13/08/2025
हाम्रा डाक्टर, नर्स लैजाने मुलुकले को–फाइनान्सिङ गर्नुपर्छ
एकातिर मुलुकमा दक्ष स्वास्थ्यकर्मीको अभाव छ । अर्कोतर्फ नेपाली चिकित्सक, नर्सहरू विदेश पलायन भइरहेका छन् । तपाईंले विदेश लैजाने मुलुकबाट को–फाइनान्सिङको कुरा गर्नु भएको थियो । त्यो सम्भव छ ?
हामीले स्वास्थ्यकर्मीलाई दक्ष बनाउने तर दक्ष बनाउन कुनै योगदानै नगरेको मुलुकले लिएर जाने ? यसमा दुई कुरा छ । देशमा राख्न नसक्नु राज्यको कमजोरी हो । राज्यले लगानी गरेर योग्य बनाएको नागरिक जुन देशमा जान्छ त्यो देशबाट सहयोग लिन नसक्नु पनि राज्यको कमजोरी हो । त्यसैले यसमा को–फाइनान्सिङ हुनु पर्छ भनेको हुँ ।
नेपालको चिकित्सा शिक्षा गुणस्तरीय भएको कारणले नै विश्वका विभिन्न मुलुकका अस्पतालमा कार्य गर्न पुगेका हुन् । नेपाली डाक्टर, नर्सहरू जहाँ पनि बिक्न सक्छन् । त्यसको लाभ लिन मुलुकले लिन सकिरहेको छैन । फिलिपिन्सले जे गरिरहेको छ त्यो नेपालले पनि गर्नुपर्छ भन्ने मेरो भनाइ हो । नेपाली डाक्टर, नर्स जो मुलुकले लैजान्छन्, त्यो मुलुकले नेपाललाई स्वास्थ्य क्षेत्रमा कोफाइनान्सिङ गर्नुपर्छ । हाम्रो स्वास्थ्य जनशक्ति लगेबापत कोफाइनान्सिङ गरे हुन्छ । हाम्रो दक्ष जनशक्ति लिएबापत नेपाललाई कम्पन्सेट गर्ने कुरा हो । लेनदेनको कुरा होइन ।
कार्यान्वयनको लागि के गर्दै हुनुहुन्छ ?
दक्ष नेपाली डाक्टर, नर्सलगायतका स्वास्थ्यकर्मी जुन मुलुकले लैजान्छन्, त्यो मुलुकले हाम्रो स्वास्थ्य क्षेत्रमा को–फाइनान्सिङ गर्नुपर्छ । यो प्रस्तावको नेतृत्व नेपालले गर्छ । विश्व स्वास्थ्य संगठनको ‘सेरो क्षेत्र’ (दक्षिण पूर्वी एसिया) क्षेत्रका सबैले मेरो प्रस्तावको प्रशंसा गर्नु भएको छ । सेरो क्षेत्रको नेतृत्व गर्दै डब्लूएचओको आगामी सेप्टेम्बरमा हुने एसेम्बलीमा प्रस्ताव गर्छु । डब्लूएचओको आर्टिकलमा कोफाइनान्सिङको विषयवस्तु समावेश हुनुपर्छ भन्ने प्रस्तावको नेतृत्व नेपालले गर्दैछ । यो काम गरिछाड्छु । यो मेरो संकल्प हो ।
https://annapurnapost.com/story/484096/?fbclid=IwQ0xDSwMJCD9leHRuA2FlbQIxMQABHkzZDMsWjC6zhCTzr-BJIX27AcnG5bbKU0LU1mMgiEt-a30QHtW5gifpaLvy_aem_kG11Jn7gsqrIzGUO7dB3bA
