22/06/2025
PANIC ATTACK – Waa Maxay & Sidee loo Maareeyaa?
Panic attack waa xaalad nafsiyeed oo si lama filaan ah ku bilaabata, iyadoo qofka uu dareemo cabsi aad u xoog badan, walwal aan la xakamayn karin, iyo calaamado jireed sida neef qabatin, wadne garaac xoog leh, gacmo gariiraya, dhidid ama dareen ah inuu dhimanayo ama waalanayo. Inkastoo ay cabsi badan leedahay, panic attack ma aha xaalad halis ah oo keeni karta dhimasho, balse waxay u baahan tahay faham iyo maarayn togan.
Panic attack waxay badanaa ka dhalataa walwal joogto ah, hurdo la’aan, culeysyo nololeed, ama xusuusta dhacdo xanuun badan (trauma). Waxaa sidoo kale kordhiya isticmaalka caffeine, sigaar, ama daal badan. Dhalinyarada Soomaaliyeed oo wajahaya cadaadisyo badan sida shaqo la’aan, tahriib, colaado, iyo amni darro ayaa si gaar ah ugu nugul xaaladdan.
Haddii aad la kulanto panic attack, waxaa jira tallaabooyin fudud oo kaa caawin kara inaad xasisho.
Marka h**e, isku day neefsasho qoto dheer oo tartiib ah: qaado neef muddo 4 ilbiriqsi ah, hayso 4 ilbiriqsi, kadibna si tartiib ah u sii daa muddo 6 ilbiriqsi ah.
Marka xigta, naftaada u sheeg inaad badbaado leedahay — xusuusnow in dareenkan uu yahay kumeel gaar. Isku day inaad diiradda saarto deegaankaaga: magacow 5 waxyaalood oo aad aragto, 4 aad taaban karto, 3 aad maqashid — si maskaxdu ugu laabato waqtiga dhabta ah.
Waxaa kale oo muhiim ah inaad ka fogaato waxyaabaha kor u qaada xasaasiyadda sida caffeine, sigaar, iyo walxaha kiciya jirka.
Haddii ay suuragal tahay, la hadal qof aad ku kalsoon tahay, si uu kuu xasiliyo ama kuu fahmo. Haddii aad si joogto ah u la kulanto panic attacks, waxaa lagugula talinayaa inaad la xiriirto la-taliye nafsiyeed ama dhakhtar cilmi-nafsi si aad u hesho taageero xirfadeed iyo daaweyn habboon.
Panic attack waa xaalad la maareyn karo. Fahamka iyo la talinta caafimaadka maskaxda - counselling waa tallaabada koowaad ee lagu xallin karo.
