24/01/2026
Para sa inyo Ginang Amada Pilar Tomas,
Nais po naming pabulaanan ang paratang na hindi naasikaso ang inyong anak. Ipapaalala po namin sa inyo ang tunay na pangyayari noong mga oras na dinala ninyo ang inyong anak sa aming pasilidad.
Dumating po kayo at ang inyong anak noong ika-19 ng Enero bandang 12:08 ng madaling-araw. Agad po siyang inasikaso ng mga nars na naka-duty, kabilang ang pagkuha ng vital signs at paggawa ng kaukulang rekord. Kaagad ding ipinaalam sa naka-duty na doktor ang pagdating ng pasyente; sa mga oras na iyon, ang doktor ay kasalukuyan ring umaasikaso ng mga pasyenteng naka-admit sa ward.
Batay sa paunang pagsusuri, ang inyong anak ay may stable na vital signs at walang palatandaan ng respiratory distress o hirap sa paghinga. Bandang 12:17 ng madaling-araw, habang papasok na sana ang doktor sa Emergency Room upang suriin ang inyong pasyente, may dumating na pasyenteng nasangkot sa isang vehicular accident na may aktibong pagdurugo. Dahil dito, ang naturang pasyente ay agad na binigyang-priyoridad na atensyon.
Habang sinusuri ng doktor ang pasyenteng nasangkot sa aksidente, nilapitan siya ng inyong asawa at nagtanong kung bakit hindi pa nauunang asikasuhin ang inyong anak. Ipinaliwanag ng doktor na pansamantala lamang niyang ia-assess ang trauma patient. Pagkaraan nito, kayo ay pumasok at nagsimulang magtaas ng boses sa doktor, tinatanong kung bakit hindi inuuna ang inyong pasyente.
Muling nagpaliwanag ang doktor na pansamantala lamang niyang susuriin ang trauma patient. Gayunpaman, nagpatuloy ang inyong galit kaya’t pinaupo na lamang kayo ng doktor upang mapakinggan ang likod ng inyong anak. Habang isinasagawa ito, patuloy pa rin kayo sa pagsasalita hanggang sa bigla na lamang kayong nag-walkout at nagbanta na ipapatanggal ninyo ang doktor na siyang sumuri sa inyong pasyente ayon sa nakarinig na kawani ng aming pasilidad.
Tungkol naman po sa inyong pahayag na sinabi umano ng mga nars na walang doktor noong mga oras na iyon, ito po ay walang katotohanan. Sa katunayan, matapos makuhanan ng vital signs ang inyong anak, agad na ipinaalam sa doktor ang kanyang pagdating.
“Batay sa masusing pagsusuri ng CCTV footage, ang nabanggit na pangyayari—mula sa oras ng pagdating ng pasyente hanggang sa oras ng pag-walkout ng magulang—ay tumagal lamang ng 17 minuto. Malinaw na agad na naasikaso ang pasyente at malinaw rin na walang naganap na pagpapabaya, taliwas sa akusasyon ng magulang ng pasyente.”
Nais din po naming ipabatid sa inyo na may sinusunod na tamang sistema sa paglalapat ng serbisyong medikal sa lahat ng pasyente, at ito ay nakabatay sa kalagayan at pangangailangan ng pasyente.
PAALALA SA LAHAT!!!
Ang Cuyapo Infirmary ay may itinakdang OPD hours para sa mga regular na konsulta/check up mula 9:00 AM – 12:00 NN at 1:00 PM – 5:00 PM, daily.
Simula 5:00 PM pataas, ang tinatanggap lamang po ay ang mga pasyenteng may mga kasong itinuturing na EMERGENCY.
Ang Emergency Room ay hindi pinaiiral ang sistemang “first come, first served.” Ipinapatupad ang TRIAGE SYSTEM, kung saan inuuna ang mga pasyenteng nangangailangan ng agarang lunas at atensyong medikal.
Ang mga doktor ay may sapat na kaalaman at propesyonal na kakayahan upang magsagawa ng triage batay sa kalagayan at pangangailangan ng pasyente, at hindi po batay sa oras ng pagdating.
Maraming Salamat po.
