22/05/2022
Төрийн сүлдэндээ адуугаа залдаг нийт монголчуудынхаа өмнөөс, даяарчлагдаж хавтгай болж байгаа дэлхийд монгол гэдэг гайхамшигт өв соёлоо бүтэн авч үлдэхийн төлөө хөдөө хөхөрч, гадаа гандаж яваа 120 мянган малчдынхаа өмнөөс УИХ-ын чуулганы индэрээс энэ үгийг хэлье. Сүүлийн 10 гаруй жил улс төр, эрлийз морины бизнес хийдэг бүлэглэлийн зөвхөн алдар цол, бай шагналын төлөөх улайрал, зугаа цэнгэл болж улсын баяр, наадам маань утгаа алдсан. Өнөөдрийн хэлэлцэж байгаа энэ хууль монгол наадмын маргааныг нэг тийш болгох зарчмыг барих ёстой байсан. Гэтэл төр энэ алдаа завхралыг засахыг хүсэхгүй байгаа мэтээр ойлгогдохоор хуулийн төсөл оруулж ирсэнд харамсаж байна. Үндсэн хуулиар мал төрийн хамгаалалтад байна гэдэг. Гэтэл зугаа цэнгэлийн төлөө монгол азаргаа яргалж байхад төр ямар ч арга хэмжээ авахгүй байна. Монголын төр эрх мэдэл, хөрөнгө мөнгөний өмнө сөхөрсөн гэдгийн баталгаа энэ мөн.
