04/07/2024
الله يسعد اوقاتكم
رح نجاوب اليوم عن أسئلة المنشور السابق.
* ما هو عصب السن ؟
- نحنا منسميه عصب تجاوزاً ، في الحقيقة هوي مو بس عصب بل شبكة من الاعصاب و الأوعية الدموية اللي بتغذي السن متل مو مبين بالصورة .
*شو فائدته ؟
- هوووون حطنا الجمّال ...
هي المنظومة اللي حكينا عنها من شوي و اللي تجاوزاً منسميها (العصب) قلنا انها بتغذي السن و الها وظيفة تانية مهمة جدّا جدّا و منكرهها جدا جدا 🙂 و هي ( تنبيهنا بالخطر ) عن طريق مكروه الجماهير المظلوم (الألم) .
لولا هي الوظيفة كانت اسناننا اهترت و سقطت و بلعناها مع الاكل بدون ما نعرف شو صار و هاد بيحطنا امام السؤال التالت :
*شو الفرق بين السن الحي و السن الميت (المسحوب عصبه)؟
- الفرق بين السن الحي و الميت متل الفرق بين الشجرة الحية و الميتة ..
الشجرة الميتة تبدو صلبة و قوية و لكنها هشّة و سهلة الكسر و باهتة اللون .. تمااااماً متل السن الميت اللي بيكون معرض للكسر اكتر بكتييير من السن الحي و احيانا و مع مرور الوقت بيتحول لونه للرمادي (بسبب بقايا العصب المجهرية او بسبب حشوة العصب ) و لذلك منحاول كتير ننضف النخر و نحشي السن بدون ما نسحب العصب(و مننلدع كتير من هالنقطة بالذات) .
*كيف منحمي السن الميت ؟
- بالتتويج اللي هوي (التلبيس)
التاج اللي منركبو على السن (التلبيسة ) هوي اللي بيغطي السن و بيتحمل كل الضغوط اللي واقعة عليه و بيحميه من الكسر .
*ايمت منسحب العصب ؟
-لما يكون التسوس كبير و واصل للعصب و لا يمكن الحفاظ عليه بدون ما يعمل الم بالسن بهالحالة منضطر نستأصل العصب متل مو واضح بالصورة.
ممكن يصير كسر بالسن بسبب سقوط او حادث ما و يكون الكسر واصل لمستوى العصب كمان ممكن نحتاج نستأصل العصب
في حالات تانية منضطر فيها لسحب العصب ممكن نحكي عنها بمنشور آخر مشان ما يصير طويل كتير.
اذا عندك اي استفسار حول الموضوع اتركلي ياه بتعليق .
عم حاول تكون المنشورات التثقيفية و التوعوية أكتر من المنشورات التسويقية و هالمنشورات بتاخد جهد و وقت اكبر و لكن قيمتها اعلى الك وفائدتها الك اكبر فحاول تشاركنا بتعليق او مشاركة للمنشور و اذا عجبيتك المواضيع اشترك بالصفحة .
دمتم بخير 💙
