02/11/2025
🐥 ماما ماما تركيلي هالببرونة من أيدك وتعالي حطي عينك بعيني بدنا نحكي موضوع مهم يلا 😌 بدي أحكيلك اليوم عن عيوني يعني عنك بما أني ما بسمعك عم تناديني غير " " والله نسيت اسمي، فكرتو يا عيوني 😂❤️
🐥 فيا عيوني لازم تعرفي أني أنا بتعلم القدرات البصرية تماماً متل ما بتعلم كيف أمشي وكيف أحكي.. ما تفكريني بعرف شوف متلك ماما لهيك بعمري من النتوفة لل٤ شهور أنا ما فيي ركز على هدفين.. هدف ويا دوب 😂🌚 لهيك وقت بتقعدي تشوبريلي أنتِ وبابا بتدوخوني والله 🤦🏻♀️ ولسا هديك تبع ال "يا الله بيبي بيبي بدي منو 😭 ليكي كيف عم ياكل ليكي أيديه ليكي تمو وأيدو شو صغيرة" هي بس تجن قدامي بتخيلني 🙂😂 خبريها أني بركز بهدف وغالباً هوي وجه الماما مو وجهها هيي 🤫 أي ماما لأني بهالعمر بشوف على بعد ٢٠سم يعني بعد وجهك وأنا عم أرضع تمام ❤️
🐥 سمعتها سمعتها لجارتنا الغليظة وقت قالتلك لك ليش وقت كان عمري شهرين.. قليلا أول شي لا تحشر أنفها بشي ما بخصها وتاني شي أنو هالشي طبيعي نكون حولان أول شهرين 🌚😂 لأنو لسا عيننا صغيرة وجدبة ما بتعرف تركز مزبوط معليييش 🖤
🐥 فيكي تقولي يا مامي أني ببلش حاول تابع حركاتك بعيوني بعمر ال٣ شهور ومن عمر ال٥شهور لل٨ هون بقى بصير ميز قربك من بعدك.. هون بقى ببلش الجعير بس شوفك ماسكة الببرونة وعم تبعدي فيها.. بعرف لتبرديها بس ومحسوبك هلق صرنا نشوف رؤية 3D فالببرونة عندي بتبين كبيرة وعجعوجة وعم يبينوا هالحلّوبات منها بشهوا فاعذري عياطنا 😂🖤
🐥 بهالعمر كمان بصير ميّز الألوان وهون بقى ببلش نقيلك تيابك وأعطيكِ رأيي فيهن 😎 وخاصةً كلشي أحمر وأخضر ❤️
🐥 من ال٩شهور للسنة بصير بزحف وبمشي وهون بيتطور بصري كتير وقال الدحبي مهم جداً لبصري كتير بطوروا فلا تزعلي بس دحبي وأكسرلك شي شغلة أو خربلك نص الغراض أو .. ضروريات تطور يا ماما والله 😂🖤
بعدي بعدي.. هيييي.. اجا المكعب على فنجان القهوة كسروا برافو يا أنا 😍 شفتي قدي دقيق برمي الغراض 😂🖤 هاد من تطوري الحركي الروحي مو بهدف الأذى حاج تخانقي 🌚
🐥 بعمر السنة للسنتين لا تحاولي تبعدي عني دفتر التلفونات ودفاتر أخي الكبير.. بدي شخبر.. إذا مو عالدفاتر عالحيط.. ضروريات تطور 🌚😂
🐥 خدينا لعند عمو دكتور العيون بعمر النص سنة ليعمل فحص شامل هيك التوصيات وخديني إذا شفتي جفون عيني محمرة أو سالتة ومغطاية العين، عم دمع كتير، الحدقة بيضا عندي، عم أتحسس من الضو أو حركات عيني مو نظامية.
🐥 حتى تساعديني بتطور نظري لازم أنتِ وبابا تعملوا يلي رح قلكن عليه أنصتوااا :
☑️ من النتوفة لل٤ شهور حطولي ضو خفيف بغرفتي، غيرو جهة تختي وجهتي دوماً، وبوجبة الأكل ميليني مرة يمين مرة يسار، لعبّوني عن قريب وبس تمشوا بعيد عني دوماً حكوني ❤️
☑️ من ال٥ لل٨ جيبيولي خشخيشة واتركوني ألعب عالأرض وسوح قد ما بدي 🌚 وجيبولي مكعبات ألعب فيهن ودوماً لعبوني وأيديكن بأيديي وعم تحكوني ❤️
☑️ من ال٩ للسنة 🙈 ومهم كتير بس دحبي تقعدوا تصفقولي لأتشجع 😂 قول كابتن ماجد وعم سجل الهدف 🌚😂 اي المهم ولعبوني ألعاب ذاكرة بصرية تبع ليك شفت خالو تفي عليه 😂😂
☑️ وبعمر السنة للسنتين جيبولي طابة مهمة الطابة ولو كسرنا نص البيت ضرورات شو؟ تطورية برافو 😂
واقرولي قصص 😍
اقرأيلي قصة حبك الي ووجودك معي دوماً ❤️ اقرأيلي بعيوني قديه أنتِ كبيرة وعظيمة ومهمة بحياتي.. قديه أنتِ نور عيوني ومن عيونك بس بشوف الدني وبشوف الله ❤️
يا كل الحب.. يا عظيم الحب يا ماما ❤️❤️
كنت معكم الدكتورة سَماح صالح محمد ❤️
