15/09/2025
ГЭРЧИЙН ГЭМТЭЛ
Хүчирхийлэлийн бичлэг зураг үзэх, унших, сонсох нь бидэнд “гэрчийн гэмтэл” үүсгэдэг гэж үздэг. Бидний тархи айсан цочирол авсан зүйлээ дахин дахин давтах механизмтай байдаг тул таньд айдас түгшүүр буруутай, хүчгүй мэдрэмж, нойргүйдэл, толгой өвдөх байдлууд илэрч болзошгүй. Ямар ч мэдээлэл байсан түүнийг хэрэгтэй хэрэггүй гэж ангилалгүй боловсруулах гэж ажилладаг гэх үү дээ тархи маань.
Та юу ч хийж чадахгүй, таны амьдрал таны хяналтнаас гарчихсан юм шиг барьцгүй түшиг тулгуургүй санагдаж магадгүй. Сэтгэл хөдлөл нь хүнээс хүнд маш халдварламтгай хурдан тархдаг.
Сэтгэл зүйн тэнцвэрээ хадгалахын тулд хүчирхийлэлтэй бичлэг нээж үзэхгүй байх, өдөрт 10 минутаас илүү мэдээ уншихгүй сонсохгүй байхыг судлаачид зөвлөдөг.
Дотны хүмүүстэйгээ холбоо харилцаатай байж энгийн яриа өрнүүлээрэй, бат бөх харилцаа нь бидэнд аюулгүй мэдрэмж төрүүлдэг. “ Би амьдарлынхаа өөрийнхөө эзэн” гэдэг хяналтын мэдрэмжээ сэргээхийн тулд жижиг зүйлүүд дээр юу идэхээ, ямар хувцас өмсөхөө, хэзээ юу хийхээ өөрөө сонгоорой.
Жижиг ч гэсэн хурдан үр дүн авчрах бодит зүйлс хийгээрэй аягаа угаах, ширээгээ цэгцлэх, хогоо хаях гэх мэт.
Хэрэв айдас түгшүүр тухгүй байдал мэдрээд байвал “Надад учирсан бодит аюул занал байгаа билүү? Болсон зүйлд би ямар нэгэн буруутай юу ? Би аюулгүй тайван байж болно. Би одоо … хийж байна. би яг одоо сууж байна, миний хөл газар дээр гишгэж байна, газар бат бөх тогтвортой.. гэх мэтээр өартөө хэлж анхаарлаа өөрийгөө энд одоо авчрахад анхаараарай.
Хэрэв таны сэтгэл санаа тогтворгүй юунд ч юм санаа зовоод байгаа юм шиг болох, үр хүүхдээ яачих бол ийчэх бол гэж бодоод түгших эсвэл юм юм төвөгтэй санаснаар болохгүй санагдаад уцаарлах, уурлах байдал нэмэгдээд байвал сэтгэл зүйчтэй ярилцаарай.
Жил гаруйн өмнөх бичвэрээ зургийн солиод орууллаа.
