23/04/2026
پروفیسر ڈاکٹر نوشیروان خان برکی کی زیرِ صدارت اجلاس: جدید موبائل ایپ کے ذریعے مربوط ڈیجیٹل ریفرل سسٹم اور ریئل ٹائم ہیلتھ انفارمیشن نظام کے قیام کا فیصلہ
پشاور: چیئرمین پالیسی بورڈ میڈیکل ٹیچنگ انسٹیٹیوشنز خیبرپختونخوا، پروفیسر ڈاکٹر نوشیروان خان برکی کی زیرِ صدارت اہم اجلاس منعقد ہوا جس میں صوبائی وزیرِ صحت خلیق الرحمان، مرکزی صدر انصاف ڈاکٹرز فورم ڈاکٹر مُدیر خان وزیر، صوبائی صدر انصاف ڈاکٹرز فورم خیبرپختونخوا ڈاکٹر نبی جان آفریدی سمیت محکمہ صحت کے اعلیٰ حکام نے شرکت کی۔
اجلاس میں صوبے میں صحت کے نظام کو مزید مؤثر، مربوط اور عوام دوست بنانے سے متعلق اہم امور پر تفصیلی غور کیا گیا۔
اجلاس کو بتایا گیا کہ ایک خصوصی موبائل ایپلیکیشن تیار کر لی گئی ہے جو اس وقت ٹیسٹنگ مرحلے میں ہے۔ اس ایپ کو بطور پائلٹ پراجیکٹ پشاور ڈویژن میں متعارف کرایا گیا ہے، جس میں چارسدہ، مہمند، پشاور، خیبر اور نوشہرہ شامل ہیں۔ اس اقدام کے تحت ڈویژن کے تمام ہسپتالوں، خصوصاً ان کے ایمرجنسی (Accident & Emergency) شعبہ جات کو اس ایپ کے ذریعے باہم منسلک کیا جا رہا ہے۔ اس انضمام سے مریضوں کے ریفرل سسٹم کو زیادہ مربوط، مؤثر اور منظم بنایا جائے گا، جس کے نتیجے میں مریضوں کو بروقت اور مناسب علاج تک رسائی مزید بہتر ہو سکے گی۔
مزید برآں، اجلاس میں ایک جدید اور مربوط نظام کے قیام پر بھی روشنی ڈالی گئی جس کے ذریعے ہسپتالوں میں بستروں کی دستیابی، ادویات اور دیگر سہولیات سے متعلق بروقت معلومات مریضوں اور ان کے لواحقین تک پہنچائی جائیں گی۔ اس اقدام سے نہ صرف مریضوں کو سہولت میسر آئے گی بلکہ ہسپتالوں کے درمیان بہتر ہم آہنگی اور وسائل کے مؤثر استعمال کو بھی یقینی بنایا جا سکے گا۔
پروفیسر ڈاکٹر نوشیروان خان برکی نے اس موقع پر کہا کہ یہ اصلاحات صحت کے نظام کو مزید شفاف، مؤثر اور عوام دوست بنانے کی جانب ایک اہم قدم ہیں، جن کے ذریعے ہر مریض کو بروقت اور معیاری علاج کی فراہمی یقینی بنائی جائے گی۔
اجلاس میں اس عزم کا اعادہ کیا گیا کہ محکمہ صحت صوبے کے ہر شہری کو اس کی دہلیز پر معیاری اور بروقت طبی سہولیات کی فراہمی کے لئے پرعزم ہے۔ اس سلسلے میں حکومت کی واضح ترجیح یہ ہے کہ مریضوں کو غیر ضروری ریفرلز سے بچایا جائے اور زیادہ سے زیادہ علاج ضلعی اور تحصیل سطح پر ہی فراہم کیا جائے تاکہ عوام کو بہتر سہولت اور آسان رسائی ممکن ہو۔
انصاف ڈاکٹرز فورم خیبرپختونخوا
میڈیا سیل
