24/02/2026
डा. दिपक मल्लको सुझाब -यी कुरामा ध्यान दिनु भयो भने तपाईंको र मेरो भेट अस्पतालमा नहुन पनि सक्छ।बाटोमा हाई-हेलो भनौंला तर अस्पतालमा आएर डाक्टर साप यस्तो रोग लाग्यो, उस्तो रोग लाग्यो, तपाईंलाई कहिल्यै भन्न नपरोस्।
डा. मल्लका अनुसार यी कुराहरुमा ध्यान दिएमा रोग लाग्ने सम्भावना कम हुन्छ।
डाक्टरले तपाईंलाई कहिल्यै औषधि लेख्न नपरोस्। कुनै रोग लागे पनि त्यो नियन्त्रणबाहिर नजाओस् र औषधिमाथि औषधि थपिरहनुपर्ने अवस्था नआओस्। यसका लागि तपाईंले जीवनशैलीका केही साधारण तर अत्यन्त महत्वपूर्ण कुराहरूमा ध्यान दिनु जरुरी छ।
-सबैभन्दा पहिले, दैनिक कम्तीमा ४५ देखि ६० मिनेट हिँड्ने बानी बसाल्नुहोस्। हिँड्नका लागि अरू कसैलाई कुर्नु पर्दैन, आफैंले आफैंलाई समय दिनुहोस्। नियमित हिँडाइले शरीर मात्र होइन, मनलाई पनि स्वस्थ राख्छ।
-त्यसैगरी, बाहिरका जंक फुडहरू सकेसम्म नखानुहोस्। आफू मात्र होइन, आफ्नो परिवारलाई पनि घरकै स्वस्थ र सन्तुलित खाना खान प्रेरित गर्नुहोस्। घरको खाना नै स्वास्थ्यको पहिलो औषधि हो।
-पर्याप्त निन्द्रा पनि उत्तिकै आवश्यक छ। दैनिक कम्तीमा ६ देखि ८ घण्टा सुत्ने बानी बसाल्नुहोस्। राम्रो निन्द्राले शरीरलाई पुनः ऊर्जावान बनाउँछ र रोगसँग लड्ने क्षमता बढाउँछ।
-सबैभन्दा महत्वपूर्ण कुरा, आफूलाई माया गर्न सिक्नुहोस्। आफ्नो परिवारसँग समय बिताउनुहोस्, हाँस्नुहोस्, खेल्नुहोस् र जीवनका साना–साना खुसीहरूमा रमाउनुहोस्। यी यस्ता औषधि हुन्, जसका लागि तपाईंले कुनै पैसा खर्च गर्नुपर्दैन।
यदि तपाईंले यी साधारण कुराहरूलाई जीवनमा अपनाउनुभयो भने, सायद हाम्रो भेट अस्पतालमा बिरामी र डाक्टरका रूपमा नहुन पनि सक्छ। भेट भए पनि बाटोमा हाँस्दै “हाई–हेलो” भन्नका लागि मात्र हुनेछ, अस्पतालमा आएर “डाक्टर साब, मलाई यस्तो रोग लाग्यो” भन्नुपर्ने अवस्था कहिल्यै नआओस्।
