07/08/2025
Үнэ цэнэд хөрөнгө оруул?
За энэ эмч үнэ цэнэд хөрөнгө оруул гэж бичээд уналаа. Энэ яаг юуг хэлэх гээд байна гээд нэг тогтож уншихыг зөвлөе. Үнэ цэнэ гэж юу вэ? Бид бүгд өөрийн гэсэн дуртай зүйл, хобби, ашиг сонирхол гээд олон зүйлд цаг хугацаа хийгээд хөрөнгө мөнгөө зарцуулж байдаг. Тэр хөрөнгө оруулж, цаг хугацаагаа зарцуулсан зүйл бол ирээдүйд ямар өгөөжийг авч ирдэг, эерэг ач холбогдол өгдөг билүү хэмээн эргэцүүлэн бодоход ихэнхдээ үгүй. Хүний амьдрал болсон хойно найр наадам, зугаа цэнгэл хүнд байлгүй яахав тэрийг бол үгүйсгээгүй. Гол зүйл бол үнэ цэнэ, энэ бол ирээдүй болох маргааш үр өгөөжөө өгч, эерэг өөрчлөлтийг бий болгож ач холбогдлоо өгч байдаг чухал зүйл юм. Иймд үнэ цэнэтэй зүйлийг дэмжиж тэр зүйлд цаг хугацаагаа өгч хөрөнгө оруулж байх ёстой. Яагаад вэ гэжүү, ирээдүйд сайхан нийгмийг бүтээж өнөөдрөөс илүү маргаашийн сайхан зүйлийг бүтээхийн тулд юм.
Тухайлбал, Номтой хүү өлсөж үзээгүй, сайн үр гэрийн голомтыг асаана хэмээн зүйр үг байдаг. Үр хүүхдээ зөв хөдөлмөрч хүн болгоход цаг хугацаагаа зарж хөрөнгө оруулбал сайн үр хүүхэд ирээдүйд гэр бүлдээ ач тустай байхын зэрэгцээ сайхан нийгмийг бүтээхэд гар бие оролцоно. Номтой хүү өлсөж үзээгүй гэдэг шиг үр хүүхдээ боловсролтой, хөдөлмөрч болговол сайн зүйлээ хийгээд хоолоо олж гэр бүлээ тэжээхээс гадна сайхан нийгмийн эд эс болно. Баатар хүн мэндэлсэн газар сайн цаг ирдэг шиг сайхан нийгмийг бүтээх зөв шийдвэр, мэргэн ухаан гаргавал ард олон аз жаргалтай амьдарна. Энэ баатар хүн бол зөв зүйл, мэргэн үйлийг хийж сайхан нийгмийг бүтээхийн тулд хичээл зүтгэл гаргаж маш сайн стратегийн үр дүнд сайхан нийгмийг цогцлооно. Мөн хүн эрүүл мэнддээ хөрөнгө оруулж байвал тэр хэмжээгээ эрүүл аж төрч элэг бүтэн сайхан өтөлдөг. Тэгэхээр үнэ цэнэ гэдэг бол хүний эрүүл мэнд, үр хүүхдийн хүмүүжил, залуусын эрдэм боловсрол, ухаалаг удирдагч, сайн стратегич, бид нарын хүрээлэн буй орчин байгаль эх, гадаадаас валъю оруулж ирэх компани, сайхан нийгэм зэрэг болой.
За тэгээд хэлэх гэсэн санааг хальт ойлгосон байх, хүмүүс ойлгодог боловч үйлдэл хийдэггүй. Сайн цаг өөрөө ирдэггүй, харин сайн цагийг хүн авч ирдэг буюу бүтээдэг гэж ойлгож болно. Иймд зөв үнэ цэнэтэй зүйлийг ямагт дэмжиж хөрөнгө оруулж байдаг экосистем эх оронд минь дутагдаад байгаа хэрэг.
Арван жилийн сурагч байхад манай анги Байтагбогд хавьд зугаалж билээ. Тэр үед нэг буурал ах морьтой ирж хэд гурван зүйл солилцож үнэ цэнэ гэдгийг анх ухаарч билээ. Бид удахгүй дунд сургуулиа төгсөж дээд сургууль авч мэргэжил эзэмшиж сайхан амьдрах талаар ярихад ах өгүүлрүүн: Хүн бүрийн зам мөр янз бүр ямар үнэ цэнэ бүтээж буй нь ялгаатай. Сайхан нийгэм ирээдүйд хэрэгтэй үнэ цэнэ бүтээж байхад хэдэн үеээрээ хил дагаж мал малласандаа харамсдаггүй бахархдаг гэж билээ. Монгол улс тусгаар тогтнож эх орон болж дархан хилээ хэдэн үеээрээ хамгаалж тэр газрыг эзэнтэй байлгана гэдэг маш том үнэ цэнэ. Тэр үнэ цэнэд олон эх орончид алсыг харж хөрөнгө оруулсан учраас эдүгээ эх орон тусгаар улс болж бид аж төрж байна. Ах бол хэдэн үеээрээ эх орны хил дагасан Байтагбогд орчим мал маллаж эх орныхоо хил манаж эх орон хэмээх үнэ цэнэтэй зүйлд гар бие оролцож буйг бодож билээ.
За тэгээд эмч би зөвлөхөд хүн бүрийн аж амьдрал зам мөр янз бүр ирээдүйдээ өгөөжөө өгөх үнэ цэнэд хөрөнгө оруулж байх хэрэгтэй. Манай нутгийн хүмүүс үнэ цэнэд хөрөнгө оруулж байдаг ухаалаг ард түмэн билээ.
#үнэцэнэ #эхорон
