14/05/2025
МАНАЛ БУРХАНЫ БЯСАЛГАЛ
“Эрдэнэт хүмүүн биеийг олсон энэ төрлийн минь эрхэм зорилго бол өөрөө гэгээрч, хамаг төрөлхтөнд өгөөмөр хайраа хуваалцах билээ. Энэ эрхэм хэргийн тухайд би эрүүл саруул бие махбод, сэтгэл оюуныг эрхшээх учиртай. Тиймээс эх болсон хамаг амьтны тусын тулд бие, сэтгэлийг анагаан тэтгэх Оточ Маналын бясалгалыг үйлдье” гэсэн сэдлийг агуул.
Үүрийн гэгээнээр, эсвэл аль зохист цагт биеэ тунгалаг гэрлийн цогц байдлаар мэдэрч амьсгалаа ажин төвшин суу. Цээжний төвд зүрхэн хүрдээ найман дэлбээт цагаан лянхуа байдлаар төсөөлж, түүний голд саран мандал дээр Оточ Манал бурханыг тодруул. (Сэтгэлийн агаарт өмнийн огторгуйд ургуулан бясалгасан ч болно.)
Ариун лагшин нь гүн хөх гэрлийн чанартай, асар дээдийн хувилгаан бэлгэ төгөлдөр дүртэй. Баруун мутраар дээдийг соёрхох дохио үзүүлж, өвчин бүхнийг анагаах увдист намжил арурын нахиа барьжээ. Зүүн мутраа тэгш агуулж, мөнхийн рашаан бүхий бадар аягыг оршоожээ. Гурван ариун суртлыг (сахил, бясалгал, билиг) бэлгэдсэн номын гурван хувцас асааж, арга билиг шүтэн барилдсан урвалтгүй амгаланг илтгэж хоёр өлмийгөө очир завилжээ.
Түг-жэ гүн-ла нём-би жом-дан-дай
Цан-зам той-ви ан-до ду-нал сэл
Дүг-сүм над-сэл сан-жай ман-жи-ла
Бэн-дү ра-ей од-ла чан-цал-ло.
Асран нигүүлсэх сэтгэл нь бүгдэд тэгш бурхан,
Алдрыг нь сонссон төдийд зовлон түйтгэр арилах,
Гурван хорын өвчин бүхнийг анагаагч Отчийн хаан
Биндэрьяа эрдэнийн гэрэлт танаа мөргөмү.
“Ялж төгс нөгчсөн Оточ Манал минь ээ. Намайг төгс гэгээрэлд хүртэл минь элдэв өвчин барцдаас хамгаалж хайрла. Эдүгээ буй өвчин зовлонг минь үлдээлгүй анагааж хайрла” хэмээн залбираад тарниа уншаарай.
Дэлгэр тарни:
Ум намо бага вадэ бэханзэ гүрү бэндүрьяа брава разаяа. Дата гада яа архадэ самъяаг сам будда яа. Дадъяата Ум бэханзэ бэханзэ Маха бэханзэ раза самуд гадэ суухаа.
Хураангуй тарни:
Дадъяата. Ум бэханзэ бэханзэ маха бэханзэ раза самудгадэ суухаа.
Тарнийн утга:
Дадъяата – Түүнчлэн буюу
Ум – Хязгааргүйд түгсэн ариун лагшин, зарлиг, таалалт
Бэханзэ – Биеийн өвчин бүхнийг анагаагч
Бэханзэ – Сэтгэлийн шаналал бүхнийг амарлиулагч
Маха бэханзэ – Өвчин зовлон бүхний үндэс болсон би-гийн үзлийг ариусгагч
Раза – Отчийн хаан
Самуд гадэ суухаа – Төгс туулсан бурханы адистид орштугай.
Тарнийг унших бүрт Манал бурханаас цацрах гэрэлд хамаг өвчин эмгэг, ад зэтгэр, хилэнц нүглийн хор арилж, бие сэтгэл ариуслаа. Өөрийн биеийн сүв бүхнээс цаглашгүй гэрэл тэгш дүүрэн цацарч, ертөнц дахиныг адислана. Манал бурханы гартаа барьсан тааллын бадар аяганаас энх мөнхийн рашаан ундарч, бүх биеийг дүүргэлээ. Ингээд хамаг өвчин эмгэг, хор зэтгэрээс ангижирлаа. Зүрхнээс ундрах рашаан далайгаар хамаг амьтныг баясган цэнгүүлж байна – хэмээн мэдэрч Маналын тарнийг 7, 21, 108, түүнээс дээш тоогоор тоолно.
Бусдад тухайлан тусалъя гэвэл өөрийн зүрхэнд Манал бурханыг тодруулж, дээрх байдлаар рашаан гэрлээр ариусган бясалгаж тарниа уншина. Уншлагаа өндөрлөх үед Манал бурхан тунгалаг гэрэлд уусан бие, сэтгэлд шингэлээ хэмээн санаад ерөөл өргөөрэй.
Энэхүү буянаар үтэр түргэн би
Оточ Маналын хутгийг олоод
Амьтан бүхнийг хоцроолгүйгээр
Ариун оронд хүргэх болтугай.
Орчуулсан П.Бадрал
#АгнистынГэгээ
