04/05/2026
ЭХ, ХҮҮХЭД, НӨХӨН ҮРЖИХҮЙН ЭРҮҮЛ МЭНДИЙН ҮНДЭСНИЙ ЗӨВЛӨГӨӨН ЗОХИОН БАЙГУУЛАГДЛАА
Эрүүл мэндийн яам, НҮБ-ын Хүн амын сан, НҮБ-ын Хүүхдийн сан хамтран эх, хүүхдийн эндэгдлийг бууруулах, тусламж үйлчилгээний чанар, хүртээмжийг сайжруулах зорилготой үндэсний зөвлөгөөн, хэлэлцүүлгийг зохион байгууллаа.
Зөвлөгөөнөөр эх барих, нярай, хүүхэд, нөхөн үржихүйн эрүүл мэндийн тусламж үйлчилгээний өнөөгийн нөхцөл байдалд үнэлгээ хийж, тулгамдсан асуудлыг тодорхойлох, шалтгаан, нөлөөлөх хүчин зүйлсийг задлан шинжлэх, салбар хоорондын уялдаа холбоо, хамтын ажиллагааг сайжруулах, цаашид хэрэгжүүлэх бодит арга хэмжээ, шийдлийг тодорхойлоход чиглэсэн хэлэлцүүлэг өрнүүлэв.
Тус зөвлөгөөний үеэр сэргийлж болох эх, нярайн эндэгдлийг бууруулах, гэр бүл төлөвлөлтийн хангагдаагүй хэрэгцээг арилгах, эх, нярай, нөхөн үржихүйн тусламж үйлчилгээг багийн зарчмаар хүртээмжтэй хүргэх нь салбарын тэргүүлэх зорилт хэвээр байгааг онцоллоо.
Мөн Эх, хүүхдийн эрүүл мэндийн үндэсний төвийн төлөөлөл:
* Клиникийн профессор, зөвлөх зэргийн эмч Л.Ганбаяр “Хүүхдэд тохиолдох ховор өвчин буюу Монгол Улсад эмчлэх боломжгүй өвчлөлийн нөхцөл байдал”,
* Анагаах ухааны доктор, клиникийн профессор, зөвлөх зэргийн эмч Г.Баттулга “Эрсдэлтэй жирэмслэлт, эх баригчийн тусламж үйлчилгээ”
сэдвээр тус тус илтгэл хэлэлцүүлж, салбарын тулгамдсан асуудал, шийдлийн талаар санал дэвшүүллээ.
Зөвлөгөөнд Эрүүл мэндийн яамны Төрийн нарийн бичгийн дарга Н.Эрдэнэбаяр, НҮБ-ын Хүн амын сангийн Монгол Улс дахь суурин төлөөлөгч Др. Халид Шариф, ДЭМБ-ын Монгол дахь суурин төлөөлөгчийн газрын хөтөлбөрийн зохицуулагч Др. Шалала Рафаэль Ахмадова, НҮБ-ын Хүүхдийн сангийн Монгол дахь суурин төлөөлөгч Др. Беате Дастел зэрэг хүндэт зочид, мөн 21 аймаг, 9 дүүрэг болон холбогдох байгууллагуудын удирдах ажилтан, мэргэжилтнүүд өргөн бүрэлдэхүүнтэй оролцлоо.
