17/04/2022
بتعرفوا حاجة عن نظرية ال
Theory of mental self-government
او اسمها التاني نظرية ال thinking styles???!!
😁لو ما عارفين اقروا الكلام دا كويس لانه حفيدك لقدام انه تحدد روحك اي نمط من انماط التفكير حقتك وكمان تعرف انماط واساليب تفكير الناس المعاك.
لو بتلاحظوا لأسم النظرية في حكومة حاصلة ولو رجعنا لأساس تشكيل اي حكومة في الدنيا حنعرف ليه اتسمت النظرية كدا.
طيب اي حكومة لازم تكون عندها تلاته سلطات:
سلطة تشريعية، سلطة تنفيذية ، سلطة قضائية.
اي سلطة من السلطات دي بتلعب دورها المهم في كيان الدولة واي خلل في اي واحدة بشل الدولة.
في عالم اسمه Robert j. Sternberg مختص في علم النفس في نظريته دي قال انه التشكيل الموجود دا للحكومة الاتكونت من قبل الانسان نفسه ما كانت صدفة وما هي الا تمثيل ومرآة عكسها لكيف بنظم او بحكم بيه روحه داخليا، فعلى الاساس دا كان في تلاته انماط للتفكير واي واحد فينا بكون ميال اكتر لنمط معين اكتر من التاني اللهم:
1. Legislative thinking ( التفكير التشريعي) :
اصحاب النوع دا من التفكير ميالين اكتر للمهمات او المشاريع والحالات البتطلب الابتكار، والصياغة ، والتخطيط وتوليد الافكار، ووضع الاستراتجيات اللهو بكونوا عاوزين يقرروا ويقولوا المفترض يتعمل شنو وكيف تتعمل الحاجة اكتر ما يقرروا ليهم الناس طريقة معينة عشان يعملوا بيها الحاجة.
2. Executive thinking ( التفكير التنفيذي):
يلا الناس هنا بتجهوا اكتر للمهمات والمشاريع البكون فيها بنية جاهزة وقواعد منظمة مختوتة ويقعدوا يشتغلوا على اساس الاستراتجيات او القواعد المعمولة اساسا
ففرقهم من اصحاب التفكير التشريعي انه عاوزين يتقال ليهم يعملوا شنو بالظبط وحنفذوه على اكمل وجه في ارض الواقع.
3. Judicial thinking ( التفكير القضائي):
شفتوا الناس البكونا دائما بعدلوا على التانيين وناقدين من الدرجة الاولى؟
ديل هم اصحاب النوع دا من التفكير اللهو بتجهوا اكتر للاعمال البتطلب تحليل ، و تقييم واكتشاف الثغرات وعمل مقارنات وإيجاد الاختلافات بين المشاريع والحالات المختلفة في سبيل التطوير واكتشاف طرق تانية احسن من الاتعمل.
حتكونوا لاحظتوا انه التلاتة انماط من التفكير مكملة لبعض ودا الفكرة من اصلوا ودا المفترض اي حكومة تكون متشكلة على اساساها:
المشرعيين هم البختوا الخطط والافكار والاستراتجيات البحدد اليتعمل شنو والما يتعمل شنو البجوا التنفيذين بعداك بعملوا على اساسها ويشتغلوا على انها تتحول من مجرد فكرة لشئ له كيان في ارض الواقع وبكونوا ملتزميين بيها البجوا بعداك اصحاب التفكير النقدي| القضائي بحلل كل من الافكار و البناء الاتعمل على اساسه ويعمل مقارنات بينها وبين افكار تانية او استراتيجيات اخرى ويقيمها عشان تظهر بصورة احسن.
وزي ما ذكرنا قبيل انه اي واحد منكم حكون ميال اكتر لطريقة تفكير معينة حاولوا حددوها لانه الحاجة دي ممكن كتيير تساعدكم في اختيار نوع العمل المناسب لطريقة تفكيرك وكيف تفهم برضو الناس التانيين المخالفين لطريقة التفكير حقتك وما تستغربهم وكيف توصل للناس دي بمحاكاة طرق تفكيرهم.
النظرية كمان اتكلمت عن حاجات تانية حنكتب عنها كمان ان شاء الله في لقاء اخر💙.
😁 ورونا انتو اي نمط تفكير بمثلكم اكتر؟؟!
