04/04/2026
2026.04.05
Ханш нээх өдөр гэдэг нь зүгээр нэг улирал солигдох үе биш.
Энэ бол байгаль дэлхий хөлдүү хүйтнээсээ гарч,
хөрс шороо амь орж,
өвс ургамал үндсээрээ хөдөлж,
амьд бүхэн дотроосоо сэрж эхэлдэг онцгой мөч юм.
Өвгөд дээдэс маань энэ өдрийг энгийн нэг өнгөрөөдөггүй байжээ.
Гэр орноо цэвэрлэнэ.
Үг хэлээ цэгнэнэ.
Сэтгэл санаагаа ариусгана.
Сайн үйл хийж, сайхан ерөөл бэлгэддэг байж.
Учир нь байгаль өөрөө сэрж, дэлхий өөрөө нээгдэж байхад
хүн дотроо хөшүүн, үг нь хатуу, сэтгэл нь гомдол бухимдлаар дүүрэн байж болохгүй гэж үздэг байсан юм.
Үүднийхээ тоосыг арчаад, сэтгэлийнхээ хир буртгийг үлдээвэл тэр цэвэрлэгээ бүтэн биш.
Ханш нээх өдөр гэдэг нь
газрын ханш нээгдэхээс гадна
хүний сэтгэлийн ханш ч бас нээгдэх ёстой өдөр юм.
Тиймээс энэ өдөр:
сэтгэлээ зөөллөе,
үгээ цэнье,
гэрээ цэгцэлье,
ахмадаа хүндэлье,
үр хүүхдэдээ сайхан үг хэлж,
өрөөл бусдад бага ч болов тус хүргэе.
Амьдрал үргэлж том өөрчлөлтөөр эхэлдэггүй.
Заримдаа ганцхан зөөлөн үг,
ганцхан цэгцтэй бодол,
ганцхан чин сэтгэлийн үйл
бүхнийг өөрчилж чаддаг.
Ханш нээх өдөр бидэнд нэг үнэнийг сануулдаг:
Байгаль хүртэл сэрж байхад
хүн бид яагаад сэтгэлээ сэрээж болохгүй гэж?
Alchemy Batbolor - Сэтгэл зүйч
#ХаншНээхӨдөр #СэтгэлийнХанш #СайнҮйл #МонголУхаан
