29/11/2025
Хүүхдэд эм уулгахад амар биш үе олон байдаг. Харин суспенз эм бол хамгийн хялбар, аюулгүй сонголтуудын нэг. Нунтаг савлагааг зөв хэмжээгээр усанд найруулж, уухад зөөлөн шингэн эм бэлэн болдог. Гэхдээ хэрхэн зөв найруулах вэ гэдгийг хүн бүр мэдээд байдаггүй. Энэ постоор бид түүний үндсэн зарчмуудыг тайлбарлая.
✔️ 1. Тухайн эмийн зааврыг эхлээд унших:
Эмийн савлагаан дээр хэдэн мл ус нэмэх, найруулсны дараа хэд хоног хэрэглэх, хөргөгчинд хадгалах эсэх бүгд бичээстэй байдаг → Заавар нь хамгийн гол юм шүү!
✔️ 2. Ямар ус хэрэглэх вэ?
-Буцалгаж хөргөсөн ус /цэвэр/
-Савласан цэвэр ус аль аль нь болно.
⚠️ Харин халуун ус эсвэл шууд крантны ус болохгүй.
Халуун ус нь эмийн бүтэц, үр нөлөөг өөрчилж болзошгүй.
✔️ 3. Усны хэмжээг ягштал баримтлах
Хэт их ус хийвэл → тун багадна, эмчилгээ сулрана.
Хэт бага ус хийвэл → тун ихдэх аюултай.
Иймээс зааварт заасан яг мл-ийг тааруулж хийх хэрэгтэй.
Хэрэв саван дээр “шугам” тэмдэгтэй бол тэр хүртэл нь хийнэ. Гэхдээ найруулах арга чухал.
✔️ 4. Найруулах стандарт арга (хамгийн түгээмэл)
Цэвэр саванд зааварт заасан усаа мл-р хэмжиж хийнэ.
Эмийн бодистой саванд эхлээд тал усаа нэмнэ.
Нунтаг бүрэн норж жигд болтол сайтар сэгсэрнэ.
Дараа нь үлдсэн усны хэмжээг нэмээд нэгэн жигд болтол дахин сайн сэгсэрнэ.
Нэгэн жигд болсоныг сайтар харж шалгах хэрэгтэй
Ингээд нэгэн төрлийн зуурамтгай суспенз болно.
✔️ 5. Найруулсны дараа
Хэрэглэх болгондоо заавал сэгсэрч байж тун нэгэн жигд болно.
Тунадас харагдвал → сайн сэгсэр
Хэт бөөгнөрсөн, үнэр өнгө өөрчлөгдвөл → ашиглахгүй байна уу. Бохирдсон байх магадлалтай.
✔️ 6. Хадгалалт
Зарим эм хөргөгчинд, зарим нь өрөөний темпертурт хадгалагддаг
→ Тухайн эмийн зааварыг уншина уу.
Ихэнх эм 7–14 хоног хадгалагддаг
Хугацаа дууссан бол дахин хэрэглэхээс татгалзаарай.
✔️ 7. Хүүхдэд өгөхдөө:
Эмтэй ирсэн хэмжигч халбага эсвэл тариурыг ашиглана
Өөр савны халбага ашиглах нь → тун зөрөх аюултай.
Хүүхдийг унтаж байхад нь өгч болохгүй шүү (бөглөрөх аюултай байдаг).
