06/05/2026
“Гарын эрүүл ахуй-Шийдвэр гаргагчдын оролцоо” сэдэвт хэлэлцүүлэг зохион байгуулагдлаа.
“Цэвэр гар-бидний дархлаа” гарын эрүүл ахуйн нөлөөллийн аяны хүрээнд Эрүүл мэндийн ажилтны гарын эрүүл ахуй сахих дадал хэвшлийг сайжруулах, гарын эрүүл ахуй сахих нөхцөл, боломжийг бүрдүүлэхэд эрүүл мэндийн байгууллагын удирдлагын оролцоог нэмэгдүүлэх зорилгоор “Гарын эрүүл ахуй- шийдвэр гаргагчдын оролцоо” сэдэвт хэлэлцүүлэг уулзалтыг 2026 оны 05 дугаар сарын 06-ны өдөр ЭМЯ, НЭМҮТ, ХӨСҮТ, Монголын тархвар халдвар судлаач эмч нарын нийгэмлэг хамтран НҮБ-ын Хүүхдийн Сангийн дэмжлэгтэйгээр амжилттай зохион байгууллаа. Хэлэлцүүлгийг Эрүүл мэндийн яамны Төрийн нарийн бичгийн дарга Н.Эрдэнэбаяр, Нэгдсэн Үндэстний байгууллагын Хүүхдийн сангийн Монгол дахь суурин төлөөлөгч хатагтай Беате Дастел нар нээж үг хэллээ.
Хэлэлцүүлэгт Нийслэлийн эрүүл мэндийн газар, Төрөлжсөн мэргэшлийн эмнэлэг, хувийн хэвшлийн эрүүл мэндийн байгууллага, дүүргийн нэгдсэн эмнэлэг, эрүүл мэндийн төв, амаржих газрын эмчилгээ шийдвэр гаргах түвшний 70 гаруй албан тушаалтан хамрагдлаа.
✅Гарын эрүүл ахуй бол энгийн мэт боловч хүний амь насыг хамгаалах хамгийн үр дүнтэй, өртөг багатай арга хэмжээний нэг билээ.
Эрүүл мэндийн тусламж үйлчилгээний явцад үүсэх халдвараас сэргийлэхэд зөвхөн эмч, эрүүл мэндийн ажилтан бус, бодлого тодорхойлогч, удирдах түвшний шийдвэр гаргагчдын идэвхтэй оролцоо нэн чухал юм.
Өнөөдрийн уулзалтад ХӨСҮТ-ийн ерөнхий захирал С.Энхболд Эрүүл мэндийн ажилтны гарын эрүүл ахуй сахилтын түвшингийн үнэлгээний урьдчилсан дүнг танилцуулсан бол
Панел хэлэлцүүлэгт Улсын Хоёрдугаар Төв Эмнэлгийн (УХТЭ) Ерөнхий захирал Э.Анхбаяр, Хан-Уул дүүргийн нэгдсэн эмнэлгийн захирал Т.Энхзаяа, Монголын тархвар халдвар судлаач эмч нарын нийгэмлэгийн тэргүүн М.Цолмон, Халдварт өвчинй судлалын үндэсний төвийн Халдварт өвчний тандалт судалгааны албанд Эрүүл мэндийн тусламж үйлчилгээтэй холбоотой халдварын тандалтын тасгийн дарга С. Амарзаяа, "Грандмед" эмнэлгийн Эмнэлзүй эрхэлсэн захирал Д.Энхбаяр нар оролцож удирдлагын манлайлал, Бодлого, хэрэгжилт, Нөөц, санхүүжилт, Хяналт, үнэлгээ, Шинэлэг шийдэл гэсэн гол асуудлуудыг хөндөн ярилцаж, бодит шийдэл, санал зөвлөмж гаргалаа.
Хэлэлцүүлгийн явцад гарын эрүүл ахуй нь эмнэлгийн тусламж үйлчилгээтэй холбоотой халдвараас сэргийлэх хамгийн үр дүнтэй, өртөг багатай арга хэмжээний нэг бөгөөд зөвхөн нэг байгууллагын асуудал биш, харин эрүүл мэндийн тогтолцооны чанар, аюулгүй байдлын үндэс юм гэдгийг онцлов. Түүнчлэн хэрэгжилт хангалтгүй, бодит нөхцөл байдалд олон сорилт тулгарсаар байгаа, цаашид салбарын хэмжээнд хэрэгжүүлэх ажил их байна.
