26/02/2026
ڈپٹی انسپکٹر جنرل پولیس رینج میرپور ڈاکٹر خالد محمود چوہان اور چیئرمین ضلع کونسل راجہ نوید اختر گوگا نے ڈویژنل ہیڈ کوارٹرز ٹیچنگ ہسپتال میرپور کا دورہ کیا اور چکسواری پولیس مقابلے میں زخمی ہونے والے پولیس اہلکاروں شاہد احمد اور مبارک علی کی عیادت کی۔ معزز مہمانوں نے زخمی اہلکاروں کی خیریت دریافت کی، ان کا حوصلہ بڑھایا اور پھول پیش کیے۔
اس موقع پر میڈیکل سپرنٹنڈنٹ ڈاکٹر اعجاز احمد اور ایڈیشنل میڈیکل سپرنٹنڈنٹ ڈاکٹر اویس زاہد بھی موجود تھے۔ میڈیکل سپرنٹنڈنٹ ڈاکٹر اعجاز احمد نے بریفنگ دیتے ہوئے آگاہ کیا کہ دونوں زخمی پولیس اہلکاروں کو ترجیحی بنیادوں پر علاج معالجہ فراہم کیا جا رہا ہے اور سینئر ڈاکٹرز کی زیر نگرانی تمام ضروری طبی سہولیات مہیا کی جا رہی ہیں۔ انہوں نے بتایا کہ دونوں اہلکاروں کی حالت خطرے سے باہر ہے اور صحت یابی کی جانب گامزن ہیں۔
ڈپٹی انسپکٹر جنرل پولیس ڈاکٹر خالد محمود چوہان نے ہسپتال انتظامیہ کے اقدامات کو سراہتے ہوئے زخمی اہلکاروں کے علاج کے حوالے سے اطمینان کا اظہار کیا اور کہا کہ فرض کی ادائیگی کے دوران زخمی ہونے والے جوان قوم کا سرمایہ ہیں۔
ہسپتال انتظامیہ اس عزم کا اعادہ کرتی ہے کہ قانون نافذ کرنے والے اداروں کے اہلکاروں سمیت تمام مریضوں کو بلاامتیاز معیاری اور بروقت طبی سہولیات فراہم کی جاتی رہیں گی
