10/04/2026
Idinaos ang PuroKalusugan Caravan noong Abril 8, 2026 sa DRRMD Building Conference Room bilang bahagi ng capacity building activity para sa mga health personnel ng Lungsod ng Mandaluyong.
Dinaluhan ang nasabing aktibidad ng mga kinatawan mula sa Addition Hills Health Center, Highway Hills Health Center, at Plainview Health Center, na naglalayong mapalakas ang kanilang kaalaman at kakayahan sa pagpapatupad ng mga programang pangkalusugan sa komunidad.
Layunin ng PuroKalusugan Caravan na higit pang paigtingin ang koordinasyon at kahandaan ng mga health centers sa paghahatid ng dekalidad na serbisyong pangkalusugan, lalo na sa antas ng komunidad. Tinalakay sa aktibidad ang mahahalagang konsepto, estratehiya, at mga makabagong pamamaraan sa pagpapatupad ng mga health programs na nakatuon sa promotive at preventive care.
Nagkaroon din ng interaktibong talakayan kung saan nagbahagi ang mga kalahok ng kanilang mga karanasan, hamon, at mga best practices sa kani-kanilang nasasakupan. Sa pamamagitan nito, mas napalakas ang ugnayan at pagtutulungan ng mga health centers tungo sa mas epektibong implementasyon ng mga programang pangkalusugan.
Sa kabuuan, ang PuroKalusugan Caravan ay nagsilbing mahalagang hakbang sa patuloy na pagpapahusay ng kakayahan ng mga health workers at sa pagsusulong ng layunin ng lungsod na makapaghatid ng abot-kaya, dekalidad, at pantay na serbisyong pangkalusugan para sa bawat mamamayan ng Mandaluyong.
