25/09/2025
✨Албан ёсны мэдэгдэл✨
SKPA-2 төслийн хүрээнд Монгол Улсад PrEP-ийн эмийг анх удаа албан ёсоор бүртгүүллээ.
Монгол Улсын Хүний эмийн зөвлөлийн 2025 оны 9 дүгээр сарын 19-ний өдрийн хурлаар Өртөлтийн өмнөх сэргийлэлтийн (PrEP) эмийг бүртгэх шийдвэр гарсныг та бүхэнтэй хуваалцахдаа бид баяртай байна.
Энэхүү амжилт нь ЭМЯ-ны бодлогын дэмжлэг болон ХӨСҮТ, ЗӨСҮТ, ЭЭХХЗГ, НҮБ-ын Хүүхдийн сан зэрэг үндэсний болон олон улсын байгууллагуудын хамтын ажиллагаа, уялдаа зохицуулалтын үр дүн юм.
👉 Эм, эмнэлгийн хэрэгслийн тухай хуулийн шинэчилсэн найруулгаар хувийн салбарын сонирхлыг татдаггүй ч нийгмийн эрүүл мэндийн өндөр ач холбогдол бүхий эмийг улсын байгууллагаар бүртгүүлэх боломж бий болсон. Бид энэхүү шинэ боломжийг анх удаа ашиглан PrEP-ийн эмийг амжилттай бүртгүүлсэн нь түүхэнд тэмдэглэхүйц ач холбогдолтой бөгөөд цаашид өнөө хүртэл бүртгэгдэж чадаагүй эмүүдийг улсын бүртгэлд оруулах шинэ замыг нээсэн чухал үйл явдал боллоо.
Ингэснээр Монгол Улс ХДХВ-ийн халдвараас урьдчилан сэргийлэх тогтвортой, шинжлэх ухаанд суурилсан арга хэрэгслийг албан ёсоор нэвтрүүлэх шинэ шатанд гарч, 2030 он гэхэд ДОХ-ын тархалтыг төгсгөх дэлхий нийтийн зорилтод хүрэхэд чухал түлхэц болох боломж бүрдэж байна.
PrEP-ийн эмийг бүртгүүлэх үйл явцад үнэтэй хувь нэмрээ оруулсан:
-Эрүүл мэндийн яамны Бодлого төлөвлөлтийн газар болон Нийгмийн эрүүл мэндийн газар
-ЭЭХХЗГ-ын импортын эмийн бүртгэлийн хэлтэс
-ХӨСҮТ-ийн ДОХ/БЗДХ-ын ТСА-ны хамт олон
-ЗӨСҮТ-ийн Эм, эмнэлгийн хэрэгслийн нөөцийн төв агуулахын хамт олон
-НҮБ-ын Хүүхдийн сангийн мэргэжилтнүүд
-Үндэсний зөвлөх М. Халиунаа
нарт Залуус Эрүүл Мэндийн Төвийн SKPA-2 төслийн багийн зүгээс гүн талархал илэрхийлье.
📢 Энэ бол хамтын хүчин чармайлтын үр дүн бөгөөд Монгол Улсад эрүүл мэндийн тэгш хүртээмжийг бодит ажил хэрэг болгох чиглэлд нэг алхам урагшилсан түүхэн үйл явдал юм.
