07/01/2026
Dhacdadii ka dhacday deegaanka Warlaliska waxay noqotay mid gilgishay damiirka bulshada, isla markaana su’aalo waaweyn ka dhalisay doorka ay ku lahaayeen qaar ka mid ah muwaadiniinta lagu eedeeyay in ay ku lug yeesheen qalalaasaha sababay khasaaraha naf iyo maalba leh.
Sida ay sheegayaan warbixinno kala duwan iyo aragtiyo ka imaanaya bulshada deegaanka, Daahir Gacamey oo ah muwaadin dhul ku leh Warlaliska, ayaa lagu eedeeyay in uu ka mid ahaa shakhsiyaad door ka qaatay kicinta iyo hagidda ciidamadii goobta yimid. Waxaa sidoo kale la tilmaamay in Daahir uu ku dhex jiray shabakad dallaaliin ah oo lagu eedeeyay gudbinta xog aan sax ahayn oo lagu marin-habaabiyay hay’adaha dowladda, isaga oo isu ekaysiinaya qof deegaanka metelaya, balse si dhow ula shaqeynaya kooxo dano gaar ah ka lahaa dhulka la isku hayay.
Inkasta oo Daahir uu si joogto ah u hadal hayo burburka dukaankiisa, haddana doodda taagan ayaa ah in khasaaraha hantida uusan ka weynaan karin mas’uuliyadda ka dhalatay khasaaraha naf ahaaneed iyo dhaawacyada lagu soo warramay in ay ka dhaceen goobta. Sida ku cad mabda’a mas’uuliyadda muwaadinnimo, qof kasta oo door ku leh abaabul, hagid ama fududeyn fal sababa dhimasho ama dhaawac shacab, waxaa saaran waajibaad sharci iyo mid anshaxeed.
Dhinaca kale, Macallin Mahdi, oo isla hayb la ah Daahir, ayaa lagu dhaliilay hadallo si qabiil ku dheehan yahay uga jeediyay arrinta Warlaliska. Hadalladiisa waxaa si gaar ah loogu eedeeyay in uu yareeyay ama dafiryay jiritaanka khasaare naf ahaaneed, taas oo sii hurisay xanuunka iyo caro ka dhalatay bulshada dhexdeeda.
Meel-marinta hadal noocaas ah, gaar ahaan xilli ay jiraan dad la xaqiijiyay in ay ku dhaawacmeen ama ku dhinteen, waxay dhaawac ku tahay wadajirka bulshada iyo run raadinta.
