04/03/2025
هي تجربتي بالماتش الأمريكي ٢٠٢٤ بالطب الباطني (الماتش الماضي) يلي كان المفروض نزلا من فترة وحال الانشغال وبرود الهمة دون ذلك
الخلفية: خريج جامعة دمشق دفعة ٢٠٢٣ (تاريخ التخرج ٢٠٢٤)
ستيب ١: ٢٦٤
ستيب ٢: ٢٦٧
رسائل التوصية: ٤ رسائل من ٤ أشهر ب٣ ولايات مختلفة
بدت القصة بشعور من السخط والخوف من المستقبل. عدم الرضى عن حاضر ومستقبل الطبيب بالبلد يلي كنت ولازلت بحبا. وكان السؤال الأول والأهم, لوين؟..
أي طبيب بهمو يبني مستقبل ويأسس عائلة ويحصل على تدريب علمي وعملي بمستوى يستحق السنين من عمرو يلي نذرها لألو. ومعظمنا بحالة من البحث عن موقع جغرافي منحصل فيه على احترامنا كبشر قبل ما نكون أطباء . وبتبلش رحلة البحث.. وبيستقر القرار على أمريكا بعد منافسة مع مؤسسة حمد بقطر يلي خسرت امام امريكا بنظري بعد ما حسيتها نسخة قليلة الجهد وكثيرة الرفاهية من طريق أمريكا نفسو, وشفتا مورد غير متجدد وفرصة قد تتاح وقد لا تتاح قدامي لما اتخرج.
بلشت تحضير للطريق من وقت اجتياح كوفيد باستغلالي للعطلة لانجاز شي مهم بدلا عن الاكتئاب الناجم عن حظر التجول, أو التحضير للجامعة الخالي من قيمتو بوقتا نظرا لتوقف الفصل الجامعي لمدى ما كانت مبينة نهايتو بهداك الوقت.
أنجزت ستيب ون بعد سنة تقريبا بعلامة ٢٦٤ (قبل ما يصير الفحص نجاح ورسوب). وستيب تو بعدها بحوالي سنة كمان بعلامة ٢٦٧. وتخلل المدتين ضمن السنة المذكورة عدة شهور من عدم الانجاز لأسباب مختلفة.
أحد أسباب النجاح بالفحصين ضمن فصول الجامعة هية تجاهلي التام وغير المبالي بالنتيجة لمواد الجامعة وعدم دراستي لأي محاضرة بدءا من السنة الرابعة, بعد ما اكتشفت انو اي طالب طب بيقدر ينجح بالمواد إذا كان عم ينجح فيها من قبل عن طريق الاستعاضة بدراسة مواد الستيب ضمن الفصل ودراسة جزء من الدورات قبل بنهار من المادة. انخفض معدلي عدة درجات من حوالي ال٩٠ لحوالي ال٨٦ بعد تغيير المسار المذكور وتخرجت بمعدل تخرج قريب ال٨٨.
بلشت تخطيطي الجدي للماتش بعد ما انهيت ستيب تو وخلال قيامي بجولة سريرية بأمريكا وبشكل طبيعي كنت اسال أي حدا بشوفو عن نصائح متعلقة بالماتش, متل الوقت المناسب للتقديم عالماتش, وأهم العوامل يلي بتساعد عالنجاح بالماتش, إلى آخره.. وكنت فعلا احصل على أجوبة, على تضاربها وتعاكسها ببعض الأحيان, كانت تساعدني ببناء رؤية أقل ضبابية للمستقبل. وقررت بعد شبه اكتمال لوازم الماتش (من علامات ستيب ورسائل توصية وفحص لغة) اني قدم على ماتش ٢٠٢٤ وكنت بمنتصف السنة السادسة. وقتها كان أحد الأشياء المهمة يلي لسا ما اكتمل عندي هو شهادة الECFMG يلي لا تصدر إلا بعد رفع الدبلوم وكشف العلامات, بالتالي كشخص غير متخرج وما بتطلع وراقي لبعد نتيجة الماتش, كان من المستحيل الاستفادة من هالشهادة للماتش, وبعد دراسة الإيجابيات والسلبيات لهالخطوة, قررت اني قدم عالماتش بكل الأحوال.
عملت الباثوي السادس بسوريا عن طريق ٣ أطباء رفعولي تقييمين سريريين كل واحد الله يزيهم الخير (دكاترة من سوريا وموجودين بسوريا وما كان عندن بورد امريكي) وقبل البداية الرسمية للمقابلات بحوالي ٣ أشهر, بلشت عبي المعلومات على حساب ERAS يلي بتضمن السيفي مقسمة لعشر تجارب, فيها تجارب العمل والتجارب السريرية بأمريكا والتطوع والهوايات وأي شي بتحسو ضاف لشخصك وبتقدر تحكي عنو بالمقابلة. وبالايراس في عدة اقسام تانية متل رسائل التوصية وغيرها.
كتبت برسونال ستيتمنت يلي هية موضوع تعبير صفحة وحدة بيشرح جوانب مهمة من قصة حياتك وكيف هالشي خلاك بتحب الطب كمهنة وبالذات الاختصاص يلي مقدم عليه وبيسلط الضوء على جوانب قوية بشخصيتك بتخليك أهل أنو يختاروك الخ..
بالنهاية قعدت مع دكتور أمريكي-سوري الله يزيه خير عدلناها سوا وساويناها اقوا ودبلوماسية أكتر. وبوحدة من المقابلات علقوا عليها بشكل إيجابي وقالو انها مميزة. وبرأيي هية مو من أهم العوامل ولكن قد تلعب دور ولازم تكتبها بأفضل شكل ممكن.
بلشت ابحث عن أي حدا بيقدر يفيدني بالماتش عن طريق انو يخدمني ويوصلني بالبروغرام تبعو. وكالمتوقع, بائت معظم هالمحاولات بالفشل, نظرا لأنو الغالبية ما عندهم الموانة عالبروغرام بالاصل, مو حابين يحطو على حالهم وحدة قدام البروغرام, أو مو رغبانين بالمساعدة نظرا لخوفهم من انك ما تكون كفائتك عالية وبالتالي تسودلن وشن قدام البروغرام. بشكل عام, الغالبية بعد ما يوصلو بينسو وين كانو من كم سنة وبيعزفو عن مساعدة الناس يلي كانو بمحلهم من فترة قريبة. وهاد عادي ومتوقع, بس ضمن كومة الناس هي في ناس رح تساعدك لأبعد الحدود بدون ما تكون متوقع منهم هالشي.
قبل المقابلات بكم شهر, قعدت ادرس البروغرامات واحد واحد بحثا عن اجوبة لعدة أسئلة, منها اذا بيقبلو الأجانب يقدمو بدون شهادة ECFMG ومنها اذا البروغرام بياخد سوريين.. الى آخره. وكان الموضوع متل البحث عن ابرة بكوكب من القش. فكنت الجا لاني راسل كل بروغرام بالسؤال لما ما لاقي اجابتو (البعض يرد جواب والأكثر ما يجاوب). وكنت استخدم بحث غوغل بيتضمن اسم البروغرام وسوالي المتعلق فيه وكتير احيان بلاقي الاجابة من صفحة غوغل بدون ما فوت عالموقع وهاد سرع العملية. وعملت ملف اكسل بكل بروغرام ومعلومات بتهمني حصلتا عنو. وكتير من هالمعلومات كانت قديمة واكتشفت انو البروغرام ما عم يحدثها او منقص معلومات مهمة ومو كاتبها. بالنهاية عملت تلفون مع طبيب عندو خبرة بالبروغرامات والله يزيه الخير عطاني الجانب يلي مو موجود عالنت عن كتير منهم, وللاسف هاد الجانب هو الصحيح وهو الجانب الأكبر. وبالمختصر كانت فترة البحث قليلة الفائدة نسبيا واظن انو موضوع البحث والايميلات جبلي مقابلة وحدة بس. وكان العامل يلي ساعدني اكتر هو التواصل بشكل مباشر مع الأطباء يلي تعرفت عليهن بامريكا واشتغلت معن.
اكتشفت انك لازم تحط ببالك البرامج يلي مو بس بتحب الأجانب بشكل عام (IMG friendly) بل يجب التركيز على البرامج يلي ما عندن مشكلة ياخدو السوريين بشكل خاص (Syrian friendly). وهالكلمة حكاها لالي بالحرف (عن طريق وسيط) أحد البروغرام دايركتورز بعد ما رفض يعطيني مقابلة وقال بما معناه: "الMSPE يلي باعتلي ياها فارغة وما بتعبر عن ادائك كطالب, وكشف العلامات فيه كتير معلومات ناقصة, ونحن ماعد اخدنا سوريين بعد الأحداث.. روح دور عبرامج بتقبل بالسوريين متل برامج نيويورك ونيوجرزي".. كل هالأمور مالها بايدينا ومسألة الوراق بأيدي الجامعة مع معرفة الجميع بقلة مبالاة الجامعة بتحسين واقع البيروقراطية تبعنا ولو هالموضوع بغير كتير امور بشكل جذري لطلاب جامعاتنا.
هالموضوع, مع انو محبط, هو جزء لا يتجزأ من تجربة الماتش, هية عبارة عن مئات تجارب الرفض, وتجربة ناجحة وحدة بس, هي الكافية لنجاح التجربة كاملة. كل حدا بتجيه كتير رسائل رفض من البروغرامات, انو نحن فللنا وماعت نبعت مقابلات. الي بصير انك رح تعيش شهور من المرمطة النفسية بسبب هالرسائل. والحقيقة انو هنة ما شافو الابليكيشن تبعك بالأصل قبل ما يبعتو الرفض, لانهم راجعو عدد معين واكتملت مطارح المقابلات وبكبو الباقي بدون ما يشوفوهم.
أحد الفلاتر المهمة هي انو بعض البروغرام دايركتورز بيفتحو على الجامعات وبشوفو مين مقدم, وبياخدو من جامعات معينة بس. وما بيحكو هالشي عالموقع طبعا لأن قد يجبلن مشاكل, بس هي الحقيقة, كتير بتصير انك تقدم على برنامج معين ويكون احتمال تاخد مقابلة فيه صفر الا بحالات استثنائية، وهي البرامج اذا عرفتا لا تقدم عليها لان مارح تزيد فرصك ومضيعة موارد عالفاضي.
لما قدمت عالماتش كنت بسوريا وتميت بسوريا بفترة المقابلات. استأجرت قاعة بشكل ساعي فيها لابتوب ومايك و(الأهم) انترنت فايبر ما بيقطش. كانت احدى المقابلات يوم الجمعة وما كانو فاتحين وبالزور وافقو يفتحو مشاني مقابل مبلغ اضافي.
اجاني عدد متوسط وقد يعتبر قليل من المقابلات ببرامج جامعية. المقابلة عبارة عن ٢-٣ اقسام رئيسية هية يلي بتم فيها تقييم المتقدم. والباقي تعرفة بالبروغرام. وعادة بكون في اجتماع مع الريزيديتس (meet and greet) بوقت مستقل واحيانا بيوم مستقل ما بتتقيم على اساسو وهو بهدف تسال الاطباء المقيمين بالبرنامج عن البرنامج والمدينة وهالأمور.
العوامل يلي بتلعب دور بنجاحك بالماتش:
موضوع المعارف (connections) موضوع كتير مهم وبيجي دورو بعد ما تبني سيفي قوية بغرض انك تورجي هالسيفي لحدا ما كان رح يشوفا أو يقدّرا لولا هدول المعارف. ومو الغرض منها تنقبل بالبروغرام. مافي كونكشن عوجه الأرض عندو القدرة أو الرغبة يحطك بالبروغرام اذا انت ما بتبيض الوش بمعايير هالبروغرام نفسا. بالتالي خلي تركيزك طوال الطريق انك تبني نفسك وما تقول لو عندي معارف كتير رح تجيني مقابلات كتير ورح متش اكيد (بفرض يلي بيجيه مقابلات اكتر احتمال يمتش اكبر).
الحقيقة انو لو بتجيك ميت مقابلة, احتمال كلن, لنفس الاسباب, يعطوك رانك قليل وبالنهاية ما تمتش. الحقيقة انو البرامج بيعرفو منيح مين رح يمتش عندن ومين لا بعد المقابلة, لان بعد رقم معين الرانك صاير للاحتياط بس وفي متقدمين ترنكو بشكل انو ما يمتشو اصلا بالحالة المثالية.
وكمان ما تتحسر عحالك لعدم وجود المعارف. تجربتي الشخصية انو ما كان عندي معارف أبدا وتعرفت عكتير دكاترة لما طلعت وببعض الأحيان كنت عن بعد من سوريا جرب احكي مع ناس واقدر اوصل لنتيجة. أحد البروغرام دايركترز تواصلت معو عن طريق الايميل وكنت عم اسالو عن موضوع السرتفكت وبعد شهور بلاقيه عم يحاكيني عالوتس ويسالني عن بعض المعلومات الشخصية بعدين اجاني منو مقابلة. بس لاني محاكيه عالايميل وحس اني صادق معو.
Step2 Score
السكور من اهم العوامل يلي بتفيد انك تحصل مقابلة وبتساهم بالرانك. الحقيقة انو السكور هوة احد المفاتيح يلي بتدخلك عالماتش وقد يكون المفتاح الاكثر موضوعية. بس الاهم من هالشي انو الستيب هوة الخطوة يلي بتاخد شغل وتركيز اكتر والناس يلي بتترك الطريق معظمن بيتركوه بسبب الستيب. بعد ما تقدم الفحص ان كان سكورك عالي او قليل تجاهل الفحص نهائياً وركز عالجوانب التانية.
البروغرام بهمو تكون علامتك عالية حتى ما ترسب بامتحان البورد وبشكل ثانوي حتى يتاكدو انو معلوماتك الطبية جيدة. الواقع انو المعلومات الطبية مو اهم عامل بتكوين ريزيدنت ناجح. أخلاقيات العمل ومهارات التواصل واللغة، مهارات القيادة، والقدرة عالعمل المكتبي هية يلي بتخلي الريزيدينت يتميز، بالذات بالبداية.
USCE
الخبرة السريرية بامريكا مهمة للاجانب لان بدونا انت ما بتعرف شي عن السستم فبالتالي خطر كبير عالبروغرام ياخدك والاهم من هيك صعب تحصل على رسائل توصية بدون خبرة سريرية بامريكا مع وجود بعض الاستثنائات.
الخبرة السريرية حتخليك تفوت عالسستم وانت مرتاح نسبياً وعرفان الاساسيات عالاقل, ولو انو مافي كمية خبرة رح تخليك جاهز فعلياً لان ما بتتعلم صح الا لما تكون مسؤول عن المريض والك مكان بالسستم كرزدنت عالاقل. معظم الروتيشنز ما رح تعطيك مسؤوليات والدكاترة فيها بكونو مشغولين وماعندن القدرة او الفراغ انو يساعدوك بشي لما تكون طالب جاية من برا واخد روتيشن بالموانة وهدفك الرئيسي منا هو رسالة التوصية.
بنصح يلي اجا يعمل روتيشن يتعلم اساسيات التاريخ المرضي، الفحص السريري, تقديم المريض للطبيب الاستشاري مع ترتيب الاولويات، وكتابة النوتس. وما يتجاهل هالشي ابداً.
Hobbies
الهوايات بتعطي لون مميز للسيفي بس عدم وجودها ما بضر. خلي قسم من الايراس للهوايات واجمعها كلها فيه وبالذات اذا ربحت جوائز او عملت انجازات احكي عنها بشكل مختصر.
Step3
مهم لانك تاخد H1b visa. لما تمتش ببروغرا بيعطي اتش ون, بيطلبو منك انك تكون مقدم ستيب ثري قبل تاريخ محدد ويكون معك العلامة قبل نهاية اذار. وهاد الموضوع كان صعب عليي لان ما طلعو وراق التخرج تبعي لنص اذار مع اني سعيت جاهدا اني اشتغل بالوراق قبل بوقت. مع هيك قدمت ستيب ثري قبل الماتش حتى ما اتركو لوقت الريزيدينسي وبنصح اي حدا يقدمو ويخلص منو قبل ما يبلش شغل لان أريح بكتير.
تقديم هالفحص قبل الماتش مفيد للي علامتو بال١ و ٢ قليلة بالتالي بتريح البروغرام من انك ترسب بهالفحص لانو وجعة راس كبيرة لالن والك اذا صارت.
قدمت ستيب ثري باعتماد عمعلومات الستيبات ١و٢ ودرست جزء من يوورلد تبع ستيب ٣ وجزء من ccscases.com مندون اسسمنتس وبرايي هاد كافي للي اساسو بالستيبات التانية منيح.
Interview Skills
بعد ما تاخد مقابلة, ادائك بالمقابلة هوة لي حيحدد بشكل رئيسي نتيجة الماتش. بس تاخد مقابلة معناها انت عالورق مناسب للبروغرام والهدف من المقابلة هو انو يشوفو شخصيتك, لغتك, ومهارات التواصل تبعك.
الفصاحة باللغة, استخدام مفردات معبرة وقوية, وعدم التأتأة
كون مقنع, والشي يلي بساعدك بالاقناع انك تحكي الحقيقة وما تحاول تلفق اجوبة لحتى تسمع الشخص يلي عم يقابلك الشي يلي هوة بدو يسمعو, لانو هالناس معظمن مقابلين غيرك بالالاف وعندن قدرة يشمو اللف والدوران من سفر سنة
لا تحفظ اجوبة, بس ينصح انك تتدرب تجاوب عالاسئلة الشائعة ولو شفت أمثلة على أجوبة لهالأسئلة مو غلط ابدا, بس بالنهاية الجواب لازم يكون خاص فيك ويعكس قصتك
لما يطلبو منك تسالن لازم تسال الشي يلي مو موجود عصفحتن وبخصن هنة كقياديين للبروغرام (ما يكون سؤال خاص بالرزدنتس بشكل رئيسي, متل اكل الكافيتيريا مثلا). والهدف من الاسئلة انك تعرف جودة البروغرام من جوا وتورجيهم انك مهتم بنفس الوقت, وافضل طريقة انو يكون عندك اسئلة منيحة هوة انك تشوف ويبسايت البروغرام قبل المقابلة وفعلا تكتب بعض الاسئلة يلي انت مهتم تعرفا وما لقيتلا جواب بالوبسايت
ممكن تخلي اسئلتك الن open ended متل مثلا "can you tell me a bit about.. "
أو "What are the resources that you offer regarding.. "
خليك دائما ممتن لالن انهم عطوك مقابلة بس كمان خلي عندك عزة نفس ولا تتملقن زيادة لانو هالشي قد يبدو نقطة سلبية
كون دائما محترم بايميلاتك مع البروغرام ولو كان مع الكووردينيتور لان الاحترام والاحترافية المهنية من اهم العوامل يلي بتتقيم عاساسا ونقصها حيكون كفيل باخراجك من الرانك
اذا كان عندك هواية مشتركة مع يلي عم يقابلك حاول تحكي فيها لما يكون مناسب لانو موضوع حديث آمن وبخليهن يحبوك اكتر من اي شي اكاديمي ناشف
اعتني باللبس والاضائة وجودة الصوت والصورة (والانترنت طبعا) لانو بتلعب دور كبير فعلا
التقديم بدون ECFMG Certificate والسباحة عكس التيار
حيازة هي الشهادة مالو شرط لازم للماتش, ولكن تشترط لحتى تمارس الطب بامريكا, بالتالي ببداية الرزدنسي. قراري اني قدم بدون الشهادة كان شخصي ولا يمكن تعميمو بالمجمل. ولو انو الشريحة يلي ممكن تفكر تأقدم عنفس هالحركة موجودة.
الشهادة شرط احيانا بكون مذكور عصفحة البروغرام واحيانا لا. وهاد مو عبرة لان الوبسايت نادرا ما تعكس السلوك الفعلي للبروغرام. يعني ممكن بروغرام عندو هالشي شرط عالوبسايت ويبعتلك مقابلة, وواحد تاني مو جايب سيرة ومع هيك يفلترك برا لانو ما عندك الشهادة.
لما تقدم بدون شهادة بتكون عم تراهن يلي عم يشوف الابليكيشن تبعك ما يركز عهالموضوع او ما يعتبرو مشكلة. لان كل الامريكان وعدد من الاجانب اصلا ما عندن هالشهادة وقت التقديم, يلي بخلي بعض العاملين عاختيار الابليكانتس ما يطلعو عليها من الاصل
حتى لو قدمت بدون الشهادة واجاك مقابلات, احتمال تطلع من الرانك اذا ما كان عندك الشهادة قبل شباط
بالتالي التقديم بدون شهادة حيكلفك مقابلات واحيانا حيكلفك مراتب بالرانك او انك تطلع من الرانك نهائيا.
وشو فائدة التقديم؟
بتوفر سنة اذا متشت. وهاد كان كافي لاني قدم. يلي خلص كل متطلبات الماتش قبل ما يتخرج ومو حابب يفوت بقصة الريسرش غير المدفوع من المنطقي انو يقدم وما يستنا الشهادة. لانك باسوأ الاحوال اذا ما متشت رح تكون خسرت مبلغ مادي وكسبت خبرة كبيرة من مرورك بالماتش للمرة الاولى. وبتم عندك فرصة تقدم عبوزشنز بماتش الSOAP او الpost-match بوزشنز مع انها قليلة وبتركز عحملة الجنسية او الغرين كارد بشكل رئيسي. كان البديل بالنسبة الي هوة اني قدم عبوزشن ابحاث غير مدفوعة وهالشي مع انو بيخدمك جزئيا بسيرتك الذاتية، رح يكلفك سنة بامريكا (على الأقل) عم تشتغل ببلاش وعم تصرف عحالك بصعوبة شديدة. أما يلي عندو اي نقطة سلبية واضحة بالسيفي متل سكور قليل او نقص بالليترز فطبعاً يستنا لتكتمل لوازم الماتش عندو ويحاول يلاقي ريسرش بوزشن يطلع عن طريقها عامريكا.
الريسرش نصيحة ليلي بيقدر عليه ماديا ومالو جاهز للماتش لسا بس يلي موحابب يفوت بهاد الطريق مالو ضروري ابدا.
نصائح
اهتم بشكل كبير ببناء لغتك ومهارات التواصل طول طريق التحضير، الموضوع بياخد وقت ومارح يكفيك شهر او شهرين تعمل تغيير جذري اذا كان اساسك ضعيف
استخدم الريزيدينسي اكسبلورر وموفع FREIDA للحصول عمعلومات عامة وسطحية للبروغرام بس بدك تحاول تتواصل مع ناس بيعرفو البروغرام حتى تجيب معلومات اعمق ويعتمد عليها اكتر
البرامج يلي بتاخد اجانب ومنيحة بنفس الوقت لل IM مالها كتيرة وبتطلع 100-150 من اصل حوالي 500 بروغرام. انا قدمت على 94 وبظن كان فيني احذف قسم منيح منها
استخدم ميزة السيغنال بشكل مدروس ولا تعطيها الا لبروغرام بياخد سوريين، لا تنسا انو بالنهاية انت منافستك الرئيسية مع السوريين وبالذات مع طلاب جامعتك نفسن، والسيغنال رح تعطيك فرصة تتفوق عالناس يلي متلك بس مو عاملين سيغنال، السيغنال للبرامج القوية او يلي ما بتاخد اجانب او سوريين عديمة الفايدة تقريباً
حاول توصل لكونكشن جوات البروغرام يلي عاملو سيغنال لان حيكون الن وش يحكولك مع مدير البروغرام، ولو انو مو شرط، يلي بدو يخدمك بيخدمك اذا قدر بدون سغنال وانا متشت ببروغرام مو عامل فيه سغنال بالاصل.
لا تحاول تبني قصتك عانك سوري وصعوبات وحرب الخ.. هاد الشي معروف وواضح وقد يكون بداية مناسبة للقصة بس ما يكون محور القصة. ركز ع انجازاتك وكيف طورت نفسك وحاول تتجاهل هي الصعوبات لان حيعطيك شكل احسن قدام يلي عم يقيمك.
من العوامل يلي بتخليك تتميز بالمقابلة انك تعرف هنن شو بهمن بالرزدنت، بشكل رئيسي حيهمن الاحترام المتبادل، الصبر وال resiliency, الالتزام المستمر بتطوير الذات، حب التعليم بالذات اذا برنامج اكاديمي، اولوية المرضى او ال patient advocacy, والاحترافية المهنية. حاول تجيب سيرة لهالمصطلحات وتاثبت فهمك الن لان هالشي بيعطيك ميزة عن غيرك من المتقدمين الاجانب.
اذا نسالت عالفلوشب قول بصراحة اذا عم تفكر فيها ولا لا بس الافضل خليك حيادي وانك ما اخدت قرارك لسا. البروغرام بفضل الشخص يلي فايت يصير انترنست قوي بغض النظر عن خططو المستقبلية ولو انو دخولك بمسار الفلوشب بيعطي البروغرام سمعة افضل بالنهاية.
بكرر من المهارات يلي لازم ما تتجاهلا وتشتغل عليها قبل بداية الرزدنسي بتشمل اخد التاريخ المرضي، الفحص السريري، كتابة النوتس بالطريقة المتعارف عليها بامريكا، وكيف بتعرض الحالة السريرية لل attending physician
الماتش اذا بتطلع عالارقام تنافسي جداً وقد يكون محبط من كتير جوانب، بالنهاية الهدف توصل لبروغرام فيه تعليم جيد وبيئة مناسبة للتقدم المهني ولا تهتم كتير بالجوانب التانية
بكرر انو الستيب هوة الخطوة الاكثر امتناعاً بهالطريق ولازم ياخد الاولوية عن كلشي بالبداية، والباقي كلو مسالة وقت.
كل الشكر لكل انسان دعمني ولو بكلمة وكل التوفيق للجميع يا رب
هي تجربتي بماتش ٢٠٢٤ بالطب الباطني (الماتش الماضي) يلي كان المفروض نزلا من فترة وحال الانشغال وبرود الهمة دون ذلك
الخلفية: خريج جامعة دمشق دفعة ٢٠٢٣ (تاريخ التخرج ٢٠٢٤)
ستيب ١: ٢٦٤
ستيب ٢: ٢٦٧
رسائل التوصية: ٤ رسائل من ٤ أشهر ب٣ ولايات مختلفة
بدت القصة بشعور من السخط والخوف من المستقبل. عدم الرضى عن حاضر ومستقبل الطبيب بالبلد يلي كنت ولازلت بحبا. وكان السؤال الأول والأهم, لوين؟..
أي طبيب بهمو يبني مستقبل ويأسس عائلة ويحصل على تدريب علمي وعملي بمستوى يستحق السنين من عمرو يلي نذرها لألو. ومعظمنا بحالة من البحث عن موقع جغرافي منحصل فيه على احترامنا كبشر قبل ما نكون أطباء . وبتبلش رحلة البحث.. وبيستقر القرار على أمريكا بعد منافسة مع مؤسسة حمد بقطر يلي خسرت امام امريكا بنظري بعد ما حسيتها نسخة قليلة الجهد وكثيرة الرفاهية من طريق أمريكا نفسو, وشفتا مورد غير متجدد وفرصة قد تتاح وقد لا تتاح قدامي لما اتخرج.
بلشت تحضير للطريق من وقت اجتياح كوفيد باستغلالي للعطلة لانجاز شي مهم بدلا عن الاكتئاب الناجم عن حظر التجول, أو التحضير للجامعة الخالي من قيمتو بوقتا نظرا لتوقف الفصل الجامعي لمدى ما كانت مبينة نهايتو بهداك الوقت.
أنجزت ستيب ون بعد سنة تقريبا بعلامة ٢٦٤ (قبل ما يصير الفحص نجاح ورسوب). وستيب تو بعدها بحوالي سنة كمان بعلامة ٢٦٧. وتخلل المدتين ضمن السنة المذكورة عدة شهور من عدم الانجاز لأسباب مختلفة.
أحد أسباب النجاح بالفحصين ضمن فصول الجامعة هية تجاهلي التام وغير المبالي بالنتيجة لمواد الجامعة وعدم دراستي لأي محاضرة بدءا من السنة الرابعة, بعد ما اكتشفت انو اي طالب طب بيقدر ينجح بالمواد إذا كان عم ينجح فيها من قبل عن طريق الاستعاضة بدراسة مواد الستيب ضمن الفصل ودراسة جزء من الدورات قبل بنهار من المادة. انخفض معدلي عدة درجات من حوالي ال٩٠ لحوالي ال٨٦ بعد تغيير المسار المذكور وتخرجت بمعدل تخرج قريب ال٨٨.
بلشت تخطيطي الجدي للماتش بعد ما انهيت ستيب تو وخلال قيامي بجولة سريرية بأمريكا وبشكل طبيعي كنت اسال أي حدا بشوفو عن نصائح متعلقة بالماتش, متل الوقت المناسب للتقديم عالماتش, وأهم العوامل يلي بتساعد عالنجاح بالماتش, إلى آخره.. وكنت فعلا احصل على أجوبة, على تضاربها وتعاكسها ببعض الأحيان, كانت تساعدني ببناء رؤية أقل ضبابية للمستقبل. وقررت بعد شبه اكتمال لوازم الماتش (من علامات ستيب ورسائل توصية وفحص لغة) اني قدم على ماتش ٢٠٢٤ وكنت بمنتصف السنة السادسة. وقتها كان أحد الأشياء المهمة يلي لسا ما اكتمل عندي هو شهادة الECFMG يلي لا تصدر إلا بعد رفع الدبلوم وكشف العلامات, بالتالي كشخص غير متخرج وما بتطلع وراقي لبعد نتيجة الماتش, كان من المستحيل الاستفادة من هالشهادة للماتش, وبعد دراسة الإيجابيات والسلبيات لهالخطوة, قررت اني قدم عالماتش بكل الأحوال.
عملت الباثوي السادس بسوريا عن طريق ٣ أطباء رفعولي تقييمين سريريين كل واحد الله يزيهم الخير (دكاترة من سوريا وموجودين بسوريا وما كان عندن بورد امريكي) وقبل البداية الرسمية للمقابلات بحوالي ٣ أشهر, بلشت عبي المعلومات على حساب ERAS يلي بتضمن السيفي مقسمة لعشر تجارب, فيها تجارب العمل والتجارب السريرية بأمريكا والتطوع والهوايات وأي شي بتحسو ضاف لشخصك وبتقدر تحكي عنو بالمقابلة. وبالايراس في عدة اقسام تانية متل رسائل التوصية وغيرها.
كتبت برسونال ستيتمنت يلي هية موضوع تعبير صفحة وحدة بيشرح جوانب مهمة من قصة حياتك وكيف هالشي خلاك بتحب الطب كمهنة وبالذات الاختصاص يلي مقدم عليه وبيسلط الضوء على جوانب قوية بشخصيتك بتخليك أهل أنو يختاروك الخ..
بالنهاية قعدت مع دكتور أمريكي-سوري الله يزيه خير عدلناها سوا وساويناها اقوا ودبلوماسية أكتر. وبوحدة من المقابلات علقوا عليها بشكل إيجابي وقالو انها مميزة. وبرأيي هية مو من أهم العوامل ولكن قد تلعب دور ولازم تكتبها بأفضل شكل ممكن.
بلشت ابحث عن أي حدا بيقدر يفيدني بالماتش عن طريق انو يخدمني ويوصلني بالبروغرام تبعو. وكالمتوقع, بائت معظم هالمحاولات بالفشل, نظرا لأنو الغالبية ما عندهم الموانة عالبروغرام بالاصل, مو حابين يحطو على حالهم وحدة قدام البروغرام, أو مو رغبانين بالمساعدة نظرا لخوفهم من انك ما تكون كفائتك عالية وبالتالي تسودلن وشن قدام البروغرام. بشكل عام, الغالبية بعد ما يوصلو بينسو وين كانو من كم سنة وبيعزفو عن مساعدة الناس يلي كانو بمحلهم من فترة قريبة. وهاد عادي ومتوقع, بس ضمن كومة الناس هي في ناس رح تساعدك لأبعد الحدود بدون ما تكون متوقع منهم هالشي.
قبل المقابلات بكم شهر, قعدت ادرس البروغرامات واحد واحد بحثا عن اجوبة لعدة أسئلة, منها اذا بيقبلو الأجانب يقدمو بدون شهادة ECFMG ومنها اذا البروغرام بياخد سوريين.. الى آخره. وكان الموضوع متل البحث عن ابرة بكوكب من القش. فكنت الجا لاني راسل كل بروغرام بالسؤال لما ما لاقي اجابتو (البعض يرد جواب والأكثر ما يجاوب). وكنت استخدم بحث غوغل بيتضمن اسم البروغرام وسوالي المتعلق فيه وكتير احيان بلاقي الاجابة من صفحة غوغل بدون ما فوت عالموقع وهاد سرع العملية. وعملت ملف اكسل بكل بروغرام ومعلومات بتهمني حصلتا عنو. وكتير من هالمعلومات كانت قديمة واكتشفت انو البروغرام ما عم يحدثها او منقص معلومات مهمة ومو كاتبها. بالنهاية عملت تلفون مع طبيب عندو خبرة بالبروغرامات والله يزيه الخير عطاني الجانب يلي مو موجود عالنت عن كتير منهم, وللاسف هاد الجانب هو الصحيح وهو الجانب الأكبر. وبالمختصر كانت فترة البحث قليلة الفائدة نسبيا واظن انو موضوع البحث والايميلات جبلي مقابلة وحدة بس. وكان العامل يلي ساعدني اكتر هو التواصل بشكل مباشر مع الأطباء يلي تعرفت عليهن بامريكا واشتغلت معن.
اكتشفت انك لازم تحط ببالك البرامج يلي مو بس بتحب الأجانب بشكل عام (IMG friendly) بل يجب التركيز على البرامج يلي ما عندن مشكلة ياخدو السوريين بشكل خاص (Syrian friendly). وهالكلمة حكاها لالي بالحرف (عن طريق وسيط) أحد البروغرام دايركتورز بعد ما رفض يعطيني مقابلة وقال بما معناه: "الMSPE يلي باعتلي ياها فارغة وما بتعبر عن ادائك كطالب, وكشف العلامات فيه كتير معلومات ناقصة, ونحن ماعد اخدنا سوريين بعد الأحداث.. روح دور عبرامج بتقبل بالسوريين متل برامج نيويورك ونيوجرزي".. كل هالأمور مالها بايدينا ومسألة الوراق بأيدي الجامعة مع معرفة الجميع بقلة مبالاة الجامعة بتحسين واقع البيروقراطية تبعنا ولو هالموضوع بغير كتير امور بشكل جذري لطلاب جامعاتنا.
هالموضوع, مع انو محبط, هو جزء لا يتجزأ من تجربة الماتش, هية عبارة عن مئات تجارب الرفض, وتجربة ناجحة وحدة بس, هي الكافية لنجاح التجربة كاملة. كل حدا بتجيه كتير رسائل رفض من البروغرامات, انو نحن فللنا وماعت نبعت مقابلات. الي بصير انك رح تعيش شهور من المرمطة النفسية بسبب هالرسائل. والحقيقة انو هنة ما شافو الابليكيشن تبعك بالأصل قبل ما يبعتو الرفض, لانهم راجعو عدد معين واكتملت مطارح المقابلات وبكبو الباقي بدون ما يشوفوهم.
أحد الفلاتر المهمة هي انو بعض البروغرام دايركتورز بيفتحو على الجامعات وبشوفو مين مقدم, وبياخدو من جامعات معينة بس. وما بيحكو هالشي عالموقع طبعا لأن قد يجبلن مشاكل, بس هي الحقيقة, كتير بتصير انك تقدم على برنامج معين ويكون احتمال تاخد مقابلة فيه صفر الا بحالات استثنائية، وهي البرامج اذا عرفتا لا تقدم عليها لان مارح تزيد فرصك ومضيعة موارد عالفاضي.
لما قدمت عالماتش كنت بسوريا وتميت بسوريا بفترة المقابلات. استأجرت قاعة بشكل ساعي فيها لابتوب ومايك و(الأهم) انترنت فايبر ما بيقطش. كانت احدى المقابلات يوم الجمعة وما كانو فاتحين وبالزور وافقو يفتحو مشاني مقابل مبلغ اضافي.
اجاني عدد متوسط وقد يعتبر قليل من المقابلات ببرامج جامعية. المقابلة عبارة عن ٢-٣ اقسام رئيسية هية يلي بتم فيها تقييم المتقدم. والباقي تعرفة بالبروغرام. وعادة بكون في اجتماع مع الريزيديتس (meet and greet) بوقت مستقل واحيانا بيوم مستقل ما بتتقيم على اساسو وهو بهدف تسال الاطباء المقيمين بالبرنامج عن البرنامج والمدينة وهالأمور.
العوامل يلي بتلعب دور بنجاحك بالماتش:
موضوع المعارف (connections) موضوع كتير مهم وبيجي دورو بعد ما تبني سيفي قوية بغرض انك تورجي هالسيفي لحدا ما كان رح يشوفا أو يقدّرا لولا هدول المعارف. ومو الغرض منها تنقبل بالبروغرام. مافي كونكشن عوجه الأرض عندو القدرة أو الرغبة يحطك بالبروغرام اذا انت ما بتبيض الوش بمعايير هالبروغرام نفسا. بالتالي خلي تركيزك طوال الطريق انك تبني نفسك وما تقول لو عندي معارف كتير رح تجيني مقابلات كتير ورح متش اكيد (بفرض يلي بيجيه مقابلات اكتر احتمال يمتش اكبر).
الحقيقة انو لو بتجيك ميت مقابلة, احتمال كلن, لنفس الاسباب, يعطوك رانك قليل وبالنهاية ما تمتش. الحقيقة انو البرامج بيعرفو منيح مين رح يمتش عندن ومين لا بعد المقابلة, لان بعد رقم معين الرانك صاير للاحتياط بس وفي متقدمين ترنكو بشكل انو ما يمتشو اصلا بالحالة المثالية.
وكمان ما تتحسر عحالك لعدم وجود المعارف. تجربتي الشخصية انو ما كان عندي معارف أبدا وتعرفت عكتير دكاترة لما طلعت وببعض الأحيان كنت عن بعد من سوريا جرب احكي مع ناس واقدر اوصل لنتيجة. أحد البروغرام دايركترز تواصلت معو عن طريق الايميل وكنت عم اسالو عن موضوع السرتفكت وبعد شهور بلاقيه عم يحاكيني عالوتس ويسالني عن بعض المعلومات الشخصية بعدين اجاني منو مقابلة. بس لاني محاكيه عالايميل وحس اني صادق معو.
Step2 Score
السكور من اهم العوامل يلي بتفيد انك تحصل مقابلة وبتساهم بالرانك. الحقيقة انو السكور هوة احد المفاتيح يلي بتدخلك عالماتش وقد يكون المفتاح الاكثر موضوعية. بس الاهم من هالشي انو الستيب هوة الخطوة يلي بتاخد شغل وتركيز اكتر والناس يلي بتترك الطريق معظمن بيتركوه بسبب الستيب. بعد ما تقدم الفحص ان كان سكورك عالي او قليل تجاهل الفحص نهائياً وركز عالجوانب التانية.
البروغرام بهمو تكون علامتك عالية حتى ما ترسب بامتحان البورد وبشكل ثانوي حتى يتاكدو انو معلوماتك الطبية جيدة. الواقع انو المعلومات الطبية مو اهم عامل بتكوين ريزيدنت ناجح. أخلاقيات العمل ومهارات التواصل واللغة، مهارات القيادة، والقدرة عالعمل المكتبي هية يلي بتخلي الريزيدينت يتميز، بالذات بالبداية.
USCE
الخبرة السريرية بامريكا مهمة للاجانب لان بدونا انت ما بتعرف شي عن السستم فبالتالي خطر كبير عالبروغرام ياخدك والاهم من هيك صعب تحصل على رسائل توصية بدون خبرة سريرية بامريكا مع وجود بعض الاستثنائات.
الخبرة السريرية حتخليك تفوت عالسستم وانت مرتاح نسبياً وعرفان الاساسيات عالاقل, ولو انو مافي كمية خبرة رح تخليك جاهز فعلياً لان ما بتتعلم صح الا لما تكون مسؤول عن المريض والك مكان بالسستم كرزدنت عالاقل. معظم الروتيشنز ما رح تعطيك مسؤوليات والدكاترة فيها بكونو مشغولين وماعندن القدرة او الفراغ انو يساعدوك بشي لما تكون طالب جاية من برا واخد روتيشن بالموانة وهدفك الرئيسي منا هو رسالة التوصية.
بنصح يلي اجا يعمل روتيشن يتعلم اساسيات التاريخ المرضي، الفحص السريري, تقديم المريض للطبيب الاستشاري مع ترتيب الاولويات، وكتابة النوتس. وما يتجاهل هالشي ابداً.
Hobbies
الهوايات بتعطي لون مميز للسيفي بس عدم وجودها ما بضر. خلي قسم من الايراس للهوايات واجمعها كلها فيه وبالذات اذا ربحت جوائز او عملت انجازات احكي عنها بشكل مختصر.
Step3
مهم لانك تاخد H1b visa. لما تمتش ببروغرا بيعطي اتش ون, بيطلبو منك انك تكون مقدم ستيب ثري قبل تاريخ محدد ويكون معك العلامة قبل نهاية اذار. وهاد الموضوع كان صعب عليي لان ما طلعو وراق التخرج تبعي لنص اذار مع اني سعيت جاهدا اني اشتغل بالوراق قبل بوقت. مع هيك قدمت ستيب ثري قبل الماتش حتى ما اتركو لوقت الريزيدينسي وبنصح اي حدا يقدمو ويخلص منو قبل ما يبلش شغل لان أريح بكتير.
تقديم هالفحص قبل الماتش مفيد للي علامتو بال١ و ٢ قليلة بالتالي بتريح البروغرام من انك ترسب بهالفحص لانو وجعة راس كبيرة لالن والك اذا صارت.
قدمت ستيب ثري باعتماد عمعلومات الستيبات ١و٢ ودرست جزء من يوورلد تبع ستيب ٣ وجزء من ccscases.com مندون اسسمنتس وبرايي هاد كافي للي اساسو بالستيبات التانية منيح.
Interview Skills
بعد ما تاخد مقابلة, ادائك بالمقابلة هوة لي حيحدد بشكل رئيسي نتيجة الماتش. بس تاخد مقابلة معناها انت عالورق مناسب للبروغرام والهدف من المقابلة هو انو يشوفو شخصيتك, لغتك, ومهارات التواصل تبعك.
الفصاحة باللغة, استخدام مفردات معبرة وقوية, وعدم التأتأة
كون مقنع, والشي يلي بساعدك بالاقناع انك تحكي الحقيقة وما تحاول تلفق اجوبة لحتى تسمع الشخص يلي عم يقابلك الشي يلي هوة بدو يسمعو, لانو هالناس معظمن مقابلين غيرك بالالاف وعندن قدرة يشمو اللف والدوران من سفر سنة
لا تحفظ اجوبة, بس ينصح انك تتدرب تجاوب عالاسئلة الشائعة ولو شفت أمثلة على أجوبة لهالأسئلة مو غلط ابدا, بس بالنهاية الجواب لازم يكون خاص فيك ويعكس قصتك
لما يطلبو منك تسالن لازم تسال الشي يلي مو موجود عصفحتن وبخصن هنة كقياديين للبروغرام (ما يكون سؤال خاص بالرزدنتس بشكل رئيسي, متل اكل الكافيتيريا مثلا). والهدف من الاسئلة انك تعرف جودة البروغرام من جوا وتورجيهم انك مهتم بنفس الوقت, وافضل طريقة انو يكون عندك اسئلة منيحة هوة انك تشوف ويبسايت البروغرام قبل المقابلة وفعلا تكتب بعض الاسئلة يلي انت مهتم تعرفا وما لقيتلا جواب بالوبسايت
ممكن تخلي اسئلتك الن open ended متل مثلا "can you tell me a bit about.. "
أو "What are the resources that you offer regarding.. "
خليك دائما ممتن لالن انهم عطوك مقابلة بس كمان خلي عندك عزة نفس ولا تتملقن زيادة لانو هالشي قد يبدو نقطة سلبية
كون دائما محترم بايميلاتك مع البروغرام ولو كان مع الكووردينيتور لان الاحترام والاحترافية المهنية من اهم العوامل يلي بتتقيم عاساسا ونقصها حيكون كفيل باخراجك من الرانك
اذا كان عندك هواية مشتركة مع يلي عم يقابلك حاول تحكي فيها لما يكون مناسب لانو موضوع حديث آمن وبخليهن يحبوك اكتر من اي شي اكاديمي ناشف
اعتني باللبس والاضائة وجودة الصوت والصورة (والانترنت طبعا) لانو بتلعب دور كبير فعلا
التقديم بدون ECFMG Certificate والسباحة عكس التيار
حيازة هي الشهادة مالو شرط لازم للماتش, ولكن تشترط لحتى تمارس الطب بامريكا, بالتالي ببداية الرزدنسي. قراري اني قدم بدون الشهادة كان شخصي ولا يمكن تعميمو بالمجمل. ولو انو الشريحة يلي ممكن تفكر تأقدم عنفس هالحركة موجودة.
الشهادة شرط احيانا بكون مذكور عصفحة البروغرام واحيانا لا. وهاد مو عبرة لان الوبسايت نادرا ما تعكس السلوك الفعلي للبروغرام. يعني ممكن بروغرام عندو هالشي شرط عالوبسايت ويبعتلك مقابلة, وواحد تاني مو جايب سيرة ومع هيك يفلترك برا لانو ما عندك الشهادة.
لما تقدم بدون شهادة بتكون عم تراهن يلي عم يشوف الابليكيشن تبعك ما يركز عهالموضوع او ما يعتبرو مشكلة. لان كل الامريكان وعدد من الاجانب اصلا ما عندن هالشهادة وقت التقديم, يلي بخلي بعض العاملين عاختيار الابليكانتس ما يطلعو عليها من الاصل
حتى لو قدمت بدون الشهادة واجاك مقابلات, احتمال تطلع من الرانك اذا ما كان عندك الشهادة قبل شباط
بالتالي التقديم بدون شهادة حيكلفك مقابلات واحيانا حيكلفك مراتب بالرانك او انك تطلع من الرانك نهائيا.
وشو فائدة التقديم؟
بتوفر سنة اذا متشت. وهاد كان كافي لاني قدم. يلي خلص كل متطلبات الماتش قبل ما يتخرج ومو حابب يفوت بقصة الريسرش غير المدفوع من المنطقي انو يقدم وما يستنا الشهادة. لانك باسوأ الاحوال اذا ما متشت رح تكون خسرت مبلغ مادي وكسبت خبرة كبيرة من مرورك بالماتش للمرة الاولى. وبتم عندك فرصة تقدم عبوزشنز بماتش الSOAP او الpost-match بوزشنز مع انها قليلة وبتركز عحملة الجنسية او الغرين كارد بشكل رئيسي. كان البديل بالنسبة الي هوة اني قدم عبوزشن ابحاث غير مدفوعة وهالشي مع انو بيخدمك جزئيا بسيرتك الذاتية، رح يكلفك سنة بامريكا (على الأقل) عم تشتغل ببلاش وعم تصرف عحالك بصعوبة شديدة. أما يلي عندو اي نقطة سلبية واضحة بالسيفي متل سكور قليل او نقص بالليترز فطبعاً يستنا لتكتمل لوازم الماتش عندو ويحاول يلاقي ريسرش بوزشن يطلع عن طريقها عامريكا.
الريسرش نصيحة ليلي بيقدر عليه ماديا ومالو جاهز للماتش لسا بس يلي موحابب يفوت بهاد الطريق مالو ضروري ابدا.
نصائح
اهتم بشكل كبير ببناء لغتك ومهارات التواصل طول طريق التحضير، الموضوع بياخد وقت ومارح يكفيك شهر او شهرين تعمل تغيير جذري اذا كان اساسك ضعيف
استخدم الريزيدينسي اكسبلورر وموفع FREIDA للحصول عمعلومات عامة وسطحية للبروغرام بس بدك تحاول تتواصل مع ناس بيعرفو البروغرام حتى تجيب معلومات اعمق ويعتمد عليها اكتر
البرامج يلي بتاخد اجانب ومنيحة بنفس الوقت لل IM مالها كتيرة وبتطلع 100-150 من اصل حوالي 500 بروغرام. انا قدمت على 94 وبظن كان فيني احذف قسم منيح منها
استخدم ميزة السيغنال بشكل مدروس ولا تعطيها الا لبروغرام بياخد سوريين، لا تنسا انو بالنهاية انت منافستك الرئيسية مع السوريين وبالذات مع طلاب جامعتك نفسن، والسيغنال رح تعطيك فرصة تتفوق عالناس يلي متلك بس مو عاملين سيغنال، السيغنال للبرامج القوية او يلي ما بتاخد اجانب او سوريين عديمة الفايدة تقريباً
حاول توصل لكونكشن جوات البروغرام يلي عاملو سيغنال لان حيكون الن وش يحكولك مع مدير البروغرام، ولو انو مو شرط، يلي بدو يخدمك بيخدمك اذا قدر بدون سغنال وانا متشت ببروغرام مو عامل فيه سغنال بالاصل.
لا تحاول تبني قصتك عانك سوري وصعوبات وحرب الخ.. هاد الشي معروف وواضح وقد يكون بداية مناسبة للقصة بس ما يكون محور القصة. ركز ع انجازاتك وكيف طورت نفسك وحاول تتجاهل هي الصعوبات لان حيعطيك شكل احسن قدام يلي عم يقيمك.
من العوامل يلي بتخليك تتميز بالمقابلة انك تعرف هنن شو بهمن بالرزدنت، بشكل رئيسي حيهمن الاحترام المتبادل، الصبر وال resiliency, الالتزام المستمر بتطوير الذات، حب التعليم بالذات اذا برنامج اكاديمي، اولوية المرضى او ال patient advocacy, والاحترافية المهنية. حاول تجيب سيرة لهالمصطلحات وتاثبت فهمك الن لان هالشي بيعطيك ميزة عن غيرك من المتقدمين الاجانب.
اذا نسالت عالفلوشب قول بصراحة اذا عم تفكر فيها ولا لا بس الافضل خليك حيادي وانك ما اخدت قرارك لسا. البروغرام بفضل الشخص يلي فايت يصير انترنست قوي بغض النظر عن خططو المستقبلية ولو انو دخولك بمسار الفلوشب بيعطي البروغرام سمعة افضل بالنهاية.
بكرر من المهارات يلي لازم ما تتجاهلا وتشتغل عليها قبل بداية الرزدنسي بتشمل اخد التاريخ المرضي، الفحص السريري، كتابة النوتس بالطريقة المتعارف عليها بامريكا، وكيف بتعرض الحالة السريرية لل attending physician
الماتش اذا بتطلع عالارقام تنافسي جداً وقد يكون محبط من كتير جوانب، بالنهاية الهدف توصل لبروغرام فيه تعليم جيد وبيئة مناسبة للتقدم المهني ولا تهتم كتير بالجوانب التانية
بكرر انو الستيب هوة الخطوة الاكثر امتناعاً بهالطريق ولازم ياخد الاولوية عن كلشي بالبداية، والباقي كلو مسالة وقت.
كل الشكر لكل انسان دعمني ولو بكلمة وكل التوفيق للجميع يا رب
