19/10/2025
Center of Attention, Ignore and Invisible
مرکزِ نگاہ، نظروں سے دور ، نظروں سے اوجھل
مجھے ایک صاحب سےچند الفاظ سننے کو ملے، وہ کچھ یوں تھے: "ignore" اور "Invisible"۔ میں نے اس میں تیسرا لفظ بھی اضافہ کیا:Center of Attention۔
یہ تین الفاظ دراصل زندگی کے تین مراحل کو ظاہر کرتے ہیں۔ پہلا مرحلہ "مرکزِ نگاہ" کا ہوتا ہے، دوسرا نظروں سے دور اور تیسرا، نظروں سے اوجھل
یہ سمجھیں کہ ہماری زندگی کے تین اہم ادوار ہیں۔ پہلا وہ جب انسان مرکزِ نگاہ ہوتا ہے — توجہ کا مرکز، یعنی
Center of Attention۔
یہ آپ کا بچپن اور جوانی کا دور ہوتا ہے۔ اس زمانے میں ہر شخص ہمارا خیال کرتا ہے، سب ہمیں پیار کرتے ہیں، ہمیں بہت توجہ ملتی ہے۔ ہماری ہر بات مانی جاتی ہے، ہماری خوراک کا خیال رکھا جاتا ہے، شادی ہوتی ہے، بچے پیدا ہوتے ہیں، اور ہر چیز کسی نہ کسی طرح ہم پر منحصر ہوتی ہے۔ ہماری بات سنی بھی جاتی ہے، مانی بھی جاتی ہے۔ اگر کھانے کے وقت ہم نہ ہوں تو انتظار کیا جاتا ہے۔ ہماری پسند ناپسند کا خیال رکھا جاتا ہے، ہماری دوا کا انتظام ہوتا ہے، ہمیں وقت دیا جاتا ہے، اگر ہم ناراض بھی ہوں تو برداشت کیا جاتا ہے۔ یہ ہماری زندگی کا پہلا مرحلہ ہوتا ہے۔
پھر زندگی کا دوسرا مرحلہ آتا ہے۔ جب ہم بڑے ہو جاتے ہیں، تقریباً پچاس سال کے قریب پہنچتے ہیں۔ بچے بڑے ہو جاتے ہیں، اسکول، کالج اور یونیورسٹی میں چلے جاتے ہیں، دوستوں میں مشغول ہو جاتے ہیں، اپنی مصروفیات میں گم ہو جاتے ہیں۔ اب ہم آہستہ آہستہ نظرانداز ہونے لگتے ہیں۔ ابو نہیں آئے تو کوئی بات نہیں، بعد میں آ جائیں گے۔ اگر ناراض ہوں تو کہا جاتا ہے، "بعد میں منا لیں گے۔" یوں آہستہ آہستہ ہم نظروں سے پیچھے ہٹنے لگتے ہیں۔ پہلے بچوں کو تیار کرو، ابو کی بات بعد میں کر لیں گے۔ یہ وہ مرحلہ ہے جب ہماری آمد و رفت سے گھر میں بہت زیادہ فرق نہیں پڑتا۔ تھوڑا بہت تو اثر ضرور ہوتا ہے، مگر ہم مرکز سے ہٹنے لگتے ہیں۔ یہ ہماری زندگی کا دوسرا مرحلہ ہوتا ہے۔
پھر زندگی کا تیسرا مرحلہ آتا ہے ، جب ہم بالکل کسی کام کے نہیں سمجھے جاتے۔ ریٹائر ہو جاتے ہیں، ہماری آمدنی ختم ہو جاتی ہے، گھر ہمارا محتاج نہیں رہتا۔ اب ہمیں ایک الگ کمرہ دے دیا جاتا ہے، یا برآمدے میں بستر لگا دیا جاتا ہے، یا درخت کے نیچے بٹھا دیا جاتا ہے۔ اب فیصلے ہماری مرضی کے بغیر ہوتے ہیں، مشورے ہم سے نہیں لیے جاتے۔ کہا جاتا ہے، "ضرورت نہیں ان سے پوچھنے کی۔" یہ وہ وقت ہے جب ہم اوجھل ہو جاتے ہیں۔ اسی مرحلے میں ہمارے اندر نفسیاتی مسائل پیدا ہونے لگتے ہیں۔ احساسِ تنہائی ہمیں جسمانی بیماریوں تک لے جاتا ہے۔ اب ہمیں کوئی نہیں دیکھتا، تو ہم خود کو دیکھنے لگتے ہیں ، کبھی آئینے میں، کبھی پرانی کتابوں میں، کبھی اپنی پرانی تصویروں میں۔ ہم خود سے باتیں کرنے لگتے ہیں، بچوں سے اپنی مشکلیں بانٹنے کی کوشش کرتے ہیں، مگر اب ہم نظروں سے اوجھل ہو چکے ہوتے ہیں۔
درخت کے ساتھ بھی یہی ہوتا ہے ۔ جب وہ چھوٹا ہوتا ہے تو ہم اس کا بہت خیال کرتے ہیں، اسے پانی دیتے ہیں، دھوپ سے بچاتے ہیں، جب وہ پھل دیتا ہے تو فائدہ اٹھاتے ہیں، اور جب پھل دینا بند کر دیتا ہے تو ہم اسے کاٹ کر باہر پھینک دیتے ہیں، اور اس کی جگہ نیا درخت لگا دیتے ہیں۔
یوں زندگی ایک دائرہ ہے۔ کبھی ہم اس کے مرکز میں ہوتے ہیں، سب کی نگاہیں ہم پر ہوتی ہیں، پھر ہم آہستہ آہستہ کنارے پر چلے جاتے ہیں، اور ایک دن مکمل طور پر دائرے سے باہر ہو جاتے ہیں۔ آج کے دور میں مرکزِ نگاہ وہ لوگ ہیں جو کما کر لاتے ہیں، بچے اور نوجوان، اور عورتیں انھیں پسند کرتی ہیں جو مالی لحاظ سے مستحکم ہوں۔ لیکن جب ہم کسی کام کے نہیں رہتے، تو ہمیں کونے میں بٹھا دیا جاتا ہے۔ یہ فطری عمل ہے، ہوتا رہا ہے اور ہوتا رہے گا۔
لیکن سوال یہ ہے کہ ہم اس سے بچیں کیسے؟ میرے خیال میں اس کا حل یہ ہے کہ جب تک آپ مرکزِ نگاہ ہیں، اسی دوران سوچ لیجیے کہ جب آپکی پرواہ ہونا کم ہوجائے ، تو فوراً کوئی نیا کام شروع کریں ۔ ایسا کام جو آپ کو دوبارہ مرکزِ نگاہ بنا دے۔ کسی تنظیم سے وابستہ ہو جائیں، اپنے علاقے کی عبادت گاہ یا کالج میں خدمات انجام دیں۔ کسی سرگرمی کا حصہ بنیں۔
جب آپ سرگرم رہیں گے، تو آپ کسی نہ کسی جگہ اہم رہیں گے۔ یوں آپ کے جسمانی امراض اور نفسیاتی مسائل دونوں کم ہوں گے۔ ضروری نہیں کہ آپ بہت بڑا کام کریں ، چھوٹا کام بھی کافی ہے۔ اصل بات یہ ہے کہ آپ مرکزِ نگاہ رہیں۔ جیسے ہی آپ محسوس کریں کہ آپ نگاہوں سے دور ہو رہے ہیں، تو اپنی جگہ بدل لیجیے، نئی سرگرمی اختیار کیجیے۔ ورنہ اگر آپ نے خود کو محدود کر لیا، تو وہ دن دور نہیں جب آپ نگاہوں سے اوجھل ہو جائیں گے اور یہ اوجھل ہونا انسان کو نفسیاتی اور جسمانی بیماریوں میں مبتلا کر دیتا ہے۔
یہاں میں ایک اور بات بھی کہنا چاہوں گا۔
جو بڑے لوگ ہوتے ہیں، جن کی عمر زیادہ ہوتی ہے، جن کا تجربہ زیادہ ہوتا ہے، اگر آپ انہیں وقت سے پہلے ایک سائیڈ پر کر دیں، اور نظروں سے دور کر دیں، یعنی اگنور کرنا شروع کر دیں، تو اس کا نقصان نہ صرف آپ کو بلکہ پورے خاندان یا کاروبار کو بھی ہوتا ہے، کیونکہ باقی لوگوں کے پاس اتنا تجربہ نہیں ہوتا۔
ہمارے ہاں پنجابی میں کہا جاتا ہے:
"بابے دے بغیر بکریاں نہیں چَرن دیاں"یعنی بزرگوں کے بغیر قافلہ درست سمت میں نہیں جا سکتا۔
اسی وجہ سے میری ان تمام لوگوں سے درخواست ہے جو اپنے بڑوں کو وقت سے پہلے اگنور کر دیتے ہیں، کہ وہ ایسا ہرگز نہ کریں۔آپ ان کو عملی کاموں یا روزمرہ آپریشن سے دور رکھ سکتے ہیں، لیکن ان کی رائے کو ہرگز نظرانداز نہ کریں۔میں نے خود بہت سے خاندانوں میں دیکھا ہے کہ جب انہوں نے اپنے بڑوں کی بات نہیں مانی اور کہا کہ "آپ کو کچھ پتہ نہیں، ہم زیادہ اچھا کام کر سکتے ہیں"، تو بعد میں وہ نقصان اٹھاتے ہیں۔ٹھیک ہے، وقت کے ساتھ نئی نسل زیادہ تعلیم یافتہ اور ہوشیار ہو سکتی ہے، لیکن تجربے سے فائدہ نہ اٹھانا بہت نقصان دہ ثابت ہوتا ہے۔
میں نے جرمنی کی ایک بڑی کمپنی کے بارے میں پڑھا کہ وہ سال میں چند دن اپنے سارے اسٹاف کو کسی دور دراز مقام پر لے جاتی ہے۔اس پروگرام میں وہ تمام ریٹائرڈ ملازمین کو بھی واپس بلاتے ہیں۔وہ موجودہ اسٹاف کو ہدایت دیتے ہیں کہ ان بزرگ ساتھیوں سے بیٹھ کر بات کریں، ان سے جانیں کہ ماضی میں حالات کیسے تھے اور انہوں نے چیلنجز کا سامنا کیسے کیا۔اس طرح وہ نئی نسل ان کے تجربے سے سیکھتی ہے، اور ادارہ اجتماعی دانش سے فائدہ اٹھاتا ہے۔
میں یہ بھی کہوں گا کہ بزرگوں کو بھی بلاوجہ مداخلت نہیں کرنی چاہیے،لیکن جو لوگ ان کی جگہ لے رہے ہیں ، چاہے وہ گھر میں ہوں، کاروبار میں، سیاسی جماعت میں یا کسی تنظیم میں انہیں اپنے بڑوں کی بات کو بلکل رد نہیں کرنا چاہیے۔
آخر میں یہی کہنا مناسب ہے کہ دونوں فریقوں کے درمیان توازن ضروری ہے۔
نہ بزرگوں کو ہر بات میں دخل دینا چاہیے،
اور نہ نئی نسل کو ان کے تجربے کو نظرانداز کرنا چاہیے۔
اسی توازن سے ہی خاندان، ادارے اور معاشرے ترقی کرتے ہیں۔
اگر یہ بات آپ کو اچھی لگے تو دوسروں تک پہنچانے میں میری مدد کریں۔
میں تو ایسا سوچتا ہوں
ڈاکٹر محمد مشتاق مانگٹ
تعاون و ترقی
