18/08/2025
*جاپان کے سات فلسفے اور کامیاب زندگی کا راز*
جاپان ایک ایسی قوم ہے جس نے اپنی سوچ اور اصولوں کے ذریعے دنیا کو حیران کر دیا۔ ان کے چند فلسفے نہ صرف معاشرے کو مضبوط بناتے ہیں بلکہ انسان کی ذاتی زندگی کو بھی کامیابی اور سکون دیتے ہیں۔
1۔ شُوگیو (Shugyō) – محنت اور سختی سہنے کا حوصلہ
شُوگیو کا مطلب ہے اپنی ذات کو مشکل میں ڈال کر مضبوط کرنا۔ جاپانی راہب سردیوں میں برفانی پانی کے جھرنے کے نیچے کھڑے ہو جاتے ہیں اور گرمیوں میں تیز دھوپ برداشت کرتے ہیں۔ جہاں ہم اے سی یا رضائی میں چھپتے ہیں، وہ اپنی حدیں بڑھا رہے ہوتے ہیں۔
یہی وجہ ہے کہ جاپانی لوگ لمبی عمر پاتے ہیں، اکثر 100 سال سے زیادہ جیتے ہیں اور بڑھاپے میں بھی کام کرتے ہیں۔ ان کا جسم اور ذہن دونوں مشقت جھیلنے کے عادی ہوتے ہیں، اسی لئے وہ بڑھاپے تک چست اور سرگرم رہتے ہیں۔
2۔ اِکیگائی (Ikigai) – زندگی کا مقصد ڈھونڈنا
اِکیگائی کا مطلب ہے وہ وجہ جس کی خاطر آپ صبح خوشی سے جاگیں۔ اگر آپ کا شوق، صلاحیت اور دوسروں کا فائدہ ایک ساتھ جڑ جائے تو وہی آپ کی زندگی کا مقصد ہے۔
مثال کے طور پر ایک استاد پڑھانے سے خوشی محسوس کرتا ہے، اس سے معاش بھی کماتا ہے اور طلبہ کو فائدہ بھی دیتا ہے – یہی اس کا اِکیگائی ہے۔ جس کے پاس مقصد ہو، وہ ادھوری زندگی نہیں جیتا۔
3۔ کوڈاوری (Kodawari) – معیار پر سمجھوتہ نہ کرنا
کوڈاوری ہمیں بتاتا ہے کہ کام کوئی بھی ہو، اسے اعلیٰ معیار کے ساتھ کریں۔ جاپانی لوگ چائے بناتے وقت بھی اتنی نفاست دکھاتے ہیں کہ لگتا ہے جیسے یہ فن ہے۔ اسی لئے دنیا جاپانی مصنوعات پر اعتماد کرتی ہے۔
اگر ہم بھی اپنی پڑھائی، نوکری یا کاروبار کو لاپرواہی سے کرنے کے بجائے اعلیٰ معیار پر کریں تو عزت اور کامیابی خود بخود ملے گی۔
4۔ شِکاتا گا نائی (Shikata ga nai) – حقیقت کو قبول کرنا
زندگی میں کچھ چیزیں ہمارے قابو میں نہیں ہوتیں۔ جاپانی اس موقع پر کہتے ہیں: شِکاتا گا نائی یعنی "اب کچھ نہیں ہو سکتا، اسے قبول کرو۔"
یہ فلسفہ ہمیں شکایت کے بجائے حل تلاش کرنے پر مجبور کرتا ہے۔ بیماری، ناکامی یا قدرتی آفت پر رونے کے بجائے حقیقت قبول کر کے آگے بڑھنا ہی اصل کامیابی ہے۔
5۔ وابی سابی (Wabi-Sabi) – سادگی اور نامکملی میں حسن
وابی سابی کا مطلب یہ نہیں کہ سب کچھ چھوڑ دیں بلکہ یہ کہ سادگی میں بھی حسن تلاش کریں اور کمال کے پیچھے اندھا دھند نہ بھاگیں۔
جاپانی ٹوٹے برتنوں کو پھینکتے نہیں بلکہ سونے یا چاندی سے جوڑ دیتے ہیں۔ اس عمل کو کنسُوگی کہا جاتا ہے۔ یوں دراڑ چھپانے کے بجائے وہ اسے خوبصورتی کا حصہ بنا لیتے ہیں۔ پیغام یہ ہے کہ انسان یا زندگی میں کمزوریاں ہوں تب بھی وہ قیمتی اور خوبصورت ہے۔
6۔ کائیزن (Kaizen) – روزانہ چھوٹی بہتری
کائیزن ہمیں بتاتا ہے کہ کامیابی بڑی بڑی جستوں سے نہیں بلکہ چھوٹے چھوٹے روزمرہ قدموں سے آتی ہے۔
مثالیں:
اگر آپ روزانہ صرف ایک صفحہ پڑھیں تو سال کے آخر میں 365 صفحات یعنی کئی کتابیں ختم کر لیں گے۔
اگر روزانہ صرف آدھا گھنٹہ نئی skill پر لگائیں تو سال میں 180 گھنٹے ہو جائیں گے اور آپ ماہر بن جائیں گے۔
اگر روزانہ صرف 10 منٹ ورزش کریں تو ایک سال میں آپ کی صحت میں کمال فرق آ جائے گا۔
یعنی چھوٹی عادتیں وقت کے ساتھ بڑی کامیابی میں بدل جاتی ہیں۔
Follow the The Eclectic Counselling Centre Islamabad channel on WhatsApp: https://whatsapp.com/channel/0029VaFmz8GHgZWclcCW4K2H
7۔ دانشاری (Danshari) – غیر ضروری بوجھ سے نجات
دانشاری کا مطلب ہے کہ زندگی سے غیر ضروری چیزوں کو نکال دینا۔ جاپانی گھروں میں کم از کم سامان ہوتا ہے، وہ صرف وہی رکھتے ہیں جو ضروری ہو۔
اسی طرح ذہنی طور پر بھی وہ غیر ضروری خواہشات اور رشتوں کے بوجھ سے آزاد رہتے ہیں۔ جب انسان غیر ضروری چیزوں سے جان چھڑاتا ہے تو دل اور دماغ دونوں ہلکے ہو جاتے ہیں اور اصل کامیابی آسان ہو جاتی ہے۔
نتیجہ
یہ سات فلسفے ہمیں یہ سکھاتے ہیں کہ کامیاب زندگی صرف دولت یا شہرت سے نہیں بلکہ مقصد، سادگی، برداشت اور مستقل مزاجی سے ملتی ہے۔
اگر ہم ان اصولوں پر عمل کریں تو ہم بھی ایک کامیاب، پُرسکون اور باوقار زندگی گزار سکتے ہیں۔
