28/11/2025
#الكيك !
الكيك يعتبر الحاجة رقم ٢ كدا بعد البسكويت عند السودانيين وبحبوه حب شديد .. اصلو اي حاجة بتهرد البنكرياس دي السودانيين بحبوها.
كدي ارفع راسك "ساي" كدا وامشي لي ناس زيارة المغرب كان ماجابو ليك بسكويت قطع شك حيجيبو ليك كيك بي شاي لبن .
وبعدين الكيك دا فيو حاجة كدا غريبة تاكل كيكة قدر المخدة .. تاكل مية كيكة وبرضو جعان .. اقول ليك شي جيب كيك الدكان كلو اكلو ما بتشبع .
ليه؟ ببساطة كدا الكيك مصنوع من دقيق ابيض .. وبتهضم في فترة وجيزة جداً جداً.. يعني اللقمة الاولى والتانية بنزلق في بطنك بهرد البنكرياس وبختفي وبعدها بي فترة بسيطة شديد بتحس نفسك وكانك ما اكلت اي حاجة .
وانت قايل دا كلو "ساي" كدا؟ لا طبعا الكيكة الوحدة فيها ما لايقل عن ٣٠٠ - ٥٠٠ سعرة حرارية.. يعني كيك ساي ممكن تعمل الف سعرة حرارية في اليوم
عشان كدا الكيك عدوك الأول لو عايز تنزِّل وزنك.. وحتى لو هدفك تزيد وزن دي ما الطريقة الصح لانك حتهرد بنكرياسك "ساي" ومسافة وزنك يزيد عادي بتخش في مقاومة انسولين .
عموما كدا الكيك دا حكمه حكم البسكويت والزلابيا .. ماتشبع فيو وما تاكلو وانت جعان وكلو بالمعقول وما تبقى شنو؟ ماتبقى عوير
#شكرا ❤️
