معا لحياة صحية أفضل نظام الكيتو واللو كارب دايت والرياضة

  • Home
  • Syria
  • Aleppo
  • معا لحياة صحية أفضل نظام الكيتو واللو كارب دايت والرياضة

معا لحياة صحية أفضل نظام الكيتو واللو كارب دايت والرياضة كل ما يهمك في الحمية فقط أنت بحاجة للقراءة

26/11/2022

الصيام المتقطع بشكل عام...
مو بس للكيتو...
وحضرو الفيديو بفيد شوي ليقرب الفكرة 😍😍
وبنصح الكل يجربو أي طريقة منو.....
وبتمنى تكتبولي بالتعليقات أي صيام حبيتوه أكتر وحسيتوه بناسبكم...

شوية تساؤلات بتخطر ببالكم

١.. شو فكرة الصيام المتقطع؟

فكرتين.. إنو اجدادنا القدامى ما كان عندن براد... لهيك كانو لما يجوعو ينزلو يصطادو شي ومعو شوية خضروات وياكلوهم ...
يعني فيكم تقولو حياتن كانت كيتو وصيام متقطع بشكل ما 🙆‍♂️😅
ولا كان عندن جلطات ولا ألزهايمر ولا مقاومة إنسولين

وإنو تقيد ساعات الأكل بتوقيت محدد...
يعني تلغي فكرة السناكات... وما تقضيها رايح جاي فاتح البراد؟ أو وإنت ماشي بالطريق مقضينها بسكوت وكرواسان وكولا...
يعني أول فائدة ضبطنا سعراتنا شوي وخففنا من كمية الأكل وصار بفترة مسموحة
منطقيا : قد ما أكلت بهالفترة ما رح تتجاوز سعراتك المسموحة)
عمليا : ممكن يصير صيامك عالفاضي... إذا صرت تاكل كل شي وما ألتزمت بأكل صحي وخضروات وتجاوزت سعراتك...

٢ شو فوائدو؟

فوائدو كتيرة وهية قيد الدراسة لسه...
بس الشي المثبت معن بالدراسات.. إذا كنت كيتو .... ي سرع في الدخول بالكيتوزيز... .. تنزيل الوزن..(رفع معدل الأيض بالجسم) .. رفع هرمون النمو.... .. تحسن حساسية الأنسولين..... الإصلاح الخلوي تفعيل آلية الإلتهام الذاتي, تهضم الخلايا وتزيل البروتينات القديمة والمختلة التي تتراكم داخل الخلايا.... صحة القلب ويقلل من الدهون الضارة بالجسم ldl.. الوقاية من السرطانات.... صحة الدماغ والوقاية من ألزهايمر وبيرفع من الهرمون BDNF يللي بتساهم بنمو الخلايا العصبية.. .. مكافحة الشيخوخة...

3.. شو بقدر أشرب بهالفترة؟

ماء... شاي بأنواعها قرفة أو زنجبيل... قهوة... زهورات.... أي شي بلا سكر أو كمون بليمون... وممكن في حال ما منتقبل هالشي نضيف شوية كريمة للاشخاص يللي عاملين كيتو او شوية حليب للأشخاض يللي مو عاملين كيتو كركال نتقبل المشروب....

4... معقول نلغي وجبة الفطور؟ يقال إنو مقدسة أو صحية؟

طبعا هالحكي الغلط مو المهم الفطور عقد ما المهم يكون أكلك صحي....

5... بصير آخد مكملات أثناء الصيام؟

مافي مشكلة أبدا فيك تاخد أي مكمل او فيتامين بس نصيحة الفيتامينات الأفضل تتاخد مع الأكل لأنو يللي بتذوب بالدهون امتصاصها أفضل مع الأكل ...

6... بصير ساوي رياضة أثناء الصيام؟

مافي مشكلة بصير حسب استطاعتك وطاقتك بس يفضل تكون قبل الموعد المقرر للإفطار.....

ويفضل تاخد أحماض آمنية قبل التمرين السريع bcaa

7... هل يمكن للصيام ينقص العضلات؟

كل طرق إنقاص الوزن بتساوي نقص في العضلات لهيك يفضل نساوي رياضة مقاومة أو رفع أثقال وناخد مكملات وفيتامينات وحاجتنا الكافية من البروتين...
وبالرغم من هيك بيضل الصيام المتقطع أقل فقدان من العضلات

8... بصير ساوي الصيام للأطفال؟ حامل؟ مرضع؟

لااااااا ممنووووووع مممنوووووع ممنوووووووووووووع....

9... مريض ضغط؟ سكر؟ قلب؟ كذا كذا .. بصير ساوي صيام؟

ممكن ولكن بشرط تتواصل مع طبيبك وتستشيرو وتاخد متابعاتك السكر والضغط يكون في جهاز معك وتتواصل معو لتعديل جرعة الأدوية ومواعيدها ولضبط كمية الملح المسموحة... (تحت إشراف طبيب)

10... شو الصيام المفضل بالكيتو؟

هوة صيام 16/8 بشكل ومرة وحدة بالأسبوع 24...

هالحكي للمبتدأ ...
أول شهر ..
بعدا فيو يصوم أيام عادي 💪
بس المهم ما يضغط عنفسو ويتبع التعليمات تبع بوست الصيام الطويل ....

هلا منجي لأنواع الصيام المتقطع وهنة كتار فيكم تساووو أي طريقة بترتاحولا...

1....أشهر طريقة... طريقة الصيام 16/8 أو 14/10 ؟

بعني بتلغي وجبة الفطور أو العشاء وحدة منهم ....
مثلا تغديت الساعة 4 العصر بتضل لتاني يوم وبتفطر الساعة 8 الصبح (لغينا العشا وصمنا 16)
أو بتتعشا الساعة 8 المسا وتاني يوم بتتغدى الساعة 12 الضهر (لغينا الفطور وصمنا 16)
فيك تساويهم 14 ساعة صيام فقط...

فيك تاكل تلت وجبات ضمن نطاق الساعات ال 8 المسموحة مو ضروري وجبتين فقط....

يفضل الرياضة قبل أول وجبة أو بالفترة يللي مسموح الأكل فيها قبل آخر وجبة....

2.... الصيام لمدة 24 ساعة (تأكل تتوقف ثم تأكل)

بأي ساعة بتوقف فيها آكل.... بتصوم 24 ساعة وبتاكل الوجبة تاني يوم بنفس التوقيت يللي آكلتو....
مرتين بالأسبوع مسموح فقط...
بيومين متفرقين بالأسبوع...
مو ورا بعض...

3... صيام اليوم البديل..

بتاكل عادي بيوم... بتصوم 24... بعدو بتاكل عادي بيوم... بترجع بتصوم 24...

يعني صيام كامل يوم كامل بعدو أكل عادي ليوم كامل....

لا ينصح فيه المبتدأئين (للمتقدمين فقط)

4... حمية المحارب...

بتاكل خضروات وشوية فواكه باليوم...
ثم وجبة كبيرة مغدية مساءا....
وممكن وجبتين خلال أربع ساعات قبل النوم...

5.. تخطي وجبة عفوية...

السبت ... فطور غدا عشا بمواعيد محددة
الاحد .... غدا وعشااا فقط بدون فطووور....ببنفس المواعيد
الإثنين.... فطور غدااا عشااااا بمواعيد محددة
الثلاثاء..... فطور وغدا فقط.... وهكذاااا

6... صيام 5..... 2

يعني مناكل طبيعي بخمسة أيام ومنختار يومين بالأسبوع مناكل فيهم...
فقط 600 سعرة للرجال عوجبتين صغار...
غقط 500 سعرة للنساء عوجبتين صغار..
وباقي الأيام طبيعي...

شكرا لمروركم ولا تنسو تكتبولنا أي نوع حسيتوه بيناسبكم او عمتمارسوه بحياتكم...

فوائد مخلل الملفوف عظيمة جدالازم يكون ببيت كل حدا منكم موجودوهي طريقة صنعو ...وأي تعليق رح يصلك فوائدووطريقة تناولو .......
25/11/2022

فوائد مخلل الملفوف عظيمة جدا
لازم يكون ببيت كل حدا منكم موجود
وهي طريقة صنعو ...
وأي تعليق رح يصلك فوائدو
وطريقة تناولو ....
بالتوفيق ....

....هرمون الجريلين (هرمون الجوع)....ضروري تقروه جماعة اللي خلصو ريجيم أو يللي عملو و رجعو كسبو وزن أويللي مبلشين جديد.....
25/11/2022

....هرمون الجريلين (هرمون الجوع)....


ضروري تقروه
جماعة اللي خلصو ريجيم أو
يللي عملو و رجعو كسبو وزن أو
يللي مبلشين جديد...
💔💔💔
وجماعة يللي منساوي ريجيم بس مافينا نعيش بلا خبز بلا كرواسانة الصبح أو بلا 3 بواحد......
تعالو أقرو معي ....
.......................................................

(((تظهر الأبحاث أن نسبة كبيرة جدا يستعيدون كل الوزن الذي فقدوه في غضون عام واحد فقط))) .....

🙄شو يعني ؟

تركت كيتو يا دكتور وسمنت فجأة ؟
الكيتو مابينحف ؟
رجعت كل شي خسرتو ؟
شوفو فلان هيك صار فيه ...
فلان عمل كيتو فلان عمل كذا ....

صديقي هاد الكلام عام مانو بصفحة كيتونية يعني كلام بيخص كل التغذوين....

يعني موضوع استعادتك للوزن ممكن يصير بأي حمية ساويتا ........وهاد اللي عبيصير ....للأسف ...

السبب هو متعدد وأهم واحد الجريلين الله يلعنو 😁

لهيك خلينا نتعرف عليه لنقدر نحسب حسابو ونعرف مين هو وشو ممكن يساوي فينا ؟
للمستقبل حتى بس نوصل لهدفنا نحافظ عليه ....

هو هرمون ينتج في المعدة غالبًا ما يشار إليه باسم "هرمون الجوع" ويسمى أحيانًا لينوموريلين.

بيروح عن طريق الدم للدماغ (المنطقة تحت المهاد )، ليخبرو إنو جوعان ...ويلا هات شي ناكلو ....

وظيفته الرئيسية مو بس أكل كمان ...

زيادة الشهية ....
كمان بأثر على دورة النوم / الاستيقاظ ، وكمان بيأثر عسلوك البحث عن المكافأة ...
والإحساس بالتذوق ....
وشهية الكاربوهيدرات ...

للأسف لهلأ مو متأكدين إذا هو سبب البدانة ولا لا ...
لأنو شافوه ناقص عند البدناء ....

بس الفكرة حكيت عنو لأنو من أحد أسباب فشل الريجيم ....
أو أهم أسباب زيادة الوزن بعد الريجيم....
هو ...

مبدأو بسيط ....
المعدة فاضية *** بيزيد بالدم...
المعدة مليانة *** بينقص بالدم ...

ويقال من الفيديوهات اللي حضرتا ....
إنو هالهرمون عندو ذروات (تعويدية) ...
لنفرض إنت متعود تاكل الساعة 7 ...
مجرد تصير الساعة 7 رح تشعر بجوع كبيررررر ....
وهيك حسب تعويدك لوجباتك ...
وبنقس الوقت حكينا إنو هو هرمون المكافئة ....
أكتر شي منشوفو بالأشخاص يللي بيجو وبيقلولي مستحيل أقدر عيش بلا نسكافيه 3*1
أنا مستحيل أقدر عيش بلا فواكه تفاحتين الصبح وسطل فوامه ....
هاد شعور المكافئة صعب يعيشو بلاه وبيبلش هالشعور بأول كل ريجيم .....

وشافو بالدراسات إنو يوم واحد من بدء نظامك الغذائي ، رح يبدأ مستويات هرمون الجريلين في الإرتفاع وبيستمر هذا التغيير على مدار أسابيع
(يعني مو يوم ولا يومين ولا أسبوع)

أديش بدنا نصبر لنضبطو 💪

في إلو علاج أو دوا ؟

((يبدو أن الجريلين هرمون لا يمكن السيطرة عليه بشكل مباشر بالأدوية أو الأنظمة الغذائية أو المكملات الغذائية)) ...

بس فينا نساوي كم شغلة لنقدر نخفف من آثار ...

الحفاظ على وزن معتدل.

أعط الأولوية للنوم.

زيادة كتلة العضلات كتير مهمة كتير بنصح الكل إنو إلعبو حديد وزيدو العضل سب كنت ولا بنت ....

تناول المزيد من البروتين.

الحفاظ على وزن ثابت.

(الصيام المتقطع ثم الصيام المتقطع ثم الصيام المتقطع )

وبالآخر الجوع متعلق بمقاومة اللبتين وومقاومة الإنسولين ....
لهيك لازم نعالج الجسم كلووووو رح حط الروابط بالتعليقات....

طبعا لهون خلصت المقالة بس رح ضيف شوية شغلات من حضوري لبعض الفيديوهات ود.بيرغ ....

الجوع نوعين ....

1 ...نوع خارق قاهر متفجر لازم تاكل يعني لازم تاكل .....وهو سببو نقص سكر الدم ....وبتصير فيك
عصبية ...
دوار...
رجفة ....
ضعف قوة الجسم ...
بس صارو هالشغلات تفضل كول (أكل صحي وكسور صيامك)

2 .... نوع جوع مياعة ومالو طعمه وسببو هرمون الغريلين....
هاد بعد ما قريت المقالة عرفت إنو شغلتو فاضية 💪
ولازم تكون قوي ....
إلو مواعيد ثابتة بيجي( أول فترة بالذات أول ما تبلش ريجيم)
ورح يذكرك بمكافئاتك السابقة (تلاتة بواحد) كرواسان صباحي يللي عأساس مافيك تعيش بلاه ...

هاد الإحساس تافه جدا ومؤقت...
لازم نطنشو نشرب مي مثلا ...
خل أي شي يحلينا ما نفكر فيه ....
نطلع نتمشى (نساوي رياضة)

رح أسألك سؤال وإنت لحالك تجاوب ...

شي مرة جعت وكنت مشغول شي وما قدرت تاكل ؟
اجتماع ! فحص ؟ سفر ؟
أي ...
بعدين ؟
طلعت ونسيت حالك أربع خمس ساعات ولا كأنو جوعان ...
هاد هو هرمون الجريلين رتفع بجسمك وراح لما طنشتو ...

يقال مدتو من20 دقيقة وحتى الساعتين ....

المسلمين (تذكرو صيام رمضان ) كم ساعة حسينا بالجوع ؟ ولما أجا موعد الإفطار ما قدرنا ناكل شي ؟
شربنا كاستين مي وكاسة عصير وما قدرنا ناكل شي ؟

وإخر شي ...
يقال إنو لما برتفع هرمون الغريلين بيرتفع معو الطاقة والقوة وبيكون قي رغبة بالجسم إنو يعمل نشاط💪
لهيك حاول تستغل فترة الجوع يللي بتجيك لتساوي أي نوع أو نشاط رياضي ....

إذا كملت لهون لا تنسى اللأحبتته والقلب 💚
وصباحكم فل ....

bliss point.......(النشوة)نقطة النعيمليه نحن مدمنين أطعمة سيئة ؟ليه منصحى بنص الليل ومنتحجج جسمنا طلب أندومي مثلا ؟ليه م...
23/11/2022

bliss point.......(النشوة)نقطة النعيم

ليه نحن مدمنين أطعمة سيئة ؟
ليه منصحى بنص الليل ومنتحجج جسمنا طلب أندومي مثلا ؟
ليه مافيني عيش بلا سكر وبسكويت ومعجنات ..
ليه لما روح عند أخصائي التغذية بقلو بدي دايت بس ما فيني أتخلا عن ال3 بواحد ؟
ليه مافيني أتخلا عن الكولا ؟
ليه وليه وليه ؟
لبه بضل بطلب وبنق عوجبة الفري كل أسبوع وبستتناها بفارغ الصبر ؟....
ليه بحس حالي مافيني عيش بلا هالأكلة؟
معقول في شي متحكم بمخي وإرادتي ؟
معقول أنا بمؤامرة...

مصنعو المواد الغذائية قبل ما يصنعو أكلة ...
بيعملو دراسات ودراسات كتيرة وتجارب عالبشر حتى يعرفو كيف يقدرو يوصلو لهالنقطة بالدماغ ...
وكيف يخلو هالخلطة تبع الأكل تخليك توصل لنقطة النشوة الطعامية والرضى التام ...
وضع دماغك رح يصير متل حال مدمن على المخدرات والكوكائين ...

وغالبا بيعملو خلطة فيها سكر ودهون غير صحية ومنتجات قمح بطريقة ما لتوصلك لعتبة ما ...وتقدر تساوي فيك هيك ...

هالخلطة سحرية بدها دقة كتير ومو أي حدا بيقدرلا ...
كم نوع بسكويت وطني حاولو يقلدو الأجنبي ؟
بس ما قدرنا ناكل وصرنا نقرف منو لأنو السكر تبعو كتير ؟
مثلا بسكوتة ستيكرز الوطنية( ماالا علاقة بالسنيكرز) ولا بتساوي إدمان 😁
يعني كل شي مدروس وعدماغك يباشا....
وهيك كمان كتير شغلات....

الموضوع نفسي بحت فيكم تقولو لهيك رح نحكي بهالموضوع نفسيا ...
وكيف نعالجها ....
بس قبل ...
المهم لحد هون عرفت كيف إنت ضمن مؤامرة .....؟

ولبش مندقق كتير عمنتجات الكيتو ومنقلكم هي كيتو وهي لأ ؟
رغم أنو مافيها كارب كتير (بالجدول)
بس بيكون عاملين خلطة خفيفة وراشين فيها شوية شغلات لتخليكم تدمنو وتاكلو بكميات كبيرة .....
حتى المكسرات المحمصة بتلاحظو إنكم بتحبوها وبتاكلو أكتر من المسموح لأنو بيحطو عليها سكر وطحين فيها مع التحميص بدهون غير صحية ..
لهيك منعناها ومنننبه عليها....

قبل كل شي الحل ...حمية وتقطعو كل شي ضار ...
بتتعذبو فترة بعدين ولا شي .....
💪
وهي خطوات لتخفف من مشكلتك ...
1 ...التخطيط مستقبلا للأطعمة .....

بعني تحط جدول أكل وتلتزم فيه ....
يعني لازم تنزل بيوم معين عالسوق تخطط لوجبات أسبوع ...
مثلا ...
السبت ...ملوخية بصدر دجاج
الأحد ....كباب باتنجان
الأثنين .... سبانغ بلحمة غنم
الثلاثاء ....سمك سلمون ..
الأربعاء ....بامية بلحمة ...
الخميس ...سودة ...
الجمعة ...فخاد متبلة ..

بنزل عالسوق بشتري ..
نصف كيلو صدر.. 100 غرام ملوخية
نصف كيلو لحم غنم ..كيلو باتننجان
نصف كيلو سمك
300 غرام سودة
كيلو فخاد ....نصف كيلو بامية ...
وهكذا ...

وهيك رح تقلل (تفاعلية جديلة الطعام ) هذا ما يسميه الباحثون قابليتك للتأثر بروائح الطعام والإعلانات والمحادثات التي تحيط بك ...
يعني ما بتكون سهران بنص الليل وبتشوف إعلان البيتزا فورا بيدوب قلبك وبتوصي ديليفري ....
إذا آكل وشبعان أو مجهز أكلك هالإعلان رح يكون آخر همك ...

2 ...حاول تعلم حالك إنو تشتري طعامك من محل بقالية قريب ...

علم نفسك
عالخضروات الطازجة ...
عمحل بيبيع لحوم طازجة...
عمحل بيبيع فواكه طازجة ...
ابتعد عن كل شي مصنع ومعلب وبالذات يالي فيها أكتر من منتج (دهون سكر كارب) ...
لاحظو كل منتج بتلاقو فيو دقيق القمح ..
قليل من غلوتين ..
قليل من الفستق كذا ...
المادة رقم كذا من كذا .....
حافظ نكهة كذا ....
لهيك الطازج أفضل من كل شي ...

3 ....حاول تناول الدهون الصحية ...

صرتو بتعررفوهم ولو مو كيتو هي بتعطيك إحساس بالشبع...
مكسرات ...
أفوكادو ...
سمك دهني...
زيت زيتون...
سمن وزبدة حيوانية ولو ماكنت كيتو

ألغي كل شي فيو سمن نباتي أو زيت نباتي

4 ....حاول تخلي نظامك الغذائي وافر بالبروتين...

البرووتين الحيواني كل اللحوم
البرووتين النباتي متل فاصوليا وخضروات ومكسرات

5....جرب الفاكهة..
(الفاكهة مانا عدوتنا ولكم كمية الفاكهة هية العدوة)
(لغير الكيتونين)

متل ما حكينا ...
وأهم شي تحدد كميتا ...
بيضل فيها مضادات أكسدة وألياف ..
ممكن تعتبر التمر بمثابة الفاكهة ...
تحدد يوميا قطعتين فاكهة ...
مثلا 3 تمرات .. وتفاحة ...
موزة وبرتقالة ...

6...حاول تضيف شغلات جديدة لوجباتك صحية..

مثلا جرب نوع سمك جديد ...
ضيف شي نوع ورقيات جديد ...
فلفل أخضر مثلا ورقيات ..
جرب الأعشاب البحرية ...
غوص بقسم الأطعمة الصحية وجرب شغلات جديدة ...
فتاح عصفحات يوتيوب وكتوب وصفات كيتو (ولو كنت مو كيتو).
فضي حالك شوي لأكلك..

7 ...تدريب العقل ....

فكر بالوجبات السريعة بشكل تاني ...
حاول تغير نظرتك للأكل يللي مو صحي ...

مثلا هاد الأكل بييساوي حساسية و يساويلك حكة وعطاس...

هاد الأكل طريقة تصنيعو سيئة والمعامل ما عمتستخدم النضافة فيها ...
والإندومي فيها دود مثلا🙄

تذكر إنو الأكل الفلاني بساوي (آلام في المعدة ، زيادة الوزن)
متل المقالي مثلا ....وضل حطا ببالك...

عقلك أقوى بكثير مما تعتقد يعني...

هالطريقة لاتستقلو فيها ...
وشافو يللي مارسوها قدرو يتركو الأكل السيء ...

وكمان فيك تدرب عقلك عالأكل الصحي وفوائدو و تتخيل اللذة تبعيتو ...

كم حبة جوز رح تنشطلي ذاكرتي...
مشروب كذا حيرفع معدل استقلاب جسمي ...
هالتوابل /كركم فلفل .. رح تفيدني.... وفيها مادة الكركمين والبربرين يللي إلهم فوائد رهيبة للجسم ...
السمك فيو أوميغا ثري ورح يحميني من الأمراض ..

9...العمل على إدارة نفسيتك ....

المشي أوالجري...

اليوغا.....

التأمل لبضع دقائق (تأمل الطبيعة)..

أخذ نفسا عميقا (شهيق وزفير طويل)...

التحدث إلى صديق موثوق به أو أحد أفراد الأسرة..

القيام بشيء إبداعي مثل الرسم....

جرب واعثر على أفضل ما يناسبك ....

إذا شعرت بتوتر شديد ، فتحدث إلى طبيبك أو أخصائي الصحة النفسية.


يعني مو غلط أو عيب تستشير حدا بنفسيتك ويساعدك طبيب صديق أخ مرشد نفسي...

إذا كملت كل هالحكي قلب أخضر ...
وكتبلي شو الأكلة يلللي كانت توصلك لنقطة النشوة ....💚💚💪

كتير منتعرض لسؤال؟رحت عطبيب وما عرف شو معي أو شو السبب هالشي كتير منشوفو بكل فروع الطب يللي درسناه....للوهلة الأولى رح ...
20/11/2022

كتير منتعرض لسؤال؟

رحت عطبيب وما عرف شو معي أو شو السبب هالشي كتير منشوفو بكل فروع الطب يللي درسناه....

للوهلة الأولى رح تقول بقلبك شو هالطبيب مو عرفان السبب وقاعد يشلف أدوية ..

بس لما تدرس طب وتتفرع مثلا جلدية أو مناعة وكل الإختصاصات ....

أول سبب لما تدرس المرض ...
السبب ...
مجهول السبب بيكون؟
النسبة ممكن توصل ل 70 بالمية و 90 وحتى يللي ضل صعب علاجو...
يعني مو معروف شو السببب ....
وعلاجنا عبيكون للأعراض يللي عمنشوفها.....

غالبا مثبطات مناعة مثلا
كورتيزونات ...
وبشكل أقل مكملات وفيتامينات....
ما بتذكر حدا قال كول أكل صحي؟
كول بالبيت ؟
اقطع مصادر السم على جسمك ...
جرب حمية خالية من الزيوت النباتية ...
جرب أقطع مصادر الغلوتين 🤷
خود نسبة بروتين جيدة بأكلك ؟
ركز عمصادر الحديد ؟
ركز عمصادر المغنزيوم والبوتاسيوم ؟
كول وجبتين سمك بالأسبوع ؟
كول دهون صحية متل الأفوكادو والمكسرات وزيت الزيتون والزبدة والسمنة الحيوانية ....
جرب ولو تمشي يوميا نصف ساعة ؟
اهتم شوي بورقياتك وسلطاتك وخضرواتك ....

بالمقابل لما تقرا وتتبحر بالتغذية بتلاقي أول سبب نمط الحياة السيء....
نقص الفيتامينات....
أغلب هالأمراص عمرا مية أو ميتين سنة؟
أي للأسف كلهن جدد....
طيب أصفن شوية صغيرة؟
شو تغير جيلنا عن أجدادنا.....

١....دخان، أركيلة؟ ؟

٢...زيوت مهدرجة (يللي أثبت بالطب بتسبب ألف مرض ومرض؟)
ومنعو ينعمل دراسات عليه لأنو تكلفة عالفاضي عشي مثبت؟
وما فيهم يمنعو إنتاجها لانو اقتصادن بينهززز؟
لللأسف نحن بمؤامرة...... أييي مؤامرة....
إذا الزيوت المهدرجة مثبت ضررها؟
ليش ما بتوقفو تصنيعا ؟
أقل شي يعملو متل الدخان
ويكتبو عليها إنها سبب رئيسي للإحتشاءات والأمراض الآخرى...
بس ما فيهم ..
لأنو بكل بساطة 60 بالمية من معاملهم عايشة عالدهون المهدرجة ؟
أبسط مثال النوتيلا ؟
من وين حيجيبولك شطة ومطة للشوكولا بدون زيت نخيل مهدرج ؟
معقول يسكرو معامل الشوكولا ؟
والأمثلة كتيرة ....

٣..الأكل كلو مهرمن ؟..؟
التربة ما عادت تعطي فيتامين ومعادن...
بجسمك في ألف فيتامين ومعدن؟
مستحيل تقدر تساوي تحليل لكل شي....
مستحيل تعرف أي واحد السبب....

٤..إشعاعات وحروب وكيمياوي ونوووي..

٥...الاكل الجاهز والزيوت يلي بينقلا فيها سبع آلاف مرة عند البياع؟
بعرف نحن كتير صعب نصل لنمط حياة جيد بالمية مية...
بس خلونا قريبين من حياة أجدادنا خلونا ناكل كل شي صحي ناكل لما نجوع...
اعتبر مافي براد....
مو ضروري كل شوي تنقرش منو ...
صوم ولو 14 ساعة....
(وحاليا أغلب اختصاصين التغذية الفهمانين لغو شي اسمو سناك تفاحة وسناك موزة لأنو أثبت العلم هالشي غلط)

ولو ما كنت كيتو....
جاي رمضان صح؟
أنا بستغرب من أب أو أم ؟
هلأ؟ قرا هالحكي؟
كيف بيقبل يفوت عبيتو هيك سم عجسمو؟
كيف بيقبل يطعمي ولادو هيك أشيا ويفرحهم فيه🤷
ماني متطرف أنا ولا تقولو الحكي سهل ...
بس الصحة والعافية بدها تعب كمان وكلو مسؤؤلين عنو...
معقول أطفال بعمر ال 10 وال 12 عندن مقاومة إنسولين ؟ وبدانة ؟
هي مين بيتحمل مسؤؤليتها ؟
مو الأم يللي ما عمتطبخ ببيتها ؟
ومعودتن عالجاهز ؟

خلو الأكل لتعيشو مو لستلذو؟
اللذة مدتها 15 دقيقة بعد ساعات بيبلش تأنيب الضمير وكلو رايح عالأمعاء ...

خدو فيتاميناتكم ومعادنكم إذا ما عندك قدرة تنوع وتاكل كل شي صحي...

ابنك إذا شتهى فضي حالك ساويلو وصفة بكل شي أكل صحي ....

هاد بحد ذاتو عبادة وثوابك عند ربك لا تسمحلو بشتري جاهز لا تخليه يتعود ياكل برا البيت ...

إنت وإنتي مسؤؤلة عن كل شي....
كونو بخيررر❤️❤️❤️
(وإذا حبيت تشارك المنشور لعل حدا يقراه وبيهتم بصحتو وبصحة أطفالو) 💚

20/11/2022

منتجات الكيتو في سوريا ....

ولا تنسو تزورو كروبنا لتعرفو أكتر عن الكيتو والرياضة ....
معا لحياة صحية أفضل ، نظام الكيتو واللو كارب دايت .....................................................

محافظة دمشق

Tuhama.nutrition.khazem


First FÓÓD. بزورية رياض الطباع واولاده
(في نص سوق البزورية)

Keto&Free
توصاية أو بالغراند

غراند مارت شام سنتر
(نفس منتجات كيتو&فري) موا الشام سيتي سنتر

WILD NUT
(جنب فندق الشام)

Wouters Chocolate
(شوكولا كيتو أبو رمانة)

Keto Narin مجموعة لبيع منتجات الكيتو🍞🍞 .....................................................

محافظة حلب

طريق الحرير Silk Road

Good food For Good Mood

Mora Box
(الموغامبو طلعة سماقية العريضة)

مول عمار - Ammar Mall
(نفس منتجات مورا هون)
(الشهباء القديمة جانب جامع الرضوان موقع المول)
.....................................................
محافظة طرطوس
Sugar free

Steviar - ستيفيار
.....................................................
محافظة حمص

Choco chips store

(نهاية شارع الغوطة الرئيسة جانب دوار الغاردينيا)

صحيح لازم أخد حمام بعد التمرين ؟وليش ؟وشو توقيتو ؟و كيف لازم أخدو بعد التمرين؟ ...كيف جهز نفسي ؟....وهل الأفضل بارد ولا...
17/11/2022

صحيح لازم أخد حمام بعد التمرين ؟

وليش ؟

وشو توقيتو ؟

و كيف لازم أخدو بعد التمرين؟ ...

كيف جهز نفسي ؟....

وهل الأفضل بارد ولا ساخن ؟

فوائد الإستحمام وهو ضروري جدا...

1 ...يخلص الجسم من البكتيريا ...
2 ...يساعد عل منع انسداد المسامات...
3 ..يقوي جهاز المناعة ...

أفضل وقت للاستحمام هو بعد 20 ل 30 دقيقة من التمرين ولكن أكيد ما رح تضل كل هالمدة بالنادي 🤷

لهيك علق تعليق صغير ولايك للبوست لتشوف الشرح كامل 😍💚

17/11/2022

تفاصيل صغيرة بتغير حياتنا كليا 💚🙆
وإنت كمان فيك تكون تجربة جميلة من تجارب الحياة الصحية ...😍
شوية صبر بس ....
وبتصير عندك القصة كلها عادة 💚
وشو حلوة هالعادة ....

ما في نظام غذائي رح يمر بفترة تصاعدية ...نحن بشر بالٱخر ...والإنسان عندو طاقة وقدرة للتحمل ...الرجيم وأي برنامج غذائي مس...
16/11/2022

ما في نظام غذائي رح يمر بفترة تصاعدية ...
نحن بشر بالٱخر ...
والإنسان عندو طاقة وقدرة للتحمل ...

الرجيم وأي برنامج غذائي مستحيل تضل محافظ فيه عوتيرة معينة طول المدة يللي راسما ببالك ...

رح قسملكن ياها بكل بساطة .....

المرحلة الأولى هي مرحلة الحماس والقوة والنشاط والإرادة ....
هي المرحلة لازم نخليها تبقى طويلة قد ما فينا ....
رح نستمد قوتنا من رغبتنا بتغير نفسنا .....
من أهدافنا يللي رسمناها ...
من الشكل يللي عمنحلم فيه ....

المرحلة التانية هي مرحلة الإستقرار ....
يمكن ما نكون سعيدين ..
ولكن وصلنا لمرحلة القناعة التامة ...
وووصلنا لمرحلة التطنيش ...
يعني ما عاد يفرق معنا الأكل شو من كان يكون ..
تعودنا عروتين معين بغض النظر مبسوطين أو لا ...
هي المرحلة حلوة كمان يمكن يكون التزامنا أخف يمكن يكون نزول وزنا أقل ولكن نحن محافظين عنتائجنا وعمنمشي خطوات صغار لنوصل لهدفنا ....

المرحلة الثالثة ...
هي مرحلة الظروف الصعبة ...
مرحلة عدم الإستقرار...
مرحلة يللي ممكن نشتهي فيها عشي بحياتنا ما حبيناه ....
مرحلة يللي منحس رح نخرب الدنيا فيها بس تصحلنا الفرصة 😅

هي المرحلة بدها خطوات لنقدر نتغلب عليها ...
وبدها نهدا ونقرا شوي ...

إعادة شحن النفس ...
بكل بساطة ...
منبحث عن دعم ذاتي ودعم خارجي

الدعم الذاتي هو إنو نساوي شي جديد بحياتنا ...
نجرب أكلات جديدة ...
نوع رياضة جديد ...
نساوي بدائل صحية لأشيا ببالنا ...

الدعم الخارجي كبير رح يكون هون ..
أهلنا ..
رفقاتتا ...
الناس يللي بيحبونا ...
زوجك ...زوجتك ..ابنك ..أمك ..أختك ...

لهيك خود مقاساتك ...
اطلع بتيابك القديمة يللي ما كانت تجي عليك ...
تصور بتياب حلوين يبينو النحف عليك ...
ابعت صورك لناس بتحبهم ..
حط ستوري وخصصها لناس بيحبوك...
رح يصلك مدح كتير ..
رح يصلك كلام حلو كتير ...
رح ترجع تنشحن إرادتك ...
رح ترجع تقوى ..

الناس الإيجابين والطيبين نعمة بحياتنا ...

الله لا يحرم حدا منهم ...

ويا ريت ما تستقلو بموضوع الرجيم والدعم النفسي ..

بالذات إنت يللي عمتقرا البوست وعندك حدا عبتدعمو وبتتمناه يوصل لشفاء من مرضو حتى لو ما كان مرض معين وهو بس بدانة ....
أصلا ..
البدانة مرض ؟ مو بس مرض بل ابتلاء ..وعلاجو مو سهل أبدا ....

الكلمة الحلوة إلها أثر كبير ....
هدية حلوة صحية إلها تأثير أكبر وأكبر...
عزيمة عمحل صحي وأكل صحي ومشوار حلو كافي يشحن هالشخص لفترة طويلة ...

المرحلة الرابعة هي بعد الشفاء من الثالثة ....
وبترجع أقوى وأفضل ....
بتشبه المرحلة الأولى ...
ولكن هو بتكون أقوى لأنو صرت خبير بموضوع الصحة ..
وقدرت تدرب نفسك وقدرت تمرن إرادتك ....
ويمكن تقدر تكون مصدر طاقة وإرادة لغيرك (فيك تقول خبير نفسي تغذوي)
😍💚

خبرونا بأي مرحلة إنتو 💚🙆
ومين داعمكم بمشواركم الصحي 💚

و تضلو بخير ....💚🤷😍

حكينا كتير عن بكتيريا الأمعاء ...حكينا كيف نصلح بكتيريا الأمعاء ..وحكينا عن أفضل الأطعمة ...ورح نرجع نجمعن هون على أمل ...
16/11/2022

حكينا كتير عن بكتيريا الأمعاء ...

حكينا كيف نصلح بكتيريا الأمعاء ..

وحكينا عن أفضل الأطعمة ...

ورح نرجع نجمعن هون على أمل حدا يجيب شي منهم ويستفيد .....

12 نوع من الأطعمة تعتبر عالية الجودة لدعم بكتيريا الأمعاء ....

والمفروض بأي نظام غذائي تنضاف

بتمنى ما نطنشها وبالذات 🙆

ولازم تنوع بينهم وكل ما زدت ونوعت أفضل بكتيررر ....

أي تعليق بتحطو ...

ورح يصلك التفاصيل مع اسمهم بالإنجليزي حتى تعرف تبحث عنهم ....
💚

15/11/2022

سمعتن كلن أنا 😅
وإنتو ؟

شو بتعرف عن بذور الشيا ؟الكمية الآمنة ؟طريقة التناول ؟فوائدها ..أضرارها ...وهل صحيح ممكن الواحد يختنق فيها ؟وكيف نتجنب ه...
15/11/2022

شو بتعرف عن بذور الشيا ؟
الكمية الآمنة ؟
طريقة التناول ؟
فوائدها ..
أضرارها ...
وهل صحيح ممكن الواحد يختنق فيها ؟
وكيف نتجنب هالشي ؟......................................................

الفوائد الطبية المحتملة لبذور الشيا ...

تظهر الدراسات التي أجريت على الحيوانات أن بذور الشيا تقلل من مقاومة الأنسولين وتحسن التحكم في نسبة السكر في الدم ...

تظهر الدراسات البشرية أن الخبز المصنوع من بذور الشيا يتسبب في انخفاض استجابة نسبة السكر في الدم مقارنة بالخبز التقليدي ...

يخفض ضغط الدم
تم العثور على بذور الشيا ودقيق الشيا على حد سواء لخفض ضغط الدم لدى الأشخاص الذين لديهم بالفعل مستويات مرتفعة

زيادة تناول الألياف
معظم الناس لا يستهلكون ما يكفي من الألياف .

يرتبط تناول كميات كبيرة من الألياف بتحسين صحة الأمعاء وتقليل مخاطر الإصابة بأمراض عديدة ...

نظرًا لقدرتها غير العادية على امتصاص الماء ، تزيد بذور الشيا من حجم الأطعمة في الجهاز الهضمي ، مما يؤدي إلى زيادة الشبع وتقليل تناول الطعام.
......................................................

حقائق غذائية ...

كل 100 غرام تحوي على ...

سعرات حراريه: 486
الماء: 6٪
البروتين: 16.5 جرام
الكربوهيدرات: 42.1 جرام
السكر: 0 جرام
الألياف: 34.4 جرام
الدهون: 30.7 جرام
أوميجا 3: 17.83 جرام
أوميجا 6: 5.84 جرام

بذور الشيا لا تحوي على غلوتين ....

80 بالمية من الكارب يللي فيها هو عبارة عن ألياف .

كل 10 غرام بذور الشيا فيها 3.5 غرام ليف

التوصيات لعدد الغرامات من الألياف الطبية العالمية لتجنب المشاكل الهضمية هي باليوم الواحد...
25 غرام للنساء
38 غرام للذكور
......................................................

ألياف الشيا مفيدة جدا جدا لأمعائك وكولونك بتتخمر وبيتعزز تكوين الأحماض الدهنية قصيرة السلسلة ...

وما ننسى فيها أوميغا 3 وهي أفضل كل المصادر النباتية لأوميغا 3 وهي أفضل من بذر الكتان حتى ...

حوالي 75٪ من الدهون في بذور الشيا تتكون من أوميغا 3 حمض ألفا لينولينيك (ALA) ،
بينما حوالي 20٪ تتكون من أحماض أوميغا 6 الدهنية .

(طبعا رغم هالشي لا يقارن الموجود في الأوميغا مع الأسماك لأنو ALA
الموجود في الشيا بدو نحوي للأشكال النشطة (EPA و DHA) وفي صعوبة بهالشي عالجسم ....

بروتين
تحتوي بذور الشيا على 19٪ بروتين - وهي توفر جميع الأحماض الأمينية الأساسية التسعة ، وبالتالي فهي بروتين نباتي عالي الجودة.

المعادن الأكثر وفرة هي:

المنغنيز.
الفوسفور.
نحاس.
السيلينيوم.
حديد.
المغنيسيوم.
الكالسيوم.
......................................................

تحوي بذور الشيا العديد من المركبات النبانية المفيدة للجسم .....

حمض الكلوروجينيك. مضادات الأكسدة قد ييساهم بتخفض ضغط الدم

حمض الكافيك. قد تساعد في مكافحة الالتهابات في جسمك

كيرسيتين. يقلل مضاد الأكسدة القوي هذا من خطر الإصابة بأمراض القلب وهشاشة العظام وأنواع معينة من السرطان

كايمبفيرول. مضاد الأكسدة مرتبط بانخفاض خطر الإصابة بالسرطان والأمراض المزمنة الأخرى

بذور الشيا النظيفة والجافة تتمتع بعمر افتراضي طويل لأن مضادات الأكسدة بها تحمي دهونها من التلف 💚
......................................................

ٱخر سؤال كيف لازم ناخدها ؟
وشو هي أفضل طريقة لتناولها ..؟

تناولها نيئة
أو انقعها في العصير أو الماء
أو إضافتها إلى دقيق الشوفان والحلوى والعصائر والمخبوزات.
ممكن نرشها فوق أطباق الحبوب أو الزبادي أو الخضار أو الأرز.
وممكن نضيفا لوصفاتنا كلها لأنها بتساهم بتماسك العجين

نظرًا لقدرتها على امتصاص الماء والدهون ، يمكنك استخدامها لتكثيف الصلصات وكبديل للبيض.

يمكن أيضًا خلطها بالماء وتحويلها إلى مادة هلامية. .....................................................

شو الجرعة المفيدة والمسموحة ؟

الجرعة الشائعة الموصى بها هي

(20 جرامًا أو حوالي 1.5 ملعقة كبيرة)

من بذور الشيا مرتين يوميًا.

يعني فينا ل 40 غرام ...

((بس أنا كنصيحتي إلك ملعقة مسح 7 غراك مرتين باليوم كافيات بالذات إذا كنت كيتو لأن فيهم سعرات كمان )) 💚💚

وممكن نبلش 28 غرام وفينا نزيد تدريجيا حسب تحمل جسمنا ...

ما ننسى لازم نشرب مي منيح حتى ما يصير معنا مشاكل هضمية ...
......................................................

في إلها أضرار شي ؟

في بعض الناس ممكن يتحسسو إلها
لهيك إذا حسيت بأي أعراض أول ما تفوتا بنظامك الغذائي ممكن يكون منها
(أعراض التحسس ...قيء ..إسهال ..حكة في الشفتين أو اللسان وونادرا يكون التحسس قوي وتأدي لضيق تنفس وصدر وحلق)

في ناس ممكن ياخدو كميات كبيرة وصح فيها ألياف بس كمان كترة اللألياف ممكن تعمل بشكل عكسي .....لهيك حطيت الجرعة المفضلة ...

وبما إنو هية ممكن تنزل السكر والضغط لهيك عند المرضى لازم ننتبه عقياس الضغط السكر (ممكن نعدل بعض الأدوية )
......................................................

صحي ممكن الواحد يختنق فيها ؟

طبعا كحالة طبية تسجلت مرة وحدة فقط

بذور الشيا لما ننقعها بالمي بتنتفخ حوال 10 ل 12 مرة ...

لهيك في إحدى الحالات ...

رجلاً يبلغ من العمر 39 عامًا تعرض لحادث خطير مع بذور الشيا عندما أكل ملعقة كبيرة من البذور الجافة ثم شرب كوبًا من الماء.

انتشرت البذور في مريئه وتسببت في حدوث انسداد ، واضطر إلى زيارة غرفة الطوارئ لإزالتها .

لهيك دائما لازم نتأكد من نقعها لمدة 5-10 دقائق على الأقل قبل تناولها.

ممكن النقع بالمي باللبن أو بالسلطة

وإذا كانت مع الأكل رح تنبلع وتصير بالمعدة وما بيتأثر الجسم أكيد ولا في خطورة

بس هي الحالة أخدها ناشفة وبدون أي شي معها لهيك ما تساوي متل هالشب 🙆

ودمتم بخير ...

إذا حضرتك أول مرة بتشوف الصفحة حاول تشرفنا بالكروب ....
في مواضيع أوسع ...
💚💚

14/11/2022

أفضل 11 نوعًا من الأطعمة لتعزيز دماغك وذاكرتك

علق بنقطة ليصلك التفاصيل والشرح 💚

السلام عليكم ....كل ما يهمك عن الكيتو بالتفصيل الممل ...بتستاهل صحتك تقراه كم مرة وتشرفنا عالكروب نفس اسم الصفحة ...😍(ر...
07/09/2022

السلام عليكم ....

كل ما يهمك عن الكيتو بالتفصيل الممل ...
بتستاهل صحتك تقراه كم مرة وتشرفنا عالكروب نفس اسم الصفحة ...😍

(رح عرفكم بنفسي قبل ما تقرو يمكم موضوع الكيتو حساس بس لك شي رح ينزل هون هو بإشرافي وفيو تحديث لأحدث المقالات الطبية التغذوية أنا اسمي بكري داديخي
ماجستير في الأمراض الداخلية العامة/جامعة حلب
ماجستير في الأمراض الداخلية القلبية/جامعة دمشق
مهتم بمواضيع التغذية والرياضة وعلى قراءة دائمة 💚💚
تحياتي للجميع .... رحلة موفقة ....
لا تنسونا من التعليق والمشاركة واللايك للبوست............................
أول شي عملت نظرة وقلت شو بدي بكل هالحكي؟ أنا بدي أنحف؟ عطوني وجبات جاهزة وعلي الأكل شو بدي بدي هالحكي؟

هاد الدايت غير كل شي دايت جربتو هاد إلو طبيعة أكل خاصة هاد ممكن أهلك يستغربو وأخواتك لأنو كلو دهون ولحم وسئسئة كيف رح تنحف؟

ممكن تروح مكرب عند الدكتور أو الصيدلي وتحكيلو؟

رح يقعد يستغرب ويقلك هاد بيضر بالصحة والقلب وهوة (ما بيعرف شو يعني كيتو) وشو من صار معك رح يقلك بسببو؟

وحتى أخضائي التغذية يللي فشل ريجيمو معك وحطلك ريجيم جاهز أبو ورقة وقلم رح يحكيلك نفس الحكي ورح يتمسخر لأنو الكيتو مافيو وجبات جاهزة وما رح تحتاجو ولا رح يشلحك فلوس😊

لهيك بتمنى من قلبي تقرأ ...

ورح نزل هي عشكل محادثة ...

كل شي بيلزمك رح تشوفو هوون ..
وفي بوستات مرفقة ...
رح ينزلو بكل حالة مرضية ...
وبتمنى تشرفنا بالكروب في بوستات أوسع عن كل شي رح ينزلو هون بالتدريج ....

____________&&&&&&_______________
عشرين سؤال بيخطرو ببالكم عن الكيتو...

ورح نعطيكم طريقة سريعة لتبلشو بشكل تقديري طبعا هالشي غلط نعطيك وصفات سريعة وجاهزة بس..

لأنو لازم تاكل لتشبع وحسب حاجتك وشو مشتهي بس كرمال تاخد أفكار...

أول شهر شهرين بتاكل لتشبع مستقبلا تعلم عحساب السعرات وتقدير حاجتك يوميا....

قبل كل شي أنا مضطر كتير لنزل وزني في عندي كم سؤال..... تفضل؟ ....

1...شو رأيك ساوي كيتو وبصير ولا لآ؟
أنا معك أول بس لازم تعرف إنو هاد غير أنظمة الدايت الآخرى...
أول شي هاد رح يغير استقلاب جسمك بشكل كامل ويتحول من الإعتماد عالسكر للإعتماد عالكيتون (المنتج من الدهون)...
لهيك القرار لازم يتاخد وبقوة وتكون واثق من خيارك وصابر عليه.....
لانو رح يمر عليك كم يوم صعبين ولازم تكون جاهز لتتحملن وهنة شي طبيعي مانو ضار إن شاء الله.... إذا كنت وإلتزمت بالخطوات
وطبعا المدة يفضل تكون أكتر من شهرين تلاتة

مين يللي ما بيصير يساوو كيتو؟ أو إلهم مراقبة خاصة؟؟ ولازم تحت إشراف طبي؟ او يتبعو نصائح معينة؟

أي شخص عندو أمراض سابقة شو من كانت المفروض يسشير أخصائي تعذية علاجية أو يكتبلي بالبوست وبجاوبو.....
كل حالة وإلها اعتبارات خاصة..
وإلها وفي بوستات خاصة...
فيكم تقروها بالبوست المثبت لتقدرو تفوتو كيتو بأمان...

الحامل ممنوع....
المرضع ممنوع...
الأطفال.... إلهم اعتبارات خاصة وملاحظات....
مرضى السكري عموما والسكري يللي معتمد عالإنسولين ممنوع يبلشو بدون استشارة طبيب وينسقو معو لآخذ متابعات السكر وتعديل الأدوية وفي أدوية ممنوعة مع السكري....
مرضى القلب والجلطات الحديثة ممنوع اقل شي بعد سنة....
مرضى القلب والجلطات القديمة استشارة أخصائي أو بتقرو بوست الشحوم....

مرضى حصيات الكلية السابقة والرمل...
راجع بوست الكلية والكيتو ...
مرضى النقرس وارتفاع حمض البول...
راجع بوست النقرس وحمض البول..
أي حالة مرضية المفروص يستشير أخصائي ويشرحلو حالتو أو يكتبلي بساعدو ضمن إمكانيتي.... إذا الموضوع سهل...
وكل هالحالات إلهم بوستات خاصة..

2... هل الكيتو سريع بنزول الوزن؟
أي.... حسب الدراسات هوة بينزل أكتر من كل أنظمة الدايت الآخرى وأسرع وأول شهر بالذات بيعطيك دفعة معنوية حلوة بالميزان وبيعطيك إحساس بالطاقة والشبع مالو مثيل وبساعدك عالصيام المتقطع..
حسب وزنك؟ عمرك؟ جنسك؟ جيناتك؟ وإذا معك أمراض أو لأ...
مثلا شب وزنو فوق ال 100 ممكن ينزل فوق ال 10 كيلو أول شهر وووممكن أقل..
بشكل عام حسب أكلك للحلويات وشراهتك للنشويات قبل الدايت لأنو في كيلوات رح تخسرن ماء ( النشويات والسكر بيحتاج لجزيئات ماء h2o ليحرق السكر لهيك رح يستغني عن كتير مي بجسمك مانك بحاجتا وتخسر وزن حلو ببدايت أول شهر) ...

طبعا الوزن كدهون الصحي الطبي... هوة أسبوعيا نصف كيو ممكن يوصل للكيلو وبحد أقصى كيلو ونصف (لا أنصح تنقص أكلك كتير لهالدرجة) حسب سعراتك الحرارية والعجز يللي عامل فيو ....

3....بصير بلش فورا ولا لازم جهز نفسي؟
يفضل تبلش بالتدريج... نمط حياتك نفسو توقف سكر ... تدريجيا تخفف خبز... تخفف نشويات رز معكرونة وتوابعا وتخفف أكل جاهز وكل شي فيو سكر ومشروبات وكولا... خلال أسبوعين لتلاتة بعدين تتبع الكيتو بشكل صارم أفضل وفي حال مستعجل مافي مشكلة بلش فورا بس الأعراض رح تكون شديدة عندك شوي إذا جاهز فيك تتحملا ....

4... شو هن هالأعراض؟
أول يوم ما رح تحس بشي... تاني تالت يوم غالبا التالت وممكن لأسبوع... رح يخلص السكر يللي بجسمك ويروح معو السوائل يللي مجمعها وهالشي رح يسحب معو معادن بالجسم ويصير نقص.....
ورح يصير معك... دوخة... تعب عام... ممكن جسمك يصير هزيل وضعيف ... وتحس بضبابية بالدماغ... وصداع ... ضعفان شهية وريحة نفس غريبة...
و رح تقول نقص سكري؟ ...
بدي حلووووو بدي سكر ..
(ممكن تراودك نفسك تاخد تمرة أو قطعة فواكه بس ما بنصحك لأنو رح تكون روحت تعبك عالفاضي وفشلت بالتجربة) ...
رح تجيك أفكار كتيرة إنو تترك وتضعف إرادتك وخلص ما عاد بدك هالتجربة....

4... طيب شو لازم ساوي لخفف هالشي؟
أول شي لازم تعرف كل شي صار معك طبيعي...
هوة من أعراض انفلونزا الكيتو (كيتو فلو).
وهي بتدل عإنو جسمك بلش يعتمد عالكيتونات...
ونزل السكر لأرقام (مقبولة بجسمك أقل من ما متعود عليه) ما رح ينزل تحت الطبيعي (مافي نقص سكر يعني) ....
والإنسولين بلش يستقر......
وجسمك بلش بمعركة الحرق وطرد السوائل...
الحل إنك تكون جاهز نفسيا وتصبر....
تشرب مي كتيررر قد ما يطلب جسمك وإن ما طلب لازم تشرب فوق 3 ليتر...
تاكل وتنوع بالكيتو وتلتزم بالخضار والورقيات وغالبا هالشي صعب لهيك في مكملات لازم تاخدها أول أسبوع لشهر أقل شي لتخف الأعراض....

5... شو هن هالفيتامينات والمعادن؟
أول شي وأهم شي...

المغنزيوم.... إذا كنت برا سوريا بتجيب (مغنزيوم سيترات) عيار 300 ل 500 وإذا مافي أي مغنزيوم معلش المهم جيب...
أما بسوريا هالمنتج أفضل شي اسمو (مغنزيوم b6) 500 بتبلش 3 حبات عمعدة فاضية يفضل قبل النوم بيرخي شوي وبيساعدك عالنوم أو بأي وقت ما بتفرق..

فيتامين دال : من خلال حياتي والتحاليل اللي طالبها فوق ال 90 بالمية من شعبنا معو نقص فيتامين دال..
وهوة مرتبط بالبدانة بشكل جدي....
ولو عوضناه بالجرعة يللي رح أكتبها ما رح تأذي إن شاء الله بدون تحليل
(لأنو تحليلو غالي جدا ومكلف وهامش أمانو واسع يعني رح أكتب جرعة بتخليك بالطبيعي ولو كان طبيعي ونادرا ما يوصل لمرحلة يأذيك لهيك ما تخاف)
sun d 10 000 اسم الدواء
بتتاخد يوميا حبة مع الطعام لمدة شهرين...
بعدين منكون عوضنا النقص إن شاء الله ومنصير مناخد حبتين كل أسبوع كمكمل...
إذا عامل تحليل وطبيعي خود حبتين عيار 10 آلاف بالأسبوع فقط...
وبجوز الصيدلي ما يرضى يبيعك وحضرتك تخاف ... سااوي تحليل وتأكد يبقا وخود وإنت متطمن...

هلأ هدول أهم تنين منجي للكماليات ويللي بشوفا مفيدة جدا للصحة والجسم بس يللي فوق أهم شي....
برجع بأكد كماليات مانا إجبارية متل أول تنين لأنو سعرن غالي كتيرررر صارو هلأ....

الأوميغا 3 ....إذا فيك تاكل وجبتين سمك أسبوعيا من نوع جيد (سلمون أو ماكريل أوسردين حتى لو معلب معلش بتغسلو وبتحطلو زيت زيتون) ما في داعي لأوميغا ثري ولكن في حال صعوبة الإلتزام...
بفضل ناخد...
حب أوميغا ثري حبة كل يوم مع الفطور أول أسبوع وممكن بعد أسبوع ناخد حبتين بشكل دائم...
كيف منعرف الأوميغا الكويس في كتير أنواع؟ بتفتحو وبتشوفو بمعلوماتو مكتوب مادتين وكل مادة جنبا رقم... EPA+DHA لازم يكون مجموع هالمادتين فوق ال 500 أقل شي وإذا فوق ال 800 بتكون نوعية فاخرة ...

البوتاسيوم

لا تجيبو كمكمل إلا إذا في حصيات كلية كتبلي وأنا بقلك...
المهم تاكل ورقيات وخضروات منيح وما تطنش ...
كل وجبة جنبا صحن ورقيات ....
وإذا صعب تلتزم جنب كل وجبتك يكون في صحن جرجير أو بقدونس أوبقلة أو سبانغ ...
جيب مكمل اسمو الفارس k بسوريا عشكل محلو ملعقة كبيرة يوميا بعد أي وجبة وبيكفي ....

6... معلش ما آخد هدول؟
أقل شي خود المغنزيوم....
وفيتامين دال ما تنساه....
وفي حال ما بدك تجيب مغنزيوم مرق كل يوم 30 غرام بزر قرع أو مكسرات و ملعقة بزر كتان وملعقة حبة سودة وملعقة سمسم وشوية أفوكادو (يللي بتقدر عليه منهم) ...

7... طيب أنا عايش كل عمري بدون مكملاات وماحسيت بشي؟ ليش بدك تكتبلي مكملات؟
صحي مانك عامل دايت...
صح نموذج حياتك سيء...
بس لا تنسى أكلك كتير وكميات كبيرة...
مزبوط إنو غير صحي بس كلو فيو فيتامينات ومعادن وعمتاخد حاجتك منهم بطريقة ما أو بشكل متفرق يعني حتى الخبز فيو...
وهلأ نحن ضبطنا أكلنا.. وألتزمنا بحمية محددة....
لهيك لازم ننتبه لهالتفاصيل ...
وهالشي الفروض بكل حمية يكون في مكمل حسب نوع حميتك يعني مو المشكلة من الكيتو المشكلة من باقي الحميات ما بيقلولك خود هيك ....

8.. شو ساوي بس تجيني الدوخة تالت أو رابع يوم؟
بتساوي محلول كيتوني.. ليتر مي... ملعقة خل التفاح يكون عضوي (طبيعي) مكتوب عليه...
مع نصف ملعقة ملح صخري أو بحري أو الهيمالايا وممكن تحط فيو ترانشات ليمون... وبتشرب كاسة كل ما حسيت بالدوخة أو ووجع الراس غالبا 12 ساعة ورح تخف كتير ....

9.. ليش ما آخد ملح الطعام العادي؟
لأنو معالج ومكرر بطريقة غير صحية...
ومنحاول نتجنبو ...

لهيك إذا بسوريا استخدم الملح الصخري (البحري) برا سوريا... فيك تستخدم ملح الهيمالايا أو البحري ...

10... قديش مسموح آخد ملح باليوم...
مو أكتر من ملعقتين حتى تلت معالق صغار وإذا مريض ضغط يفضل أقل من ملعقة ونصف..

11... سمعت عن الصيام صح ضروري؟

أول فترة مو ضروري أبدا وبتاكل لتشبع وإيمت ما بدك بس بشرط تكون الوجبة كاملة ومشبعة يعني النقرشة والسناكات غير محبذة بالكيتو...
خلال أسبوع لأسبوعين رح تخف شهيتك كتيرر وجسمك ما عاد يطلب الاكل كتير وبطبيعة الكيتو دهونو كتير فالوجبة مشبعة وبتصد نفسك حتى ❤️
لهيك إذا صمت يفضل تصوم 16/8 بشكل عام ولما تحب الموضوع اختياري وليس إجباري بس الصيام رح يسرعلك حرق الدهون ويلزمك بسعرات أقل ويفوتك بالكيتوزيز أسرع

12... شو يعني صيام 16/8...
رح اعطيك مثال إنت آخر وجبة أكلتها الساعة تمانة المسا؟ صح؟
تاني يوم لا تفطر للساعة 12 الضهر صارت 16/8...
أو مثلا آخر وجبة الساعة الساعة 6 وتاني يوم الوجبة الساعة 10 وهكذا....
وتشرب مي قهوة زهورات أي شي بلا سكر وبدون إضافات ومي أكيد....

13.... معلش صوم دوم؟

18/6 مافي مشكلة فيو ولو كان بشكل دائم...
بس من أولها تصوم كتير وتضغط عنفسك ما بفضل ....
لهيك بلش تدريجيا
مثلا ..
أول أسبوع بلا صيام
تاني أسبوع صيام 14 وتدريجيا ساوي 20
تالت أسبوع مرقلك يوم 24
رابع أسبوع مرقلك يومين 24
ومستقبلا بس يصير جسمك كيتوني بامتياز بتقدر تصوم كتيررر وبتقدر تضل بشكل دايم صايم 24 ...
وبتقدر تصوم 48 في بوستات مخصصة لازم تقراها لتعوض جسمك بالمعادن والفيتامينات ...
بس المهم تكون عبتاخد بروتين منيح وخضروات منيح وعمتنوع بوجبتك وما تحرم حالك من ولا عنصر غذائي

ونصيحتي تضيف مكمل حب ملتي فيتامين (أفتح الجدول وشوف يكون فيو يود + سيلينيوم + زنك ) إذا ناوي تصوم صيام 24 وفوق ...
في بوست مخصص لصيام 48 وفي ناس معنا قديمين بالكروب صامت أسبوع كامل ...

14... طيب عمشوف كتير بوستات بالكروب عن ثبات الووزن؟ شو القصة؟

أول شي نتيجة الممارسة الغلط والصيام الطويل الدائم الفوري وعدم حساب السعرات رح يتأثر الجسم ويوقف لفترة عن نزول الوزن....

15... طيب أنا نقاق كتير ومستعجل عنزول الوزن؟ كيف فيني أعرف تطور جسمي؟

أول شي خليك واثق إنو طالما أنو بلشت كيتو وعمتاكل أقل من سعراتك مستحيل تكسب دهن...
لهيك لازم تزين مرة وحدة كل شهر بس...
وللنساء مرة بعد إنتهاء الدورة الشهرية فقط
في شي اسمو حساب مقاسات ونسبة دهون جسمك...
في شي اسمو تياب وصور...
حاول تاخد صور إلك بكل الوضعيات لتحفز حالك وتشوف تطور جسمك... وقديه حليت..
إحسب نسبة دهون جسمك... رح نزل بوست عنو بشكل منفصل وأعتمد عليه...
هوة الأهم...
ممكن إذا ساويت رياضة يثبت وزنك بس تنزل كمقاس... يزيد الكتلة العضلية وتنقص دهون وإنت رح تفكر الميزان واقف وحرق الدهون واقف لهيك المقاسات ضرورية ومقدسة والصور وتشوف تغير التياب عليك والحزام يللي لابسو...

16... في داعي ساوي تحاليل؟

حسب هدفك...
إذا ناوي تساوي الكيتو لأسباب مرضية أكيد لازم تساوي وتراقب تحت إشراف طبيب...

إذا ناوي تساوي الكيتو أكتر من مدة تلت شهور أو ست شهور حد أقصى يفضل تساوي تحاليل قبل...
(أرجوك قبل؟ لا تساوي تحليل بعد شهر وتجي تشلفلي ياهن تقلي شوفن؟
بتساوي قبل وبعد 2 شهر أو 3 أشهر)
بدون تحاليل قبل ما بقدر أعرف شو يللي صار بجسمك....
والتحاليل ممنوع قبل الشهرين لأنو ممكن بترتفع بشكل طبيعي وبترجع بتنزل بعد هالفترة...

إذا في أعراض بجسمك من قبل متل تعب عام إحساس بالبرودة... ضخامة بالرقبة... وبتحس إنو أكلك قليل وبالرغم من هيك عمتزيد وزن...
لازم تساوي شوية تحاليل للإطمئنان....

17... طيب شو هن التحاليل؟

(لنعرف سبب الوزن الزائد وضعف الإستقلاب بالجسم)..

هرمون الدرق tsh
فيتامين د vit d
مغنزيوم mg
بوتاسيوم k
كالسيوم ca
خضاب الدم والصيغة cbc

إذا في فقر دم سابق حسب نتيجة التحليل ممكن ينطلب لأنو مكلفين شوي
حديد fe
سعة رابطة للحديد TIBC
مخزون الحديد ferritin
فيتامين بي 12 ..... vit b12
حمض الفوليك..... folic acid

وتحاليل الشحوم كاملة حصريا في حال بدك تساوي كيتو لمدة طويلة (الأهم) ....
cholestol
ldl
hdl
tg3
uric acid حمض البول

18... سؤال مهم كتير بيخطر عبالكم...؟
هل الكيتو مكلف...
هوو صح مكلف وكتير بسوريا ومافيك تتدلل بس إذا مغترب يعتبر عادي وفيك تعيش كنطام حياة وتأمن كل شي مطلوب...
عموما فيك تعتمد عزيت الزيتون بدل السمن والزبدة....
فيك تعتمد علحوم الدجاج وتنوع فيهم ...
الوصفات مو كتير ضرورية ...
وصدقني بسعر وجبة شاورما جاهزة وصحن نابلسية فيك تاكل ليوم كيتو كامل ....
وبالنسبة لوصفات الكيتو الحلويات والمشروبات بسوريا والخبز الكيتوني...
فيك تجيب من البذورية طحين اللوز طحين الترمس ومبشور جوز الهند وبذور الشيا وقشور السيليوم وسكر استيفيا فرط....
وفيك تجيب جبنة دهن وقشطة بلدية أصلية او نيوبارك ولبنة عالية الدسم وكل أنواع الجبن الأصلية عالية الدهن مسموحة موتزاريلا شيدر قشقوان الحلوم.....

19... طيب منحي لأغلظ سؤال؟
قديه رح أنزل وزن أول شهر ... أول أسبوع؟

هاد السؤال صعب جاوبك عليه....
كل جسم وإلو اعتبارات خاصة...
بس من خلال خبرتي وأصدقائي يللي فاتو كيتو...
يللي مدمنين سكر وحلويات بينحفو كتير أول شهر وأول أسبوع وحسب وزنهم مثلا وزنهم فوق المية.... ممكن ينزل أول أسبوع 4 كيلو وأول شهر للهشرو كيلو؟؟
يللي مدمنين أكل جاهز أقللل....
في ناس ممكن يثبت وزنهم... هدول بالأساس عايشين أسوء نظام صحي بحياتن بياكلو معجنات وكرواسات وبسكويت وبروتينهم قليل وعندن ضعف عضلي والكيتو بيهتم بالبروتين وبيركز عالنسب وتناول فيتاميناتك فأول فترة ممكن يحتاج الجسم فترة ليعوض النقص بالفيتامين والبروتين يللي صرت تلتزم فيهم بالكيتو ...
بعدين بتبلش تنزل وزن وبالرغم من هيك لو آخد مقاساتك رح تشوفا عمتنزل بطريقة حلوة وتحفزك كتيررر لهيك الله يخليك خود مقاساتك وأحسب نسبة دهون جسمك من الرابط يللي موجود بالكروب ....

20... خلصنا من المقدمات وجينا لأهم سؤال؟ شو لازم أكل شو لازم أشتري؟ شو لازم جيب.؟

أرجوك مرة ومرتين وألف مرة الكميات تقديرية مو غصب تاكلها كلها؟ نقص ملعقتين تلاتة زود خمسين غرام لحم أو نقص عاااااااااادي الكميات تقديرية أرجوك لا تقلي إنو كتير مو ضروري تاكلن كلن بتاكل حاجتك بس تشبع وقف؟

أول شي الدهون المسموحة والمفضلة...
زيت زيتون..
دهن الخروف...
زبدة حيوانية أو سمن حيواني أي نوع (مرسوم عليهم بقرة) أقرو التفاصيل يكون مكتوب عليهم طبيعي وحيواني مية بالمية وما يكون مكتوب عليها اي شي نباتي أو مهدرج...
يفضل زبدة لورباك... أو سمن حيواني من شي راعي غنم من الريف (بقري أو غنم)

طيب قديش رح أكل منو وكيف شو من كان أكل يوميا لازم تاكل حوالي 4 ل 6 ملعقة دهن حسب شو رح تاكل مثلا...
وجبتنا فيها فخد أو جنح أو لحم غنم منقلل... لأنو دهنهم عالي...
وجبتنا صدر جاج وتونا وسمك دهنو قليل منكتررر ل 6 هالحكي مثلا...
هللحكي مؤقتا لبين ما تتعلم عحساب السعرات الحرارية ...

منقسم هالكمية قسمين تلاتتة... زيت زيتون للسلطة..
سمنة أو زبدة منحطن للحمة أو ومنقمر فيهم اللحم أو منقلي البيض فيهم...
أو أكلنا مثلا لحمة منزيد دهن الخروف فيه شوي والصبحية كم ملعقة زيت

برجع بأكد هالشي مؤقت أول شهر بعدين منخفف دهون ومنحسب سعراتنا ومننوع منكون تعلمنا عكل شي هالشي كرمال تقدرو تحسو بالشبع والطاقة وما تاخدو أقل من 2000 سعرة حرارية كبداية...

خلصنا من الدهون....

بشكل عام حسب وزنك بتاكل لحم.....

الفطور خليه دوما 2 ل 4 بيضات كاملين مسلوقين أو مقلين بتساوهم عجة أو بيض ببندورة ضلو نوعو شي ما تملو....
مع ملعقتين تلاتة لبنة أو 50 غرام جبنة عالية الدسم أو ملعقتين مسبحة أصلية أو قطعتين تلاتة جبنة كيري (ركزو عكلمة أو)
بتحطو فوقهم جزء من الدهون يللي كتبتن فوقن للقلي أو للحمص أو للبنة...
مع خيارة و بندورة وصحن سلطة جرجير مثلا (كتبت تحت شو المسموح بشكل يومي منهم)
ودائما فوق صح السلطة رش ملعقة بذور الشيا أة سمسم غير محمص أو حبة سودة ...

الغدا أي نوع لحم حوالي مثلا
وزنك بين ال 90 ل 100 بتاكل حوالي 350 غرام صدر جاج أو صدر كبير...منكتر دهن شوي متل ما حكينا ...
أو نصف كيلو فخذ دجاج من دون عظم
تقريبا فخدتين كبار... منخفف دهن ....
أو 400 غرام لحمة ... منخفف دهن.....

كل ما زاد وزنك 10 كيلو بتزود 50 غرام لحمة...
كل ما نقص وزنك 10 كيلو بتنقص تقريبا 50 غرام لحمة.... هالحكي تقديري...
مثلا بنت وزنك 70.... بيكفيكي 200 غرام صدر جاج مع تلت بيضات باليوم...
300 غرام فخد صافي بدون عظم (اتركو الجلد عادي) شي فخدة ونص كبيرة أو أقل....

خلصنا من البرووتين....
رح نحكي عن الخضرووات والورقيات....

كل يوم بتاكل...
جرجير قد ما بدك....
بقدونس أو سبانغ بدون حساب قد بدك حاول تغير جو فيهم تساوي عجة مثلا...
وكل الورقيات هيك ويفضل تكتررر مليانين معادن مهمة لجسمك....
ركز عورق الخس ولا تاكل العضد يللي جوات الخسة حاول تاكل خسة يوميا....
الملفوف شي أقل من عشر ورقات يوميا...
كل شي ورق أخضر يفضل تاخدو وبدون حساب
خيار وحدة وسط يوميا....
بندورة وحدة وسط يوميا...
بصل حوالي 50 غرام..
توم حسب الحاجة...
ليمونة حجم وسط....
فطر مسموح مئة غرام يوميا إذا بتحب
قرن فليفلة وسط

هدول أساسيات...
منجي للخضروات يللي منحطا مع الأكل...
يوميا إما 200 غرام باذنجان أو كوسا أو بامية أو فاصولية خضرة أو لوبيا خضرة أو يقطين أو قرع أو كماية أو أرضي شوكي ...
وإذا وزنك كبير فيك تزيدن شوي....

منجي للمكسرات... يفضل ما تكترر أي نوع ببالك بتاكل قبضة (30 غرام) بإيدك وقت تشتهي..

منجي للفواكهة...
حوالي مية غرام فريز أو أو جوز هند أو توت العليق (الأزرق بس 50 غرام) أو توت البري الأحمى والأسود معك ل 150 غرام (الشامي ممنوع)..
وإذا حضرتك بسوريا ومافي هدول تفاحة حامضة تبعوت كسب وحدة صغيرة بال 70 غرام...
أو اجاصاية خمسين غرام ما تكون مستوية ...

الأفوكادو فيك تاخدو بدل دهونك مثلا اعتبر كل 100 غرام عبارة عن ملعقة ونصف دهن وهالشي كتير حلو وافضل من ملاعق السمن والزبدة وبالذات لمرضى القلب والكبار بالسن...

هي الكيتو ببساطة وسلاسة...
ورح ننزل بوستات بوجبات الشعب وأكلاتة يا ريت تتابعوهم وتسألو عن اي شي ببالكم بدون خجللل....
هي نموذج جاهز لأكلات لأسبوع كامل....
فيك تكررو أول كم أسبوع...
وبعدا تنوع وتتعلم كيف تاكل من بوستات الكروب والصبايا والشباب
https://m.facebook.com/groups/475742467099311/permalink/484013412938883/

طيب آخر سؤال أكيد خطر عبالك صح؟

شو الفرق بين الكيتو واللوكارب.....؟

تعال لجاوبك بعد ما فهمت الكيتو 😍
أكيد عرفت الكيتو شو وقريت البوست مرتين تلاتة بتمعن وسجلت كم شغلة ببالك....

يلا...

الكيتو... للازم أقل من 20 غرام باليوم كاربوهيدرات ( يللي موجودين بالخضروات والحمص واللبنة والجبنة والمكسرات والفواكه) وبحد أقصى 30 ويللي قديمين كتير وبيعملو رياضة ممكن يضلو كيتو ل 50

اللوكارب بيبلش من 20 غرام ل 50 وممكن ل 130 كحد أقصى يعني بيشبه الكيتو....

ما فهمت شي مو؟
والله حقك...
شغلة بتضوع...

طيب بتتذكر لما قلتلك كل يوم بتاكل خيارة؟
وبندورة؟ و 200 غرام باذنجان وتوابعتا واللبنة ملعقتين والحمص ؟
والفريز قلتلك 100 غرام والمكسرات 30 غرام
أي...
هدول بتصير بتاكلن بأريحية.... بتضاعف الخيار بتضاعف البندورة بتضاعف الخضروات بكمية أكبر مثلا 300 غرام باذنجان.... مثلا أربع خمس ملاعق حمص....؟
الفريز والمكسرات كل يوم....
هيك صار اسمك لو كارب؟ وبطلت كيتوني.... وهيك بس تخلص كيتو بتطلع منو وشوي شوي بتزود بهدول الشغلات لترجع طبيعي😊😊
بس لا تنسى إنو رح تنقص دهونك ما عاد تحط من 4 ل 6 ملعقة ....
يعني حد أقصى 2 ل 3 ملاعق وحسب شو عمتاكل.....
أكيد فهمت صح 🤗
بس هون يا حلو ما فعلنا كيتونات الجسم وضل جسمك ودماغك عبيعتمد عالسكر بس أكيد رح تنزل وزن لأنو رح تشبع وتاكل قليل يعني لساتو نظام عالي الدهون... 🤗
والله أسهل من هيك ما ضل...
كتبلي أي سؤال ببالك بالتعليقات ولا تنسى تحط لايك ووردة لأعرف إنك مريت... 💚
ولا تنسى تشوف بوست اللوكارب شارح فيه كل شي بالتفصيل شو المسموح والممنوع....
ومنو بتفهم كل شي بيخص الحميات والمقارنات ....

Address

Aleppo

Telephone

+963995670921

Website

Alerts

Be the first to know and let us send you an email when معا لحياة صحية أفضل نظام الكيتو واللو كارب دايت والرياضة posts news and promotions. Your email address will not be used for any other purpose, and you can unsubscribe at any time.

Shortcuts

Share

Category