29/06/2025
*الفرق بين الأشعة السينية، الأشعة المقطعية، والرنين المغناطيسي؟*
كتير من الناس لمن يمشوا يكشفوا، الدكتور يطلب ليهم نوع معين من الأشعة، ويجي السؤال الطبيعي:
ليه طلب لي الأشعة دي، وما طلب التانية؟
لأنو ببساطة في فرق بينهم وكل نوع ليه إستهداماتو...
#أولاً: الأشعة السينية (X-Ray):
دي أبسط وأقدم نوع من أنواع التصوير الطبي.
بنستخدمها يومياً في الطوارئ والمستشفيات.
▪️شنو بتكشف؟
- الكسور في العظم.
- التهابات الصدر والرئة (زي الالتهاب الرئوي).
- مشاكل الأسنان.
#مميزاتها:
سريعة جداً، رخيصة، فيها إشعاع بسيط، لكن مقبول لو ما تكرّرت كتير.
لكن... ما بتورّي التفاصيل الصغيرة، خاصة في العضلات أو الأعصاب.
#ثانياً: الأشعة المقطعية (CT Scan):
دي زي نسخة مطوّرة من الأشعة السينية، لكن أقوى وأدق.
بتاخد صور مقطعية (يعني زي شرائح) من الجسم، وبتجمعها في صورة واحدة واضحة.
▪️ شنو بتكشف؟
- النزيف الداخلي، خاصة في المخ بعد الحوادث.
- الأورام.
- مشاكل البطن والصدر.
- كسور معقدة ما بتظهر في الأشعة العادية.
#مميزاتها:
سريعة جداً، وبتستخدم في الحالات الطارئة، أغلى من الأشعة العادية، فيها إشعاع عالي نسبياً، عشان كده ما بنعملها ساكت بدون داعي.
#ثالثاً: الرنين المغناطيسي (MRI):
ده ما بيستخدم إشعاع، بل بيعتمد على مغناطيس قوي جداً وأمواج راديو.
يعني آمن من ناحية الإشعاع.
▪️ شنو بيكشف؟
- مشاكل الأعصاب والمخ.
- الغضاريف والمفاصل.
- العضلات والأربطة.
- الأورام اللي ما بتظهر في الأشعة التانية.
لكن عندو عيوب:
بياخد وقت طويل، غالي.. الناس العندهم أجهزة معدنية في جسمهم (زي شرايح أو منظمات قلب) ما بقدروا يعملوه.
#الخلاصة :
- الأشعة العادية (X-Ray) ممتازة لو عندك كسر أو اشتباه في التهاب في الصدر.
- الأشعة المقطعية (CT) بنحتاجها لو في اشتباه نزيف، ورم، أو إصابة داخلية.
- الرنين المغناطيسي (MRI) هو الأدق، خصوصاً في تصوير الدماغ، الأعصاب، والغضاريف، لكنه الأغلى والأبطأ.
![*"لأجمل لحظة في حياتك... ولادة آمنة ومريحة"*🌟 *مرحبًا بكم في [لاين كير ] – فريق سوداني من اخصائي النساء والتوليد في كب...](https://img4.findhealthclinics.com/953/818/1092738919538186.jpg)
