Жигжидсүрэнгийн Чинбүрэн

04/03/2026

БАЯНХОНГОР АЙМГИЙН НЭГДСЭН ЭМНЭЛГИЙН ТӨРӨХ ТАСГИЙГ “М-Си-Эс” ГРУПП 3.9 ТЭРБУМ ТӨГРӨГӨӨР ШИНЭЧИЛЖ БАЙНА

М-Си-Эс Групп нийгмийн хариуцлагын хүрээнд Баянхонгор аймгийн Нэгдсэн эмнэлгийн Төрөх, эмэгтэйчүүдийн тасгийг иж бүрэн шинэчилж байна.

Тус эмнэлэг 1942 онд байгуулагдсан бөгөөд барилгын их засвар, шинэчлэл шаардлагатай эмнэлгүүдийн нэгт тооцогддог. 2025 онд Төрөх тасагт 1,236 эх амаржсан бөгөөд жил бүр 1,300 орчим нярайг аюулгүй, тав тухтай орчинд хүлээн авах нөхцөлийг бүрдүүлэх зорилгоор энэхүү шинэчлэлийг хэрэгжүүлж буйгаа танилцууллаа.

3 давхар, 1,774.08 мкв талбай бүхий барилгад иж бүрэн засвар хийж, цонх, хаалга, фасад, сантехник, цахилгаан, агаар сэлгэлт, дээвэр, холбоо дохиолол, сувилагчийн дуудлага, хий хангамж, камержуулалтыг бүрэн шинэчлэх юм.
Засварын ажлыг 2025 оны 11 дүгээр сараас “Номин ундрах өргөө” ХХК хийж эхэлсэн бөгөөд ирэх дөрөвдүгээр сард хүлээлгэн өгөхөөр төлөвлөжээ.

📌Нийгмийн хариуцлагынхаа хүрээнд эрүүл мэндийн салбарт оруулж буй хувийн хэвшлийн томоохон хөрөнгө оруулалт нь бусад аймагт жишиг болон хэрэгжих боломжтой юм. Бүтээн байгуулалтыг хийж буй компанийн удирдлага, хамт олонд талархал илэрхийлье.

Монгол Улсын Засгийн газарын 2024–2028 оны үйл ажиллагааны хөтөлбөрт хөрөнгө оруулалт, хувийн хэвшлийг татварын бодлогоор дэмжихээр тусгасан.

Аж ахуйн нэгжийн орлогын албан татварын тухай хуульд оруулсан нэмэлт өөрчлөлтөөр татвар төлөгч нь нийгэмд чиглэсэн хөрөнгө оруулалт, хандив, санхүүгийн дэмжлэг үзүүлсэн тохиолдолд татвар ногдох орлогын нэг хувь хүртэлх дүнг төлөх албан татвараас шууд хасуулах боломжтой болсон.
Тухайлбал, татвар ногдох орлого 500 сая төгрөг бол 5 сая төгрөг хүртэлх дэмжлэгийг татвараас хасуулах боломжтой.

Байгаль орчин хамгаалах, орчны бохирдлыг бууруулах, ахмад настан, хөгжлийн бэрхшээлтэй иргэд, хүүхдэд ээлтэй орчин бүрдүүлэх, соёлын өвийг хамгаалах, нийтийн эзэмшлийн зам талбай байгуулах, гамшгийн хохирлыг бууруулах, биеийн тамир спорт, боловсрол, шинжлэх ухаан, төрийн болон орон нутгийн өмчийн эрүүл мэндийн байгууллагыг дэмжих зэрэг чиглэлд хэрэгжүүлсэн төсөл, санаачилгууд энэхүү хөнгөлөлтөд хамрагдаж болдог байна.

Баянхонгор аймаг дахь томилолт эмч, сувилагч, ажилтнуудтай хийсэн уулзалт, нээлттэй ярилцлагаар өндөрлөлөө.

📍Баянхонгор аймаг, Баянхонгор хот
2026.03.04

04/03/2026

04/03/2026

Баянхонгор хотод болж буй "Ууган оточ" нээлттэй өдөрлөгөөс шууд дамжуулж байна.

Уламжлалт анагаах ухааныг түгэн дэлгэрүүлэх нөлөөллийн ажлыг амжилттай зохион байгуулж буйд баяртай байна.

04/03/2026

БАЯНХОНГОР АЙМАГ ТОМУУГИЙН ВАКЦИНЫГ 100 ХУВЬ, УМАЙН ХҮЗҮҮНИЙ ХАВДРААС СЭРГИЙЛЭХ (HPV – ХҮНИЙ ХӨХӨНЦӨР ВИРУСИЙН ЭСРЭГ) ВАКЦИНЫГ 88 ХУВИЙН ХАМРАЛТТАЙ ХИЙЖЭЭ

21 аймагт ажиллах томилолт 10 дахь аймагтаа үргэлжилж, өнөөдөр Баянхонгор аймагт ажиллаж байна.

Аймгийн эрүүл мэндийн салбарын үйл ажиллагаа, хүн амын эрүүл мэндийн өнөөгийн нөхцөл байдлын талаар Баянхонгор аймгийн Эрүүл мэндийн газрын даргын албан үүргийг түр орлон гүйцэтгэгч Г.Лхагва-Очир дэлгэрэнгүй танилцуулга хийлээ.

📌Баянхонгор аймаг 2025 оныг “Эрүүл мэндийг дэмжих жил” болгон зарлаж, нийгмийн эрүүл мэндийн чиглэлд бодлогын түвшинд онцгойлон анхаарч ажилласны үр дүнд дархлаажуулалтын хамралтыг өндөр түвшинд хүргэжээ. Тодруулбал, томуугийн вакциныг 100 хувийн хамралттай, умайн хүзүүний хавдраас сэргийлэх HPV (хүний хөхөнцөр вирусийн эсрэг) вакциныг 88 хувийн хамралттай хийсэн нь орон нутгийн сайн туршлага болж байгааг онцолъё.

📌Мөн аймагт байгуулагдаж буй Баруун бүсийн Наркологийн төвийн үйл ажиллагааг улсын хэмжээнд жишиг төв болгон хөгжүүлэхэд салбарын яамнаас онцгой анхаарч ажиллах болно.

Баянхонгор аймгийн 88 мянга орчим хүн амд эрүүл мэндийн салбарын 1400 орчим эмч, ажилтан эмнэлгийн болон нийгмийн эрүүл мэндийн тусламж үйлчилгээг үзүүлж байна.

Аймгийн хүн амын дундаж наслалт 2024 онд 72.32 болж, өмнөх оноос 0.27 пунктээр өссөн үзүүлэлттэй гарчээ. Үүнээс эмэгтэйчүүдийн дундаж наслалт 74.38 жил, эрэгтэйчүүдийнх 69.09 жил байгаа бөгөөд хүйсийн дундаж наслалтын зөрүү 5.29 жил байна.

2024 онд тус аймагт бүртгэгдсэн нийт нас баралтын дийлэнх хувийг зүрх судасны өвчин, хавдар, осол гэмтэл болон бусад халдварт бус өвчлөл эзэлж байна. Тэр дундаа зүрх судасны тогтолцооны өвчин нас баралтын тэргүүлэх шалтгаан хэвээр байгаа бол хавдрын шалтгаант нас баралт удаах байрт эрэмбэлэгджээ.

Аймгийн хэмжээнд бүртгэгдсэн нийт өвчлөлийн зонхилох шалтгаанд:
• Амьсгалын тогтолцооны өвчин
• Зүрх судасны өвчин
• Хоол боловсруулах эрхтний өвчин
• Осол гэмтэл
• Халдварт өвчин зэрэг өвчлөлүүд багтаж байна.

✅ Орон нутаг дахь томилолт үргэлжилж, салбарын эмч, мэргэжилтнүүдтэй уулзалт хийж, Нэгдсэн эмнэлгийн үйл ажиллагаатай газар дээр нь танилцан ажиллана.

📍Баянхонгор аймаг, Баянхонгор хот
2026.03.04

03/03/2026

ӨВӨРХАНГАЙ АЙМАГТ 30 САЯ АМ.ДОЛЛАРЫН ХӨРӨНГӨ ОРУУЛАЛТААР 300 ОРТОЙ ЖИШИГ НЭГДСЭН ЭМНЭЛЭГ БАЙГУУЛНА

✅Өвөрхангай аймагт хийж буй ажлын томилолт үргэлжилж байна. Ажлын хүрээнд салбарын эмч, сувилагч, ажилтнуудтай уулзаж, эрүүл мэндийн салбарт хэрэгжүүлж буй шинэчлэл, бодлого, тус аймагт хийгдэх хөрөнгө оруулалтын талаар дэлгэрэнгүй мэдээлэл өгч, сонирхсон асуултад нь хариуллаа.

📌“Дэлгэсэн тэрлэг шиг уудам нутагтай Монгол орныхоо хаана амьдрахаас үл хамааран иргэн бүр эмнэлгийн тусламж, үйлчилгээг цаг алдалгүй, чанартай авах боломж бүхий дэд бүтэц, хүний нөөцийг бүрдүүлэх нь Монгол Улсын Засгийн газрын эрүүл мэндийн салбарт баримталж буй тэргүүлэх бодлого юм.

Энэхүү бодлого нь сум, аймгийн эмнэлэг, эрүүл мэндийн төвүүдийг олон улсын стандартад нийцсэн барилга байгууламжаар хангах, орчин үеийн менежментийг нэвтрүүлэх, эмч, ажилтнуудын чадавхыг бэхжүүлэх замаар хэрэгжинэ. Ингэснээр аврах боломжтой амь насыг аварч, хөдөлмөрийн чадвар алдалтаас урьдчилан сэргийлэх нөхцөл бүрдэнэ. Ялангуяа харвалт, шигдээс, осол гэмтлийн үед цаг алдалгүй, чанартай тусламж үзүүлж чадвал жил бүр дээрх гурван шалтгааны улмаас амь насаа алдаж буй 18 мянган хүний гуравны нэгийг аврах боломжтой”.

✅Азийн хөгжлийн банкны санхүүжилтээр Монгол Улсын 21 аймгийг хамарсан эрүүл мэндийн тусламж, үйлчилгээг сайжруулах, эрчимжүүлэх төслийн хүрээнд Өвөрхангай аймагт 300 ортой жишиг Нэгдсэн эмнэлгийг 30 сая ам.долларын хөрөнгө оруулалтаар байгуулахаар төлөвлөж байна.

📌Өвөрхангай аймагт ажиллаж, амьдарч буй эрүүл мэндийн салбарын эмч, сувилагч, ажилтан та бүхэндээ талархал илэрхийлж, Өвөрхангайнхандаа эрүүл энхийг хүсье.

✅Өнөөдрийн уулзалтад Улсын Их Хурлын гишүүн, Аюулгүй байдал, гадаад бодлогын байнгын хорооны дарга Г.Тэмүүлэн, аймгийн ИТХ-ын дарга Т.Нарангарав, Засаг дарга О.Пүрэвдорж болон Эрүүл мэндийн газар, Бүсийн оношилгоо, эмчилгээний төвийн удирдлага, мэргэжилтнүүд оролцлоо.

📍Өвөрхангай аймаг Арвайхээр хот
2026.03.03

03/03/2026

ӨВӨРХАНГАЙ АЙМАГТ АЖИЛЛАЖ БАЙНА

21 аймагт хүрч ажиллах зорилготойгоор эхэлсэн томилолтын хүрээнд ес дэх аймаг болох Өвөрхангай аймагт ажиллаж байна.

Албан уулзалт аймгийн Нутгийн захиргааны ордонд болж, сумдын эрүүл мэндийн төвийн дарга нар болон холбогдох албаныхан оролцож байна.

Өвөрхангай аймгийн эрүүл мэндийн салбарын эмч, ажилтнууд 115 мянга гаруй хүн амд 19 сум, 112 багийг хамруулан эрүүл мэндийн тусламж, үйлчилгээ үзүүлж байна.

Аймгийн иргэдийн эрүүл мэндэд тулгамдаж буй асуудлын талаар Эрүүл мэндийн газрын дарга Н.Оюунтуяа танилцуулахдаа архидалт, амиа хорлолт нэмэгдэж байгааг онцоллоо.

Үүнтэй холбогдуулан нийгмийн эрүүл мэндийн тусламж, үйлчилгээг өргөжүүлэх, сэтгэц-зан үйлийн чиглэлийн хүний нөөцийг нэмэгдүүлэх, дархлаажуулалтын тогтолцоог бэхжүүлэх, эмнэлгийн аюултай хог хаягдлыг дэвшилтэт технологиор устгах, байгальд ээлтэй эрүүл мэндийн байгууллагын загварыг нэвтрүүлэх шаардлагатай байгааг дурдав.

Мөн аймгийн хэмжээнд 2025 онд 1590 эх амаржсан нь өмнөх оноос 123 төрөлтөөр буюу 7.1 хувиар буурсан үзүүлэлттэй байна. Жирэмсний хяналтад шинээр 1600 эх хамрагдсанаас 95.7 хувь нь жирэмсний эрт үедээ хяналтад орж, улсын дунджаас 2.5 пунктээр өндөр үзүүлэлттэй гарсныг танилцууллаа.

2025 онд эхийн эндэгдэл бүртгэгдээгүй нь эерэг үр дүн боловч 0–5 хүртэлх насны хүүхдийн эндэгдэл 35 тохиолдол бүртгэгдэж, 1000 амьд төрөлтөнд 21.8 ногдсон нь өмнөх оноос 9 тохиолдлоор өссөн байна.

Аймгийн эрүүл мэндийн салбарт гарч буй дэвшил, ололтын талаар танилцуулахдаа хавдрын хими, бай эмчилгээг орон нутагт нутагшуулж чадсан нь ойр аймгуудаас иргэд ирж үйлчлүүлэх нөхцөл бүрдсэнийг онцлов.

Мөн ангиографийн тусламж, үйлчилгээг чанартай нэвтрүүлсний үр дүнд зүрх, судасны өвчлөлийн шалтгаант нас баралт эрчимтэй буурчээ. Үүнээс гадна гэмтлийн мэс засал, тусламж үйлчилгээг амжилттай хөгжүүлж байгааг дурдсан юм.

Аймаг орон нутагтаа лавлагаа шатлалын тусламж үйлчилгээг чанартай хүргэж, үр дүнтэй ажиллаж буй нь тун сайшаалтай.

Өвөрхангай аймаг дахь ажлын хүрээнд салбарын эмч, ажилтнуудтай уулзаж, аймгийн Нэгдсэн эмнэлгийн үйл ажиллагаатай танилцахаар төлөвлөж байна.

Өвөрхангай аймаг, Арвайхээр хот
2026.03.03

02/03/2026

ХОРТ ХАВДРЫН ЭМЧИЛГЭЭНҮҮДИЙГ АМЖИЛТТАЙ НЭВТРҮҮЛЭН АЖИЛЛАЖ БУЙ АРХАНГАЙН НЭГДСЭН ЭМНЭЛГИЙН ХАМТ ОЛОНДОО БАЯР ХҮРГЭЖ АМЖИЛТ ХҮСЬЕ 👏👏👏

Тус эмнэлэг тусламж үйлчилгээний цар хүрээгээ тэлж Хавдрын тасагтай болж, элэг цөсний хавдрын мэс засал 40 орчмыг хийж, бай болон хими эмчилгээг нэвтрүүлээд байгаа гэдгээ өнөөдөр танилцуулав. Ойрын хугацаанд ходоодны хорт хавдрын эмчилгээг нэвтрүүлэхээр бэлтгэл ажлаа ханган ажиллаж байгаа аж.

Орон нутгийн иргэдэд маш чухал эмчилгээг ойртуулан, эмнэлгийн тусламж үйлчилгээнийхээ чанарыг ахиулан ажиллаж буйг үнэлж зохих шаардлагыг хангасан тохиолдолд журмын дагуу даатгалаас санхүүжүүлж ажиллах болно.

Мөн нярайн найман төрлийн эрт илрүүлгийг хийн ажиллаж байгаагаа танилцуулав.

Архангайд Улсын төсвийн хөрөнгө оруулалтаар, 21 аймгаас анх удаа олон улсын жишигт нийцсэн 300 ортой нэгдсэн эмнэлгийн барилга ашиглалтад орсноор эмч, эмнэлгийн ажилтнуудын ажиллах орчин, нөхцөл сайжирч, иргэдийн ая тухтай эрүүл мэндийн үйлчилгээ авах боломж бүрдсэн.

Мөн Архангай аймаг Элэг бүтэн монгол хөтөлбөрийг хамгийн сайн хэрэгжүүлсэн аймаг учраас элэгний хорт хавдрын нас баралт хоёр дахин буурсан үр дүнтэй байгаа гэв.

Танай хамт олонд амжилт хүсэж Архангайчуддаа элэг бүтэн амьдралыг ерөөе.

Хүндэтгэсэн,
Эрүүл мэндийн сайд Ж.Чинбүрэн

2026.03.02
Архангай аймаг, Эрдэнэбулган сум

02/03/2026

АРХАНГАЙЧУУДЫН ЭРЭГТЭЙ, ЭМЭГТЭЙ ХҮМҮҮСИЙН ДУНДАЖ НАСЛАЛТЫН ЗӨРҮҮ 3.2 ЖИЛ БАЙГААД БАЯР ХҮРГЭМЭЭР БАЙНА

Манай улсын хүн амын дундаж наслалт 71.7 байдаг бол эрэгтэйчүүдийнх 67.9 эмэгтэйчүүдийнх 77.1 байдаг. Хүйсийн насны зөрүү нь 9.2 буюу эрэгтэйчүүд илүү богино наслаад байгаа нийт хүн амын насжилтын онцлог болоод байгаа юм. Харин Архангайчуудын онцлог нь эрэгтэй, эмэгтэй хүйсийн дундаж насны зөрүү бага байгаа нь олзуурхах статистик байв.

Ийнхүү томилолтынхоо хоёр дахь өдрийг сайхан мэдээтэйгээр үргэлжлүүлж байна.
Ажлынхаа эхэнд орон нутгийн эрүүл мэндийн салбарын нөхцөл байдал, үзүүлэлт, тулгамдсан асуудалтай танилцлаа.

Архангай аймаг 93,201 хүн амтай. Үүний 49.3 хувь нь эрэгтэй, 50.7 хувь нь эмэгтэй. Нийт хүн амын 22.5 хувь нь аймгийн төвд, 77.5 хувь нь хөдөө орон нутагт амьдардаг байна. Эрэгтэйчүүдийн дундаж наслалт 71.2, эмэгтэйчүүдийнх 74.5 байгаа ба хүйсийн наслалтын зөрүү 3.2 жил байгаа юм байна. Улсын хэмжээнд эрэгтэй эмэгтэй хүмүүсийн дундаж наслалтын зөрүү найм байдаг бол Архангай аймагт баяр хүргэхүйц онцлог гэж салбарын сайд онцлов.

Архагайчуудын өвчлөлийн тэргүүлэх шалтгааны,
1-т хоол боловсруулах тогтолцооны эмгэг,
2-т амьсгалын тогтолцооны эмгэг болон зүрх судасны өвчин,
3-т шээс, бэлгийн тогтолцооны эмгэг,
4-т осол гэмтэл, гадны шалтгаант өвчлөл орж байгаа аж.

Нас баралтын шалтгааныг авч үзвэл:
1-т зүрх судасны өвчин,
2-т хавдар,
3-т осол гэмтэл,
4-т амьсгалын тогтолцооны өвчин,
5-т хоол боловсруулах тогтолцооны өвчин орж байна гэж тус аймгийн Эрүүл мэндийн газрын дарга Р.Гандиймаа танилцуулав.

Хавдрын нас баралтын 33 хувь нь элэг болон элгэн дэх цөсний сувгийн хавдар, 17 хувь нь ходоод, 15 хувь нь уушги, 7.7 хувь нь улаан хоолой, 2 хувь нь умайн хүзүүний хавдар байгаа юм байна.

2025 онд осол гэмтэл 10,000 хүн амд 357.1 бүртгэгдсэн. Энэ үзүүлэлт жил бүр өсөж байгаа нь анхаарал татаж байна гэв.

Өнгөрсөн гурван жилийн хугацаанд нийт хүн амын 49.3 хувь нь буюу 46,200 хүн эрт илрүүлэг, үзлэгт хамрагджээ. Илэрсэн өвчлөлийн 63.7 хувь нь хоол боловсруулах эрхтний өвчин, 11.6 хувь нь дотоод шүүрэл, бодисын солилцооны эмгэг, 5.9 хувь нь зүрх судасны өвчин, 4.1 хувь нь шээс, бэлгийн тогтолцооны өвчин, 4.1 хувь нь халдварт өвчин, БЗДХ, В, С вирус илэрчээ.

Цаашид,
1. Хавдрын тусламж, үйлчилгээ
2. Гэмтлийн мэс засал
3. Харвалт, шигдээсний үеийн тусламж
4. Хүүхдийн шүд, хүүхдийн мэс засал
5. Сэтгэцийн тусламж үйлчилгээ зэрэг чиглэлд хамгийн түлхүү анхаарч ажиллахаар төлөвлөөд байгаа юм байна.

2024 онд орон нутгийн 250 сая төгрөгийн санхүүжилтээр хөдөөгийн бүх багийн эмч нарыгаа унаажуулсан байна. Мөн 390 сая төгрөгөөр Цахир, Цэцэрлэг, Булган, Өлзийт, Өгийнуур, Хотонт суманд шүдний кабинетийн иж бүрэн тоног төхөөрөмж суурилуулжээ. Ингэснээр 16 сум шүдний кабинеттай болсон. Одоогоор 7 суманд орон тооны нүүр ам судлалын эмч ажиллаж байгаа аж.

2025 онд аймгийн эрүүл мэндийн салбарын 124 байгууллагад 1329 ажилтантайгаар анхан болон лавлагаа шатлалын тусламж үйлчилгээ үзүүлж байгаа ба 10,000 хүн амд 25 их эмч, 32 сувилагч ногдож юм байна.

2024–2025 онд Засаг даргын нэрэмжит “Эрүүл мэндийн салбарын шилдэг” уралдааныг зохион байгуулж 356 сая төгрөгийн урамшуулал олгожээ. Орон нутагт чадвартай эмч, боловсон хүчинг бэлтгэн тогтвор суурьшилтай ажиллуулах бодлогыг орон нутгийн удирдлагууд улам хөгжүүлж ажиллана гэв. Үүнээс гадна, Аймгийн Нэгдсэн эмнэлгийн хуучин 4 барилгыг Анагаахын шинжлэх ухааны үндэсний их сургууль-ийн харьяанд шилжүүлж, Хангайн бүсийн сувилахуйн сургалт, эрдэм шинжилгээ, эмнэлзүйн цогцолбор байгуулжээ. Засаг даргын нөөц сангаас Архангай аймгаас суралцаж буй 113 оюутанд сургалтын төлбөрийн 50 хувийн дэмжлэг үзүүлсэн байна. Тэдгээр оюутнууд төгсөөд аймагтаа 5 жил тасралтгүй ажиллах нөхцөлтэй ба цаашид эдгээр дэмжлэг үргэлжилнэ гэж ажлын уулзалтын үеэр аймгийн удирдлагууд танилцууллаа. Та бүгдэд баярлалаа.

Архангайчууддаа эрүүл энх элэг бүтэн амьдралыг ерөөе.

Одоо үргэлжлүүлэн Архангай аймгийн нэгдсэн эмнэлгийн хамт олонтой уулзаж ажиллана.

2026.03.02
Архангай аймаг, Эрдэнэбулган сум

02/03/2026

ХАРХОРИН СУМЫН НЭГДСЭН ЭМНЭЛГЭЭС ӨНӨӨДРИЙН АЖЛАА ЭХЛҮҮЛЛЭЭ

Өнөөдрийн ажлаа Орхон голын хөндийд орших Монголын эзэнт гүрний нийслэл байсан түүх соёлын өндөр ач холбогдолтой Өвөрхангай аймгийн Хархорин сумаас эхлүүллээ.

Салбарын эмч, ажилчид залуустайгаа уулзаж маш сайхан эрч хүч, урам зоригийг авлаа. Цоо шинэхэн эмнэлгийн барилга суманд ашиглалтад орсон нь өнгөтэй сайхан байна. Иргэд эмнэлгийн тусламж үйлчилгээг тав тухтай орчинд авч, сэтгэл тэнэгэр байгаагаа илэрхийллээ. Эмнэлгийн барилга барих ажлыг анх Монгол Улсын Ерөнхийлөгч У.Хүрэлсүх санаачлан бодит ажил болгох эхлэлийг тавьж байв.

Орчин нөхцөлөөс гадна тоног төхөөрөмжийн хувьд бүрэн шинэчлэгджээ. Тухайлбал, компьютер томографийн шинжилгээг орон нутагтаа хийх боломж бүрдэж, оношилгоо, эмчилгээний чанар, хүртээмжийг нэмэгдүүлэв.

Хүртээмжтэй, чанартай, шуурхай тусламж үйлчилгээг орон нутгийн иргэд маань цаг алдахгүй, зардал чирэгдэл багатай авах бүх бүх нөхцөл бүрэн бүрдтэл ажиллахаа салбарынхан болон иргэддээ нүүр бардам хэлээд гарч байна.

Хагалгааны вакум өрөөг тохижуулж, бүрэн ашиглалтад оруулахад шаардлагатай дэмжлэгийг бүх талаар үзүүлнэ ээ. Хархорин сумын эмнэлгийн тусламж үйлчилгээний онцлог нь осол гэмтэл болон тархины харвалтын яаралтай тусламж байдаг тул хагалгааны өрөөг бүрэн хүчин чадлаар ажиллуулах нь сэргийлж болох нас баралтыг бууруулахад чухал ач холбогдолтой.

Мөн Хархорин сум цаашид хот болон өргөжин, аялал жуулчлалын бүс нутаг болон хөгжиж буйтай холбогдуулан орон нутгийн эрүүл мэндийн байгууллагын тусламж үйлчилгээ чанартай, чадамжтай, хүртээмжтэй байх нөхцөлийг бодлогоор тасралтгүй дэмжиж, хамтран ажиллах болно.

10 гаруй хоногийн орон нутгийн томилолт маань сайхан эхэллээ.

2026.03.02

27/02/2026

ЧАНАРТАЙ ЭМ, ЭМНЭЛГИЙН ХЭРЭГСЛҮҮДИЙГ НЭГДСЭН ХУДАЛДАН АВАЛТААР НИЙЛҮҮЛЭХ САНАМЖ БИЧИГТ ГАРЫН ҮСЭГ ЗУРЛАА

✒️Өнөөдөр Нэгдсэн Үндэстний байгууллагын Хөгжлийн хөтөлбөрийн Суурин төлөөлөгч Матилда Димовскатай харилцан ойлголцлын санамж бичигт гарыг үсэг зурлаа.

✅Энэхүү санамж бичгийн хүрээнд НҮБ-ын Хөгжлийн хөтөлбөр (UNDP) олон улсын байгууллагаар дамжуулан эрүүл мэндийн байгууллагуудын тусламж үйлчилгээнд түгээмэл хэрэглэдэг, зардал өндөр, нэн шаардлагатай, тасалдал үүсэх өндөр эрсдэлтэй эмийг чанартай, боломжийн үнээр нэгдсэн худалдан авалтаар шууд нийлүүлэх боломж бүрдлээ.

💊Тухайлбал, “Төрөөс төлбөрийг нь хариуцах зарим өвчин эмгэг, түүний эмийн жагсаалт”-д байдаг тасалдал үүсэх эсдэлд ороод байсан гемофилийн эсрэг эмийг уг санамж бичгийн хүрээнд худалдан авах юм. Гемофилийн эсрэг эмийг цус бүлэгнэлтийн эмгэгтэй өвчтөнд тогтмол тарьж, цус алдалтаас сэргийлэх, цус алдалтыг эмчлэхэд хэрэглэдэг. Мөн уналт таталтын эсрэг эмүүдийг ч нэгдсэн худалдан авалтаар нийлүүлэх эмийн жагсаалтад оруулж байна.

📌 Монгол Улсын Засгийн газар, бодлогын яамны зүгээс эмийн үнэ, чанарын асуудалд ихээхэн анхаарч ажиллаж байгаа бөгөөд чанартай эмийг боломжийн үнээр худалдан авах тогтолцоо руу шилжих эхний том алхам хийгдлээ.

🤝НҮБ-ын Хөгжлийн хөтөлбөр (НҮБХХ) нь Монгол Улсын Засгийн газартай тогтвортой хөгжлийн зорилтууд, үндэсний хөгжлийн бусад тэргүүлэх зорилтуудыг хэрэгжүүлэхэд тууштай дэмжлэг үзүүлэн ажиллаж байгаад талархал илэрхийлье.

2026.02.27

25/02/2026

ЭМДҮЗ-ИЙН 03 ДУГААР ТОГТООЛЫГ ШИНЭЧЛЭН БАТАЛЛАА

✅Эрүүл мэндийн даатгалын үндэсний зөвлөл өнөөдөр хуралдаж “Төлбөрийн хэмжээ, төлбөрийн арга, журам шинэчлэн батлах тухай” 03 дугаар тогтоолыг сүүлийн шатанд хэлэлцэж, нийт гишүүдийн саналаар эцэслэн баталлаа.

✅Анхан шатны тусламж үйлчилгээний бодлого, чиглэл, санхүүжилтийг тодорхойлох 03 дугаар тогтоолоор өрхийн эрүүл мэндийн төвд 56 тэрбум, сумын эрүүл мэндийн төвд 77 тэрбум, нийт 133 тэрбум төгрөгийн зузаатгал хийснээр түүхэн шийдвэр гаргав.

✅03 дугаар тогтоолын гол шинэчлэлт нь хаалга баригчийн тогтолцоог бүрдүүлэх, архаг өвчний хяналт, хүн амын дундаж наслалт тэр дундаа эрэгтэйчүүдийн эрүүл мэндэд онцгойлон анхаарах, тусламж үйлчилгээний хүртээмж, хүний нөөцийн бодлого, нэг иргэний суурь тарифыг нэмэгдүүлж бэхжүүлэх, урамшууллын системийг тус тус нэгтгэн зохицуулснаараа онцлогтой.

✅Уг тогтоолоор Эрүүл мэндийн даатгалын системийг илүү үр дүнтэй хэрэгжүүлэх, анхан шатны өрх, сум, тосгоны эрүүл мэндийн байгууллагуудыг иргэний бүртгэл, хяналт, гүйцэтгэлээр нь үнэлэн урамшуулах, иргэдэд хүртээмжтэй, чанартай тусламж үзүүлэх гэсэн гурван талын оролцоог хангав.

2026.02.25

25/02/2026

“Хүн төвтэй эрүүл мэндийн тогтолцоо” нээлттэй хэлэлцүүлэгт оролцож салбарын эмч, ажилтан, иргэдийн асуултад хариулав.

Эмийн чанар, үнийн асуудал, ЭМДС-ийн доголдол, лиценз, магадлан итгэмжлэл, хөнгөлөлттэй эмийн жагсаалт, эрт илрүүлэг, цахимжилт, инновац гэх мэт асуулт, санал хүсэлтүүдийг бодлогодоо тусган ажиллах болно.