26/07/2025
بوست هام وضروري كتير اي مربي حيوان أليف يعرفو 🛑🛑🛑🛑
للأسف كتير العالم بتخلط بين الحالات الاسعافية والمستعجلة والعادية 😐😐
البعض بيقلك اسعاف وبتكون الحالة بسيطة جداً وهون نص مصيبة 🫢
البعض للأسف بيترك حالات اسعافية أو مستعجلة وبيهملها أو بيتهاون فيها أو بيأخرها لخوفو من شي معين 🤦🏻♀️🤦🏻♀️
حالتين مرو على العيادة بنفس الاسبوع 📆
📌حالتين فتق إربي (خروج محتويات البطن من أمعاء ومثانة و و من خلال قناة بين البطن والفخذ وتوسع هلقناة)😞
هاد الفتق غالبا بيصير بسبب رض وقعة ضربة 🥺
التصحيح السريع الو كتير مهم أولا لتجنب الخطورة على الحياة من اختناق الأمعاء وتنكرزها 👍🏻👍🏻
وتانيا حتى ما تضمر وتتنكرز النسج العضلية الي بدا تسكر هاد الفتق🤝🏼
قطين الأول صغير كتير ما بيتجاوز عمرو الشهرين اجا للعيادة بعد الحادث بيوم
مباشرة قررنا الجراحة وباليوم التالي كانت امورو ممتازة بفضل الله 👨🏻⚕️
شوية عناية بالبيت خلال اسبوع ل2 صار ممتاز (الله يجزي الي أنقذو كل خير)♥️♥️
📌الثانية قطة عمرها 4 سنين تقريبا 🐱عندها فتق من 3 سنين وللأسف لما أصحابها عرضوها على شخص كان رأيو انو تركو تحت المراقبة لأنو الجراحة كتييييييييييير خطيرة 😫😤
3 سنين والقطة عم تعاني من ألم وصعوبة هضم وتراكم كتل براز داخل الأمعاء 😭
عملنا الجراحة الأولى للتصحيح من جدار البطن وللأسف ما كانت كافية بسبب التهتك والتراجع الشديد للأنسجة
عملنا الجراحة التانية من الطرف الإربي وزرعنا شبكة جراحية ومع كل هاد في أماكن ضمن عظم الحوض ما حسننا نرممها بسبب قربها من أعصاب وشرايين هامة وبسبب صعوبة الوصول الها ولهلق هي تحت المراقبة ادعولها الله يتمم شفاءها😢🥺
التدخل الطبي المبكر والصحيح تحت إشارف طبيب متمرس ضروري جداً
انتبهو كتير 🚨
والله هلمخلوقات أمانة عندكم مو شغلة لعبنا فيها شوي وبس يصير شي مندور عل أرخص حدا♥️
