Эрүүл хоолны жорууд

31/08/2025

Шар тос сайн гэсэн чинь өглөө кофендоо хийж уугаад, шар тостой арвайн гурил багсарч идээд, хуушуураа шар тосондоо хайраад, цуйвангийн гурилаа хүртэл шар тосоороо тослоод 🤣🤣🤣
Ихдүүлбэл ямар ч зүйл хор болноо.

Өдөрт нэг л удаа, өөрийн хурууны өндөг шиг /хамгийн ихдээ нэг халбага/ орчмыг хэрэглэхэд л жинхэнэ эрдэнэ болдог юм гэсэн шүү Уламжлалтын эрдэмт оточ айлдсан бөлгөө.

26/08/2025

Ногоо хөлдөөж хадгалахыг хүмүүс их сонирхох болжээ.
✅Сайн судлаад ногоо тус бүр дээрээ зөв хадгалах арга сонгох
✅Маш хурдан хөлдөөх ёстой учраас хөлдөөгчний багтаамжаа тооцож ногоогоо авах
✅ Үнийн ялгаа их болдог цөөн төрлийн нарийн ногоогоо сонгох

Сэтгэл хөөрлөөр өчнөөн ногоо авч буруу зөрүү хөлдөөгөөд дараа нь баахан амт өөрчлөгдсөн хөлдүү ногоотой болов оо.

26/08/2025

Монголд хүнсний үнэ арай аймаар өндөр байнаа.
Хэдхээн юм авахад л 100, 200 мянга
Хамгийн өндөр өртөгтэй дэлхийн хотуудтай эн зэрэгцэх нь
Гэтэл хүмүүсийн цалин тэтгэвэр хэд билээ дээ

22/08/2025

Чанартай эсэх нь баталгаагүй элдэв витамин, хүнсний нэмэлт янз бүрийн бэлдмэлд мөнгөө үрж байхаар
хүнсээ гайгүйхэн олон төрлөөр базаагаад сайхан тохируулаад идээрэй.
Шинэ ургацын монгол ногоо, олон төрлийн будаа, үр тариа, ааруул, тараг, хоормог, өрөм, ээзгий, байгалиас нь түүсэн аньс, чацаргана, нэрс ямар олон амин дэм эрдэс шим тэжээлтэй гэж санана.
Эднийгээ авах гэхээр үнэтэйг нь гайхаад, харамлаад, баахан шаардлага тавиад байгаа хэрнээ юуг нь мэдэхгүй бэлдмэлээ өчнөөн мөнгөөр аваад ид шидэнд нь найдаад байх юм

15/08/2025

Тарган байж байгаад турснаа л тураадаг коуч, эрүүл хооллолтын коуч болоод
сэтгэл гутралтай байж байгаад мэргэжлийн сэтгэлзүйчээс эмчилгээ авч эдгэрснээ өөрөө сэтгэлийн шархны коуч болоод...
Баахан л мэргэжлийн бус хүмүүсийн сургалт

Уг нь хоолзүй, шим тэжээл, эрүүл хооллолт гээд энэ их өргөн мэдлэгийг мэргэжлээр нь их сургуульд 4 жил сураад, төгссөнийхөө дараа гадаад дотоодын олон сургалтуудад дахин сууж нэмж мэргэшиж, цаг үеэсээ хоцрохгүй байж гэмээнэ хүнд заах боломжтой болох юм.
Хэдий энэ мэргэжлээр сурсан ч гэлээ, одоо ч нэмээд сурсаар байгаа ч энэ олон коучуудын эрүүл хоолны сургалтуудыг хараад өмнөөс нь бүүр айгаад, санаа зовоод, Эмчилгээний хоолны сургалтаа хийхээс бүүр халшраад байна шүү

14/08/2025

Үхрийн мах, хөц будаатай шөл
ОРЦ:
Үхрийн мах -200гр
Хөц будаа - 80-100 гр дэвтээгээд хонуулчвал зүгээр
Лууван -30 гр
Бууцай - 1-2 навч
Улаан лооль -50 гр
Ногоон сонгино, давс -амталгаагаар
Ясны шөл-400-600 мл
ХИЙХ ЗААВАР:
Ясны шөлөндөө үхрийн мах болон дэвтээсэн хөц будаагаа хийж буцалгана.
Жижиглэж хэрчсэн лууван, улаан лоолио нэмнэ.
Гаргахын өмнө бууцайгаа нэмээрэй.
ХӨЦ БУДААНЫ АШИГ ТУС
Хөц будаа нь гадна талын хальс нь арилаагүй, хамгийн бага боловсруулсан, шим тэжээлээр хамгийн баялаг будааны төрөлд ордог. Эрүүл мэнд, ялангуяа элэг, ходоод гэдэс, жингийн зохицуулалт, зүрх судасны системд олон талын ашиг тустай.
✅ Хөц будааны хүний биед үзүүлэх гол ач тус:
Элэг хамгаална, өөхлөлт бууруулна
Хөц будааны их хэмжээний эслэг нь гэдэсний гүрвэлзэх хөдөлгөөнийг сайжруулж, цөс сайн гадагшлуулна. Энэ нь элгэнд хуримтлагдах өөх тосыг багасгаж, элэг өөхлөхөөс сэргийлдэг.
Цусан дахь сахарын хэмжээг тогтворжуулна
Цусан дахь сахарын хэмжээг огцом нэмэхгүй учраас чихрийн шижинтэй болон инсулины эсэргүүцэлтэй хүмүүст тохиромжтой.
Жин хасах, бие хөнгөрүүлэхэд тустай
Өндөр эслэгтэй учраас хурдан цадах мэдрэмж төрүүлж, илүүдэл калори авахгүй байх боломжтой.
Зүрх судасны эрүүл мэндэд сайн
Магни, селен зэрэг эрдэс бодисоор баялаг тул зүрх судасны өвчнөөс сэргийлнэ, даралт бууруулахад дэмжлэг үзүүлнэ.
Дархлааг дэмжинэ
Будааны хальсанд агуулагдах В группийн амин дэм, селен зэрэг нь дархлаа сайжруулна.
Ходоод гэдэс цэвэрлэнэ
Эслэг ихтэй тул өтгөн хаталтаас сэргийлж, ходоод гэдсийг цэвэрлэх, шимэгдэлт сайжруулахад тустай.
Бие организмын хорыг гадагшлуулна
Байнга хэрэглэвэл шээс хөөх, биеэс илүүдэл шингэн, хорыг гадагшлуулах үйлчилгээ үзүүлдэг.
АНХААР: Хэт их хэрэглэвэл, эсвэл дутуу болгож идвэл хэт эслэг ихдэж гэдэс хийгээр дүүрэх, гүйлгэх эрсдэлтэй.

13/08/2025

12/08/2025

Нэг хэсэг витамин нэмэлтүүд сайн гэж хошуурч байсан. Сүүлийн жилүүдэд дэлхийн чиг хандлага эрс өөрчлөгдөж, аль болох хоол хүнснээсээ л биед хэрэгтэй амин дэм эрдэс бодисоо авахыг зөвлөдөг болсон.
Хоол хүнсээ хэт боловсруулж, хэт амтанд ач холбогдол өгч элдвээр амтлалгүй байгалийн амтаар нь зохистой хэмжээгээр хэрэглэ гэж.
Хэрвээ тэгвэл бидний бие махбодь өөрт хэрэгтэй зүйлээ өөрөө үйлдвэрлэчих хүчин чадалтай, маш ухаалаг систем.
Өдөр бүр ашигтай бактери нэмэлтээр хэрэглэх нь хүний өөрийн гэдэс "залхуу" болж ашигтай бактери "үйлдвэрлэхээ" зогсоодог гэсэн байна лээ шүү
Тиймээс сайн гэсэн элдэв витамин, хиймэл орцтой янз бүрийн капсултай нэмэлтүүд уухаасаа өмнө сайн судлаарай.
Тэрний оронд сайхан ургамлын цайнууд, байгалийн жимс, шинэхэн ногоо, шимт малын махаа хэмжээг нь тааруулаад хүртээрэй.
Бидний дийлэнх нь хоолоо ихдүүлснээс л өвчин хурааж байгаа шүү, аль болох багасгаарай🩷

10/08/2025

Хүндэт аав ээж, эмээ өвөө нараа
🙏Хичээлийн шинэ жил эхлэх дөхөж байгаатай холбогдуулаад таниас хүсэх нэг зүйл байна 🙏
Хүүхэдтэйгээ 5 минут суугаад түүнд бусдыг хэт өндөр, намхан, бүдүүн, туранхай эсвэл арьс нь ямар ч байлаа гээд шоолох зүйл биш юм шүү гэдгийг сайн тайлбарлаж хэлээрэй. Бас хэн нэг сурагч шил зүүдэг, бусдаас ялгаатай, байнга нэг хувцсаа өмсдөг байлаа гээд тэр шоолох зүйл биш,
Хуучин цүнх, шинэ цүнхний аль аль нь ижилхэн мөрөөдлөөр дүүрэн байдгийг үрдээ тайлбарлаарай.
Хэнийг ч ядуу, дутуу болохоор нийгмээс хасах учиргүйг зааж өгөөрэй.
Дээрэлхэх нь бусдыг гомдоодог, өвтгөдөг бөгөөд сургууль бол өрсөлддөг газар биш харин суралцдаг газар болохыг хэлээрэй.
Бид бүгдээрээ адилхан үнэ цэнтэй, эрх тэгш хүн гэдгийг хүүхдэдээ ойлгуулаарай.
🥰❤️Боловсрол гэрээс эхэлдэг.

04/08/2025

Сургалт асуусан чат их ирж байнаа
Уучлаарай би нь саам, айраг уугаад хөдөө амарч явнаа, нэлээн удна
Мөддөө сургалт хийж амжихгүй нь ээ🙏

03/08/2025

100 эрхэм-д Хайдав гуайн хэлсэн гоё үгс байдаг даа.
Юуг ч битгий хэтрүүл гэж❤️
Хоол хүнсэн дээр ч яг ийм. Та аль нэг хүнсээ тас хорихын оронд зүгээр сайхан тааруулаад л хүрт.
Сайн зүйлс ч тун нь ихэдвэл хор болдог. Хэмжээг нь тааруулвал бүгд шим болно❤️

03/08/2025

Карнивор дэглэм ярьж буй нэг бүсгүй
"Манай өвөг дээдэс дан мах иддэг байсан" гээд далбайсан, өөрийнхөө нүүрнээс том стейк хазалж буй рийлсээ оруулжээ.
Уучлаарай манай монголын өвөг дээдэс л лав жилийн 4 улирал өдөр бүр мах иддэг байгаагүй шүү.
Өвлийн хэдэн сардаа л иднэ. Идэхдээ бас исэг идээтэйгээ хослуулна
Монголчуудыг маш бага иддэг, тэгсэн хэрнээ эрч хүчтэй эрүүл чийрэг, өл сайн даадаг, тэсвэр тэвчээртэй тухай гайхан бичиж үлдээсэн олон түүхийн баримт байдаг юм шүү. Судлаад үзээрэй.
Дандаа мах идээд дэлхийг эзэлсэн ч гэх шиг, тэгж худлаа хүмүүсийн тархийг угаах хэрэггүй.
Монголчуудын уламжлалт хоолны соёл бол маш өргөн, маш гайхалтай, одоогийн гэдэсний ашигтай бактери гэж шуурч эхэлж буй зүйлсийг аль хэдийнэ ойлгоод хэрэгжүүлчихсэн тийм л агуу соёл байсан юм