18/09/2025
Open dag på Herøy brannstasjon søndag 21 september kl 13-15👨🚒👩🚒
Sjå brannbilen, møt brannfolka og lær om branntryggleik
Det brenn i veke 38, og difor inviterer Herøy brann og redning til open brannstasjon søndag 21. September frå kl. 13:00 fram til kl. 15:00, der publikum kan møte brannfolka, Bjørnis, oppleve utstyret i bruk og få råd om korleis heimen kan gjerast tryggare. Samstundes blir kampanjen «Nasjonal brannøvelse» lansert, som skal få fleire til å øve på kva dei gjer dersom det byrjar å brenne.
Herøy brann og redning inviterer store og små til open brannstasjon søndag 21. September frå kl. 13:00 fram til kl. 15:00. Her får publikum oppleve kvardagen til brannfolka på nært hald, samstundes som dei lærer korleis ein best kan førebyggje brann i heimen.
– Open brannstasjon er ein tradisjon vi er stolte av. Det er både lærerikt og morosamt for heile familien, og vi gler oss til å ta imot mange besøkande, seier brannsjef Frank Steinsvik.
Aktivitetar for heile familien
På brannstasjonen blir det høve til å prøve seg som brannkonstabel for ein dag: Sitte i brannbil, spyle på blink, sjå demonstrasjonar av sløkkeutstyr og delta i konkurranse. Rebusløp, svar på spørsmål og legg svararket i kassa, så er du med i trekninga av Brannstigesespel.
Har du eit brannsløkkjeapparat du er usikker på, ta det med å få det sjekka av dyktige folk frå FOSNOT.
Difor blir Brannvernveka arrangert
Brannvernveka er eit landsdekkjande initiativ som blir gjennomført kvart år i veke 38, og som har til føremål å setje søkjelys på brannførebygging. Dette markerer òg starten på den landsomfattande aktiviteten «Nasjonal brannøvelse».
Når haustmørket fell på, brukar vi meir straum, tenner fleire lys og oppheld oss meir innandørs – alt dette kan auke risikoen for brann, og difor blir det ekstra viktig å øve, seier Lene Utseth på førebyggande brann.
Lag di eiga brannøving heime
Dei fleste alvorlege brannar skjer i private heimar – men der er det ingen krav om brannøvingar. For å gjere det enklare å vere førebudd, har Brannvernforeningen utvikla eit gratis verktøy på www.brannovelse.no, der ein kan skreddarsy ei brannøving tilpassa eigen bustad og livssituasjon.
– Når det byrjar å brenne, tel kvart sekund. Difor er det utruleg viktig å ha øvd heime, slik at heile familien veit kva dei skal gjere for å kome seg raskt og trygt ut, seier kommunikasjonssjef i Brannvernforeningen, Aslak Gausen.
Ei brannøving heime kan vere så enkelt som å snakke om ulike forhold knytte til brann rundt middagsbordet. Det kan til dømes vere: kvar er det sannsynleg at ein brann kan starte hos oss, eller kva rømmingsvegar har vi? Ho kan òg gjerast til ei meir praktisk og engasjerande aktivitet for heile familien.
