31/07/2025
पूर्वी नेपालमा जोर्नी समस्या समाधानका लागि औषधिको अनुचित प्रयोग बढ्दो, चिकित्सकको निगरानीको सुझाव
पूर्वी नेपाल — पछिल्लो समय पूर्वी नेपालका विभिन्न जिल्लामा जोर्नीसम्बन्धी समस्याको समाधानका लागि औषधिको अनुचित प्रयोग बढ्दो छ। बिना चिकित्सकको सल्लाहमा प्रयोग गरिने यी औषधिहरूले लाभभन्दा बढी हानि पुर्याउने खतरा बढेको देखिएको छ।
सजिलै पाइने स्टेरोइडयुक्त औषधि तथा पेनकिलरहरू जोर्नी दुखाइका लागि सहज उपायका रूपमा प्रयोग हुने गरेको पाइन्छ। तर दीर्घकालीन रूपमा हेर्दा यी औषधिहरूले मिर्गौला, कलेजो र मुटुमा गम्भीर असर पुर्याउने विशेषज्ञहरू बताउँछन्।
यस विषयमा पूर्वी नेपालमा कार्यरत चिकित्सक डा. अनुपम घिमिरे भन्छन्, “जोर्नीको समस्या समाधानका लागि औषधिको अनुचित प्रयोग खतरनाक बन्दै गएको छ। यसलाई नजिकबाट निगरानी गर्नु अत्यन्त आवश्यक छ।”
डा. घिमिरेका अनुसार रोगको प्रकृति अनुसार उपयुक्त उपचार नगरी आफैंले औषधि सेवन गर्दा समस्या थप जटिल बन्ने खतरा रहन्छ। उनले सरकार तथा सम्बन्धित निकायहरूलाई यस विषयमा सचेतना फैलाउन आग्रह गरेका छन्।
स्थानिय स्वास्थ्य चौकीहरूमा बिरामीको चाप बढ्दै गइरहेकाले आम नागरिकमा औषधिको सही प्रयोगबारे जनचेतना फैलाउन आवश्यक देखिएको छ। स्वास्थ्यकर्मीहरूले पनि अनुगमन र सल्लाहमार्फत यस्तो लापरवाही रोक्नुपर्ने आवश्यकता औंल्याएका छन्।
