05/08/2015
СУУЛГАЛТААС ХЭРХЭН СЭРГИЙЛЭХ ВЭ?
Уншсан: 51
Бага насны хүүхдэд элбэг тохиолдож, эцэг эхчүүдийн санааг зовоодог эмгэгийн нэг бол суулгалт юм. Суулгалтыг хүмүүс “Шингэн алдах, гүйлгэх, сур харвах, хордлогод орох, чацга алдах” гэх мэт олон янзаар нэрлэдэг. 24 цагийн хугацаанд 3-аас олон удаа, эмгэг хольцтой баахыг суулгалт гэнэ.
Эмгэг хольц гэж юу вэ? Энэ нь ус, цус, боловсроогүй хоолны үлдэгдэл, залхаг, шимэгч-хялгасан хорхой зэргийг агуулсан ялгадас өтгөнийг хэлнэ.Суулгалтын үед дүлэх, гэдэс дүүрэх, базалж өвдөх, бөөлжих, хошногоны амсар суларч онгойх зэрэг шинжүүд ажиглагддаг. Хүүхдийн нас бага байх тусам хоол боловсруулах эрхтнүүдийн бүтэц үйл ажиллагаа дутмаг байдгаас ходоод гэдэс амархан хямрах эрсдэлтэй байдаг. Суулгалт нь өөрөө өвчин биш, хоол боловсруулах замын хямралын үед илрэх шинж юм.
Суулгалтаар өвчлөхөд нөлөөлөх үндсэн хүчин зүйлс:
Бохир орчин ахуй, хангалтгүй асаргаа, шаардлага хангаагүй ундны ус, хоол хүнсний хадгалалт буруу, боловсруулалт дутуу байх: /усны савны бохирдолт, аяга, сав дутуу угаах, хог шороотой орчин г.м/.
Гарын ариун цэвэр муу: /гар хиртэй, хумс урт байх тусам халдвар тараах эрсдэл өндөр/.
Нэмэгдэл хоолонд буруу оруулах /хэмжээ ихдэх, багадах, орц ядмаг эсвэл хэт олон найрлагатай байх, эрт эсвэл хожуу хоолонд оруулах /
Хүүхдийн архаг суурь өвчнүүд, ялангуяа тураал, мөн вирусийн гаралтай өвчнөөр өвчлөх: /тураалыг суулгалт дагалддаг жамтай/
Эмийн замбараагүй, хяналтгүй хэрэглээ: /гэдэсний ашигтай нянг устгана/.
Эдгээр нөлөөлөх шалтгаануудыг эцэг эхчүүд маань төдийлөн сайн мэдэхгүй эсвэл тоохгүй байснаас хүүхдүүд суулгалт өвчнөөр ялангуяа урин дулаан зуны цагт илүү их өвчилж байна.
Илрэх шинжүүд:
Шалтгаан, хүүхдийн нас, өвчин үргэлжилсэн хугацаа, байрлал, хэлбэр зэрэг олон зүйлсээс шалтгаалж илрэх шинжүүд өөр өөр байна. Юуны өмнө баасны тоо олширно.
Суулгалттай хүүхэд цочромтгой, уух юм руу дайрч, ховдоглон ууж байвал шингэн алдалт гүнзгийрч буй шинж тэмдэг бөгөөд та заавал мэргэжлийн эмчид хандан, үзүүлж, зөвлөгөө аван, эмчлүүлэх хэрэгтэй. Суулгалт хүндрэх тусам хүүхэд маань уух дургүй, тасралтгүй бөөлжиж эхлэх ба дээрх шинжүүдээс гадна арьс цайх, цонхийх, зулай хонхойх, баасны тоо олшрох, бөөлжилт нэмэгдэх, гэдэс дүүрэх, шээсний гарц багасах, халуурах зэрэг шинжүүд гардаг юм.
Суулгалтыг хугацаагаар нь:
1. Цочмог суулгалт (14 хоног хүртэл хугацаагаар тасралтгүй суулгасан бол)
2. Ужиг суулгалт (суулгалт 14 хоногоос удаан үргэлжилсэн бол )гэж ангилна.
Дараах арга нь гэрийн нөхцөлд хөнгөн хэлбэрийн суулгалтыг эмчлэх энгийн үр дүнтэй аргыг танилцуулж байна.
Хөхүүл бол ойр ойрхон хөхүүлэх
Шингэн хангалттай уулгах (шингэн хярам,будааны шүүс, шөл, ус, хоросол, тараг г.м)
Хоол сойхгүй, гэхдээ урьд хэрэглэж байгаагүй шинэ төрлийн хоол өгөхгүй.
Цайрын бэлдмэл өгөх (эмч зөвлөсөн үед)
Шингэнийг суулгалт зогсох хүртэл уулгана. Бөөлжвөл 10 минут хүлээнэ.
Яаж уулгах вэ? 2 нас хүртэл 50-100 мл, 2 дээш насанд 100-200 мл-ийг суулгалт бүрийн дараа бага багаар шимүүлж, эсвэл халбагаар 1-2 минутын зайтай уулгана.
Суулгалттай ихэнх хүүхдүүд дээрх зарчмаар 3 хоног хүртэл хугацаагаар шингэн уулгах тууштай эмчилгээнд биеийн байдал дээрдэж, баас засардаг.
Дээрх эмчилгээг хийхэд эцэг эхчүүд маань дараах алдааг голчлон гаргах нь ажиглагддаг, үүнд: хэт чихэрлэг, нялуун ундаа өгөх, бөөлжингүүт их хэмжээтэй унд уулгах, хоол сойх г.м.
Өтгөн байхуу цай нь суулгалтыг ихэсгэдэг сөрөг талтай.
Сөд, мэхээр, мойл зэргийн шүүсийг хэрэглэж болно.
Анхааруулга: Цустай баагаагүй л бол антибиотик эм хэрэглэж болохгүй!!!
Суулгалтаас хэрхэн сэргийлэх вэ?
Хүүхдэд тохирсон хоолыг бэлтгэсэн даруйдаа хэрэглэх, үлдээхгүй, халааж өгөхгүй байх
Хоол унд бэлтгэхийн өмнө, хүүхдээ хооллохын өмнө, бие зассаны дараа, хүүхдийнхээ живхийг солих бүрийн дараа заавал гараа угааж хэвших нь үр хүүхдээ болон өөрсдийгөө элдэв халдвараас хамгаалах үр дүнтэй арга юм шүү.
Хүүхдээ 6 сар хүрэхэд Эх хүүхдийн эрүүл мэндийн дэвтрийн (ягаан)нас тус бүрт тохирсон хооллолтын зөвлөмжийг мөрдөж, нэмэгдэл хоолонд оруулаарай.
Эмийг зөвхөн эмчийн заавраар (эмийн санчийн биш!), хүүхдэд тохирсон тунгаар эмчийн зааврын дагуу зөв уулгаарай.
Хүүхдээ архаг суурь өвчнүүдээр өвчлүүлэхгүйн тулд Д болон А аминдэмийг цаг тухайд нь уулгаж, товлолын вакцинжуулалтанд хугацаанд нь хамруулаарай.
Та бүхэнд эрүүл энхийг хүсье.
