27/11/2025
*اجمل طبیہ کالج راولپنڈی کے طلباء و طالبات کا اساتذہ کے ہمراہ بسلسلہ شناخت ادویات مطالعاتی دورہ *
مورخہ 23/11/2025 بروز اتوار ، اجمل طبیہ کالج راولپنڈی کی طرف سے ایک مطالعاتی و معلوماتی پروگرام بمقام موضع تلہاڑ اسلام آباد اور یاسمین اینڈ روز گارڈن اسلام آباد کا اہتمام کیا گیا.
اس مطالعاتی و معلوماتی پروگرام کا اہتمام اجمل طبیہ کالج راولپنڈی کے پرنسپل محترم جناب پروفیسر حکیم عمران لودھی صاحب کی سربراہی میں پروفیسر حکیم میر ویس خان صاحب نے کیا جن کی معاونت دیگر اساتذہ کرام حکیم عبدالمجید مرزا ، حکیم محمد علی ملک اور حکیم ضیاء الرحمن صاحب نے کی.
پروگرام کے مطابق اجمل طبیہ کالج راولپنڈی سے صبح تقریباً 10 بجے کالج کے طلباء و طالبات کا ایک گروپ بذریعہ بس سب سے پہلے موضع تلہاڑ اسلام آباد کی طرف روانہ ہوا.
دامن کوہ اسلام آباد کی بل کھاتی شاہراہوں اور سرسبز چوٹیوں سے ہوتا ہوا تقریباً 11:30بجے موضع تلہاڑ اسلام آباد کے بلندوبالا اور پرفضا مقام پر پہنچ گیا.
وہاں پہنچ کر مختلف نباتات، جڑی بوٹیوں، پودوں اور درختوں کے بارے میں جو کہ ادویاتی خواص و اوصاف کے حامل تھے ان پر اساتذہ کرام نے سیر حاصل گفتگو اور علمی معلومات فراہم کی. ان کی جڑوں، تنوں ، چھالوں ، ٹہنیوں، پتوں ، گوند ، پھلوں اور پھولوں کے علیحدہ علیحدہ خواص اور استعمالات پر مکمل ادراک و آگاہی فراہم کی. اس پروگرام کو یادگار بنانے کے لئے سب طلباء نے تصاویر اور ویڈیوز بھی بنائیں.
تقریباً 3 گھنٹے بعد اساتذہ کی زیر نگرانی تمام طلباء پروگرام کے مطابق یاسمین اینڈ روز گارڈن اسلام آباد کی طرف روانہ ہوئے. وہاں پہنچ کر بھی مختلف نباتات، جڑی بوٹیوں، پودوں اور درختوں کی ادویاتی اوصاف و خواص پر معلومات بہم پہنچائی گئی.
اس دوران نماز ظہر کی ادائیگی کے بعد پر تکلف ظہرانہ کا اہتمام کیا گیا. اور سب بریانی اور سافٹ ڈرنکس سے لطف اندوز ہوئے . کھانے کے بعد گرما گرم چائے سے اساتذہ کرام اور طلباء و طالبات کی تواضع کی گئی. اس کے بعد بھی مطالعاتی و معلوماتی پروگرام جاری و ساری رہا.
بعد نماز عصر واپسی کے لئے روانگی ہوئی اور تقریباً 5 بجے سب بخیروعافیت واپس کالج پہنچ گئے.
اس بہترین مطالعاتی پروگرام کے لئے سب طلباء و طالبات اجمل طبیہ کالج راولپنڈی کی انتظامیہ و اساتذہ کرام کے بہت ممنون و مشکور ہیں. جن کی بہترین مخلصانہ کاوشوں سے یہ علمی، عملی و معلوماتی پروگرام ممکن ہوا.
