02/08/2021
MOTORSIKLO KAG TRICYCLE NAGSALPUKANAY SA PONTEVEDRA, ISA PATAY, DUHA PILASON
Patay ang bana, samtang pilason ang asawa sa nagluntad nga aksidente sa National Highway sa Barangay Recreo, Banwa sang Pontevedra kahapon sang aga.
Ang napatay ginkilala kay Edgar Balaod, ang pilason ginkilala naman kay Jovelyn tanan legal ang edad kag nagapuyo sa Barangay Nabulao, Syudad sang Sipalay.
Ang driver sang tricycle ginkilala kay Roque Pagsubiron, legal ang edad nagapuyo sa Valladolid kag nagalibod sang pahu.
Suno kay PSSgt Rommel Villaruel, assistant Traffic Investigator sang Pontevedra PNP, sa panuaron ni Pagsubiron, hinali siya nga nagpadulong sa pihak nga dalan bangud hinali man ngab nagdulong ang iya ginasundan nga salakyan, apang indi man matumod kun anu nga sahi sang salakyan.
Sa dugang nga imbestigasyon sang otoridad, nagtabok ang tricycle sa pihak nga dalan agud magbaligya kun tani sang pahu, apang likom sa iya ihibalo nagapadulong ang motorsiklo nga ginsakyan sang mag-asawa.
Si Pagsubiron napilasan man, apang nakaguwa na sa hospital kag yara karun sa kostudiya sang kapulisan.
Ang mag-asawa halin sa Sipalay kag magapadulong sa iya tiya sa Murcia.
Ginahulat pa ang otoridad sa desisyon sang pamilya sa mga biktima kun mapa-areglo ukon magakaso.
Photo: Pontevedra PNP