2. ဆီးချို - HbA1c ကျစေနိုင်
3. သွေတိုးကျစေနိုင် (ဝိတ်ကျလာလို့)
4. သွေးတွင်းအဆီကျစေနိုင်
5. အသည်း အဆီဖုံးတာ သက်သာနိုင်

အရေးကြီးဆုံး အချက်က

Mounjaro ကို အသုံးမပြုမီ မိမိမှာ သိုင်းရွိုက် (Thyroid) ရောဂါ(အထူးသဖြင့် ကင်ဆာ) ရှိ၊ မရှိ သို့မဟုတ် ပန်ကရိယ (Pancreas) ရောဂါအခံ ရှိ၊ မရှိ ဆရာဝန်နဲ့ အရင်ဆုံး တိုင်ပင်ဆွေးနွေးဖို့ လိုအပ်ပါတယ်။ ထိုရောဂါတွေ ရှိရင် ဆေးထိုးဖို့ ကို ဆရာဝန် နဲ့ သေချာတိုင်ပင်ပါ။

ဓါတ်ခွဲခန်း မှာ ကြွက်တွေ ကို Mounjaro ဆေးထိုးကြည့်တဲ့ အခါ thyroid C cell tumor (သိုင်းရွိုက် ကင်ဆာ) ဖြစ်ကြတာ တွေ့ပေမယ့် လူတွေမှာ တော့ ဖြစ်တယ် ဆိုပြီး တွေ့ရှိချက် မရှိသေးပါဘူး။ ဒါကြောင့် မိမိ မျိုးရိုးထဲ မှာ Medullary Thyroid Carcinoma (MTC) လိုမျိုး သိုင်းရွိုက်ကင်ဆာ ဖြစ်ဖူးတာ ရှိရင်တော့ ဆေးမထိုးသင့်ပါ။

ဆရာဝန် နဲ့ သေချာ တိုင်ပင်ပြီး ထိုးနှံနိုင်ပါတယ်ခင်ဗျာ။

လေးစားစွာဖြင့်
ဒေါက်တာ ညီညီကျော်

🩼ဘန်ကောက်မှာ ဝိတ်ချချင်သူများ ဆရာဝန်နဲ့တိုင်ပင်ပြီး ဆေးထိုးလိုသူ ဧည့်သည်များ ဆက်သွယ်နိုင်ပါတယ်ခင်ဗျာ။☀️

ကျွမ်းကျင်ဆရာဝန် များ ကိုယ်တိုင် ပြန်လည် ဖြေကြားပေးသွားပါလိမ့်မယ် ခင်ဗျာ

📱Viber phone - 09950311916/ 09261104175
📱Thai phone - 0858482139, 0970051844
Copy/Credit

19/12/2025

ဆီးချိုရောဂါစဖြစ်ပြီဆိုလျှင်
- စိတ်ဓာတ်ကျဖို့မလိုသလို အရမ်းလည်းကြောက်ဖို့လည်းမလိုအပ်ပါဘူး
- ဒါပေမယ့် အရင်လို မဆင်မခြင် နေလို့တော့ မရပါဘူး

ဆီးချိုဖြစ်ရင် ဘာမှ မစားရတော့ပဲ နေရတာမဟုတ်ပါဘူး
- အပိုဆောင်း သကြား ၊ အချိုရည် ၊ ကိန်မုန့်အချို စတာတွေပဲ သေချာ ဆင်ခြင်ရတာပါ
- စားနေကြ ထမင်းက စားလို့ရပါတယ် (ပမာဏ လျှော့စားရတာပါ)
- အသားစားလို့ရပါတယ်
- အသီးအနှံလည်း စားလို့ရပါတယ်၊ ဟင်းသီးဟင်းရွက်များများစားရပါတယ်
- ရေ ပုံမှန်သောက်ဖို့ လိုအပ်ပါတယ် (ရေသောက်များလို့ ဆီးသွားများတာမဟုတ်ပဲ ဆီးချိုထိန်းနိုင်ရင် ဆီးပုံမှန် ပမာဏ သွားပါလိမ့်မယ်)
- အရက် ဆေးလိပ်ကတော့ ဖြတ်ရပါမယ်
- ထိုင်ချည်းနေတာ မလုပ်သင့်ပဲ ၊ လှုပ်လှုပ်ရှားရှားနေပါ - လမ်းလျှောက်ပါ

ကျန်းမာရေးဗဟုသုတ တိုးပြီး
သက်ရှည်ကျန်းမာ စိတ်ချမ်းသာကြပါစေ

Dr. ဘုန်းစည်သူလွင်
Copy/Credit

19/12/2025

အက်စပရင် (Aspirin) က ကင်ဆာပျံ့နှံ့မှုကို တားဆီးပေးနိုင်သလား? 💊🤔

ပုံမှန်အားဖြင့် အကိုက်အခဲပျောက်ဆေး၊ သွေးကျဲဆေးအဖြစ် လူသိများတဲ့ Aspirin ဟာ ကင်ဆာရောဂါ ကုသရေးမှာပါ အရေးပါလာနိုင်ကြောင်း Cambridge တက္ကသိုလ်ရဲ့ သုတေသနအသစ်က ဖော်ပြလိုက်ပါတယ်။

🔬 ဘယ်လို အလုပ်လုပ်သလဲ? ကျွန်ုပ်တို့ရဲ့ ခန္ဓာကိုယ်ထဲမှာ သွေးတိတ်အောင် ကူညီပေးတဲ့ သွေးဥမွှား (Platelets) တွေ ရှိပါတယ်။ ကင်ဆာဆဲလ်တွေ ပျံ့နှံ့ဖို့ ကြိုးစားတဲ့အခါ ဒီသွေးဥမွှားတွေက မသိလိုက်ဘဲ ကူညီမိသလို ဖြစ်သွားတတ်ပါတယ်။

သွေးဥမွှားတွေက ဓာတ်ပစ္စည်းတစ်ခု (Thromboxane A2) ကို ထုတ်ပြီး ကင်ဆာကို တိုက်ဖျက်မယ့် ကိုယ်ခံအားဆဲလ် (T Cells) တွေကို အိပ်ပျော်သွားအောင် လုပ်လိုက်ပါတယ်။

အဲဒီအခါ ကင်ဆာဆဲလ်တွေက လွတ်လွတ်လပ်လပ် ပျံ့နှံ့သွားပါတယ်။

Aspirin သောက်လိုက်တဲ့အခါ ဒီဖြစ်စဉ်ကို ဝင်တားလိုက်ပါတယ်။ T Cells တွေကို ပြန်နိုးကြားစေပြီး ကင်ဆာပျံ့နှံ့မှုကို တိုက်ဖျက်စေတာ ဖြစ်ပါတယ်။

🚨 သတိပြုရန်အချက် ဒါဟာ ဆေးပညာလောကရဲ့ အလွန်ကောင်းမွန်တဲ့ တွေ့ရှိချက်အသစ် ဖြစ်ပေမယ့် မိမိသဘောနဲ့မိမိ Aspirin သောက်တာမျိုး မလုပ်ပါနဲ့။ Aspirin မှာ အစာအိမ်သွေးယိုတာလိုမျိုး ဘေးထွက်ဆိုးကျိုးတွေ ရှိနိုင်တာမို့ ဆရာဝန်နဲ့ တိုင်ပင်ပြီးမှသာ အသုံးပြုသင့်ပါတယ်။


Copy/Credit

13/12/2025

ဒီစာက အစာအိမ်အချဉ်ပေါက်တတ်တဲ့ သူတွေအတွက် သီးသန့်ပါ။
သင့်ပတ်ဝန်းကျင်မှာ အစာအိမ်အချဉ်ပေါက်တဲ့သူရှိရင်လဲ share ပေးလို့ရပါတယ်။
အစာအိမ်အချဉ်ပေါက်တယ်ဆိုတာ လျစ်လျူရှုထားရမယ့် ပေါ့သေးသေးလက္ခဏာတစ်ခုတော့ မဟုတ်ပါဘူး။
သေချာကုသတာမျိုးမလုပ်ဘူးဆိုရင် အစာမျိုပြွန်ရဲ့ လမ်းကြောင်းကျဉ်းသွားတဲ့အထိ ဒုက္ခရောက်သွားနိုင်ပါတယ်။

အစာအိမ်အချဉ်ပေါက်တာကို ဆေးပညာအရ GERD လို့ခေါ်ပါတယ်။
GERD ဆိုတာ Gastro-Esophageal Reflux Disease ကို အတိုကောက်ခေါ်တာပါ။
နာမည်က ရှုပ်နေပေမယ့် ဖြစ်စဉ်ကတော့ ရိုးရှင်းပါတယ်။
ဒါက အစာအိမ်အက်စစ်တွေ အပေါ်ကို တက်လာပြီး သင့်အစာမျိုပြွန်ထဲဝင်လာတာကို ဆိုလိုတာပါ။

သင့်အစာအိမ်မှာ အက်စစ်ပါဝင်တယ်၊ ဘာလို့လဲဆိုတော့ အက်စစ်က အစာတွေကို ချေဖျက်ဖို့ ကူညီလို့ပါ။
ဒါပေမယ့် အဲဒီအက်စစ်တွေက အစာအိမ်ထဲမှာပဲ ရှိနေရပါတယ်။
အဲဒီအက်စစ်တွေ အပေါ်တက်လာတဲ့အခါ သင့်အစာပြွန်ရဲ့ အပေါ်ယံအလွှာကို ပူလောင်စေပါတယ်။
ဒါကြောင့် သင့်မှာ ရင်ဘတ်အောင့်တာ၊ ပူလောင်တာ၊ (သို့) လည်ချောင်းထဲ ချဉ်ရည်တွေဆန်တက်လာတာကို ခံစားရတာပါ။

လက္ခဏာတွေအကြောင်း ရှင်းရှင်းလင်းလင်း ပြောကြည့်ရအောင်။
အဖြစ်အများဆုံးကတော့ ရင်ဘတ်အလယ်တည့်တည့်မှာ ပူလောင်သလို ခံစားရတာပါ။
တချို့က အဆီတွေ၊ အပူအစပ်တွေစားပြီးရင် ရင်ပူကြတယ်။
တချို့က ခါးကုန်းလိုက်တဲ့အခါ ရင်ဘတ်ထဲမှာ လေးနေသလို ခံစားရတယ်။
တချို့က အိပ်ရာထတဲ့အခါ ပါးစပ်ထဲ ချဉ်တဲ့ အရသာခံစားရတယ်။
တချို့က အအေးမိတာမရှိပေမယ့် ချောင်းတွေ ဆက်တိုက်ဆိုးနေတတ်တယ်။
တချို့က မနက်ခင်းမှာ အသံတွေ ဩနေသလို ခံစားရတယ်။
တချို့က အစာတွေ လည်ချောင်းထဲမှာ ဆို့နေသလို ခံစားရတယ်။
တချို့ဆိုရင် နှလုံးရောဂါထသလိုပဲ ရင်ဘတ်ထဲမှာ စူးပြီးအောင့်တတ်ကြပါတယ်။

GERD ဘာလို့ ဖြစ်ရတာလဲ?
သင့်အစာအိမ်နဲ့ အစာမျိုပြွန်ကြားမှာ LES (lower esophageal sphincter) လို့ခေါ်တဲ့ တံခါးငယ်လေး ရှိပါတယ်။
အဲဒီတံခါးလေးက အစာအိမ်ထဲကို အစာဝင်ပြီးရင် တင်းတင်းကျပ်ကျပ် ပိတ်ထားရမယ့်
တာဝန်ယူပါတယ်။
ဒါပေမယ့် တစ််ခါတလေမှာ ဒီတံခါးက အားနည်းသွားတယ် (သို့) ပြေလျော့သွားတတ်ပါတယ်။
တံခါးက ကောင်းကောင်းမပိတ်တဲ့အခါ အက်စစ်တွေက အပေါ်ကို ဆန်တက်ပါတယ်။

တစ်ခါတည်းနဲ့ အစာအများကြီးစားလိုက်တာက အက်စစ်တွေကို အပေါ်တွန်းပို့လိုက်သလိုဖြစ်စေပါတယ်။
အလောတကြီးနဲ့ အရမ်းမြန်မြန်စားတာကလည်း အစာအိမ်ကို ကောင်းကောင်းအလုပ်လုပ်ဖို့ အချိန်မပေးပါဘူး။
အစာစားပြီးပြီးချင်း လှဲအိပ်တာက အဓိကအကြောင်းအရင်းပါ။
အပူအစပ်၊ အဆီများတာ၊ ချဉ်တဲ့အစာ၊ ကော်ဖီ၊ ချောကလက်၊ အအေးအချိုရည်တွေက ခုနကပြောခဲ့တဲ့ တံခါးလေးကို ပိုပြေလျော့စေပါတယ်။
စိတ်ဖိစီးမှုကလည်း အစာအိမ်ထဲမှာ အက်စစ်ထုတ်လုပ်မှုကို တိုးစေပြီး အရာအားလုံးကို ပိုဆိုးစေပါတယ်။
ဆေးလိပ်သောက်တာက အစာအိမ်တံခါးကို အားနည်းစေပါတယ်။
ခန္ဓာကိုယ်အလေးချိန်များတာကတော့ ဝမ်းဗိုက်အတွင်းမှာ ဖိအားကို တိုးစေပါတယ်။
ကိုယ်ဝန်ဆောင်ချိန်မှာလည်း ဟော်မုန်းတွေနဲ့ ဖိအားတွေကြောင့် အက်စစ်တွေ အလွယ်တကူ ဆန်တက်သွားတတ်ပါတယ်။

ဒါဆို ဘယ်လိုသက်သာအောင်လုပ်မလဲ?
တကယ်အလုပ်ဖြစ်တဲ့ ဖြေရှင်းနည်းတွေအကြောင်း ပြောကြည့်ရအောင်။

အစာကို တစ်နေကုန် နည်းနည်းချင်းစီ၊ ခဏခဏစားပါ။
ဖြေးဖြေးစားပါ၊ သေချာဝါးပါ — သင့်အစာအိမ်ရဲ့ တာဝန်ကို လျော့ချပါ။
အစာစားပြီး အနည်းဆုံး ၂-၃ နာရီကြာအောင် မလှဲပါနဲ့၊ မအိပ်ပါနဲ့၊ မမှောက်ပါနဲ့။
ညဘက် အစားကြီးစားတာကို ရှောင်ပါ — ဒါက ညဘက်ရင်ပူခြင်းရဲ့ နံပါတ်တစ် အကြောင်းရင်းပါ။
အစာစားပြီးရင် ရေနွေးနွေးလေး သောက်ပြီး အစာအိမ်ကို ကူညီပေးပါ။
ဒီအစားအစာတွေကို ရက်သတ္တပတ်အနည်းငယ်လောက် ရှောင်ပါ - အပူအစပ်၊ အချဉ်၊ အဆီများတာ၊ အအေးအချိုရည်၊ ကော်ဖီ၊ ပူစီနံ။
အသက်ပြင်းပြင်းရှူသွင်းခြင်း (သို့) အနည်းငယ်လမ်းလျှောက်ခြင်းဖြင့် စိတ်ဖိစီးမှုကို လျှော့ချဖို့ ကြိုးစားပါ။
ဗိုက်ကို ညှစ်ထားတဲ့ တင်းကြပ်တဲ့ အဝတ်အစားတွေ ရှောင်ပါ။
ရင်ပူပြီးအိပ်ရာနိုးလာရင် ခန္ဓာကိုယ်အပေါ်ပိုင်းကို နည်းနည်းမြှင့်ပြီး အိပ်ပါ။
တတ်နိုင်ရင် ဗိုက်အဆီနည်းအောင် လုပ်ပါ။

GERD က ခဏခဏဖြစ်လာရင် — တစ်ပတ်ကို နှစ်ကြိမ်ထက် ပိုဖြစ်လာရင် — ဆရာဝန်နဲ့ တိုင်ပင်သင့်ပါတယ်။
Antacids, Omeprazole, Ranitidineလိုဆေးတွေက အကူညီပေးနိုင်ပေမယ့် တစ်သက်လုံးတော့ မသုံးသင့်ပါဘူး။
ရေရှည်မှာတော့ နေထိုင်မှုပုံစံ အလေ့အထတွေက ဆေးတွေထက် ပိုစွမ်းပါတယ်။

ဒါလေးကို မှတ်ထားပါ -
GERD ကို လျစ်လျူရှုရုံနဲ့ မသက်သာပါဘူး။
ဘာကြောင့်ဖြစ်စေတယ်ဆိုတာ အဖြေရှာရပါမယ်။
လိုအပ်ရင် နေထိုင်စားသောက်တဲ့ ပုံစံတွေကို ပြောင်းလဲရပါမယ်။
သင့်ပတ်ဝန်းကျင်မှာ အစာအိမ်အချဉ်ပေါက်တဲ့သူရှိရင်လဲ ဒီ post လေးကို share ပေးလို့ရပါတယ်။
pageမှစာများကို ပြန်share လို့ရပါတယ်။
Copyကူးပြီးပြန်တင်ခွင့်တော့ မည်သူ့ကိုမှ မပေးပါ‼️
Copy/Credit