https://www.facebook.com/104432965777019/

Babies with Dr.Samah الأطفال مع د.سماح, Damascus (2026)

25/12/2025

و بتعرفوا كمان خرافات لصححلكم ياها ؟

ابعتوا هالريل لكل ماما جديدة واحصلوا دوماً على معلومات عن البيبيات من مصادر علمية موثوقة مو كلام وقيل عن قال

د.سماح محمد
طبيبة أطفال و حديثي ولادة⁩⁩

24/12/2025

أنا صرلي ١٤ يوم مخلفه بنوته
بس اليوم بكتشف انو صدرها عم يطلع نقط حليب وواحد منهم كتير محجر 💔كانت تبكي طول اليوم وانا فكر انو مغص بس لما شفت هيك انصدمت والله سألت أمهات رفقاتي لان انا بغربه وقالولي انو طبيعي هاد من هرمون الأم هل هاد شي صحيح؟وشو الحل تبعو لان والله اول مرة بسمع هيك شي
دلكتها بزيت الزيتون صارت تبكي كتير كتير بس لما لفيتها وطعميتها ونيمتها ارتاحت الحمدالله بس ئلبي عم يتقطع عليها شو اعمل
أمانه جاوبيني

يلي عم يصير مع الطفلة اسمو حليب الساحرة
نتيجة هرمونات الماما يلي انتقلوا للطفلة خلال الحمل صدر الطفلة عم يدر حليب
العلاج ؟
ممنوع نضغط أو نعصر الثدي منعاً باتاً
منحط كمادات مي دافية بس
وشوية وقت بتروح الهرمونات وبيرجع كلشي طبيعي

23/12/2025

يلعن الحرب وين ما كانت وكيف ما كانت ومين ما كان سببها !!

اجتني استشارة تنظيم نوم لطفلة عمرها ١٠ شهور بتنام لوحدها بتحط راسها على بطن أمها وبتنام بس عندها كل يوم 5 استيقاظات ليلية ما بتعمل فيهن شي غير أنو تنادي امها وتقعد بحضنها لترجع تنام !!

وقت كانت الطفلة عمرها ٥ شهور الأم تعرضت لصدمة نفسية بسبب موت حدا قريب منها بسوريا ووقتها ضلت الأم متوترة وما تنام وخف حليبها

فالطفلة من وقتها لهالوقت حاسة بأمها
ما عم تفيق ترضع لتحس بالأمان لاء
عم تفيق لتحاول تعطي الأمان لأمها لتخبرها أنو أنا حدك لا تخافي لا تتوتري رح نكون مناح !

وقت الاستشارة بكيت
بكيت على حنية الطفلة أنو وعلى صغرها حاسة بأمها وعم تحاول تعطيها حب متخيلين !
وبكيت على هالناس بهالبلد يلي مكتوب عليهن الموت والقهر سواء كانوا هون أو مو هون 💔

ويلعن الحرب ألف مرة يلعن الحرب
الأبرياء دوماً ضحاياها

23/12/2025

البيبي حديث الولادة وخاصةً بأول يوم ما بيقدر يشوف أبعد من مسافة وجهه لوجه أمه وقت الرضاعة لهيك كل الكغي والأغي والتدليعات والحركات البهلوانية يلي بتعملولوا ياها على أبعد من هالمسافة بتخوفه وبتزعجه وبتخليه يقول بقلبه شو هالمجانين هدول ! 😑😂

بدك تتفاهم مع بيبي احضنو واحملو 🥹🐥

23/12/2025

عن فيروس الانفلونزا H3N2 المنتشر بالفترة الحالية

16/12/2025

ماما أماني ❤️

بعرف أنك بتوقفي بكتير لحظات عاجزة قدامي ما عم تعرفي كيف تهديني وتخليني بطل بكي بس أنا يا ماما مخلوق لساتني جديد على هالحياة وعم أتعرف عليها وأنا لسا بحاجة كتير من مشاعر الطمأنينة والثقة والحب يلي ما حدا بيقدر يعطيني ياهن قدك أنتِ ❤️

من الطرق يلي ممكن تساعدك حتى أهدأ التقميط
التقميط اللطيف الناعم يلي بيذكرني بضيق الرحم الحنون بس كمان بيعطي عضلاتي حريتها

الضوضاء البيضاء يلي بتشبه أصوات الرحم متل صوت المكنسة السشوار الغسالة
وممكن كمان صوت فيروز أو موسيقى رايقة
وممكن صوتك .. صوتك لحاله يكون دوا

لازم يكون عندك دفتر روتيني بتكتبي عليه ايمت باكل ايمت بنام ايمت بفيق ايمت بلعب
دوماً وأبداً الروتين شي مهم وبساعد كتير عالتأقلم السريع

كتير ممكن يكون توتري منك
أنتِ متوترة يا ماما وعم تنقليلي هالمشاعر الي
بهاللحظة لازم بابا يحضنك ويحضني ❤️

أكيد ممكن يكون سبب البكي مشاكل الطفولة يلي ما الها حل متل المغص الغازات الارتجاع التسنين
وهدول كلن بدن وقت ليروحوا بس هدوءك عامل كتير مهم لتمرق هالفترات الصعبة

باللحظة يلي بتشوفي بكيي صار متواصل وما عم تنفع معو ولا طريقة اعطيني لبابا وخليه يحاول ، ممكن توترك أو إحباطك خرج عن سيطرتك
معلش خدي استراحة وتنفسي بعمق واهدي انتي بعدين ارجعيلي

قبل هالحكي وبعدو رح قلك شي
أنا كتير بحبك ❤️ بكل لحظة بحياتي عم اكل عم نام عم ابكي أنا بحبك
أنتِ يا ماما دنيتي كلا روحي من جوا بجسد تاني
ضميني لقلبك وخليني معك واتذكري دائماً
بحبك

كنت معكم الطبيبة سماح صالح محمد ❤️
طبيبة أطفال وصانعة محتوى طبي عن الأطفال من سوريا ✨

09/12/2025

👶🏻 كانت الجيّة كتير صعبة يا ماما ومو بهالسهولة شفت وجهك هالحلو 🥺
شايفة هالنبيّرة يلي طالعتلي براسي.. هي وذمة صايبة أنسجة الفروة يعني مكانها تحت جلد راسي ما بتخوّف، مو مقرّبة عدماغي لا تقلقي يا عمري ❤️

👶🏻 بسموّها الدكاترة وهيي أذية كتير شائعة سببها هوي التعرض للضغط أثناء الولادة.

👶🏻 وقت عم أمرق مع صرخاتك وكبساتك، جدران مهبلك عم تضغط عراسي، رحمك، كلشي كان حاضنني بحنيّة بصير قاسي وضيّق 🥺

وإذا كنت أنا عجعوج ووزني كبير متل وقت بكون طوّلت بحملك الي أو كنتِ أنتِ مصابة بالسكري بعيد الشر عنك ماما هون وقتها بتزيد احتمالية إصابتي بهالأذية 💔

حتى القيصرية ممكن يصير معي فيها هيك أو وقت بطبقوا الدكاترة وسائل مساعدة ليسحبوني ملقط أو محجم.. وكمان بحالة وقت بيروح هالكيس المحاوطني وبقلّ السائل الأمنيوسي يلي كان عاملّي مخدّة حنونة ليدافع عني 🥺

المهم أنو وجود هالنبيّرة دليل على معاناتي وعلى مخاض طويل وصعب تعرضتلو أنا وأنتِ 💔

👶🏻 وقت بشوفني دكتورك المولّد بهالمنظر بيبعتني لعند طبيب أطفال ليميّز الأذية يلي معي ويتأكد أنها حدبة مصلية مو ورم دموي رأسي أو نزف أو كسر أو هيك.. وهوي ماما الوحيد يلي قادر يعرف بطرقو الخاصة 😎

👶🏻 ما في شي تاني بصير.. غالباً بس هالنبيّرة
بس ممكن بحالات نادرة يصير مضاعفات متل أنو يصير مكان هالانتفاخ كدمات أو تندب أو تعلبة أو حتى عدوى بس نادرة كتير كتير هالشغلة، الحمدلله ❤️

👶🏻 ما في داعي للعلاج ماما ولا عملية ولا شي..
ولا حتى خوف وقلق.. لحالها بكم يوم بتروح ❤️

بس بدها بوسة دافية منك وتقليلي الحمدلله عالسلامة أنو مرقت وقدرت أزمط 😂😍

يا شريكة آلامي من لحظاتي الأولى..
يا وطني الأول والأخير..
يا بيتي الصغير ووسع الدني.. يا كل الدني ❤️

كنت معكم سَماح صالح محمد ❤️

04/12/2025

إبداع Caroline & christina Assaf makeup artist
وعايدة القمر رح حطلكم حسابها بالتعليقات

02/12/2025

يا صباح الخير وهي مقتطف من حلقتنا عن نزلات البرد عند الأطفال على قناة الثانية 💙
اعطوني رأيكم بالمقابلة وكمان اختاروا موضوع نحكي عنو بالمقابلة الجديدة يلي رح تكون بكرا نشالله

18/11/2025

Get ready with me وشوية كلام عن البرد ومشاكل الأطفال بهالبرد 🥹

17/11/2025

هاي ماما ❤️
شوو قال فاضحتينا بالحارة وبين الأقارب والمعجبين أنو ابني انتقائي ابني انتقائي 😏
أوكي أنا انتقائي بالأكل بس بينما مع الصبايا الحلوات بحب التنوع 😂

تعالي خبرك كيف تتعاملي مع انتقائيتي بالأكل وخاصةً بعد عمر السنة بعد ما يصير الي وجودي وقراري ومزاجي الخاص وهي حقيقة علمية يا ماما ، أنا عم أكبر وأتطور وعم بلش حس فعلاً باستقلاليتي وبأنو الي رأي لازم أفرضه بالأكل بالنوم بكل الأوقات

ومن هون أول طريقة حل ، خليني شارك بصناعة أكلي حتى بزراعته اذا بتقدري
نزرع بندورة جنب البيت شو عليه !
روح أنا عالدكان وحط الخضرا بالكيس واجي غسلهم
كل هاد بخليني قوي علاقتي بالأكل وحس حالي المسيطر عليه

خدي رأيي وكأني أنا عم قرر شو أكل
حطيلي صحن فيه موز وسيرلاك
تاكل موز ولا سيرلاك يا بطل ؟
اختياري وقراري أنا بخليني حب أكتر

نوعيلي بطرق تقديم الأكل بلون الصحون بشكل الأكل يلي عم يتقدم
حتى باسمه !
بكره الكوسا المسلوقة ؟
اشويها مع لحمة وسميها صلصة الأبطال مثلاً

تجربة الطعام تجربة جديدة كتير عليي وعظيمة بحياتي
خليني عيشها بالتدريج وبسلاسة
خليني ألمس الأكلة شمها العب فيها حسها وبعدين قرر أكلها

اصبري عليي بدك ١٥ محاولة واكثر لأتقبل طعمة جديدة فلا تيأسي

بينفع تحببيني بالتقليد يعني انتي ما بتحبي البيض ولا بشوفك بتاكلي بيض
من وين بدي حبو أنا لك أمي
حتى خالتو المايعة لا بتحبو ولا بتاكلو 🤭

اي ومن هون فيكي تعزميها لعنا وتخليها تاكل قدامي بحماس ممكن أتشجع
هوي صح هيي بتاكل الأخضر واليابس وما بتترك شي بس حاولي تستفيدي منها 😂💔

اي حتى ماما فيكي تحطي صحن فيه اكلة بحبا واكلة ما بحبا وتتركيني جرب على راحتي بدون ما تقليلي

أحياناً الطناش حل أكتر من النق صدقيني 👍🏼

وهلق يا تفاحة قلبي يا ماما شو رأيك تبطلي تقولي عني انتقائي وتقومي تعمليلنا جلسة رضاعة وحب لأرمقك نظرات العشق تبعي ❤️ وقلك بحبك من هلق لآخر عمري يا عمري كلو

كنت معكم الطبيبة سماح صالح محمد
طبيبة أطفال وحديثي ولادة وصانعة محتوى طبي من سوريا

Babies with Dr.Samah الأطفال مع د.سماح

25/12/2025

24/12/2025

23/12/2025

23/12/2025

23/12/2025

16/12/2025

09/12/2025

04/12/2025

02/12/2025

18/11/2025

17/11/2025

Address

Website

Alerts

Contact The Practice

Shortcuts

Share

Category