24/01/2025
ایک زمانہ تھا جب طوائف کا پیشہ سب سے زیادہ بدنام سمجھا جاتا تھا۔ اس پیشے کا ذکر کرنا بھی معیوب سمجھا جاتا تھا۔ لیکن آج کے دور میں، طوائف کے پیشے کو اتنی نئی شکلیں دی گئی ہیں کہ اس کا اصل مطلب بھی دھندلا گیا ہے۔ ماضی کی طوائف، جو جسمانی خدمات اور اداؤں کے ذریعے نوابوں کو لبھاتی تھی، آج ڈیجیٹل پلیٹ فارمز پر "کانٹینٹ کریئیٹر" یا "آرٹسٹ" کے نام سے جانی جاتی ہے۔
پرانے وقتوں میں طوائفیں اپنے حسن، ناچ، اور گانے کے ذریعے نوابوں کو اپنی طرف مائل کرتی تھیں۔ نواب اپنی دولت کے تھیلے لے کر ان کی مالکہ یعنی نائیکہ کے پاس جاتے اور ان کی خدمات حاصل کرنے کے لیے بولی لگاتے۔ خوبصورت اور کم عمر طوائفوں کے لیے یہ پیشہ ایک طرح کی ترقی کی علامت تھا جب وہ کسی نواب کی رکھیل بن کر اُس کے ذاتی محل میں منتقل ہو جاتی تھیں۔
وقت بدلا اور طوائفوں کے پیشے کو نیا نام دیا گیا۔ اب یہ پیشہ "آرٹ" کہلانے لگا۔ ناچنے والی رقاصہ بن گئی اور جسم بیچنے والی کو مختلف الفاظ کی اوٹ میں چھپا دیا گیا۔ رقص کو فن کا درجہ دیا گیا، اور نوابوں کی رکھیل بننے کا عمل اب فلمسازوں اور سرمایہ داروں کے ساتھ "رشتے" بنانے کی شکل اختیار کر گیا۔
طوائف سے انفلوئنسر تک کا سفر
آج کے دور میں طوائف کے پیشے نے ڈیجیٹل پلیٹ فارمز پر جگہ بنالی ہے۔ ماضی کے تماشبین جو طوائف کے کوٹھے پر جا کر بھاری قیمت ادا کرتے تھے، آج ٹک ٹاک، فیس بک ریلز، اور انسٹاگرام کے ذریعے مفت میں ہزاروں "ڈیجیٹل طوائفوں" کے جسمانی جلوے دیکھ سکتے ہیں۔
ماضی کی طوائفیں بھاری لباس میں اپنے جسم کو چھپاتی تھیں جبکہ آج کے دور کی ڈیجیٹل "کانٹینٹ کریئیٹرز" مختصر ترین لباس میں اپنی ہر حرکت کو نمایاں کرنے کی کوشش کرتی ہیں۔ وہ اپنی ویڈیوز کو اس طرح تیار کرتی ہیں کہ ہر زاویہ تماشبین کے لیے دلچسپی کا باعث بنے۔
دور جدید کے نواب اور چکلے۔
آج کے دور میں "نواب" وہ ایڈورٹائزنگ کمپنیاں، برانڈز اور وہ سبسکرائبرز ہیں جو ان ڈیجیٹل طوائفوں کو اسپانسر کرتے ہیں۔ وہ ان کے ہر ویڈیو، ہر ریلز اور ہر پوسٹ پر سرمایہ لگاتے ہیں۔
پہلے طوائفوں کے اڈے نائیکہ کے زیرِ انتظام چلتے تھے اور آج ڈیجیٹل دنیا کے "چکلے" ٹک ٹاک، انسٹاگرام اور فیس بک کے الگورتھم چلاتے ہیں۔
ماضی میں ایک تماشبین کو طوائف کے رقص کا لطف اٹھانے کے لیے سفر کرنا پڑتا تھا، بھاری خرچ اٹھانا پڑتا تھا اور دیگر تماشبینوں کے ساتھ جگہ بانٹنی پڑتی تھی۔ آج، ہر تماشبین اپنی مکمل تنہائی میں، اپنی موبائل اسکرین پر دنیا بھر کی کانٹینٹ کریئیٹرز کو دیکھ سکتا ہے۔ نہ کوئی خرچ، نہ کوئی جھجک۔ زوم، سلو موشن، اور ری پلے جیسے فیچرز نے ان کی "تفریح" کو بے حد آسان کر دیا ہے۔
ڈیجیٹل پلیٹ فارمز نے طوائف کے پیشے کو ایک نیا نام اور نئی شکل دی ہے، لیکن مقصد وہی رہا: پیسہ کمانا اور تماشبین کو خوش کرنا۔ ماضی کے کوٹھے اب ٹک ٹاک پروفائلز اور انسٹاگرام ہینڈلز بن چکے ہیں، اور نوابوں کی جگہ اسپانسرز نے لے لی ہے۔
یاسر رسول۔
