12/01/2024
Бага насны хүүхдийн сэтгэл түгшил
(Child anxiety)
Бага насны хүүхдүүд маань ямар нэгэн зүйлээс айх хандлага нилээн байдаг ба үүний нэг том жишээ бол шүдний эмчид үзүүлэх байдаг. Хүүхэд битгий хэл том хүнд ч эмзэг санагдах энэ сэдвээр сая 2 настай охинтойгоо шүдний эмчид үзүүлсэн өөрийн туршлагаасаа хуваалцаж байна.
Ямар ч насны хүнд сэтгэл түгшил үүсгэх үндсэн шалтгаан нь: үл мэдэгдэх байдал эсвэл тодорхойгүй байдал байдаг.
Хүн ихэвчлэн мэдэхгүй зүйлээсээ айдаг, эмээдэг нь үүнтэй холбоотой. Жишээ нь: та аймшгийн кино үзэж байхдаа хаанаас, юу, хэзээ гарч ирж айлгахыг мэдэхгүй учир айдаг. Тийм үү?
Хүүхдүүд шүдний эмч дээр очиход айх хамгийн том шалтгаан нь Шүдний эмч юу хийх бол?, Шүдний эмнэлэгт юу болох бол? зэрэг энгийн мэдээлэл байхгүйн улмаас “тариа тарьдаг”, “өвтгөдөг” эмч рүү явж байгаа гэж бодон айж, сэтгэл түгшил үүсч эхэлдэг.
Миний охин 2 настай хэрнээ эмчээс айлгүйгээр, шүдний эмнэлгийн орон дээр өөрөө гарч суугаад, амаа онгойлгоод, шүдээ эмчид айх аюулгүйгээр үзүүлсэн юм. Энэ нь би хүүхдээ магтаж байгаа юм биш, харин таны хүүхэд адилхан шүдний эмчээс айлгүй үзүүлэх боломжтой гэдгийг сануулах гэсэн юм.
Охиноо шүдний эмч рүү явахад бэлдсэн зүйлс:
1. Шүдний эмч рүү явах гэж байгаа талаар нөхөртэйгээ хажууд нь ярингаа, “Миний охин шүдээ эмчид харуулна шүү” гэж сануулсан
2. Youtube дээрээс шүдний эмч гэж хэн болох, шүдний эмч бидэнд яаж тусладаг болох, шүдний эмчийн өрөөнд ямар үндсэн багаж хэрэгслүүд байдаг болох, тухайн багажнууд яаж дугардаг талаар 3аас дээш бичлэгийг үзэнгээ, хамт яриад, 2 ахынх нь амыг онгойлгоод, эмч ингэж үздэг гэх мэтчилэн үлгэрлэн үзүүлсэн.
3. Шүдний эмч рүү явахын өмнөх өдөр гэрийнхэндээ бүгдэд нь “охин бид 2 маргааш шүдний эмч рүү явна” гэж зарлаж охиндоо давхар сануулсан.
4. Өглөө босоод шүдээ угааж байхдаа “Хоёулаа одоо шүдний эмч рүү явна, тэнд шүдээ үзүүлнэ” гэх мэтээр яриад, цайгаа ууж байхдаа очих эмнэлгийн гадна хаяг болон дотор тохижилтыг Google map дээрээс хайн өөрт нь харуулж “Ийм шүдний эмнэлэг рүү явна гэж сонирхуулсан.
5. Эмнэлэг явж байхдаа, эмнэлэг дотор үзүүлэх цагаа хүлээж сууж байхдаа ч мөн шүдний эмчийн тухай, шүдээ яагаад үзүүлж байгаа тухай, аль шүд нь ямар байгааг бас өөртэй нь ярилцаж суусан.
За тэгээд энэ бүх бичил яриануудын үр дүнд охин маань шүдний эмчид айлгүйгээр үзүүлээд, насаараа ажилласан шүдний эмч өвөөг гайхширалд оруулаад гарч ирсэн байдаг юм аа😊😊😊
Зөвхөн шүдний эмнэлэг ч биш, гадаа гарахдаа хүртэл хүүхдэдээ богино бөгөөд тодорхой байхаар “хаашаа, юу хийхээр явах, очих газраа хэр удах, буцаад гэртэж хэзээ ирэх” зэрэг жижиг мэдээллүүдийг өгч сурвал эцэг эх бидэнд ч, хүүхдүүдэд ч ойлгомжтой байж, харилцааны үл ойлголцол багасахыг сурч, түүнийгээ хэрэгжүүлэх гэж би бас хичээж байгаа.
“Хувцсаа, гутлаа өмс. Хурдхан гарая” гэж хэлэх үү????
-> -> -> ЭСВЭЛ
“Миний хүү гялс хувцасаа, гутлаа өмсчих. Дэлгүүр орж сүү авах хэрэгтэй байна. Удахгүй гэрт зочин ирнэ”
“Миний хүү гялс хувцсаа, гутлаа өмсчих. Өвөө эмээ нь хүрээд ир гэсэн. Өвөө эмээ рүүгээ явъя”
1-2 өгүүлбэр илүү тайлбарлах нь бяцхан хүүхдүүдийн бүхнийг мэдэх гэсэн “Яагаад?” гэх асуултаас биднийг аврахаас гадна таны хүүхэд бүтэн өгүүлбэрээр ярьж сурахад туслана😅😅😅
#сэтгэлтүгшил
#хүүхдийнсэтгэлтүгшил
#сэтгэлзүй
