05/08/2023
Ердөө л энэ шүү дээ!
Зөвхөн Австри гэлтгүй Австралийн дунд сургуулийн бага ангийнханд ч жишээ нь гэрийн даалгавар гэж өгдөггүй. Дараагийн өдөр ангидаа ирэхэд ямар ч дарамтгүй гэсэн үг. Ёстой нөгөө дурласан охиндоо дуу аялан очих дуртай гэдэг шиг байгаагаараа давхиад очих нөхцлийг бүрдүүлдэг ...
Сургууль, гэрийн хооронд хэдэн номоо ээлжлээд зөөгөөд байх ч шаардлага байхгүй. Номнууд ангид нь л байна. Дэвтэрнүүд нь ч ялгаагүй. Гэртээ мартаж ирээд нүд болохоос сэргийлдэг гэсэн үг. Хүүхэд цүнхэндээ ангийнхандаа гайхуулах, бэлэглэх юмаа л үдийн цайны савтай хийсэн харагддаг.
Манайд дунд сургуульд хоорондоо ярьж болохгүй зөвхөн урагшаа хараад суух ёстой гэсэн дүрэм хэвээрээ байгаа гэж сонссон ...
Гараа урдаа аваад хажуудахтайгаа ч ярих эрхгүй суусаар хүнтэй ярилцах, өөрийгөө илэрхийлэх чадвар муутай хүмүүс л төгсөөд байдаг ...
Австралийн бага анги 6, 6-гаараа ширээ тойрон суух бөгөөд хүүхдүүд нь таалагдахгүй бол өөр ширээ сонгох эрхтэй. Ширээнийхэнтэйгээ битгий хэл хажуу ширээнийхэнтэй ч бурах, тоглох эрхтэй байдаг нь өөрийгөө илэрхийлэх, зөв, цэгцтэй ярьж сурахад нь дэмтэй байдаг гэж үздэг гэсэн ...
Дунд, ахлах анги руу ороод ирэхээрээ хүүхэд ямар хичээлийг аль семестертээ үзэхээ сонгодог бөгөөд нэг анги гэсэн ойлголт алга болж, нөгөө ангийн хүүхдүүдтэйгээ холилдон нэг хичээлд нийлж, нэг хичээлд салж хичээллэн одох нь харилцааны хөгжлийн дараагийн шат гэлтэй ...
Тухайн хичээл бүр түвшин тогтоолтоор хэд хэд хуваагдсан байдаг нь жишээ нь тоонд муу хүүхэд тоонд сайн хүүхэдтэй нэг ангид орж дээрэлхүүлэх, муугаа үзүүлэхээс сэргийлдэг. Нөгөө талаасаа гүйх нохойд баах нохой бэлдэхгүй гэсэн үг ... Тухайн хичээлд сайн нь тасран одвол одог гэж ...
Эцэг эхийн хурлын тухайд бөөнөөр нь суулгаж байгаад заримыг нь магтаж, заримыг нь ичээх үйлдэл хийхгүй. Бүгд очих ч шаардлагагүй. Тухайн хичээлийн багштай уулзах хүсэлт гаргавал тусгайд нь ганцаарчлан хүлээн авч уулзан хүүхдийн сайн, мууг ярилцдаг ...
Хүүхэд хичээлдээ хоцрох, таслахад өөрт чинь л муу шүү гэдгийг эвтэйхэн ойлгуулах болохоос ангид нь чичлэх, сургуулиар нэг зарлан ичээх, аав, ээжийг нь олны өмнө улайлгах үйлдэл огт хийхгүй ...
Баярын бичиг, сайшаалын үнэмлэх шиг юмыг сар, улирлаар нь өгч харагддаг. Гэхдээ дан онц сураад буй хүүхдээс гадна муухан сурч буй ч тэрүүхэндээ ахиц гаргасан хүүхдийг олж өгдөг нь цаагуураа урам өгөн дэмжих арга гэж үздэг бололтой ...
Хүүхэд бүр онц сурах албагүй, бүх хичээлдээ жигд байх ч албагүй гэж үздэг ...
Жиргэсэн сэдвийнхээ эхлэл рүү эргэн очвоос энд бага ангийн хүүхдийг яаж нийтэч, яаж хэл ярианы хөгжил сайтай, яаж өөртөө итгэлтэй болгох вэ гэж л хичээдэг болохоос өөрөөсөө хүнд цүнх үүрүүлэн нааш цааш сажлуулж, гэрийн даалгавар гэдэг том дарамттай амьдруулдаггүй юм билээ л ...
Монголд нэвтрүүлэхэд болохгүй юмгүй арга барил юм уг нь. Хүүхдийн хүмүүжил, сургалтанд том өөрчлөлт авчирна даа ...
Би Монголд хүүхдүүдийнхээ явж байсан сургуулиудын хичээлийн эрхлэгч, багш нартай уулзахдаа хэлсээр л ирсэн. Санаанд нь багтаж өгөхгүй байх шиг харцгаадаг ...
Манайх Кембрижийн сургалттай болсон, наадах чинь нэг их сонин биш гэж хэлсэн багш ч бий:)
Тэр нь яг ямар учиртайгаа ч сайн мэдэхгүй. Хажуудах хүүхэдтэйгээ ч таван үг солин хичээлээ хамтран хийх боломжгүй сургалт, орон зай бат бөх оршсоор ...
21-р зуун гараад нилээн удчихлаа шд.
21-р зууны хүүхдүүдэд яг юуг ямар арга барилаар заах, юунд бэлдүүлэх, хаана яаж тэнцүүлэхийг анзаарсан, тэгэж ажилладаг улсын битгий хэл хувийн сургууль манайд гарын 5 хуруунд багтана ... Багтаж буй хэдийн багш нар нь ч жигд биш ...
via
