17/06/2025
Занданшатарыг боорлохын оронд Оюун-Эрдэнээс орлогоо нотлохыг шаард!
Хөгшдийн дууг хөөрхөн охин дуулахгүй эээ. Одоо яг яамаар байна, юу хүсээд байгаа юм, дотроосоо урвагч тодруулж Шар хадны энгэрт цаазлаад, Дотоод яамандаа залуусыг ажилд аваад, тэгснээ урвагч олж ирэхгүй бол өөрийг нь хорьж байцаагаад, хорь хонуулаад бас цааз уу? Энэ яг ямар технологи вэ? Бид ямар урвагч олж бууддаг 1937 онд амьдраад байгаа юм уу? Намаа хуваана, танай, манай тал гэж тачигнатал гөлөлзүүлнэ. Танхимаа хуваана, таалдаг, таалдаггүй гэж тарж унатал талцуулна. Улсаа хуваана, урвагч урвалзагч гэж ухаан самууртал хагаралдуулна. Яг сайхан хоёр тал болгож байгаад ярзайтал зодолдуулна, өмнө өмнөөс нь буу шагайлгана. Херопаганда урвагч хайгаад удлаа. Тэр ч урвасан, энэ ч урвасан гэдэг үлгэр үглээд, үүд хоймроо хольж хутгаад хорлон сүйтгээд сар гаруй боллоо. Үнэхээр урвагч олмоор байгаа бол 1.5 тэрбумын бенз маркийн хос аяллын машин, 10.8 тэрбумын нисдэг тэрэг, 17 саяын бөгж, 20 саяын гүйлгээ гээд татвар төлөгчдийн мөнгийг үрж, үлээж, Лондонд хөл бөмбөгийн баг ивээн тэтгэж байсан гэх өөрсдөөсөө хайх хэрэгтэй. Ард түмэн чинь ядуу байхад арай их тансаглахыг харин жинхэнэ урвалт гэнэ. Дээр нь тэр Оюун-Эрдэнэ гэдэг чинь хэн юм бэ, хүн урваад, урвуулаад байдаг ямар улс гүрэн үү? Улсаасаа урваж худалдсан хүмүүсийн тухай бол ярьж болно оо. Босч л байдаг, унаж л байдаг Засгийн газар, томилогдож л байдаг, огцорч л байдаг Ерөнхий сайд шд. Аль ч Засгийн газар буруудвал унана, мөнхийн суудал биш, зөвдвөл түүх гэрчилнэ, мөнх бусын хорвоо...ямар юмны чинь урвагч, яасан их юм ярьж, яах гээд ингээд шоудаад байдаг юм. Тэр шоугаа Болормаа нарын аймшигт улаан хамгаалагчаар дамжуулаад Ерөнхий сайд Занданшатарыг шантаажлаад хэвтчихлээ. Гадаад харилцааны яам, Соёлын яамыг авах юм байх аа. За Болормаа нарын залуу гишүүд ээ, наад Оюук, Хэро, Жэнок нарын үеэ элээж яваа үеийнхний дууг үе нь эхэлж буй залуус залгуулж дуулахгүй шүү. Ямар хүмүүсийн гар хөл болоод, яг юу хийгээд яваад байгаагаа бодож үзсэн үү? Херопагандагийн ээлжит хүүхэлдэй болох чинь эмгэнэл шүү дээ, ээлж дараалан авилгын хэрэгт араасаа, урвасан хэрэгт урдаасаа ухуулдаг, өмнөх хүмүүсийнх нь тавилан эх орноосоо зугтах хүртлээ эвгүйдсэн түүхтэй. Гэтэл яав, хөгшдийн дууг хөөрхөн охин дуулна ингэнэ эээ. Тэгдэггүй юм, тээглэж унах нүхийг чинь өөрөөр чинь ухуулж байна. Та нар ингэж Занданшатарыг боорлож байхын оронд Оюун-Эрдэнээс орлогоо нотлохыг шаардсан бол нийгмээрээ дэмжих байлаа. Ерөнхий сайд Занданшатарт эрхийг нь өг, ажлыг нь хийлгэ, зун шувтарлаа. Хэнийг танхимдаа багтааж, хэрхэн ажиллах эрхийг нь бататгасан Үндсэн хууль бий. Үүдийг нь сахилаа гээд Үндсэн хуулиа уландаа гишгэх үү? Түрүүчийн Засгийн газраас ямар ч хүн улирч ажиллаж болно, эрх нь нээлттэй. Төгрөг нуурын ордоо авмаар байна, Гадаад харилцааны ололтоо бэхжүүлмээр байна, төсвөө тодотгомоор байна. Оюун-Эрдэнийг анх Засгийн газраа байгуулж байхад хэн ч ингэж эрхэнд нь халдаж байгаагүй юм шүү. Арай л давраад, ард олноо үгүйсгээд, хууль журмаа гишгэлээд, худал попрох чинь ихдээд байгаа юм биш үү? Ерөнхий сайд Занданшатар ч гэсэн энэ мэтийн эрхэнд нь халдаж байгаа гишүүдэд сатаарч саатаад байлгүй, эрх үүргийнхээ хүрээнд ажлаа эхлээч ээээ. Өчүүхэнд бүдэрч, энүүхэнд айх байсан юм бол яах гэж ер нь Ерөнхий сайд болсон юм? Зоригтой хүний зорьж хийдэг ажил байх шүү!
