29/05/2025
عظیم امریکی، ٹرمپ، کی جانب سے شیخ مصطفیٰ العدوی کے نام
مجھے آپ کا ویڈیو پیغام موصول ہوا جس میں آپ نے مجھے اسلام کی دعوت دی ہے۔ یہ پیغام اسی طرز پر تھا جیسے تمہارے نبی محمد نے دنیا کے عظیم حکمرانوں کو دعوت دی تھی: ہرقل، قیصرِ روم کو؛ کسریٰ، بادشاہِ فارس کو؛ اور مقوقس، عظیم مصر کے حکمران کو۔
مجھے تجسس ہوا کہ آخر یہ دعوت نامہ کس محلِ حکومت سے آیا ہے؟ تو مجھے بتایا گیا کہ آپ تو نیل کے کنارے واقع مصر کے ایک دیہات میں رہتے ہیں، نہ آپ کسی حکومت یا اقتدار کے فرد ہیں، بلکہ عوام کو نکاح، طلاق، زکوٰۃ اور دیگر مسائل پر فتوے دیتے ہیں۔
اس کے باوجود، میں آپ کو حیران کروں گا کہ میں نے آپ کا پیغام سنجیدگی سے لیا۔ میں نے اس دعوت پر غور کیا، لیکن مجھے کوئی ایک وجہ بھی ایسی نظر نہیں آئی کہ میں آپ کی دعوت قبول کروں۔
آپ مجھے اسلام کی طرف بلاتے ہیں جبکہ میرے ایک اشارے پر، تمہارے سارے مسلمان حکمران میرے سامنے سر جھکا کر حاضر ہو جاتے ہیں۔ کیا بہتر نہ ہوتا کہ آپ پہلے انہی کو اسلام کی دعوت دیتے؟
آپ مجھے اسلام کی طرف بلاتے ہیں، جبکہ آپ کا اپنا اسلام آپ کو اس قابل نہ بنا سکا کہ آپ غزہ کی طرف قدم بڑھاتے، جہاں ہمارے ہتھیاروں سے مسلمانوں کا قتلِ عام ہو رہا ہے۔ آپ نے کوئی لشکر نہیں نکالا، نہ ہی کوئی قیادت سنبھالی۔ کیا وہ آپ کے دینی بھائی نہیں؟
آپ مجھے اسلام کی طرف بلاتے ہیں، لیکن آپ کا اسلام آپ کو یہ جرات بھی نہ دے سکا کہ اپنے حکمرانوں کے خلاف حق کی ایک آواز بلند کرتے، جو کہ غزہ کے خلاف سازشوں میں شریک ہیں اور وہاں کے مسلمانوں کو بھوکا مارنے میں ہمارا ساتھ دے رہے ہیں۔
میں کل ہی تین خلیجی ممالک، سعودی عرب، قطر اور امارات کے دورے سے لوٹا ہوں، اور مسلمانوں کے چار ٹریلین ڈالر لے کر واپس آیا ہوں۔ اگر مزید قیام کرتا تو اور زیادہ لے آتا۔ تو کیا آپ کا اسلام اس لوٹ مار کو جائز قرار دیتا ہے؟ یا کم از کم، کیا آپ کا اسلام آپ کو اجازت دیتا ہے کہ آپ اس پر خاموش رہیں؟
آپ نے مجھے اسلام کی دعوت دی، جبکہ آپ کے حکمران مجھے صرف دولت اور اندھی اطاعت پیش کرتے ہیں، اور آپ خود ان پر نکیر کرنے کے بجائے مجھے دعوت دیتے ہیں۔ میں آپ کے حکمرانوں سے اسلام کی عزت تلاش کرنے گیا، مگر صرف دولت اور غلامی ملی۔
آپ مجھے اسلام کی طرف بلاتے ہیں، جبکہ آپ کی دنیا چھپن ریاستوں میں تقسیم ہے جو آپس میں دست و گریبان ہیں، اور آپ میں سے کسی کی زبان سے آج تک یہ نہیں سنا کہ آؤ ہم ان سرحدوں کو مٹائیں اور ایک عادل امام کے تحت متحد ہوں۔
آپ مجھے اسلام کی دعوت دیتے ہیں، اور خود اپنے حکمرانوں کے سامنے اتنے بزدل ہیں کہ ان کے خلاف آواز بھی بلند نہیں کرتے، جبکہ یہ وہی حکمران ہیں جو میرے ایک اشارے پر میرے قدموں میں ہوتے ہیں۔
شیخ مصطفیٰ! آج غزہ کے لیے مظاہرے نیویارک، فلوریڈا، کیلیفورنیا اور دیگر امریکی ریاستوں میں ہو رہے ہیں، مگر آپ میں سے کسی کو ان کی قیادت کرتے نہیں دیکھا۔ بلکہ آپ تو ان مظاہروں کو اختلاط کی وجہ سے حرام قرار دیتے ہیں!
ہمارا ایک ماہر پائلٹ، جس پر ہم نے لاکھوں ڈالر خرچ کیے، غزہ کے حالات پر دل گرفتہ ہو کر خود کو آگ لگا بیٹھا۔ اور آپ اپنے گھروں میں آرام سے کھانے پینے میں مشغول ہیں۔ شاید آپ میں سے کوئی فتوٰی دے دے کہ وہ جہنمی ہے کیونکہ اس نے خودکشی کی!
میں حیران ہوں کہ آپ نے مجھے دعوت کیوں دی، جبکہ آپ خود اپنی زندگیوں میں کوئی ایسی نشانی نہیں رکھتے جو کسی اور کو آپ کے دین کی طرف راغب کرے؟ بلکہ میں تو یہ سوچنے لگا ہوں کہ کیا آپ اور آپ جیسے دیگر علماء واقعی مسلمان ہیں؟
شیخ مصطفیٰ! آؤ میں تمہاری سمت درست کر دوں۔
تمہارے نبی محمد نے مکہ میں، ہجرت سے پہلے، کسی بادشاہ یا حکمران کو کوئی دعوت نامہ نہیں بھیجا۔ اگر بھیجتے تو کیا کہتے؟ کہ ہم مظلوم ہیں، محصور ہیں، قریش ہمیں اذیت دے رہے ہیں، بھوک سے پیٹ پر پتھر باندھ رہے ہیں؟
اس لیے نبی نے "أسلم تسلم" (اسلام لاو، سلامت رہو) کے الفاظ سے اپنی دعوتوں کا آغاز مدینہ میں کیا، جب آپ قوت و اقتدار کے مالک بن چکے تھے، اور دنیا بھر کے حکمرانوں کو دعوت دی۔ تب آپ کے پاس ایک عملی نظام تھا، جسے دشمن بھی تسلیم کرتے تھے۔
یہی وہ حقیقی دعوتِ اسلام ہے جو بادشاہوں کو دی جاتی ہے، نہ کہ وہ جو آپ نے مجھے اپنے گھر یا ٹی وی سکرین پر بیٹھ کر بھیجی۔
شیخ مصطفیٰ! یہ نہ سمجھو کہ ہم خوشحال ہیں۔ ہمارا سرمایہ دارانہ نظام ہمیں تھکا چکا ہے، ہمارے خاندان برباد کر دیے، ہماری معاشرت کو جانوروں سے بدتر بنا دیا۔ یہاں مرد مرد سے اور عورت عورت سے شادی کرتی ہے، اور میں پوری قوت سے ان گندگیوں کے خلاف لڑ رہا ہوں، لیکن حیرت ہے کہ آپ کے خواص میں بھی یہ رجحانات جنم لے رہے ہیں!
تم کہاں ہو؟ اور وہ اسلام کہاں ہے جس کی طرف تم بلاتے ہو؟
میں قسم کھاتا ہوں ایوانکا اور اس کی ماں کی عزت کی، کہ اگر تم نے اسلام ویسے ہی نافذ کیا ہوتا جیسے تمہارے نبی اور خلفائے راشدین نے کیا، تو ہم سب سے پہلے تمہارے دین کو قبول کرتے۔ ہمیں اس دین کی ضرورت ہے، نہ کہ صرف رسوم کی، بلکہ اس لیے کہ یہ ہمیں سرمایہ دارانہ نظام کی غلاظت سے نکالے۔ مگر کیا کریں، تم تو اسے نافذ کرنے کی جرات ہی نہیں رکھتے۔
آخر میں، میں تمہیں عزّ بن عبدالسلام کی یاد دلاتا ہوں، جس نے ظالموں کے خلاف کلمہ حق کہا اور تخت و تاج ہلا دیے۔
میں تمہیں دعوت دیتا ہوں کہ ان کے نقش قدم پر چلو، حق بات کہو، اللہ سے ڈرو، دنیا سے نہیں۔ ویسے ہی مرد بنو جیسے تمہارے رب نے تمہیں کہا، ویسے ہی تبدیلی لاؤ جیسے تمہارے نبی نے لائی۔ ان سرحدوں کو مٹاؤ جو ہم نے تمہارے درمیان قائم کیں، ان تختوں کو گراؤ جو ہم نے تمہارے سروں پر بٹھائے، اور انہی کے ملبے پر اپنا اسلام نافذ کرو۔
اگر تم نے ایسا کیا تو ہمیں تمہاری دعوت کی ضرورت نہیں رہے گی، بلکہ میں خود اپنے لوگوں کی قیادت کرتا ہوا تمہارے ملک کی طرف ہجرت کروں گا۔
ٹرمپ
شیخ سرور الدین سرور حفظہ اللہ۔ منقول سید محمد کلیم جان
