Dr Kyal Sin - Mom & Nutritionist

23/04/2026

ကလေး ၆ လ အထက် ဖြည့်စွက်စာ အလွယ်ဆုံးချက်နည်း 🙂

ကိုယ်တိုင်အမြန်ဆုံးဖြစ်အောင် ချက်တဲ့ နည်းလမ်းလေးတွေ မျှဝေလိုက်ပါတယ်။

မနက်စာ- ဆရာမ သားကတော့ မနက်စာကို Rice cereal/ Oat Cereal ကို နို့မှုန့်နဲ့ ရောပြီး စားပါတယ်။

အဆာပြေ- နေ့လယ်ကို အသီး/မြေပဲထောပတ်/rice cracker လေးတွေ ကျွေးပါတယ်။

ညနေစာ - homemade ဆန်ပြုတ်လေး ကျွေးပါတယ်။ မချက်နိုင်တဲ့ နေ့တွေမှာ Ready Made ဆန်ပြုတ်လေးတွေ ကျွေးဖြစ်ပါတယ်။

ကလေးက ချေးမများဘဲ အစားစုံ စားတတ်ဖို့ အရေးကြီးပါတယ်။

ကလေးဆန်ပြုတ်ချက်ရင်

-ဆန်
-အသား တစ်မျိုး
- အရွက် ၁ မျိုး
- ဆီ
- ပဲ (တစ်ပတ် ၃ ရက်လောက် ထည့်ကျွေးလို့ရပါတယ်) ပါရင် လုံလောက်ပါတယ်။

ဆန်ပြုတ်ထဲကို အရွက်တွေ အများကြီး ထည့်ရင်လည်း အမျှင်ဓာတ် များလွန်းပြီး အစာမကြေတာ/လေထိုးတာ/အန်တာ ဖြစ်တတ်လို့ပါ။

ပါဝင်ပစ္စည်းတွေ ကျက်အောင်ပြုတ်- blender နဲ့ကျိတ် ပြီး လိုအပ်သလို ဘူးလေးတွေနဲ့ ခွဲသိမ်းပါ။

ခုမှ စကျွေးမယ့် မေမေတို့လည်း လုပ်ရလွယ်တာလေးတွေ စချက်ကြည့်ဖို့ တိုက်တွန်းပါတယ်နော်။ အရမ်း stress မထားပါနဲ့။ ကလေးမစားလည်း စိတ်မကောင်းမဖြစ်ဖို့ မှာချင်ပါတယ်။

အစာ ကျွေးချိန်ကိုလည်း ၃၀ မိနစ် ထက် မကြာတာ ပိုကောင်းပါတယ်။

နေ့စဉ် အချိန်မှန်လေး ကျွေးပေးဖို့က အဓိက ကျပါတယ်။ ကလေး ကုန်သလောက်ပဲ စားပါစေ။ စားတဲ့ အချိန် ပျော်နေဖို့ အရေးအကြီးဆုံးပါ။

မေမေများနဲ့ ကလေးများအားလုံး ကျန်းမာပါစေ။

မေတ္တာဖြင့်

Dr ကြယ်စင်

18/04/2026

ဘယ်အချိန်မှာ သောက်တာ အထိရောက်ဆုံးလဲ? ✨✨

ကျမ ကလေးမွေးပြီးနောက်ပိုင်း သောက်ဖြစ်တဲ့ supplements ထဲမှာ collagen ပါ ပါတယ်။ မေမေ တွေ ကလေးမွေးပြီး နောက် recovery ပြန်လုပ်ရတဲ့ ကာလမှာ အရိုးအဆစ်တွေ သန်မာဖို့၊ အသားအရည် ထိန်းသိမ်းဖို့ လိုအပ်တဲ့ အာဟာရဓာတ်တွေထဲမှာ collagen ကလည်း အရေးကြီးတဲ့ ဓာတ် တစ်ခုပါ။

⏰Collagen ကို ဘယ်အချိန်မှာ သောက်သင့်သလဲ?

တကယ်တော့ Collagen သောက်ဖို့အတွက် "အတိအကျ" သတ်မှတ်ထားတဲ့ အချိန်မရှိပါဘူး။ ဒါပေမဲ့ ကိုယ့်ရဲ့ ရည်ရွယ်ချက်ပေါ်မူတည်ပြီး အောက်ပါအတိုင်း ရွေးချယ်သောက်သုံးနိုင်ပါတယ်။

• မနက်စောစော (ဗိုက်ထဲမှာ ဘာမှမရှိခင်):
လူတော်တော်များများက ဗိုက်ထဲမှာ ဘာမှမရှိတဲ့အချိန်မှာ သောက်ရင် အစာအိမ်က ပိုပြီး စုပ်ယူမှုကောင်းတယ်လို့ ယုံကြည်ကြပါတယ်။

• ညအိပ်ခါနီး:
ညဘက်မှာ ခန္ဓာကိုယ်က ပြန်လည်ပြုပြင်ခြင်း (Repairing process) လုပ်ဆောင်တဲ့အတွက် ညအိပ်ခါနီး သောက်တာက အသားအရေအတွက် ပိုထိရောက်တယ်လို့လည်း ဆိုကြပါတယ်။

• လေ့ကျင့်ခန်း လုပ်ပြီးချိန်:
အရိုးအဆစ်နဲ့ ကြွက်သားတွေအတွက် ရည်ရွယ်တယ်ဆိုရင်တော့ Gym ဆော့ပြီး သို့မဟုတ် လေ့ကျင့်ခန်းလုပ်ပြီးချိန်မှာ သောက်ပေးနိုင်ပါတယ်။

✅ အကြံပြုချက်: အရေးကြီးဆုံးက အချိန်ထက် "နေ့တိုင်း ပုံမှန်သောက်ဖို့" ဖြစ်ပါတယ်။ မိမိ အဆင်ပြေဆုံးအချိန်ကို ရွေးပြီး နေ့စဉ် သောက်ပေးပါ။

✨ Collagen သောက်ခြင်းရဲ့ အကျိုးကျေးဇူးများ ✨

Collagen ဟာ ခန္ဓာကိုယ်မှာ အပေါများဆုံး ပရိုတင်းတစ်မျိုးဖြစ်ပြီး အောက်ပါ အကျိုးကျေးဇူးတွေကို ရရှိစေနိုင်ပါတယ်။

အသားအရေ: အရေပြား တင်းရင်းမှုကို မြှင့်တင်ပေးခြင်း၊ အရေးအကြောင်းများကို လျော့ပါးစေခြင်းနှင့် သဘာဝအတိုင်း ဝင်းပစိုပြေစေခြင်း။

• အရိုးအဆစ်: အဆစ်အမြစ် နာကျင်မှုကို လျော့နည်းစေပြီး အရိုးနုများကို ကာကွယ်ပေးခြင်း။

• ဆံပင်နှင့် ခြေသည်းလက်သည်း: သန်မာစေပြီး ကျိုးလွယ်၊ ပဲ့လွယ်ခြင်းမှ ကာကွယ်ပေးခြင်း။

• ကြွက်သား: ကျစ်လျစ်သော ကြွက်သားထု တည်ဆောက်ရာတွင် အထောက်အကူပြုခြင်း။

✅သိထားသင့်တဲ့ အချက်များ

1. Vitamin C နှင့် တွဲသောက်ပါ: Collagen စုပ်ယူမှု ပိုကောင်းစေဖို့ Vitamin C ကြွယ်ဝတဲ့ အစားအစာတွေ (သို့မဟုတ်) အားဆေးနဲ့ တွဲသောက်တာ အကောင်းဆုံးပါ။

2. ရေများများသောက်ပါ: Collagen သောက်နေစဉ်အတွင်း ရေဓာတ်ပြည့်ဝနေဖို့ လိုအပ်ပါတယ်။

3. သဘာဝ အစားအစာ: ငါး၊ ကြက်ဥ၊ ပဲအမျိုးမျိုးနဲ့ အရိုးပြုတ်ရည်တွေမှာလည်း သဘာဝ Collagen တွေ ကြွယ်ဝစွာ ပါဝင်ပါတယ်။

ကျမ လက်ရှိသောက်နေတာကတော့ Pro360 ရဲ့ Marine Collagen လေးပါ။ collagen type 1, Vitamin C နဲ့ Hyaluronic Acid တို့ ပါဝင်ပါတယ်။ ပင်လယ်ငါး ကနေ ရယူထားတဲ့ collagen ဖြစ်တာကြောင့် ပင်လယ်ငါး ဓာတ်မတည့်သူများနဲ့ မတည့်ပါ။ ကျမကတော့ ခြေလေးချောင်းသား မစားသူမို့ bovine collagen (နွားက ရယူတဲ့ collagen) ကို မသောက်ချင်တဲ့ အထဲပါတာကြောင့် ကျမ အတွက်ကတော့ marine collagen က အဆင်ပြေပါတယ်။

မီးဖွားပြီး မေမေများလည်း အရင်ကထက် ပိုကျန်းမာပြီး ကျစ်လစ်လှပစေဖို့ အတွက် အစားအသောက်၊ လေ့ကျင့်ခန်း၊ supplements လိုတာလေးတွေ ဖြည့်စွက်ပါလို့ အကြံပြုချင်ပါတယ်။ မိမိကိုယ်ကို ဂရုစိုက်ဖို့ မေ့နေတတ်ကြလို့ပါ။ မိမိကိုယ်ကို ကျန်းမာအောင် နေထိုင်ခြင်းက မိသားစု အတွက် အများကြီး အကျိုးရှိစေပါတယ်။

မေမေများအားလုံး ကျန်းမာလှပ ကြပါစေရှင်။

မေတ္တာဖြင့်

Dr ကြယ်စင်ယုမွန်

17/04/2026

အေးချမ်းပျော်ရွှင်သော မြန်မာနှစ်သစ်ကူး ဖြစ်ပါစေ

13/04/2026

💦ပျော်ရွှင်စရာ သင်္ကြန်ဖြစ်ပါစေရှင် 💦

11/04/2026

☀️ နွေရာသီလမ်းညွှန်- ကိုယ်ဝန်ဆောင်နှင့် နို့တိုက်မိခင်များအတွက် အကြံပြုချက်များ☀️

#အပူချိန်များလွန်းတဲ့ ကာလမှ ကိုယ်ဝန်ဆောင်နဲ့ နို့တိုက် မေမေတွေ အထူးသတိထားဖို့ လိုအပ်ပါတယ်။ ကိုယ်ဝန်ဆောင်တွေဟာ အပူဒဏ်ကို ပိုပြီး ခံရတတ်ပါတယ်။ သာမာန်လူတွေထက် ရေဓာတ်ခမ်းခြောက် လွယ်ပြီးတော့ အပူလျှပ်တာ ဖြစ်တတ်တာကြောင့် သတိထားစရာလေးတွေကို မျှဝေလိုက်ပါတယ်။

🤰 ကိုယ်ဝန်ဆောင် မေမေများ

#ရေဓာတ်ခမ်းခြောက်လွယ်ပြီး၊ ရေဓာတ်ပြည့်ဝအောင် ပြန်မဖြည့်နိုင်ရင် ကျောက်ကပ်ကို ထိခိုက်စေတတ်ပါတယ်။ အပူကြီးတာ၊ အပူလျှပ်တာ တွေ ဖြစ်တတ်ပြီး ကလေးကိုပါ အန္တာရာယ်ရှိစေတတ်ပါတယ်။

အထူးသဖြင့် နေပူထဲ အလုပ်လုပ်ရသူများ၊ အပူချိန်မြင့်မားတဲ့ စက်ရုံအလုပ်ရုံမှာ လုပ်ရသူများ၊ စားသောက်ဆိုင်အကြီးတွေမှာ မီးဖိုနား တောက်လျှောက်ချက်ပြုတ်ရသူများစတဲ့ လုပ်ငန်းတွေမှာ လုပ်နေရတဲ့ ကိုယ်ဝန်ဆောင် မေမေများ သတိထားသင့်ပါတယ်။

တတ်နိုင်သလောက် နေ့ခင်း နေပူတဲ့ အချိန် အပြင်ထွက်တာကို ရှောင်ကျဉ်သင့်ပါတယ်။ အလုပ်လုပ်နေရပါက ရေကို မပြတ် သောက်ပါ။ ရေများများ/ဓာတ်ဆား/အုန်းရည်/အသီးဖျော်ရည် စတာတွေကို လုံလောက်စွာ သောက်သုံးဖို့ လိုပါတယ်။ ပူအိုက်ပြီး လေဝင်လေထွက် မရှိတဲ့ အဆောက်အဦးမျိုးကို ရှောင်ပါ။ မတတ်သာလို့ အလုပ်လုပ်ရပါကလည်း အလုပ်ရှင် ကို ပြောပြပါ။ အနားယူပါ။ ရေသောက်ပါ။ ပေါ့ပါးတဲ့ အဝတ်အစား ဝတ်ဆင်ပါ။ ချည်သား အေးအေး အရောင်ဖျော့ဖျော့ လေးတွေ ဝတ်သင့်ပါတယ်။

🤱 နို့တိုက်မိခင်များ

နို့တိုက်နေဆဲ မေမေများလည်း သတိထားစရာလေးတွေ ရှိပါတယ်။ သဘာဝ အရ ကောင်းတဲ့ အချက်ကတော့ ပူပြင်းလွန်းတဲ့ ကာလမှာ မိခင်နို့ရည်ဟာ ရေဓာတ်များများ ပါဝင်ပြီးတော့ ကလေးကို ရေဓာတ်ပြည့်စေပါတယ်။ ရေဓာတ် ခမ်းခြောက်မှုမှ ကာကွယ်ပေးနိုင်တာကို တွေ့ရပါတယ်။ မွေးစမှ အသက် ၆ လ အထိ ကလေးတွေကိုတော့ အမေနို့ကိုပဲ ခဏ ခဏ တိုက်ပါ။ ကလေး ဆီး ကောင်းကောင်း သွားပြီး လန်းလန်းဆန်းဆန်းရှိနေတယ်ဆို ရင် နို့ လုံလောက်ပါတယ်။

မေမေ အနေနဲ့ကတော့ နို့ရည်ထုတ်လုပ်ရတဲ့ ကာလ ဖြစ်တာကြောင့် ကိုယ်တိုင် အာဟာရပြည့်ဝဖို့နဲ့ ရေဓာတ် ပြည့်ဝဖို့ လိုအပ်ပါတယ်။ ရေကို ၃ လီတာ သောက်ပါ။ အသီးဖျော်ရည်/အုန်းရည်/ဓာတ်ဆားရည် လိုအပ်ရင် သောက်ပါ။ အစား အချိန်မှန်စားပါ။ အသား/ငါး တစ်ရက် ၂ ကြိမ် နဲ့ ဟင်းသီးဟင်းရွက်နဲ့ အသီးအနှံများများ စားပါ။ အရည်ရွှမ်းတဲ့ အသီးအနှံ များ စားသုံးပါ။ အဝတ်အစားကို ပေါ့ပေါ့ပါးပါး ဝတ်ဆင်ပါ။ လေဝင် လေထွက်ကောင်းတဲ့ နေရာမှာ ကလေးကို နို့တိုက်ပါ။

⚠️⚠️⚠️ ကိုယ်ဝန်ဆောင် မေမေတွေရော နို့တိုက်မေမေ တွေပါ ဂရုစိုက်ရမှာကတော့ အစာအဆိပ်သင့်ခြင်း ဖြစ်ပါတယ်။ အစာအဆိပ်သင့်မှုမှ ကာကွယ်ရန် လက်သုပ်များ၊ အချဉ်များ ရှောင်သင့်ပါတယ်။ ခဏခဏ ပြန်နွှေးထားတဲ့ အစားအစာများမှာလည်း ပိုးမွှားပေါက်ဖွားလွယ်ပါတယ်။ အသီးတွေကို စားသုံးခါနီးမှ ခွဲပါ။ အစားအစာကို ပူပူနွေးနွေးချက်ပြုတ် စားသုံးသင့်ပါတယ်။ အစားအသောက် ချက်ပြုတ်သူအနေနဲ့ လက်ကို ဆပ်ပြာနဲ့ သေချာ ဆေးဖို့ လိုအပ်ပါတယ်။

နောက်ဆုံး အနေနဲ့ မဖြစ်မနေ နေပူထဲ ထွက်ရမည် ဆိုပါက ထီး/ဦးထုပ်/မျက်မှန် ဝတ်ဆင်ပါ။ နေရိပ်ထဲ တတ်နိုင်သမျှ နေထိုင်ပါ။ နေ့ခင်း နေပြင်းလွန်းသော အချိန်များတွင် အရိပ်ထဲတွင်သာ နေသင့်ပါတယ်။ ကလေးကို ပူလွန်းတဲ့ အချိန် အပြင် မခေါ်သွားတာ အကောင်းဆုံး ဖြစ်ပါတယ်။

မေမေတွေရော ကလေးတွေပါ ဘေးကင်းကျန်းမာ ကြပါစေ။

မေတ္တာဖြင့်

Dr ကြယ်စင်

04/04/2026

#ဖြည့်စွက်စာ စတင်ခြင်း အဆင့် (၁) ၆လ - ၈ လ
(Stage 1 Complementary Feeding - 6-8 months)

ကလေးငယ် အသက် ၆ လမှ ၈ လအတွင်း ဖြည့်စွက်စာ စတင်ကျွေးမွေးခြင်း (Stage 1 Complementary Feeding) အတွက် ရိုးရှင်းသော လမ်းညွှန်ချက်

၁။ စတင်ကျွေးမွေးရမည့်အချိန်နှင့် ပမာဏ

* စတင်ရမည့်အရွယ်: ကလေးအသက် ၆ လပြည့်လျှင် စတင်ပါ။
* အကြိမ်ရေ: တစ်နေ့လျှင် ၂ ကြိမ်မှ ၃ ကြိမ် ကျွေးပါ။ (မိခင်နို့ကိုလည်း ဆက်လက်တိုက်ကျွေးပါ)။
* ပမာဏ: တစ်ခါကျွေးလျှင် ထမင်းစားဇွန်း ၂ ဇွန်းမှ ၃ ဇွန်းခန့်ဖြင့် စတင်ပြီး ကလေးဗိုက်ဆာမှုအပေါ်မူတည်၍ ခွက်တစ်ခွက်၏ တစ်ဝက် (125 ml) အထိ တဖြည်းဖြည်း တိုးကျွေးသွားပါ။

၂။ အစားအစာ၏ အပျော့အမာ (Consistency)

* ကလေးတွင် သွားမပေါက်သေးသည့်အတွက် အစာကို ညက်ညက်ကြေအောင် ထောင်းထားသော သို့မဟုတ် ချေထားသော အစာပျော့ (Puree/Mashed food) ဖြစ်ရပါမည်။
* ဇွန်းဖြင့် ခပ်လိုက်လျှင် အောက်သို့ လွယ်လွယ်နှင့် စီးမကျသော ပျစ်ပျစ်အိအိ အနေအထား ဖြစ်သင့်သည်။

၃။ ကျွေးသင့်သော အစားအစာများ

ကလေး ကြီးထွားဖွံ့ဖြိုးရန်အတွက် အုပ်စုစုံအောင် ကျွေးရပါမည်။
* အဓိကအစာ: ဆန်ပြုတ် ပျော့ပျော့ကို ကြက်သား/ငါး၊တို့နှင့် ရောချက်၍ ကျိတ်ချေကျွေးပါ။
* ဗီတာမင်: ဟင်းနုနွယ်၊ ကန်စွန်းဥ၊ မုန်လာဥနီ၊ ဘူးသီး တို့ကို ဆန်ပြုတ်ထဲရောထည့်ပြုတ်ပြီး ကျွေးပါ။
* အသီးအနှံ: ငှက်ပျောသီး၊ သင်္ဘောသီးမှည့်၊ ထောပတ်သီးတို့ကို အနှစ်ပြုလုပ်၍ ကျွေးပါ။

၄။ အရေးကြီးသော အချက်များ

* သံဓာတ်: ၆ လကျော်လျှင် ကလေးအတွက် သံဓာတ် ပိုမိုလိုအပ်သောကြောင့် အသည်း၊ အသား နှင့် ကြက်ဥအနှစ်တို့ကို ပါဝင်အောင် ကျွေးပါ။
* အရသာ: အသက် ၁ နှစ်မပြည့်မချင်း အစာထဲတွင် ဆား နှင့် သကြား လုံးဝ (လုံးဝ) မထည့်ရပါ။
* သန့်ရှင်းရေး: အစာမကျွေးမီနှင့် ပြင်ဆင်မီတွင် လက်ကို စင်ကြယ်စွာ ဆေးကြောပါ။
* ဖြည်းဖြည်းချင်းစပါ: အစားအစာအသစ် တစ်မျိုးကို စကျွေးလျှင် ဓာတ်မတည့်မှု (Allergy) ရှိမရှိ သိနိုင်ရန် ၂ ရက် ၃ ရက်ခန့် စောင့်ကြည့်ပါ။

၅။ နမူနာ အစားအစာဇယား (ဥပမာ)

နံနက်စောစော - မိခင်နို့
နံနက်စာ - ဆန်ပြုတ် + ကြက်သား + မုန်လာဥနီ (အကုန်ချေထားရန်)
နေ့လယ်စာ - မိခင်နို့
အဆာပြေ- ငှက်ပျောသီးမှည့် (သို့) ကန်စွန်းဥပြုတ်ချေ
ညဘက် - မိခင်နို့

ကလေးစားနိုင်ရင် ညနေဘက်ကို ဆန်ပြုတ် တစ်ကြိမ် ထပ်တိုးပြီး ကျွေးနိုင်ပါတယ်။

ကလေးက အစာကို ငြင်းဆန်လျှင် အတင်းအဓမ္မ မကျွေးပါနှင့်။ စိတ်ရှည်ရှည်ဖြင့် နောက်တစ်ကြိမ် မှ ပြန်လည် ကြိုးစားကြည့်ပေးပါ။ အစာကျွေးချိန် မိနစ် ၃၀ ထက် ပိုမကြာသင့်ပါ။

😁ဆရာမ သား မောင်နေသန်ရဲ့ စားပုံ 😁

(သူကတော့ နည်းနည်းပိုစားနိုင်ပါတယ်၊ ၆ လ မှာ ဒီလောက် မစားကုန်သေးလည်း ရပါတယ်)

မနက် ၉ နာရီ ဝန်းကျင်- Rice cereal သို့ Oat cereal (နို့မှုန့် ၁ အောင်စရောပြီးကျွေးပါတယ်) - ၆၀ စီစီ ကုန်ပါတယ်

နေ့လယ် ၁၂-၁ နာရီ - ငှက်ပျောသီး/ဖရဲသီး/သင်္ဘောသီး နည်းနည်းစားပါတယ်။ ဆန်မုန့်လုံး ၁၀ လုံးလောက်နဲ့ မြေပဲထောပတ် နည်းနည်း စားပါတယ်။

ညနေ ၄ နာရီ - ဆန်ပြုတ် ၆၀ စီစီ

ကြားထဲမှာ နို့ဘူး ၂ ကြိမ်လောက် သောက်ပါတယ်။ အမေနို့လည်း သောက်ပါတယ်။

04/04/2026

Health Point Clinic ရဲ့ လူနာတစ်ဦးချင်းစီအတွက် ပိုမိုပြည့်စုံပြီး စနစ်ကျတဲ့ ကျန်းမာရေးစောင့်ရှောက်မှုတွေ ပေးနိုင်ဖို့အတွက်... အာဟာရဆိုင်ရာ အထူးပြု ဆရာဝန် ( Clinical Nutritionist) ဖြစ်တဲ့ ဒေါက်တာကြယ်စင်ယုမွန် -Dr. Kyal Sin Yu Mon မှ ကျွန်မတို့ရဲ့ Health Point Clinic မှာ စတင်ပူးပေါင်းပါဝင် ကုသပေးတော့မှာဖြစ်ကြောင်း ဝမ်းမြောက်စွာ အသိပေးအပ်ပါတယ်ရှင်။
🎓 Dr. Kyal Sin Yu Mon
- MBBS
- MSc Nutrition & Dietetics ( Bedfordshire UK)
- PG course in Advanced Dietetics ( Harvard )

Dr. Kyal Sin ဟာ ကျန်းမာရေးနဲ့ အာဟာရဆိုင်ရာ ဗဟုသုတတွေကို (Dr Kyal Sin - Mom & Nutritionist) Page ကနေတစ်ဆင့် အစဉ်တစိုက် မျှဝေပေးနေသလို၊ ဆေးပညာရပ်ဆိုင်ရာ research and publication တွေမှာ တက်ကြွစွာ ပါဝင်သူ တစ်ယောက် ဖြစ်တာမို့ လူနာတွေရဲ့ ကျန်းမာရေးအခြေအနေအရ အသင့်တော်ဆုံး အာဟာရစီမံချက်တွေကို ကျွမ်းကျင်စွာ အကြံပြုပေးနိုင်မှာပါ။

Dr. Kyal Sin မှ
✅ Weight Management(Diet Program)
ကျန်းမာရေးနဲ့ညီညွတ်စွာ ဝိတ်ချခြင်း သို့မဟုတ် ဝိတ်တင်ခြင်းဆိုင်ရာ အာဟာရစီမံချက်များ။

✅ Pediatric Nutrition
ကလေးငယ်များ၏ အရွယ်အလိုက် ကြီးထွားဖွံ့ဖြိုးမှုအတွက် လိုအပ်သော အာဟာရနှင့် စားသောက်မှုပုံစံ အကြံပေးခြင်း။

✅ Dietary Counseling for Chronic Illness
ဆီးချို၊ သွေးတိုး၊ နှလုံး၊ ကျောက်ကပ် နှင့် တခြားရောဂါအခံရှိသူများအတွက် ရောဂါထိန်းချုပ်နိုင်မည့် စားသောက်မှုလမ်းညွှန်ချက်များ။

✅ Pregnant & Postpartum Nutrition
ကိုယ်ဝန်ဆောင်မိခင်များနှင့် နို့တိုက်မိခင်များအတွက် လိုအပ်သော အာဟာရနှင့် ဂရုစိုက်မှုများ။

✅ General Wellness & Nutrition Guidelines
လူတိုင်းအတွက် ရောဂါကင်းဝေးပြီး ကျန်းမာပျော်ရွှင်သော လူနေမှုဘဝအတွက် အာဟာရလမ်းညွှန်ချက်များ ကိုတိုင်ပင်ဆွေးနွေးပေးမှာဘဲဖြစ်ပါတယ်။

ကျန်းမာရေးအသိပညာပြည့်ဝပြီး ယုံကြည်စိတ်ချရတဲ့ ဆရာဝန်ကြီးများနဲ့ တိုင်ပင်ဆွေးနွေးနိုင်ဖို့Health Point Clinic မှာ Appointment ရယူလိုက်ပါ။

📞 Appointment ရယူရန်- 09 880 875 220 ~ 21
📍Building No (B2),Lan Thit Residence,Between Bhone Gyi & Lan Thit Road,Lanmadaw Township,Yangon

29/03/2026

“ကလေးကျန်းမာရေး- ဝမ်းချုပ်ခြင်းကို သက်သာစေမည့် နည်းလမ်းများ” 👶👧🧒👦

ကလေးများ ဝမ်းချုပ်ခြင်းကို သက်သာစေရန် ရေဓာတ်၊ အမျှင်ဓာတ်၊ အလေ့အကျင့် နှင့် ထိုင်ပုံထိုင်နည်း ဆိုသည့် အချက် (၄) ချက်ကို အဓိက အာရုံစိုက်ရပါမည်။

အောက်ပါအချက်များသည် ကလေးများ ဝမ်းချုပ်ခြင်းကို သက်သာစေရန်အတွက် အထောက်အကူပြုနိုင်သော အလေ့အကျင့်ကောင်းများဖြစ်သည်-

✅ ၁။ ရေဓာတ်ဖြည့်တင်းခြင်းနှင့် အမျှင်ဓာတ်ကြွယ်ဝသော အစားအစာများ

* ရေဓာတ်နှင့် အမျှင်ဓာတ်သည် ဝမ်းသွားခြင်းကို ပုံမှန်ဖြစ်စေရန် အရေးကြီးပါသည်။ ကလေးများကို ရေနှင့် အမျှင်ဓာတ်များသော အသီးအနှံနှင့် ဟင်းသီးဟင်းရွက်များ ပိုမိုကျွေးမွေးသင့်ပါသည်။
* ပေါင်မုန့်ဖြူနှင့် ဆန်ဖြူအစား အညိုရောင်ပေါင်မုန့်၊ အုတ်ဂျုံ (Oatmeal) သို့မဟုတ် ကွေကာများကို ပြောင်းလဲကျွေးပါ။
* နို့နှင့် ဒိန်ခဲ အလွန်အကျွံစားခြင်းသည် ကလေးငယ်များ ဝမ်းချုပ်စေသည့် အဓိကအကြောင်းရင်း ဖြစ်တတ်သဖြင့် လျှော့ကျွေးသင့်ပါသည်။

✅ ၂။ နေ့စဉ်အလေ့အကျင့်ကောင်းများ လုပ်ဆောင်ပေးခြင်း

* အစာစားပြီး မိနစ် ၂၀-၃၀ ခန့်အကြာတွင် ကလေးကို အိမ်သာတွင် အချိန်တစ်ခုသတ်မှတ်၍ ထိုင်ခိုင်းခြင်းဖြင့် ဝမ်းသွားသည့် အလေ့အကျင့်ကို ပုံမှန်ဖြစ်အောင် လုပ်ဆောင်ပေးနိုင်ပါသည်။
* ကလေးများ စိတ်အေးလက်အေးနှင့် ပျော်ရွှင်စွာ အိမ်သာတက်နိုင်ရန်အတွက် အားပေးခြင်းနှင့် အိမ်သာအနီးတွင် စာအုပ်များ၊ အရုပ်များ ထားရှိပေးခြင်းတို့ကို လုပ်ဆောင်ပေးပါ။

✅ ၃။ မှန်ကန်သော အနေအထားနှင့် လှုပ်ရှားမှု

* အိမ်သာတက်စဉ် ခြေထောက်အောက်တွင် ခုံတစ်ခုခုခုထားပေးခြင်းဖြင့် ဝမ်းသွားရလွယ်ကူသော အနေအထားကို ရရှိစေပါသည်။
* ကိုယ်လက်လှုပ်ရှားမှုသည် အစာခြေစနစ်ကို ကောင်းမွန်စေသဖြင့် ကလေးများကို လှုပ်လှုပ်ရှားရှား ဆော့ကစားခိုင်းခြင်းသည် ဝမ်းချုပ်ခြင်းကို ကာကွယ်ပေးနိုင်ပါသည်။
* ကလေး၏ ဝမ်းဗိုက်ကို နာရီလက်တံအတိုင်း ဖြည်းညှင်းစွာ နှိပ်ပေးခြင်းသည်လည်း အူလမ်းကြောင်း လှုပ်ရှားမှုကို အထောက်အကူပြုနိုင်ပါသည်။

‼️‼️‼️ ကလေးအထူးကုဆရာဝန်နှင့် မည်သည့်အချိန်တွင် ပြသရမည်နည်း။

ကလေးတွင် ဝမ်းချုပ်ခြင်း (၂) ပတ်ထက်ကျော်နေလျှင် သို့မဟုတ် အောက်ပါလက္ခဏာများရှိလျှင် ဆရာဝန်နှင့် တိုင်ပင်ပါ-
* ဗိုက်အလွန်အမင်း အောင့်ခြင်း သို့မဟုတ် ဗိုက်ပွခြင်း။
* ဝမ်းတွင် သွေးပါခြင်း။
* ဖျားခြင်း၊ အန်ခြင်း သို့မဟုတ် ကိုယ်အလေးချိန်ကျခြင်း။
* အတွင်းခံဘောင်းဘီတွင် ဝမ်းအရည်များ ထွက်နေခြင်း (Soiling)။

‼️‼️‼️ သတိပြုရန်- ကလေး၏ ကျန်းမာရေးပြဿနာများနှင့်ပတ်သက်၍ စိုးရိမ်ပူပန်မှုများရှိပါက ဆရာဝန် သို့မဟုတ် ကျန်းမာရေးပညာရှင်နှင့် တိုင်ပင်ဆွေးနွေးရန် အရေးကြီးပါသည်။

23/03/2026

#နို့တိုက်မိခင်များသတိထားစရာအချက်

နို့တိုက်မိခင်တွေ မနက်စောစောမှာ ချွေးထွက်တာ၊ မူးဝေတာ နှင့် ခေါင်းချာချာလည်မူးခြင်းတို့မှာ ခန္ဓာကိုယ်၏ ပြန်လည်ပြုပြင်ပြောင်းလဲမှု ဖြစ်စဉ်များကြောင့် အဖြစ်များလေ့ရှိပါတယ်။

➡️➡️➡️ အဓိက အကြောင်းအရင်းများ ➡️➡️➡️

* သွေးတွင်းသကြားဓာတ် လျော့နည်းခြင်း (Hypoglycemia): နို့တိုက်ကျွေးခြင်းသည် စွမ်းအင် အလွန်လိုအပ်သော ဖြစ်စဉ်ဖြစ်ပြီး အထူးသဖြင့် တစ်ညလုံး နို့တိုက်ထားပြီး နံနက်စောစောအချိန်တွင် အစာမရှိပါက သွေးတွင်းသကြားဓာတ် ကျဆင်းကာ ချွေးစေးထွက်ခြင်း၊ ခေါင်းမူးခြင်းနှင့် တုန်ရီခြင်းတို့ ဖြစ်နိုင်ပါသည်။

* ဟော်မုန်း အပြောင်းအလဲများ: ကလေးမွေးဖွားပြီးနောက် အီစထရိုဂျင် (Estrogen) နှင့် ပရိုဂျက်စတီရုန်း (Progesterone) ဟော်မုန်းများ ရုတ်တရက် ကျဆင်းသွားခြင်းကြောင့် ခန္ဓာကိုယ် အပူချိန်ထိန်းညှိမှုစနစ် (Hypothalamus) ကို အနှောင့်အယှက်ဖြစ်စေကာ "Night Sweats" ဟုခေါ်သော ညဘက် ချွေးအလွန်အမင်း ထွက်ခြင်းကို ဖြစ်စေပါသည်။

* ရေဓာတ် ခမ်းခြောက်ခြင်း (Dehydration): မိခင်နို့ထုတ်လုပ်ရန် ရေဓာတ်များစွာ လိုအပ်ပါသည်။ ညဘက်တွင် ရေလုံလောက်အောင် မသောက်မိပါက နံနက်ပိုင်းတွင် ခေါင်းမူးခြင်းနှင့် အားနည်းခြင်းတို့ကို ခံစားရနိုင်ပါသည်။

* သွေးအားနည်းခြင်း (Anemia): မီးဖွားစဉ် သွေးဆုံးရှုံးမှုကြောင့် သွေးအားနည်းနေပါက ခန္ဓာကိုယ်တစ်ရှူးများသို့ အောက်ဆီဂျင် ပေးပို့မှု နည်းပါးသွားပြီး မူးဝေခြင်း၊ မောပန်းခြင်းတို့ကို ဖြစ်စေပါသည်။

* အိပ်ရေးပျက်ခြင်း (Sleep Deprivation): ညဘက် ကလေးနို့တိုက်ရန် ခဏခဏ နိုးရခြင်းကြောင့် အိပ်ရေးပျက်ကာ ဥနှောက်၏ ဟန်ချက်ထိန်းစနစ်ကို ထိခိုက်ပြီး နံနက်ပိုင်းတွင် မူးဝေခြင်း ဖြစ်နိုင်ပါသည်။

* ကိုယ်ဟန်အနေအထားပြောင်းလဲမှုကြောင့် သွေးဖိအားကျခြင်း (Postural Hypotension): အိပ်ရာမှ ရုတ်တရက် ထထိုင်ခြင်း သို့မဟုတ် ထရပ်ခြင်းကြောင့် သွေးဖိအား ခဏတာ ကျဆင်းသွားပြီး ခေါင်းမူးခြင်း ဖြစ်ပေါ်တတ်ပါသည်။

✅✅✅ သက်သာစေရန် နည်းလမ်းများ ✅✅✅

* အာဟာရ ဖြည့်တင်းပါ: အိပ်ရာမဝင်မီ သို့မဟုတ် ညဘက် နို့တိုက်ချိန်များတွင် ပရိုတင်း (Protein) နှင့် ကာဗိုဟိုက်ဒရိတ် (Carbohydrate) ပါသော သရေစာ (ဥပမာ - အခွံမာသီး၊ ဒိန်ချဉ်) စားပေးခြင်းဖြင့် နံနက်ပိုင်း သွေးတွင်းသကြားဓာတ် ကျဆင်းမှုကို ကာကွယ်နိုင်ပါသည်။

* ရေဓာတ် ဖြည့်ပါ: တစ်နေ့လျှင် ရေ ၃ လီတာမှ ၄ လီတာခန့် သောက်ပေးပါ။ နို့တိုက်နေစဉ် အနားတွင် ရေဘူးအမြဲ ဆောင်ထားပါ။

* ဖြည်းဖြည်းချင်း လှုပ်ရှားပါ: အိပ်ရာမှထလျှင် ချက်ချင်းမထဘဲ ခဏထိုင်ပြီးမှ ဖြည်းဖြည်းချင်း ထရပ်ပါ။

* အနားယူပါ: ကလေးအိပ်ချိန်တွင် အတူတူ လိုက်အိပ်ခြင်းဖြင့် အိပ်ရေးပျက်ခြင်းကို ပြန်လည်ဖြည့်တင်းပါ။

‼️‼️‼️သတိပြုရန် - အကယ်၍ ခေါင်းမူးခြင်းမှာ ပြင်းထန်လာခြင်း၊ သတိလစ်ခြင်း၊ အမြင်အာရုံ ဝေဝါးခြင်း သို့မဟုတ် ဖျားနာခြင်းတို့နှင့် တွဲဖက်ဖြစ်ပေါ်ပါက ဆရာဝန်နှင့် ချက်ချင်း တိုင်ပင်ပြသသင့်ပါသည်။

18/03/2026

ဆရာမ ရေးထားတဲ့ ကျောက်ကပ်ဆေးနေရသောလူနာများအတွက် အာဟာရ အပိုင်း (၁)

ကျောက်ကပ်ဆေးနေရသောလူနာများအတွက် အာဟာရနှင့် အထွေထွေဗဟုသုတများ အပိုင်း (၁)
Dr ကြယ်စင်ယုမွန် (အာဟာရအထူးပြုဆရာဝန်)

"အာဟာရချို့တဲ့ခြင်း"
•အာဟာရချို့တဲ့ခြင်းသည် ရောဂါကို ခုခံရန်အင်အားကျဆင်းစေပြီး၊ နှုံးခြင်း၊ မူးဝေခြင်း၊ အားမရှိခြင်း၊ တဖြည်းဖြည်း ပိန်လာခြင်း၊ မကြာခဏ ဖျားခြင်း စသည့်လက္ခဏာများ ခံစားရတတ်ပါသည်။
•အာဟာရ ပြည့်ဝခြင်းသည် ရောဂါကို ပိုမဆိုးအောင် ထိန်းထားနိုင်ခြင်း၊ ပုံမှန်လူတစ်ယောက် ကဲ့သို့အလုပ်လုပ်နိုင်ခြင်း၊ မကြာခဏ ဖျားနာခြင်း မရှိခြင်း၊ ဆေးရုံတက်ရသည့် အကြိမ်ရေ နည်းခြင်း၊ ကျန်းမာသော လူနေမှုဘဝကို ရရှိနိင်ခြင်း စသည့်အကျိုးကျေးဇူးများ ရှိပါသည်။
•ရောဂါ အဆင့်အလိုက် အာဟာရ လိုအပ်ချက် မတူညီပါ။
•ထို့ကြောင့် မိမိ၏ အာဟာရ လိုအပ်ချက်အလိုက် နေထိုင်စားသုံးခြင်းဖြင့် ပိုမိုကျန်းမာပျော်ရွှင်သော ဘဝကို ပိုင်ဆိုင်နိုင်ပါသည်။

"ကျောက်ကပ်ဆေးမည့်နေ့ အတွက် အကြံပြုချက်များ"

· ကျောက်ကပ်ဆေးနေစဉ်အတွင်း သွေးပေါင်ကျခြင်း ဖြစ်နိုင်ပါတယ်။

· သွေးတွင်းသကြားဓာတ်ကို ထိန်းထားရန် လိုအပ်ပါတယ်။

· ပိုတက်စီယမ်၊ ဖော့စဖိတ် နှင့် အရည်များ အလွန်အကျွံစားခြင်းကို ရှောင်ကြဉ်ပါ။

· အသားဓာတ် လုံလောက်စွာ စားသုံးဖို့ အရေးကြီးပါတယ်။

"ကျောက်ကပ်မဆေးဆီ (၁-၂ နာရီအလို)"

• အစာကြေလွယ်ပြီး မျှတသောအစားအစာကို ရွေးချယ်ပါ။ ကျောက်ကပ်ဆေးခြင်းမပြုမီ အစားနင့်အောင်စားခြင်း သို့မဟုတ် အဆီများသော အစားအစာများကို ရှောင်ကြဉ်ပါ (ပျို့အန်ခြင်းကို ဖြစ်စေနိုင်သည်)

• ထမင်းအနည်းငယ် + ကြက်သား/ငါး/ကြက်ဥ စားနိုင်ပါတယ်။

• အရည်ကို 200-300 mL ဝန်းကျင်ထက် ပိုမသောက်သင့်ပါ။

"ကျောက်ကပ်ဆေးနေစဉ် စားနိုင်သောအရာများ"

• ဆားနည်းသော ဘီစကစ် ၃-၄ ချပ်
• ကြက်ဥပြုတ်
• ကျောက်ကပ်ဘေးကင်းသော အာဟာရဖြည့်စွက်စာ
• ပေါင်မုန့် ၁-၂ ချပ်

"ကျောက်ကပ်ဆေး ပြီးနောက်-"

• ခန္ဓာကိုယ်က ပင်ပန်းနွမ်းနယ်နေနိုင်ပြီး အာဟာရဓာတ်တချို့ ဆုံးရှုံးသွားနိုင်ပါတယ်။ ပရိုတင်းဓာတ်ကြွယ်ဝပြီး မျှတသောအစာစားပါ။

"သတိထားရန်"
• ကြွက်တက်ခြင်း သို့မဟုတ် သွေးပေါင်ကျခြင်းတို့ကို ရှောင်ရှားရန် ကျောက်ကပ်ဆေးခြင်းမပြုမီ အရည်များကို အလွန်အကျွံမသောက်ပါနှင့်။

• ငှက်ပျောသီး၊ လိမ္မော်သီး၊ အုန်းရေ၊ ခရမ်းချဉ်သီး (အမြောက်အများ) ကဲ့သို့သော ပိုတက်စီယမ်များသော အစားအစာများကို ရှောင်ပါ။

• ဖော့စဖိတ် binder မသောက်သုံးနေပါက နို့ထွက်ပစ္စည်း၊ ကိုလာ၊ အခွံမာသီးများစားသုံးမှုကို လျှော့ချပါ။

References
•Kidney Disease: Improving Global Outcomes (KDIGO). (n.d.). KDIGO 2024 Clinical Practice Guideline for the Evaluation and Management of Chronic Kidney Disease. Retrieved from https://kdigo.org/guidelines/ckd-evaluation-and-management/
•Kidney Disease: Improving Global Outcomes (KDIGO). (2024). KDIGO 2024 Clinical Practice Guideline for the Evaluation and Management of Chronic Kidney Disease: Executive Summary. Retrieved fromhttps://kdigo.org/wp-content/uploads/2017/02/KDIGO-2024-CKD-Guideline-Executive-Summary.pdf
•Myanmar Calorie and Protein Counting Booklet for Kidney Patients. (2023). Cherry Win Maung, Mahidol University

05/03/2026

“ကလေး ဘဝ အဝလွန်ခြင်း၏ နောက်ဆက်တွဲများ”

🚫🚫🚫 ကလေးတွေ ဝတိုင်း မကောင်းဘူးဆိုတာ မိဘတိုင်း သတိထားစရာပါ။ ကလေးအသက် ၂ နှစ်နဲ့ ၁၀ နှစ်ကြားမှာ အဝမလွန်အောင် ထိန်းထားပေးဖို့ အရေးကြီးပါတယ်။

အသက်အရွယ်အလိုက် ရှိသင့်တဲ့ ကိုယ်အလေးချိန်နဲ့ အရပ်အမောင်းရှိဖို့ အရေးကြီးပါတယ်။ ကလေးရဲ့ အသက်အရွယ်အလိုက် ကျန်းကျန်းမာမာ ကြီးထွားဖို့ က အရေးအကြီးဆုံးပါ။

⏩⏩⏩ ကလေးတစ်ယောက်နဲ့ တစ်ယောက် ဝိတ် ယှဉ်စရာ မလိုပါဘူး။ ကြီးထွားမှု ဟာ တပ်အပ် မတူနိုင်ပါ။

ငယ်ဘဝမှ အဝလွန်ခဲ့ရင် နောင်တစ်ချိန်မှာ ရောဂါတွေ တိုးနိုင်ပါတယ်။ ဒါကြောင့် ဒီရောဂါတွေ ကာကွယ်ပြီးသားဖြစ်အောင် ကျန်းမာတဲ့ ကိုယ်အလေးချိန်အတွင်းဝင် ဖို့ပဲ ကြိုးစားကြဖို့ တိုက်တွန်းချင်ပါတယ်။ ဝစေချင်လို့ မတရား ကျွေးတာဟာ ကလေးအတွက် အန္တရာယ်ရှိစေပါတယ်။

‼️‼️‼️ ငယ်ဘဝ အဝလွန်ခြင်းရဲ့ နောက်ဆက်တွဲများ

ဆီးချိုအမျိုးအစား ၂ (စောစောဖြစ်နိုင်ခြင်း)
သွေးတိုးခြင်း
သွေးတွင်းအဆီဓာတ်များခြင်း
အသည်းရောဂါ
အရိုးနှင့် အဆစ်အမြစ် ပြဿနာများ
အသက်ရှုလမ်းကြောင်းဆိုင်ရာ ပြဿနာများ
အိပ်လျှင် ဟောက်ခြင်း၊ အိပ်ရင်း အသက်ရှုရပ်တပ်သည်
အပျိုဖော် ဝင်တာ စောခြင်း
စားသောက်မှု မမှန်သည့် ရောဂါ (အလွန်အကျွံရှောင်ခြင်း၊ အလွန်အကျွံစားခြင်း)
အရေပြားရောဂါများ
နှုံနယ်ခြင်း၊ မတက်ကြွခြင်း

🧠 စိတ်ပိုင်းဆိုင်ရာ တွင်လည်း-
အနိုင်ကျင့် ခံရခြင်း
စခံရခြင်း၊ လှောင်ပြောင်ခံရခြင်း
မိမိကိုယ်ကို ယုံကြည်မှု ပျောက်ဆုံးခြင်း
လူမှုဆက်ဆံရေး ချို့တဲ့လာခြင်း
စိတ်ဖိစီးမှုများခြင်း
အမူအကျင့်များ ပုံမမှန်ဖြစ်ခြင်း တို့ ဖြစ်နိုင်ပါတယ်။

‼️ ငယ်ငယ်က အဝလွန်သည့် ကလေးများ ကြီးလာလျှင် -

သွေးတိုးရောဂါ
နှလုံးရောဂါ
လေဖြတ်ခြင်း
အသည်းရောဂါ
ဆီးချိုအမျိုးအစား ၂
အတိတ်မေ့ရောဂါ
ကင်ဆာရောဂါ အမျိုးမျိုး ဖြစ်နိုင်ပါတယ်။

✅ ဒါကြောင့် ကလေးတွေကို ပုံမှန် ဝိတ်ချိန်ပေးပါ။ အာဟာရမျှတအောင် ကျွေးပါ။ ဆော့ကစားစေပါ။

❌ အချိုရည်၊ သွားရေစာ လျှော့ပါ။ အချိုလျှော့ပါ။
ဆား အငန်များတာ လျှော့ပါ။

အပြင်စာကျွေးတာ ကိုလည်း ချင့်ချိန်ပြီး ကျွေးမွေးကြဖို့ အကြံပြုချင်ပါတယ်။

ကျန်းမာကြပါစေရှင်

မေတ္တာဖြင့်

Dr ကြယ်စင်ယုမွန်

04/03/2026

အချိန်လေး ခဏယူပြီး survey လေးကို ဖြည့်ပြီး Diet Plan လေး ရယူနိုင်ပါတယ်ရှင်

Your voice matters. At Dermaluxe, we believe weight management is not just about appearance — it is about health, confidence, and long-term wellbeing. This 3 mintues survey helps us design programs that truly support you.