25/03/2026
DERMA CLINIC SA DAVAO CITY NGA GITUDLONG HINUNGDAN SA KAMATAYON SA 51 ANYOS NGA BABAE, GIHATAGAN NA OG SHOW CAUSE ORDER
Gipatuman na ang show cause order batok sa usa ka derma clinic sa Suazo, Davao City nga nalambigit sa reklamo sa pamilya sa usa ka 51-anyos nga pasyente nga namatay, sumala kini ni Councilor Ralph Abella atol sa exclusive interview sa 93.9 iFM News Davao.
Matud ni Abella, kabahin kini sa lihok sa konseho aron mapatubag ang maong clinic ug makumpirma kon adunay foreign doctor nga nagtrabaho sa maong clinic, human mabutyag sa pamilya sa pasyente nga adunay giingong Vietnamese doctor nga nalambigit sa pagtambal.
Samtang, gibutyag usab sa pamilya sa pasyente ang medical certificate gikan sa Brokenshire Medical Center, nga nagpakita sa mga findings sa kondisyon ni Alyas "Lily", 51 anyos, nga na-confine gikan Marso 3 hangtod Marso 5, 2026.
Sumala sa medical certificate, lakip sa mga diagnosis ang multi-organ failure secondary to shock, acute liver failure secondary to drug-induced liver injury (Methotrexate), psoriasis vulgaris, ug acute kidney injury secondary to infection o hypoperfusion.
Lakip usab sa findings ang acute respiratory failure, ischemic hepatitis, encephalopathy, ug pancytopenia, nga pawang kabahin sa komplikadong kondisyon sa pasyente sa wala pa kini namatay.
Gibutyag sa pamilya nga ilang gidala ang maong medical findings isip kabahin sa ilang panawagan alang sa hustong imbestigasyon sa giingong pagtambal ug sa mga medicines nga nareseta sa maong derma clinic.
Sa session kagahapon sa Sangguniang Panlungsod, nasuta usab nga ang maong clinic nagsugod og operasyon niadtong Oktubre 2025 bisan wala pa kiniโy business permit sumala sa Business Bureu.
Tungod niini, giisyuhan kini og cease and desist order niadtong Nobyembre 2025, ug nasundan pa og laing aksyon niadtong Marso 14, 2026 human sa sunod nga inspeksyon.
Gibutyag usab sa Business Bureau nga nakakuha gihapon og business permit ang maong clinic niadtong Marso 18, 2026 human makasumite sa documentary requirements ug makadawat og approval gikan sa mga regulatory offices.
Sumala ni Abella, gitakda sa Abril 7 ang committee hearing sa konseho aron hisgutan ang resolusyon sa pag-imbestiga sa maong clinic ug ang ordinansa nga nagtumong sa pagbutang og mas klarong regulasyon, requirements, ug permit sa mga dermatology clinics sa Davao City.
Gilauman usab nga motambong sa maong hearing ang mga ahensya sama sa DOH, PRC, NBI, ug Bureau of Immigration, ilabina sa pag-verify sa mga permit ug sa legal nga pagpraktis sa mga doktor.
Sa pagkakaron, developing pa ang maong balita ug gipaabot pa ang dugang detalye sa nagpadayong imbestigasyon. Atangi sa 93.9 iFM News Davao.
Via || Idol Danica Raneses
