Mohammed Qurashi Abbas

23/02/2026

عائلة الحزاز – الشائع الغامض
فنان العائلة

في المنشور ده دايرين نخت المجهر على "فنان العائلة" أو النوع اللي برسم خطوط هندسية في الجلد، وهو "الحزاز الخطي" (Lichen Striatus).

النوع دا بيختلف عن بقية أخوانو لأنو بظهر في الغالب عند الأطفال (بين عمر 3 لـ 12 سنة)، وبجي فجأة في شكل حبوب صغيرة جداً ولونها بمبي أو بلون الجلد، وبتكون مرتبة في شكل "خيط" أو خط طويل ومستمر بيمتد على طول اليد أو الرجل. الحكاية دي ما صدفة، لأنو الحبوب دي بتمشي وراء مسارات سرية في الجلد بنسميها "خطوط بلاشكو" (Blaschko lines)، وهي طرق مخفية اتكونت والجنين لسه في بطن أمه، وكأنو المرض دا بيتبع خريطة قديمة مرسومة جوا الجلد بسبب طفرات جينية بسيطة بتحصل لبعض الخلايا وهي لسه بتنمو.

الجميل والمطمن في الحزاز الخطي إنو في أغلب الحالات بكون "مسالم" جداً؛ يعني الطفل لا بيحس بحكة ولا بوجع، والموضوع بكون بس في شكل الخط الملون دا. ومن الملاحظات المهمة إنو المرض دا بيحب يجي مع الأطفال اللي أصلاً عندهم تاريخ مع "الحساسية البنيوية" زي الأكزيما أو أزمة الصدر (الربو) أو حساسية الأنف. وفي حالات تانية، ممكن نلقى المرض دا "هبش" الأظافر، وبظهر في شكل ظفر واحد بس بكون فيهو خطوط بارزة أو تشققات أو بيبقى رقيق ومكسور من جهة واحدة، ودا دايماً بيكون في نفس اليد أو الرجل اللي فيها خط الحبوب.

أما بخصوص العلاج، فالكلمة السحرية هنا هي "الصبر"؛ لأنو الحزاز الخطي دا حالة "بتمشي براها" (Self-limiting) وبتحتاج فترة من 6 شهور لسنة عشان تتلاشى نهائياً. وممكن لما الحبوب تروح، تسيب وراها بقع لونها "فاتح" (Hypopigmentation) شوية عن الجلد الطبيعي، ودا بظهر أكتر عند الأطفال اللي بشرتهم داكنة، لكن البقع دي برضه مؤقتة وبيرجع لون الجلد يتوحد مع الوقت.

غالباً ما بنحتاج ندي أدوية قوية، وممكن نكتفي بمرطبات أو كريمات كورتيزون خفيفة لو كان في حكة بسيطة، وبنقول للأهل إنو الخط دا هو مجرد "سحابة صيف" وحتعدي بسلام من غير ما تترك أي أثر دايم في مستقبل الطفل الجمالي.

23/02/2026

عائلة الحزاز – الشائع الغامض
الأخ الأصغر اللامع

بالمنشور ده حنتعرف على "الأخ الصغير" والمميز جداً في عائلة الحزاز، وهو "الحزاز اللامع" (Lichen Nitidus). وكلمة "نيتيداس" باللاتيني معناها "لامع" أو "براق"، ودا لأنو بظهر في شكل حبوب دقيقة جداً (زي رأس الدبوس) وليها لمعة واضحة لما الضوء يقع عليها. المرض دا في الغالب "صديق للأطفال" والشباب الصغار، ونادراً ما بصيب الكبار، وبيعتبر حالة منفصلة ومستقلة تماماً عن الحزاز العادي رغم التشابه في الاسم.

الحبوب دي بكون حجمها صغير شديد (حوالي 1-2 ملم)، وبتكون بنفس لون الجلد أو بتميل للون البمبي الخفيف، لكن في بشرتنا السودانية الغامقة ممكن تظهر في شكل بقع فاتحة شوية أو أغمق من الجلد الطبيعي.

الحزاز اللامع بحب مناطق معينة جداً في الجسم، زي "باطن الساعد" و"ظهر اليدين"، ومنطقة الصدر والبطن، وكمان منطقة الأعضاء التناسلية عند الرجال (القضيب). ومن الصفات المشتركة بينه وبين أخوه الكبير، إنو برضه بيعمل (ظاهرة كوبنر)؛ يعني الحبوب الصغيرة دي ممكن تترص في شكل خط مستقيم لو الجلد اتعرض لخدش أو هرش قوي.

من الحاجات المريحة في النوع دا إنو غالباً بكون "صامت" وما بيعمل وجع أو حكة شديدة، والمريض بكتشفه بالصدفة أو بلاحظ اللمعة بتاعته تحت الضوء، لكن مرات عينه بتمشي للأظافر، والكلام دا بيحصل عند حوالي 10% من المصابين بيهو، الظفر بتبدأ تظهر فيهو حفر صغيرة شديد كأنو زول نقره بإبرة، أو تظهر فيهو خطوط طولية بارزة، ومرات الظفر براهو بيبقى خفيف ورقيق أو سميك زيادة عن اللزوم. الحاجة المطمنة إنو حتى مشاكل الأظافر دي في الغالب بتمشي وبتروح براها لما المرض يختفي من الجلد.

كمان الحزاز اللامع دا ما دايماً بيجي براهو، فغالباً بنلقاهو "رفيق" لأمراض تانية مشهورة، وأكتر زول بكون ماشي معاهو هو "الأكزيما البنيوية" اللي اتكلمنا عنها قبل كدة، ودا بيخلينا دايماً نفتش عن أي علامات حساسية تانية عند المصاب. وفي حالات نادرة، الدراسات لقت إنو ممكن يظهر مع أمراض تانية زي مرض "كرون" (التهاب الأمعاء)، أو متلازمة داون، وحتى مع بعض أنواع التهابات المفاصل اللي بتصيب الأطفال. الحكاية دي بتورينا إنو الجلد دايماً هو "المراية" اللي بتعكس صحة الجسم من جوه، وإنو حتى حبة صغيرة بتلمع زي رأس الدبوس ممكن تكون ليها علاقة بقصة صحية تانية خالص.

الكويس فيهو هو إنو الحزاز اللامع في الغالب مرض "حميد" وبمشي براهو من غير أي علاج في فترة سنة واحدة عند حوالي ثلثين المصابين، لكن لو كان منتشر في كل الجسم أو الحكة كانت مزعجة، بنلجأ لكريمات الكورتيزون الخفيفة أو العلاج بالضوء (Phototherapy)، ودايماً بنطمن الناس إنو آثاره الملونة اللي بتفضل بعد الشفاء بتبدأ تتلاشى تدريجياً مع الوقت.

23/02/2026

عائلة الحزاز – الشائع الغامض
وبينهما متشابهات !!

الليلة عندنا "ضيف ثقيل" ومخادع جداً بنسميه (Lichenoid Atopic Dermatitis) أو "أكزيما الحزاز". النوع دا في الحقيقة هو نوع نادر من أنواع الأكزيما البنيوية (Atopic Dermatitis)، لكن الفارق إنو بغير شكله تماماً وبظهر في هيئة حبوب بنفسجية أو بقع بارزة ومسطحة بتخلي أي زول يشوفها يحلف إنها حزاز أصلي بسبب التشابه الكبير في الشكل

والسبب اللي خلانا نركز عليهو الليلة إنو النوع دا بظهر غالباً وبكثرة في "البشرة الداكنة" أو شديدة السمار، ودا اللي بيخلينا دايماً حذرين في السودان لأنو صبغة الجلد عندنا بتغير شكل الالتهاب وتخليهو يظهر باللون الأرجواني أو الرمادي الغامق بدل الاحمرار العادي.

الفرق الجوهري بين النوع دا والحزاز الكلاسيكي بيبدأ من "المكان"؛ فبينما الحزاز بحب ثنيات المعصم واليدين، أكزيما الحزاز دي غالباً بنلقاها في "المناطق الخارجية" من الجسم زي الركب والكوعين من برة. والمريض بحس فيها بحكة جنونية و"نار" بتخليهو يهرش المنطقة دي باستمرار، ودا اللي بيزيد سماكة الجلد ويخليها تشبه الحزاز المتضخم أو السميك.

الغريب في الأمر إننا لو شلنا عينة من الجلد دا وفحصناها تحت المجهر، ما حنلقى تدمير الخلايا القاعدية اللي بنشوفو في الحزاز الحقيقي، لكن حنلقى حاجة بنسميها (Spongiotic dermatitis)؛ ودي معناها ببساطة إنو في سوائل أو "وذمة" بين خلايا الجلد، وهي العلامة المميزة للأكزيما.

وعشان الحبوب والطبقات دي بتكون سميكة ومتحجرة، الكريمات البسيطة والمرطبات ما بتقدر عليها؛ فبنضطر نستخدم كريمات كورتيزون قوية جداً (Potent steroids) زي "الكلوبيتازول" بتركيزات معينة عشان نقدر نكسر حدة الالتهاب دا ونرجع الجلد لشكله الطبيعي. الحكاية دي بتورينا إنو التشخيص الدقيق هو اللي بحدد العلاج، وما كل حكة ولون بنفسجي معناها حزاز.

22/02/2026

عائلة الحزاز – الشائع الغامض
مسار المعالجات الممكنة والوقاية

وصلنا لمحطتنا الأخيرة في رحلتنا مع الحزاز، والسؤال الأهم هو: "كيف حنتعامل معاهو ونغلبه؟". الحقيقة إنو علاج الحزاز ما فيهو "وصفة واحدة" بتنفع للكل، لأنو الخطة لازم تتفصل تفصيل على حسب نوع الحزاز، ومكانه، وشدة الحكة، وحتى جينات المريض وبيئته
الهدف الأساسي من العلاج هو إننا نسيطر على الأعراض المزعجة زي الحكة والحريق، ونخفف الالتهاب عشان نمنع حدوث ندبات أو بقع سوداء عميقة، وفي حالات حزاز الفم، بنركز كمان على المتابعة الدقيقة عشان نمنع أي تحول سرطاني لا قدر الله.

في "ترسانة" العلاج، بنبدأ غالباً بالكريمات القوية جداً زي "الكلوبيتازول" (Clobetasol) اللي بنعتبره "الضربة القاضية" للحكة والالتهاب في الحالات المحدودة، ولو كان الحزاز في الوش أو مناطق الجلد الرقيقة، بنستخدم بدائل تانية زي "التاكروليمس" (Tacrolimus) لأنو فعال وما بيعمل ترقق في الجلد مع الاستخدام الطويل.

أما لو كان الحزاز منتشر في كل الجسم أو أصاب الشعر والأظافر بقوة، هنا بنحتاج لتدخل "ثقيل" بالأدوية اللي بتتاخد بالفم زي حبوب "البريدنيزولون" (Prednisolone) لفترة محددة، أو مشتقات فيتامين أ زي "الأسيتريتين" للأنواع المتضخمة العنيدة، والخبر الجميل إنو العلم حالياً وصل لأدوية حديثة جداً زي "مثبطات جاك" (JAK inhibitors) اللي أظهرت نتائج مبشرة جداً للحالات اللي ما استجابت للعلاجات التقليدية.

لكن العلاج الدوائي براهو ما كفاية إذا ما غيرنا طريقة تعاملنا مع المرض في حياتنا اليومية، في السودان، شمسنا الحارة هي "المحفز الأول" لأنواع كتيرة من الحزاز، وعشان كدة استخدام واقي الشمس (SPF 50+) بانتظام ولبس الملابس الساترة هو جزء لا يتجزأ من العلاج، ما بس عشان نحمي الجلد، لكن عشان نمنع البقع السوداء (PIH) من إنها تزيد.

كمان لازم نطبق مبدأ "التعامل اللطيف" مع الجلد؛ يعني نبتعد تماماً عن الهرش القوي أو استخدام ليفة خشنة، لأنو أي إصابة للجلد بتحفز الجهاز المناعي يربي حبوب جديدة في مكان الجرح، وما ننسى دور "الراحة النفسية"، لأنو التوتر هو "البنزين" اللي بيزيد نار الحزاز، وعشان كدة تمارين الاسترخاء والابتعاد عن الضغوط بساعدوا الجسم يستعيد توازنه المناعي.

وأخيراً، التعايش مع الحزاز بطلب مننا نكون واعين؛ فمثلاً لازم أي مريض في بعض الدول العربية يعمل فحص الكبد الوبائي (C) كإجراء روتيني لانو العلاقة بينهم قوية في دول بعينها، ولو كان الحزاز في الفم، المتابعة الدورية مع الطبيب كل 2 لـ 3 شهور ضرورية جداً للتأكد من إنو الأمور كويسة.

الحزاز مشواره طويل ومحتاج صبر ومتابعة، لكن بالالتزام بالخطة العلاجية والوقاية، بنقدر نسيطر عليهو ونعيش حياتنا بصورة طبيعية جداً. نتمنى تكون السلسلة دي نورت ليكم جوانب غامضة في المرض دا، ودايماً نتذكر إنو المعرفة هي أول خطوة في طريق الشفاء

22/02/2026

عائلة الحزاز – الشائع الغامض
مسار المرض والآثار المتوقعة

السؤال اللي دايماً بنسمعو في العيادة وبكون شاغل بال أي مريض: "يا دكتور الحبوب دي حتروح متين؟ والآثار السوداء دي حتفضل كدة طول العمر؟".

في الحقيقة الحزاز مرض محتاج "طولة بال" وصبر شديد، لأنو المشوار معاهو بكون طويل شوية، في الغالب، النوع "الكلاسيكي" العادي اللي بيظهر في الجسم بياخد ليهو فترة من 6 لغاية 18 شهر عشان يختفي براهو ويقشر تماماً في أغلب الحالات.

لكن في أنواع تانية "راسا قوي" وعنيدة شوية، زي النوع المتضخم السميك اللي بيظهر في الكرعين أو النوع اللي بصيب الفم، دي للأسف ممكن تستمر مع الزول لسنين طويلة أو حتى عقود لو ما لقت العلاج المناسب والمتابعة اللصيقة.

وأهم حاجة لازم نكررها ونأكد عليها عشان الناس تطمئن، هي إنو الحزاز دا ما "قوب" ولا مرض معدي ولا بنتقل بالمصافحة أو اللمس أو استخدام أدوات المريض، هو بس "نيران صديقة" ولخبطة داخلية في جهاز المناعة بتخليهو يهاجم الجلد زي ما شرحنا سابقا

المشكلة الكبيرة اللي بتواجهنا في السودان وبشرتنا السمراء الداكنة، هي "الذكرى" اللي بسيبها الحزاز وراهو، وهي البقع الغامقة أو السوداء اللي بنسميها تصبغ ما بعد الالتهاب. البقع دي في الحقيقة هي مجرد تراكم لصبغة الميلانين في طبقات الجلد العميقة بسبب الالتهاب اللي حصل، وللأسف في أغلب الأحيان البقع دي بتزعج المريض وبتأثر على نفسيتو أكتر بكتير من الحكة والوجع اللي كان في بداية المرض.

المريض بكون شايف إنو لسه ما شفي، لكن الحقيقة هي إنو البقع دي مجرد "أثر" وما معناها إنو المرض لسه نشط، وعلاج الآثار دي بكون أصعب بكتير وبياخد وقت أطول من علاج الحبوب نفسها. وعشان كدة دايماً بنقول إنو "السر" في تقليل الآثار دي هو إننا نعالج الحزاز بقوة وبسرعة من البداية قبل ما يخلي أثر عميق في الجلد.

لازم كمان نكون عارفين إنو الحزاز ممكن "يغدر" بينا ويرجع تاني بعد ما يختفي تماماً، ودا بيحصل لنسبة بتصل لـ 15% إلى 30%. الرجعة دي غالباً بكون وراها محفزات زي الضغط النفسي الشديد، أو رجوع المريض لاستخدام أدوية معينة كانت هي السبب، أو حتى التعرض القوي للشمس في بعض الأنواع.

نهاية الحزاز هي بداية مشوار تاني مع "ترميم" الجلد والتخلص من البقع، والموضوع دا محتاج صبر واستخدام واقيات الشمس بانتظام لأنو الشمس بتزيد سواد البقع دي وبتخليها تقعد فترة أطول

22/02/2026

عائلة الحزاز – الشائع الغامض
بحصل ليه أساسا؟

الحكاية وما فيها هي قصة "نيران صديقة" من جيش الجسم الدفاعي، الطبيعي إنو جهازنا المناعي بحمينا من الجراثيم والفيروسات، لكن في حالة الحزاز، الخلايا الدفاعية اللي بنسميها (T-cells) وبالتحديد النوع القاتل منها (CD8+) بتصاب بنوع من اللخبطة وبتبدأ تهاجم طبقة الجلد الأساسية أو "القاعدية" كأنها جسم غريب دايرة تدمره.

الهجوم المناعي المركز دا هو اللي بيخلي خلايا الجلد تموت وتعمل لينا الحبوب والنتوءات اللي بنشوفها فوق الجلد، وبظهر تحت المجهر كأنو في "شكله" أو التهاب عنيف في منطقة التماس بين طبقات الجلد السطحية والعميقة.

ومن الحاجات العجيبة في الحزاز، هي ظاهرة بنسميها (ظاهرة كوبنر)؛ ودي معناها إنو لو الجلد اتعرض لأي نوع من الصدمات أو الخدوش أو حتى الهرش القوي، المرض بعتبر إنو دي منطقة "ضعيفة" وبيقوم يربي فيها حبوب جديدة في شكل خط مستقيم مكان الجرح أو الخدش.

عشان كدة دايماً بنحذر المريض وبنقول ليهو "يا ريت ما تهبش ولا تحك" لأنو الحركة دي بتزيد انتشار المرض في الجسم، ووجود العلامات الخطية دي بورينا كأطباء إنو الجهاز المناعي حالياً في قمة النشاط والتحفز بتاعو.

طيب شنو اللي بيخلي الجيش الدفاعي دا يتلخبط ويبدأ يضرب في أصحابه؟ الأسباب والمحفزات كتيرة، لكن أهمها وأقربها لينا هو "التوتر النفسي والضغط العصبي"؛ لأنو هرمونات التوتر بتغير توازن الجهاز المناعي وبتنشط الخلايا الهاجمة دي
وفي دراسة لافتة في جيرانا في السنغال، لقوا إنو المشاكل الأسرية والضغوط العاطفية والخلافات الزوجية كانت موجودة عند حوالي 25.6% من المرضى قبل ظهور الحزاز، كمان في أدوية شائعة جداً بنستخدمها، زي بعض أدوية ضغط الدم (مغلقات بيتا Beta Blockers ) أو مسكنات الألم، ممكن تكون هي المحفز الأساسي للهجوم دا.

ولازم ما ننسى إنو في علاقة قوية في بعض المناطق، خاصة في عالمنا العربي، بين الحزاز وفيروس الكبد الوبائي (C)، وعشان كدة كإجراء روتيني ووقائي، بنطلب من مريض الحزاز أحيانا فحص الكبد عشان نتأكد إنو ما في مسبب داخلي هو اللي محرك الجهاز المناعي بالطريقة دي.

22/02/2026

عائلة الحزاز – الشائع الغامض
حزاز الفم والمناطق الحساسة

حنتكلم عن أكتر نوعين الناس بتخجل تفتح سيرتهم، رغم إنهم من أصعب أنواع الحزاز وأكترهم تأثيراً على جودة الحياة، وهم حزاز الفم والمناطق الحساسة.

نبدأ بالفم، والنوع دا بيبدأ يحس المريض فيه بحرقة شديدة مع الأكل لدرجة إنو بلع الأكل ببقى مهمة صعبة، وبتوصف الألم فيهو كأنه "نار" جوا الخشم، وبأثر أحيانا لدرجة فقدان حاسة التذوق.

حزاز الفم بظهر بأشكال كتيرة، أشهرها الخطوط البيضاء اللي بتشبه الشبكة، لكن النوع الأخطر هو "التقرحي" اللي بيعمل جروح مكشوفة ومؤلمة شديد.

الموضوع في الفم ما بس وجع وتعب أكل، الموضوع فيهو جانب لازم نكون فيهو واعين؛ لأنو منظمة الصحة العالمية صنفت حزاز الفم كحالة "محتملة التسرطن". دا معناه إنو في نسبة بسيطة (بين 0.4% لـ 5.6%) ممكن الجروح دي تتحول لنوع من أنواع سرطان الفم مع مرور السنين، خاصة لو المريض بدخن أو بسف.

وعشان كدا، أي مريض عندو حزاز في الفم لازم يتابع مع الطبيب كل 3 لـ 6 شهور، ولو ظهرت أي حتة قاسية أو ورم أو جرح ما داير يبرأ، لازم تتاخد منها عينة فوراً للتأكد.

أما في المناطق الحساسة، المشكلة الكبيرة هي "الصمت"؛ فالمرض غالباً بظهر في شكل حلقات بنفسجية أو بقع مسطحة، والمريض ممكن ما يحس بحكة أصلاً، ودا بيخلي التشخيص يتأخر جداً.

الخطورة هنا بتكمن في "الندبات"؛ لأنو الحزاز لو استمر من غير علاج ممكن يعمل تليف وضيق في المخارج، ودا بيؤدي لمشاكل كبيرة في الوظائف الحيوية والقدرة الجنسية، وفي حالات متقدمة ممكن يعمل "التصاقات" بتحتاج لتدخل جراحي عشان تتصلح.

22/02/2026

عائلة الحزاز – الشائع الغامض
حزاز الشعر والأظافر

الحزاز للأسف ممكن يصل لمناطق حساسة جداً في جمالنا وصحتنا، وهي الشعر والأظافر، فهو ممكن يصيب المناطق دي بإصابات ممكن تكون دايمة لو ما اتلحقت بسرعة.

نبدأ بـ "حزاز الشعر" أو اللي بنسميه (Lichen Planopilaris)، ودا مشكلتو الأساسية إنو بيعمل "صلع ندبي"؛ يعني الجهاز المناعي لما يهاجم بصيلة الشعرة، ببدلها بنسيج ليفي أو ندبة، والشعرة اللي بتقع بسبب الندبة دي للأسف ما بترجع تنبت تاني أبداً لأنو المنبت بكون اتقفل تماماً.

المزعج في الموضوع إنو الحزاز دا غالباً ببدأ "في سكات" من غير وجع أو حكة شديدة، مجرد فراغات بسيطة وقشور رقيقة حوالين الشعرة، ودا اللي بيخلي التشخيص يتأخر لحدي ما تظهر بقع صلع واضحة وصغيرة بتبدأ تتوسع مع الوقت.

وفي دراسات في أوغندا وجيرانا في ليبيا واليمن، لقوا إنو النوع دا موجود بنسب بسيطة لكنها "مخادعة" لأنها غالباً بتكون أكتر مما بنشوف في العيادات بسبب التأخير في الفحص، وهنا التصوير بالديرمسكوب مفيد جدا في التشخيص المبكر.

أما في الأظافر، فالحزاز بظهر كأنو "بياكل" في الظفر حرفياً؛ الأظافر بتبدأ تضعف وتتشقق، وبظهر فيها خطوط طولية بارزة أو لونها بيبقى بني مصفر، وممكن الظفر يبدأ ينفصل من مكانه، لكن العلامة اللي بتخوفنا كأطباء جلدية وبنعتبرها "إنذار خطر" هي لما الجلد الفوق يلحم في الظفر ويبدأ يسحب فيهو، ودا بنسميه (Pterygium)، ودي علامة "بصمية" للحزاز ولو وصلناها بكون الظفر في طريقه للضياع النهائي.

الحزاز في الشعر والأظافر بكون "راسه ناشف" وعنيد جداً، وعلاجه ما بينفع معاهو الكريمات البسيطة؛ بنحتاج لتدخل قوي بحقن الكورتيزون المباشر في الفروة أو الأظافر، وممكن حتى أدوية بالفم قوية عشان نلحق نوقف الهجوم المناعي قبل ما البصيلات أو الأظافر تتدمر نهائياً.

22/02/2026

عائلة الحزاز – الشائع الغامض
الحزاز الشمسي Actinic LP

نوع مختلف برضو هو "حزاز الشمس" أو (Actinic LP)، ودا قصتو مرتبطة تماماً بشمسنا الحارة ،فالنوع دا عندو ميزة غريبة جداً وهي إنو بظهر وبزيد شديد في فصل الصيف والربيع، وبخف أو بيختفي تماماً في الشتاء، وعشان كدا بسموه "حزاز المناطق المدارية".

أغلب الناس اللي بصيبهم النوع دا بظهر ليهم في الوش (الجبهة والخدود) واليدين، وممكن يظهر في شكل بقع بنية بتشبه "الكلف" أو بقع حلقية لونها بني محمر.

الغريب في الموضوع إنو بلدنا الجارة مصر بتسجل أعلى نسبة في العالم للنوع دا (حوالي 40%)، والسبب هو التقاء الشمس القوية مع جينات الناس اللي بشرتهم متوسطة السمار لفاتحة؛ لأنو البشرة الداكنة جداً بتكون محمية أكتر بالميلانين، بينما البشرة الفاتحة شديد ما بتنتج التفاعل المناعي دا.

حجر الزاوية في علاجه هو الحماية الصارمة من الشمس واستخدام الكريمات الواقية والملابس الساترة، لأنو من غير حماية، الأدوية وحدها ما حتقدر تعمل حاجة في مواجهة أشعة الشمس اللي بتحفز الجهاز المناعي يهاجم الجلد من جديد

ومن المهم يظل في بال الطبيب والمريض في حال ظهور بقع بنية أو دوائر بالوجه، لسلامة التشخيص وسرعة بدء العلاج الصحيح

22/02/2026

عائلة الحزاز – الشائع الغامض
الحزاز المتضخم Hypertrophic LP

بعد ما عرفنا في المرة الفاتت حكاية الحزاز وتفاصيلو الستة الأساسية، الليلة دايرين نركز على نوع "عنيد" جداً ومزعج، وبنسميه "الحزاز الثؤلولي" أو المتضخم (Hypertrophic LP).

النوع دا بالتحديد هو أكتر نوع بحب "السيقان" وبالذات منطقة قدام الساق ومفاصل الأصابع، وشكلو بكون مختلف تماماً عن الحبوب المسطحة العادية؛ فبظهر في شكل طبقات سميكة وقوية لدرجة إنو العلماء وصفوا مظهره كأنو "صخور بركانية" طالعة من الجلد.

المشكلة في النوع دا إنو الحكة فيهو بتكون "هيستيرية" وما بتتمسك، ودا بدخل المريض في حلقة مفرغة من "الحكة والهرش" اللي بتخلي الجلد يربي طبقات أسمك وأصلب عشان يحمي نفسو، والعملية دي بتخلي المرض يقعد سنين طويلة وممكن حتى عقود من الزمان
في جيرانا في أوغندا النوع دا بيمثل حوالي 24% من حالات الحزاز، وبأفريقيا عموماً نسبتو أعلى بكتير من أوروبا، ودا غالباً لانو بيئتنا وجيناتنا عندها دور في ردة فعل الجلد دي. والخطورة هنا بتكمن في إنو الحزاز العنيد دا لو استمر أكتر من 10 سنوات من غير علاج ومتابعة، في حالات نادرة ممكن يتحول لنوع من أنواع سرطان الجلد، وعشان كدا أي تغير في شكل الطبقات دي أو ظهور قروح فيها لازم يتشاف فوراً

22/02/2026

عائلة الحزاز – الشائع الغامض

حنتكلم في عدة بوستات عن مرض بتسمعو بيهو كتير رغم غموضو عندكم ألا وهو الـ (Lichen Planus) أو ما يعرف باللغة العربية بـ "الحزاز المسطح".

الاسم مشتق من كلمات يونانية ولاتينية معناها "طحالب الشجر المسطحة"، ودا بوصف بدقة شكل الحبوب لما تظهر في الجلد، وفي بلدنا وبحكم إننا "نقطة التقاء" وخليط فريد بين الشعوب العربية والأفريقية، بنلاحظ إنو المرض دا بظهر عندنا بأنواع كتيرة ومختلفة بتعكس جيناتنا وبيئتنا المشمسة.

هو في الحقيقة ما "حساسية" بالمعنى المفهوم ولا هو مرض معدي بنتقل باللمس، هو ببساطة عبارة عن اضطراب مناعي مزمن بيخلي خلايا الجسم الدفاعية (T-cells) تهاجم طبقة الجلد الأساسية بالخطأ كأنها عدو.

لما المريض يجينا بيهو، بنفتش على ستة علامات أساسية بنسميها (The 6 P's) عشان نقدر نشخص الحالة بدقة: أول حاجة هي إنو الحبوب دي بتكون "مسطحة" (Planar) وما عندها راس، وبكون شكلها "مضلع" (Polygonal) وليها زوايا واضحة ما زي الحبوب المدورة العادية، أما اللون، فدا أكتر حاجة بتميز المرض؛ بظهر كأنو "بنفسجي" أو أرجواني في البشرة الفاتحة، لكن في بشرتنا السودانية السمراء والداكنة، اللون دا غالباً بتحول لرمادي غامق أو بني عميق.

ومن أكتر الحاجات المتعبة للمريض فيهو هي "الحكة" (Pruritus) الشديدة، بتوصف كأنها "حريق" أو "نار" أو "قرصة" عميقة جوا الجلد، وبتزيد شديد بالليل وبتأثر على النوم. ولو عاينت للحبوب دي بدقة شديدة، بنشوف خطوط بيضاء رقيقة زي الشبكة أو خيوط العنكبوت بنسميها "خيوط ويكهام" (Wickham striae)، ودي بنعتبرها "البصمة" اللي بتأكد لينا إنو دا حزاز فعلاً
المرض دا في الغالب بكون "مؤدب" وبمشي براهو في فترة من 6 شهور لسنة ونصف، لكن في أنواع تانية بتكون عنيدة وبتقعد لسنين، خاصة لو ظهرت في مناطق زي الرجلين أو الفم. عشان كدا مهم شديد نعرف أنواعو وكيف نتعامل معاهو، زي ما حنفصل بالبوستات الجاية

18/02/2026