22/09/2025
DOH: 48 SUGATAN DINALA SA JRRMMC MATAPOS ANG GULO SA MENDIOLA; 1 NASAWI, LAHAT SAKOP NG ZERO BALANCE BILLING
Umabot sa 48 katao ang dinala sa DOH-Jose R. Reyes Memorial Medical Center (JRRMMC) matapos ang kaguluhan sa pagitan ng mga di pa kilalang elemento na sumabay sa kilos protesta, at kapulisan kahapon sa Recto, Manila.
Sa tala ng DOH-JRRMMC, 2 pulis ang nagtamo ng minor injuries (laceration at pasa sa katawan) at agad ding nakalabas matapos gamutin. Samantala, isang hindi pa nakikilalang lalaki naman ang kumpirmadong nasawi na idineklarang dead on arrival dahil sa tinamong saksak.
Mayroon ding 6 na iba pang pasyente ang nagtamo ng iba’t ibang sugat kabilang ang hiwa sa paa, eye trauma, head trauma, injury sa ugat ng kaliwang braso, gunshot wound, at matinding sugat sa braso. Apat sa kanila ay nakalabas na matapos gamutin, habang dalawa ang kasalukuyang naka-admit para sa karagdagang gamutan.
Bukod dito, 39 pang raliyista ang sumasailalim ngayon sa physical examination bilang bahagi ng proseso bago sila dalhin sa kulungan. Wala namang agarang panganib sa kanilang kalusugan.
“Tinitiyak ng DOH na sakop pa rin ng Zero Balance Billing ang mga pasyenteng ito, alinsunod sa direktiba ni Pangulong Ferdinand R. Marcos, Jr. na tiyakin ang maagap at dekalidad na serbisyong medikal para sa lahat ng Pilipino,” ani Health Secretary Teodoro J. Herbosa.
