05/10/2018
مسا الخير
رح نحكي ب هاد البوست عن أهم الممارسات الغلط اللي بنشوفا عند الرضع و بتمنى نقدر من خلال هالبوست أنو نوصل فكرة و لو بسيطة للأمهات عنها و نتجنبها للحفاظ على صحة أطفالنا و نحافظ قدر الإمكان على الممارسات الصحيحة ليتربوا أطفالنا بطريقة سليمة
من أهم الممارسات الغلط اللي بنشوفا عند الرضع و أول ما يخلق الطفل بنلفو بالملفة و بنحطلو حزام السرة و بنعصر الولد عصر ... هاد شي غلط تماما بالعكس نحنا بهابهالتصرف عم ندايق الطفل و نزعجو و عم نسببلو احتباس للغازات اللي ببطنو و عم نسببلو تحدد بحركات ايديه و رجليه ... بالعكس فرفدي الطفل و اتركيه على راحتو و لما تحمليه مشان ما ينلوى ظهره(و هي الحجة اللي عم يلفو الطفل مشانها) لما تحمليه بتحطي ايدك ورا ضهره و بس ما داعي تعصروا البيبي عصر ..
كمان اللهاية ... ممنوع استعمال اللهاية بعد عمر الاربع شهور لأنو بتصير بهالمرحلة مصدر انتان و بنبلش نفوت بمشاكل التهابات الأمعاء و الاسهال من ورا اللهاية لأنو مو معقول تضل عيننا عليها و نضل محافظين على نظافتها على مدار ال ٢٤ ساعة ... و يفضل عدم استعمال اللهاية بالمطلق ...
كمان نوم الطفل على بطنه... غلط ننيم الطفل على بطنه خوفا من حدوث موت مفاجئ للرضيع لأنو ممكن لا سمح الله الطفل يحرك راسه و يثبت وجهه على المخدة و بهالحالة الطفل رح يختنق و ما رح نحس عليه و هو مسكين لسا ما بيعرف يتحكم منيح بحركات راسه و ما بيعرف يقلب من بطنه لظهره ... لهيك ممنوع تنيمي البيبي على بطنه ...
من الممارسات القديمة هي وضع الكحل في العينين للبيبي الصغير ... كمان غلط لأنو الكحل رح يأذي عيون الطفل
كمان من الممارسات القديمة هي تمليح الطفل يعني دهن جسم الطفل بالملح ... هاد من أشد الممارسات خطورة بحق هالبيبي الصغير ... مو حرام هالشرة الرقيقة الناعمة تندهن بالملح !!!! الملح اول شغلة رح يسد مسام الجلد و يمنع الجلد من التنفس .. و تاني شي رح يفوت من خلال المسام لداخل الجسم و يعمل فرط صوديوم الدم اللي هو بحد ذاته رح يعمل مشاكل عصبية عند الطفل متل الاختلاجات و النزف الدماغي .. إضافة للتجفاف اللي رح يصير مع الطفل ... إضافة للأذية الجلدية اللي رح يسببها الملح اللي اندهن على الجسم بهالكمية و اللي رح يكون مادة رح تكوي الجلد و تسبب التهاب جلد...
رح نحكي كمان عن الممارسات الغلط بتغذية البيبي اللي بيكون بمرحلة الوليد يعني خلال الشهر الأول من العمر... يمنع اعطاء الطفل خلال الأربع أشهر الأولى من العمر أي تغذية سوى حليب الأم و الإرضاع الصناعي المخصص لهي المرحلة العمرية و اللي هو حليب المرحلة الأولى ..
يمنع إعطاء الطفل أية أنواع من السوائل من المي و السكر او ماء التفاح او ماء التمر او الزهورات ااو الكمون او البابونج أو أو أو .... كلو ممنووووع منعا باتا باستثناء حليب الأم و الحليب الصناعي الممخصص للمرحلة الأولى .... و رح نفصل بمقال قادم بتغذية الطفل خلال كل مرحلة عمرية بالتفصيل
كمان ممنووووع تعطي البيبي يانسون لأنو بيحتوي على مواد بتثبط الجملة العصبية عند الرضيع ...
يمنع إعطاء أي عشبة للمغص عند الرضيع أو مادة مكتوب عن فوائدها على الانترنت لأن كل ما يكتب على الانترنت ما هو إلا كلام أشخاص لا نعرف مصداقيتهم و لا توجد دراسات علمية مؤكدة لسلامة هالمادة اللي عم تعطيها لابنك ...
كمان يمنع إعطاء الماء للطفل قبل عمر الأربع شهور ... طيب رح تقولولي مو حرام البيبي رح يعطش.. لاء تطمنو البيبي ما رح يعطش لأنو حليب الأم ٨٠ % منو هو عبارة عن ماء ... و المي اللي نحنا رح نشربو ياها رح تاخد حجم بمعدته و تخليه يشبع بسرعة من دون ما ياخد كمية الإرضاع اللي هو بحاجتها ..
و رح ننحكي ملاحظة لكل أم مرضع ... لا تكتري من شرب المنبهات متل القهوة و الشاي و النسكافيه لأنه رح تسبب للرضيع قلق و نزق و عصبية ... ما عم نقول لا تشربيها أبدا لاء بس خففيها تخفيف .. لا مانع من فنجانين قهوة باليوم بس مو اكتر ...
بتمنى يكون هالبوست مفيد و نقدر نوصل من خلاله ملاحظات هامة لازم كل أم تعرفها و تطبقها ليتمتعوا أطفالنا بالصحة و العافية ... و متل ما كلنا منعرف العقل السليم في الجسم السليم ...
مع حبي
د. وعد الكويفي
