17/11/2025
محکمہ صحت، حکومت خیبرپختونخوا کی جانب سے خسرہ و روبیلا (MR) مہم کا باقاعدہ آغاز کر دیا گیا۔ افتتاحی تقریب میں صوبائی وزیر صحت خلیق الرحمان، چیف سیکرٹری شہاب علی شاہ، سیکرٹری ہیلتھ شاہد اللہ خان، سیکرٹری انفارمیشن بختیار خان، ای او سی کوآرڈینیٹر شفیع اللہ خان ،معاونِ خصوصی برائے اطلاعات شفیع اللہ جان، ڈی جی ہیلتھ شاہد یونس، ڈائریکٹر ای پی آئی ڈاکٹر اصغر خان، یونیسیف ہیلتھ ٹیم لیڈ ڈاکٹر انعام اللہ خان محکمہ صحت کے افسران، یونیسیف اور عالمی ادارۂ صحت کے نمائندوں نے شرکت کی۔
یہ مہم صوبے بھر میں 17 سے 29 نومبر تک جاری رہے گی، جس کے دوران 6 ماہ سے 5 سال تک کے تمام بچوں کو خسرہ اور روبیلا سے بچاؤ کی ویکسین دی جائے گی۔ صوبے کا ہدف ہے کہ 64 لاکھ بچوں کو ویکسین لگا کر کم از کم 95 فیصد کوریج حاصل کی جائے۔
مہم کے لیے مجموعی طور پر 6,509 ویکسینیشن ٹیمیں تشکیل دی گئی ہیں، جن میں 1,616 فکسڈ ٹیمیں، 4,678 آؤٹ ریچ ٹیمیں اور 215 موبائل ٹیمیں شامل ہیں۔ تمام تیاریاں، مائیکرو پلاننگ، پلان کی جانچ اور عملے کی تربیت مکمل ہو چکی ہے، جبکہ متعلقہ محکمے فیلڈ میں تعاون فراہم کر رہے ہیں۔
وزیر صحت خلیق الرحمان نے کہا کہ محکمہ صحت میں کئی منصوبے جاری ہیں جن کا مقصد عوام کو بہتر صحت سہولیات فراہم کرنا ہے۔ انہوں نے کہا کہ حکومت محکمہ صحت کے ساتھ ہے اور ہر سطح پر تعاون فراہم کر رہی ہے۔ ان کا کہنا تھا کہ خسرہ و روبیلا مہم کی کامیابی ہم سب کی مشترکہ ذمہ داری ہے۔
چیف سیکرٹری شہاب علی شاہ نے کہا کہ صحت کا شعبہ صوبائی حکومت کی اولین ترجیحات میں شامل ہے۔ انہوں نے کہا کہ ضلعی انتظامیہ خسرہ و روبیلا مہم کو ہر ممکن حد تک کامیاب بنانے کے لیے کام کر رہی ہے۔ انہوں نے والدین سے اپیل کی کہ وہ محکمہ صحت کی ٹیموں کے ساتھ تعاون کریں، کیونکہ عوام کے تعاون کے بغیر کوئی مہم اپنے اہداف حاصل نہیں کر سکتی۔
سیکرٹری ہیلتھ شاہد اللہ خان نے کہا کہ محکمہ صحت میں اصلاحات جاری ہیں۔ انہوں نے کہا کہ میڈیا کا کردار اہم ہے اور امید ہے کہ میڈیا مہم کے دوران مثبت کردار ادا کرے گا تاکہ کوئی بچہ ویکسین سے محروم نہ رہے۔
ڈائریکٹر ای پی آئی ڈاکٹر اصغر خان نے کہا کہ مہم کے لیے تمام تیاریاں مکمل ہیں اور محکمہ اس مہم کو کامیاب بنانے کے لیے پرعزم ہے۔ انہوں نے حکومت کی معاونت پر شکریہ بھی ادا کیا۔
Let's get Information about Health
