14/08/2025
Salamat Aksyon Radyo Bacolod 🙏🙏🏻
PINAKAUNA NGA NUCLEAR MEDICINE UNIT SA NIR, NATALANA IPATUKOD
By: Aksyon Radyo Bacolod | Agosto 14,2025
Natalana igatukod sa tupad sang Cancer Care Center sa Riverside Medical Center ang pinaka-una nga Nuclear Medicine Unit sa bilog nga Negros Island Region kag gina paabot nga matapos sa Hunyo 2026.
Ang Nuclear Medicine Unit ang isa ka specialized unit sa patag sang medisina sa diin naga gamit ini sang mga nuclear substances para sa pagbulong sang nanarisari nga mga balatian kaangay sang cancer.
Suno kay Dr.Kenji Ip, nagaserbi nga Nuclear Medicine Consultant, may kapasidad ang Nuclear Medicine Unit nga mag-detect kag maka diagnose sang blocked artery, pagbulong sang thyroid, kidney functions, major organ systems kag iban pa.
Gin pahayag man ni Dr. Paolo Sogono, Cancer Care Medical Director, may ikasarang ang Nuclear Medicine nga maka gamit sang mga Radio Active Material nga gina "infuse" ukon gina pasulod sa lawas sang pasyente nga may kapasidad nga makaguba sa mga cancel cells kag iban pa nga mga abnormal development sa lawas sang tawo.
Dugang pa, suno kay Neil Ganchero, Cancer Care Manager, sa pagtukod sang amo nga medical facility, lauman nga mas mapalapad pa ang ila kapasidad nga magtatap sa mga pasyente sa diin iya man gin pasiguro nga may mga mekanismo nga gina himo ang Riverside lakip na ang pagpartner sa mga NGO agud mabuligan ang mga pasyente sa medical expenses.
Gin pahayag naman ni Genesis Goldi Golingan ang CEO kag Presidente sang Riverside Medical Center, luyag nila nga mangin multi specialty hospital ang Riverside halin sa general service hospital.
Samtang suno kay Dr. Antonia Gensoli, VP Chief Medical Officer sang ospital, madamo sang available nga mga treatment kag bulong para sa balatian nga cancer kag may mga doktor ang Riverside para diri nga mga consultant man sa mga public hospitals.*
