23/08/2025
المدارس قربت و كلامي النهاردة مش يلا نعلم اولادنا الاختلاف وبلاش التنمر و الكلام الجميل ده ….
كلامي النهارد للعكس لان ببساطة لازم نقتنع ان في ناس مش هاتربي اولادها ولا كل الناس مهتمة اصلا ان اولادها يراعوا مشاعر الاخرين ….
انا كلامي للاولاد و البنات الي بيتم عليهم التنمر
انا كأم و اب اعمل ايه ؟!!!
اولا في حاجات اعملها احترازيه
- لازم اسمح لابني بالاعتراض ( بأدب)
يعني اديله مساحة انه يغترض على اوامري ، لان ده ببساطه بيديله جرأه انه يعترض على تصرف صحابه الي مش عاجبه .
- لازم اعلم ابني او بنتي يعبروا عن مشاعرهم و افهمها و بلاش جملة مش عايز اسمع عياطك …
- لازم دايما اكبر دائرة معارف اولادي . يعني بلاش يبقى اعتمادهم الكلي على اصحاب المدرسة.
و في حاجات كتير بس خالينا نركز على دول دلوقتي
نيجي بقى لثانيا
ثانيا اعمل ايه لو ابني بيتعرض دلوقتي للتنمر و رجوع المدرسة بقى حمل على قلبه….
- اولا لازم اسحبه من الدائرة دي حالا و اعرفه ان ده علشان مصلحته و ان دول مش صحاب اصلا .
-ادور على حاجة بره الدراسة ابني منيز فيها ( رسم، رياضة، موسيقى، coding)
و ابتدي ادخله فيها لان احساس التمييز الي هايوصله هايحسسه بثقة بالنفس و مش هايبقى محتاج يسكت على الضغط الي صحابه بيعملوها.
-ابتدي اديله ادوار قياديه في محيط العائله و الاصدقاء. لان ده هايساعده انه يتاجاهل تصرفات الصحاب البايخة لانه هايبقى شايف دوره اكبر بكتير مش شوية عيال
دي حاجات بسيطة نقدر نعملها من غير كلكعه و تنظير .
لو مش هانعرف نربي المجتمع يبقى على الاقل نقوى اولادنا علشان يواجهه المجتمع
#التربيةالايجابية
