28/07/2025
🩷🩷Måtar å møte seg sjølv med varme på:
1. Snakk venleg til deg sjølv
Legg merke til tonen du brukar inni deg. Prøv å bytte ut sjølvkritikk med ord du ville sagt til eit barn du er glad i:
«Eg gjer så godt eg kan no.»
«Eg er sliten, og det er heilt lov.»
2. Gje kroppen det den treng
Et når du er svolten, kvil når du er trøytt, rør på deg når det kjennest godt. Varme mot deg sjølv bur i handlingane – ikkje i perfeksjonen.
3. Lag små rom berre for deg sjølv
Eit pledd, eit altar, ein kopp te, ein lukt, ein lyd, ein stein i handa. Små kvardagsritual som ber omsorg for det indre.
4. Sei nei med kjærleik
Å møte deg sjølv med varme handlar òg om grenser. Når du seier nei til det som tømmer deg, seier du samstundes ja til deg sjølv.
5. Tilgje deg sjølv, om att og om att
Du treng ikkje vere flink for å vere verdifull. Du treng ikkje få til alt. Øv på å romme heile deg – også det som er sårt, også det som er krevjande.
6. Ver med deg sjølv når du har det vondt
I staden for å rømme frå kjenslene – ver litt med dei. Hald deg sjølv. Kanskje med handa på hjartet, kanskje med eit mjukt pust. Dette er òg ein måte å vise omsorg for eige indre på.
7. Smil med heile andletet – og kjenn det innanfrå
Løft munnvikene, berre litt. Kjenn at kinna også får vere med på smilet. Augo dine kan smile dei òg – milde og varme. Kanskje kan panna få glatte seg litt, medan du er i øvinga. Det kan kjennast uvant i starten, men ver der ei lita stund. Kanskje kjem det ikkje glede, men kanskje ei still ferd inn mot deg sjølv. Eit lite rom av nærleik.
8. Gjer ting du likar – og gi deg sjølv lov til å vere i det
Å halde på med ein hobby, noko kreativt eller berre noko som gir deg glede, er ein måte å vere god mot deg sjølv på. Det gir næring til det indre og byggjer kjærleik til din eigen rytme.
Biletet er frå tidleg i sommar – då eg laga alvetromma mi, med eigne hender, med nærvær. Ei stille form for heling.
